12
ङोंइती ङा पास्सा चाड
गन्ती ९:१-१४; ब्यवस्था १६:१-८
1 मिनु मोसा नु हारून इजीप्त रागीम बाक्सानु, परमप्रभु यावेमी मेको आस कली
2 “मुल जाक्शो महिना बर्स ङा ङोंइती ङा महिना दुम्चा माल्ब। प्रस्थान १३:४
3 मिनु गे इस्राएली नेल्ल आन कली ‘मेको महिना ङा १० नाक्ती खिं का ङा ठेयब मुरुमी पाठा का चाक्चा माल्नीम।
4 खिं का कली पाठा का आ श्ये शुश दुम्त हना, आ नेक्था बाक्शो मुर आन कली हिक्शा, दोशो ब्वाइनीमी योक्शा, ब्वचा कली ब्रेत्चा माल्नीम।
5 मेको पाठा मारेइ मदुम्शो थम रिम्शो नु बर्स का ङा बोका बाक्चा माल्ब। भेडा के हना यो, क्यारश के हना यो दुम्ब। लेवी २२:२०
6 मिनु मेको महिना ङा १४ नाक्ती सम्म मेको बोका कली ठीक पा वोइक्चा माल्नीनी। मिनु नां रिक्चावानु, इस्राएली नेल्लेमी मेको बोका क्योरचा माल्नीनी।
7 तेको खिंमी ब्वाइनीनी, मेको खिं ङा मुरुमी बोका आ हुश इच्का लाइश्शा, आ खिं ङा थाम निक्शी नु लाप्चो आ पियाम ख्रेक्चा माल्नीनी। प्रस्थान १३:२२
8 मेको नाक्दो मेको बोका आ श्ये ब्वचा माल्नीनी। दोपा ब्वचा माल्नीनी देंशा हना, मीम चोशा, बोरब ओख्ती मसुप्शो शोब्ले, कशो खाइ नु ब्वचा माल्नीनी।
9 मेको श्ये क्येख ब्वचा मदुम्ब, लोप्शा ब्वचा यो मदुम्ब। आ पिया, खोइली क्यी नेल्ल मी तारी चोचा माल्नीनी। ब्यवस्था १६:७
10 सुनी सम्म मारेइ हेंत हना, मीम चोशा थुम्चा माल्नीनी।
11 मेको श्ये किप्शुर किप्शा, जुत्ता लिक्शा, गुइमी कोक्के ग्याइश्शा, रीब पा ब्वचा माल्नीनी। मारदे हना मेको परमप्रभु यावे आ पास्सा चाड बाक्ब। ब्यवस्था १६:३; यसैया ५२:१२
12 मेको नाक्दो गोमी इजीप्त रागी हिरशा, इजीप्त ङा मुर आन ङोंइती जरमेशो तौ नेल्ल साइक्नुङमी। बस्तु भाव आन के यो ङोंइती जरमेशो नेल्ल साइक्नुङमी। इजीप्त ङा देवी देवता नेल्ल आन कली सजाइ गेनुङमी। गो, परमप्रभु यावे मेकोन पाइनुङ। गन्ती ३३:४
13 मेको ख्रेक्शो हुश इन खिं ङा चिन्ड दुम्ब। तेको खिंम हुश ख्रेक्शो तङा, मेको खिं कली हेरशा लाक्नुङ। गो इजीप्त रागी ङा मुर आन कली बेक्चा ङा श्येत गेनुङमी। इन कली चहिं मेको श्येत मगेनुङ। हिब्रू ११:२८; प्रस्थान ३०:१२
14 मेको नाक्ती इन कली मिम्तीक नाक्ती दुम्चा माल्ब। मोपतीके आं नेंम भोज जचा माल्नीनी। गे बर्स बर्सम मेको चाड परमप्रभु यावे कली मानेचा माल्नीनी। इन पाला नेल्ल आन कली गेना हना यो अरेशो लोव़ बाक्ब।
बोरब ओख्ती मसुप्शो शोब्ले
15 गे ७ नाक्त सम्म बोरब ओख्ती मसुप्शो शोब्ले जचा माल्नीनी। ७ नाक्त ङा ङोंइती नाक्ती गे इन खिंम बाक्शो बोरब ओख्ती ताइक्चा माल्नीनी। सुम मेको ७ नाक्तीम बोरब ओख्ती सुप्शो शोब्ले जाइबा, मेको इस्राएली आन दाते रे तिल्चा पुंइसीब। प्रस्थान १३:७; प्रस्थान २३:१५
16 मिनु ७ नाक्त ङा ङोंइती नाक्ती नु नोले ङा नाक्ती परमप्रभु आ नेंमी ग्रुम्चा माल्नीनी। मिनु जचा थोव़क सेल्चा क्येङा लाक्शा, अरु गेय काइ मपने।
17 बोरब ओख्ती मसुप्शो शोब्ले ङा चाड मानेचा माल्नीनी। मारदे हना मेको नाक्ती गो इन हुल आन कली इजीप्त रागी रे ग्रुंइताक्ङ। मोपतीके इन पाला मुर नेल्ल आन कली गेना हना यो अरेशो लोव़ बाक्ब।
18 ङोंइती ङा महिना ङा १४ नाक्ती ङा नाक्दो रे २१ नाक्त ङा नाक्दो सम्म गे बोरब ओख्ती मसुप्शो शोब्ले ला जचा माल्नीनी।
19 मेको ७ नाक्ती इन खिंमी बोरब ओख्ती काइ मवोइक्चा। सुमी बोरब ओख्ती सुप्शो शोब्ले जाइबा, मेको अर्को रागी ङा मुर बाक्त हना यो, इस्राएली बाक्त हना यो इस्राएली आन दाते रे तिल्चा पुंइसीब।
20 इन बाक्तीक नेल्लेमी बोरब ओख्ती मसुप्शो शोब्ले ला जने, बोरब ओख्ती सुप्शो शोब्ले मजने’ दे माइक्मी” दे परमप्रभुमी देंत।
पास्सा ङा पाठा आ हुश
21 मिनु नोले मोसामी इस्राएल ङा खाल्पा नेल्ल आन कली ब्रेश्शा “इन खिं ङा ठेयब मुर आन कली पाठा का का चाक्कीन। मिनु मेको पाठा पास्सा चाड मानेचा कली क्योरीन।
22 मिनु गे हिस्सोप के ब्राक्स लाइश्शा, हुश दाइक्तीक बोसुम ख्रुम्शा, लाप्चो आ पिया नु थाम निक्शी कली ख्रेक्तीन। मेको नाक्दो सुनी सम्म सुइ लाङगा मग्रूङीने। प्रस्थान १२:१३
23 परमप्रभु यावे इजीप्त ङा मुर साइक्चा कली हिरब। परमप्रभु यावेमी लाप्चो आ पिया नु थाममी हुश ख्रेक्शो तशा, इं खिं हेरशा लाक्ब। मिनु साइक्ब कली इं खिंम ओव़चा मगेब।
24 मुल रे इन तौ, चच युइ नेल्लेमी एको पास्सा चाड बर्स बर्सम मानेचा माल्नीम। मेको गेना हना यो लीशो अरेशो लोव़ बाल्ब।
25 मिनु गे परमप्रभु यावेमी देंशो खोदेंशो पा इन कली गेशो रागी जाक्दीश्शा, यो एको चाड मानेचा माल्नीनी।
26 इन आलपुकीम इन कली ‘एको चाड आ अर्थ मार बाक्मे?’ दे हिल्लो पाम्तेक्म हना,
27 गे मेको आन कली ‘इस्राएल ङा मुरपुकी इजीप्त रागीम बाक्मानु, परमप्रभु यावेमी इजीप्त ङा मुर आन कली साइक्ची ना इस्राएली आन खिं चहिं हेरशा लत। एको हेरतीक आ पर्बम चढ़ेशो बाक्ब’ देंचा माल्नीनी” दे मोसामी देंत। मिनु मुरपुकीमी खुम्की पा बाप्शा, परमप्रभु यावे कली ठेयब सेल्तेक्म।
28 मिनु इस्राएलीपुकीमी लशा, परमप्रभु यावेमी मोसा नु हारून आस कली दोदेंशो देंमे, मोदेंशो पाम्तेक्म।
ङोंइती ङा जरमेशो नेल्ल बेक्शो
29 मिनु नाक्दो उइक्थ दुम्मेनु, परमप्रभु यावेमी इजीप्त रागी ङा मुर आन ङोंइती जरमेशो तौ आन कली साइक्तीमी। फाराओ आ नोले सासन पाइब तौ रे जेल्खानम बाक्ब मुर आन ङोंइती जरमेशो तौ नेल्ल आन कली साइक्तीमी। बस्तु भाव आन ङोंइती जरमेशो यो साइक्तु। प्रस्थान ४:२३
30 मिनु मेको नाक्दो फाराओ, आ गेय पाइबपुकी नु इजीप्त रागी ङा मुर नेल्ल बोक्तेक्म। इजीप्त रागीमी ठेयब रोंका पा ङाक्तेक्म। मारदे हना खिं खिं नेल्लेमी मुर बेक्तेक्म। प्रस्थान ११:६-७
इस्राएलीपुकी इजीप्त रे ग्रूशो
31 मिनु मेको नाक्दो फाराओमी मोसा नु हारून आस कली ब्रेश्शा “छुल छाल बोक्कीस। गे नु इस्राएल ङा मुर नेल्ल आं रागी ङा मुर आन दाते रे ग्रूङीन। इस देंशो खोदेंशो पा परमप्रभु यावे कली चढ़ेथ लने।
32 इन बी ब्यफ नु क्यारश भेडा आन कली लाइश्शा, फो फु ग्रूङीने। आं कली आसीक गेयीसी” देंत। प्रस्थान १०:२६; एज्रा ६:१०
33 मिनु इजीप्त ङा मुरपुकीमी मेको आन कली आन रागी रे ब्रा ब्रु खेरशा सोइक्ताक्म। मारदे हना “गो नेल्ल बेक्नय” दे हिंतेक्म। प्रस्थान ६:१
34 मिनु मुरपुकीमी बोरब ओख्ती मसुप्शो, निशो फस आन बोस वाम गिल्शा, बलाम लाप्शा कुरतेक्म।
35 मिनु इस्राएलीपुकीम मोसा आ देंशो खोदेंशो पा इजीप्ती आन सुन चांदी नु वासी पुंइतेक्म। प्रस्थान ११:२
36 मिनु परमप्रभु यावेमी इजीप्त ङा मुर आन कली इस्राएली आन कली दाक्पाइक्तीके, आन पुंइशो नेल्ल गेम्तेक्म। मोपा इजीप्त ङा मुर आन शोंप लाइश्शा गाक्तेक्म। प्रस्थान ३:२१
37 मिनु इस्राएल ङा मुरपुकी रामेसेस सहर रे गाक्शा, सुक्कोथ सहर जाक्दीत्तेक्म। मेको आन मीश नु तमी तौ नेल्ल महिक्थु, वोंइश मुर ला ६ लाख बाक्तेक्म।
38 मिनु हिक्ने मचाप्चा ङा पा इस्राएली खोदेंशो पा परमप्रभु यावे कली टीबपुकी यो, आन बी ब्यफ, क्यारश भेडा, शुश बस्तु भाव खुल्शा गाक्तेक्म।
39 मिनु इजीप्त रे कुरशो बोरब ओख्ती मसुप्शो निशो फस रे शोब्ले चोम्तेक्म। मारदे हना इजीप्त रागी रे खेरचा पुंइसीतीके मेकेर लाम्जी सेल्ने मचाप्शो बाक्तेक्म।
40 इस्राएलीपुकी ४ सहे ३० बर्स इजीप्त रागीमी बाक्शो बाक्मा बाक्त। उत्पत्ती १५:१३
41 मिनु ४ सहे ३० बर्स गाम नाक्ती, परमप्रभु यावे आ योव़शो इस्राएली नेल्ल इजीप्त रागी रे गाक्मा बाक्त।
42 मेको नाक्दो इस्राएलीपुकीमी परमप्रभु यावे आ ङोंइती शुश मिम्तीक नाक्दो दुम्माक्त। मारदे हना मेको आन कली इजीप्त रागी रे ग्रुंइदा बाक्त। मेको परमप्रभु यावे आ नाक्दो बाक्ब। इस्राएल ङा मुर आन पाला नेल्लेमी मेको मिम्तीक नाक्दो बाक्ब। यसैया ३०:२९
पास्सा चाड दोपा मानेचा
43 मिनु परमप्रभु यावेमी मोसा नु हारून आस कली “पास्सा दोपा पचा आं अरेशो लोव़ मार बाक्त देंशा हना, अर्को रागी ङा मुरुम मेको जचा ब्वचा मदुम्ब।
44 ख्रोइक्तीक चिनु ख्रोइश्शो इन वाइलपुकीम चहिं जचा ब्वचा दुम्नीम। उत्पत्ती १७:१२-१३
45 तन्न अर्को रागी ङा मुर इन दातेमी बाक्त हना यो, गेय पाइब हना यो जचा ब्वचा मदुम्ब।
46 मेको पास्सा ङा पाठा आन खिंमी ब्वचा माल्नीम। आ श्ये लाङगा ग्रुंइचा मदुम्ब। आ रुश का यो जिक्चा मदुम्ब। यूहन्ना १९:३६
47 इस्राएली नेल्लेमी मोदेंशो पचा माल्नीम। प्रस्थान
48 इन दातेमी अर्को रागी ङा मुर काम परमप्रभु यावे कली पास्सा चाड मानेचा दाक्ताक्व हना, आ खिं ङा गेय पाइब वोंइश मुर नु आ तौ आन कली ख्रोइक्तीक चिनु ख्रोइश्शा ला, इस्राएली आन नेक्था जाक्शा, पास्सा चाड मानेने चाप्ब। मोपा ला इन खोदेंशो दुम्ब। मारदे हना ख्रोइक्तीक चिनु मख्रोइश्शो मुरुम जने ब्वने मचाप्नीम।
49 मेको इन कली नु इन दातेम बाक्ब अर्को रागी ङा मुर आन कली अरेशो लोव़ का बाक्ब” दे परमप्रभुमी देंत। लेवी १९:३४; लेवी २४:२२
50 मिनु परमप्रभु यावेमी मोसा नु हारून आस कली दोदेंशो देंमे, मोदेंशो इस्राएली नेल्लेमी पाम्तेक्म।
51 मिनु मेको नाक्ती परमप्रभु यावेमी इस्राएली थर आन कली हुल हुल पा इजीप्त रागी रे ग्रुंइताक्व।