18
यित्रो मोसा कली ग्रुम्‍थ जाक्‍शो
मिनु मिदयान रागी ङा नाक्‍सो मोसा आ शिउ यित्रोमी परमप्रभुमी मोसा नु इस्राएली आन पर्बम मार मार पवा नु परमप्रभु यावेमी मेको आन कली इजीप्‍त रागी रे दोपा ग्रुंइदा, मेको नेल्‍ल नेना बाक्‍त। प्रस्‍थान ३:१ ङोंइती मोसामी आ मीश नु आ तौ निक्‍शी आस कली आ माइत सोइश्‍शो बाक्‍माक्‍त। मुल यित्रोम मेको आन कली मोसा आ बाक्‍तीक चाक्‍ती‍मी। प्रस्‍थान ४:२० मोसामी आ तौ का आ नें गेरशोम वोइश्‍शो बाक्‍त। मारदे हना मेकोमी “गो मतुइश्‍शो रागी ङा मुर आन दातेमी अर्को रागी ङा मुर दुम्‍ती” देंत। प्रस्‍थान २:२२ मिनु अर्को कली एलीएजर नें वोइक्‍तु। मारदे हना मेकोमी “आं आफ आ परमप्रभुमी आं कली फाराओ आ तरवार रे प्रोंइशा, वारच पाइक्‍ती” देंशो बाक्‍त। १इतिहास २३:१५-१७
मिनु मोसा आ शिउ यित्रो, मोसा आ मीश नु आ तौ निक्‍शी गोरशो रागीमी मोसा कली ग्रुम्‍थ जाक्‍तेक्‍म। मेना मोसामी आ ताम्‍बु परमप्रभु आ डांडा आ पुंमी कीतु। मिनु यित्रोमी मोसा कली “इ शिउ यित्रो, इ मीश नु इ तौ निक्‍शी इ कली ग्रुम्‍थ जाक्‍तक” दे लोव़ सोइक्‍ताक्‍व।
मिनु मोसा आ शिउ ग्रुम्‍थ जाक्‍शा, सेउ पशा, पुक्‍पु पशा “दोपा बाक्‍नी” दे ताम्‍बुम ओंइताक्‍व। मिनु मोसामी परमप्रभु यावेमी इजीप्‍त ङा फाराओ कली नु आ मुर आन कली मार मार पवा, लांमी मार मार श्‍येत जामे, दोपा परमप्रभु यावेमी मेको नेल्‍ल रे प्रोना, मेको नेल्‍ल आ शिउ कली शेंताक्‍व।
यित्रो थमा सुइक्‍ब दुम्‍शो
मिनु यित्रोमी परमप्रभु यावेमी इस्राएली आन कली गिश रिम्‍शो पवा नु इजीप्‍त ङा मुर आन गुइ रे दोपा प्रोना मेको नेल्‍ल नेंशा, शुश ग्‍येरसाक्‍व। 10 मिनु मेकोमी “इन कली इजीप्‍त ङा मुरपुकी नु फाराओ आ गुइ रे प्रोंइब परमप्रभु यावे कली ठेयब सेल्‍य। 11 देवी देवता आन क्‍येङा परमप्रभु यावे ला ठेयब बाक्‍ब, दे गो मुल तुइक्‍ताक्‍ङ। आ मुर आन कली इजीप्‍त ङा मुर आन गुइ रे प्रोंइतु। मारदे हना इजीप्‍तीपुकीमी मेको आन कली ठेयब लेश्‍शा दिप्‍शो बाक्‍तेक्‍म” दें‍त। नेहेम्‍याह ९:१०; येरमीया ५०:२९ 12 मिनु मोसा आ शिउमी परमप्रभु कली चोशा चढ़ेतीक नु अरु चढ़ेतीक यो चढ़ेप्‍तु। मिनु हारून नु इस्राएल ङा मुर आन खाल्‍पा नेल्‍ल मोसा आ शिउ नु परमप्रभु कली मान पा ठेयब सेल्‍शा जाम्‍तेक्‍म। उत्‍पत्ती ३१:५४
यित्रोम मोसा कली अर्ती गेशो
13 मिनु मोसा सुनी कना बोक्‍शा, मुर आन कली निसाफ पचा कली निस्‍साक्‍व। मुरपुकी सुनी रे जाक्‍शा, नाक्‍दो सम्‍म मोसा आ ङोंइती बाक्‍तेक्‍म। 14 मिनु मोसा आ शिउ मी मोसा कली मोदेंशो पा मुर आन कली निसाफ पशो तशा “गे मुर आन कली मार पाइनेवे? गे मारदे इ का ला गेय पना पन बाक्‍नेवे? मुरपुकी सुनी रे नाक्‍दो सम्‍म जाक्‍शा, बाक्‍शो बाक्‍नीमी” दें‍त। 15 मिनु मोसामी आ शिउ कली “मुरपुकीमी परमप्रभु आ देंशो तुइक्‍चा दाक्‍नीम, मोपतीके जाक्‍नीम। 16 मेको आन दातेमी मार मार निसाफ पाचा माल्‍शो बाक्‍मे, मेको गो गारपाइक्‍नुङ। मोपा गो निसाफ पचा माल्‍नुङ। मिनु मेको आन कली परमप्रभु आ फुल्‍लुम मुशा ब्रेक्‍शो लोव़ नु आ अरेशो लोव़ तुइक्‍पाइक्‍नुङ” दें‍त। 17 मिनु आ शिउमी “इ पशो मरिम्‍शो बाक्‍ब। 18 गे शेम्‍सीनेवे। गे नु बाक्‍ब मुरपुकी यो शेम्‍सीनीम। एको गेय इ मचाप्‍चा ङा बाक्‍ब। गे ला पने मचाप्‍नेवे। गन्‍ती ११:१४; ब्‍यवस्‍था १:९ 19 आं लोव़ नेनो, गो इ कली अर्ती गेनुङ। परमप्रभु गे नु बाक्‍ब। गे मुर आन पर्बम परमप्रभु कली पुंइदो। 20 परमप्रभु आ फुल्‍लुम मुशा ब्रेक्‍शो लोव़ नु आ अरेशो लोव़ मेको आन कली तुइक्‍पतो। मोपा गे मेको आन गाक्‍तीक लां नु आन पचा माल्‍शो गेय मेको आन कली शेंदो। 21 गे मुर नेल्‍ल आन दाते रे रिम्‍शो गेय पने चाप्‍ब परमप्रभु कली मान पा हिंब, थमा सुइक्‍चा पुंइसीब नु ख्रुइश्‍शा मार मार ताक्‍शा मजाइब मुरपुकी योव़चा माल्‍नेवे। नोले मेको मुर आन कली कोव़ब ठेयब मुर वोतो। मेको आन कली १० जना मुर आन कली कोव़ब, ३० जना मुर आन कली कोव़ब, सहे सहे जना मुर आन कली कोव़ब नु हजार हजार जना मुर आन कली कोव़ब ठेयब मुर आन कली योव़ङो। 22 मेको कोव़ब मुरपुकीमी नाक्‍त किंत किंत ङा निसाफ पामेक्‍ल। ठेयब मुददा चहिं इ ङोंइती चाक्‍गमेक्‍ल। आइक्‍च मुददा आंमा गारपदमेक्‍ल। मो पाप्‍तीवी हना, इ कली रिम्‍शो दुम्‍ब। मिनु मेको कोव़बपुकीमी इ गेय नु श्‍येत योक्‍शा पाइनीम। 23 गे आं देंशो पाप्‍तीवी हना, परमप्रभुमी यो इ कली मोदेंशो पचा गेब। गे मेको गेय फाल्‍ने चाप्‍नेवे। मिनु इ मुर नेल्‍ल दुशा गारशा, आंम आन बाक्‍तीके लाइनीम” दे यित्रोमी मोसा कली अर्ती गेप्‍तु।
24 मिनु मोसामी आ शिउ आ अर्ती नेंशा, आ देंशो नेल्‍ल पाप्‍तु। 25 मिनु इस्राएली आन दाते रे रिम्‍शो गेय पाइब आन कली योव़शा, मुर आन कली कोव़ब वोइक्‍तु। १०, १०, ३०, ३०, सहे सहे नु हजार हजार जना मुर आन कली कोव़ब वोतो। 26 मेको मुरपुकीमी मुर आन कली निसाफ पची ना, निसाफ पाइनीम। मिनु ठेयब मुददा बाक्‍त हना, मोसा कली ब्रेत्‍ताक्‍म। आइक्‍च मुददा चहिं आंमा निसाफ पाम्‍तेक्‍म। 27 मिनु मोसामी आ शिउ कली लचा गेप्‍तु। मिनु मेको आ रागी लेत्‍त।