23
ठीक पतीके आ पर्बम अरेशो
1 “गेपुकी जोल लोव़ मब्रपतीने। मरिम्शो पाइब कली वारच मपने। जोल पा सांकछी मबाक्कीन। प्रस्थान २०:१६; लेवी १९:१६; भजन संग्रह १५:३; हितोपदेस १९:९
2 मिनु ठेयब हुल का मरिम्शो पाइब बाक्तेक्म हना, मेको आन नोले मखोतीन। निसाफ पाइब आ ङोंइती ‘ठेयब हुल ङा मुर ठीक बाक्नीम’ मदेनीन। मोपा आं ठीक पतीके रे ङोन मलने।
3 दूली पाइब मुर प्रुङग बाक्त हना यो मेको कली वारच मपतीन। लेवी १९:१५
4 मिनु गे इन जोरी सत्रु आन ब्यफ, गधा लां जाम्शा, हिरशो ताइतीनी हना, मेको कली वारच पा, लेश्शा आ खिं चोव़दीत्चा माल्नीनी। अय्युब ३१:२९; हितोपदेस २५:२१-२२; लूका ६:२७
5 गे नु मदुइब मुर आ गधा आ भारीम चिप्शो थित्तीनी हना, गे मेको पोक्ने मचाप्शो मुर ताइतीनी हना, मेको कली महेरदीन। मेको कली वारच पा मेको कली पोक्कीन।
6 मिनु प्रुङग मुर का पित हना, मेको कली प्रुङग बाक्त हना यो, ठीक निसाफ पने। ब्यवस्था २५:१९; भजन संग्रह ८२:२-४; उपदेसक ५:७; यसैया १:१७
7 जोल पा सांकछी माल्ब आन क्येङा ङोन बाक्कीन। दोस मताइब नु ठीक पाइब कली मसतीन। मारदे हना गो मरिम्शो पाइब आ पर्बम ठीक पाइब बाक्ब मदेंनुङ।
8 गेपुकी ख्रुइश्शा मारेइ मताक्कीन। मारदे हना मेकोमी मिक्च सिल्ब। मिनु ख्रुइश्शा ताक्शोमी ठीक पाइब आ मुददा लोक्ब। ब्यवस्था २७:२५; १सामुएल ८:३; हितोपदेस १७:२३
9 मिनु अर्को रागी ङा मुर आन कली मदिपीन। मारदे हना गेपुकी यो इजीप्त रागीम अर्को रागी ङा मुर दुम्शा, अर्को रागी ङा मुर आन थुं तुइक्नीनी। प्रस्थान २२:२०
नाइक्तीक नाक्त नु बर्स
10 मिनु ६ बर्स सम्म इन रूमी ख्रुम्शा, सेक्शा खुप्तीन। लेवी २५:१-१७, १८-२४
11 मिनु मेको आ नोले ङा बर्स चहिं मारेइ मशोक्थु, मो वोतीन। इन रागी ङा प्रुङगपुकीमी मेको आंमा वाशो जामेक्ल। लीत हना, जन्तुपुकीम जामेक्ल। इन अङगुर रू नु इन तेल रवापुकी यो मेको खोदेंशोन पने।
12 गेपुकी ६ नाक्त गेय पचा माल्नीनी। मेको आ नोले ङा नाक्ती चहिं नांइसीन। मोपा इन ब्यफ नु गधा यो नाइक्ने चाप्नीम। मिनु इन वाइलीम आ तौ नु इन खिंम बाक्शो अर्को रागी ङा मुर यो नाइक्चा ताइनीम। प्रस्थान २०:८-११
13 आं अरेशो नेल्ल पने। देवी देवता आन कली मारेइ मपुंइचा आन नें यो मथिचा। यहोसु २३:७; जकरिया १३:२
बर्स ङा चाड सां
14 बर्सम आं पर्बम खेयप सां चाड मानेचा माल्नीनी। प्रस्थान ३४:१८-२६; लेवी २३:४-४४; ब्यवस्था १६:१-१७
15 गो इन कली देंशो खोदेंशो पा, बोरब ओख्ती मसुप्शो शोब्ले ङा चाड मानेचा माल्नीनी। गेपुकी ७ नाक्त सम्म बोरब ओख्ती मसुप्शो शोब्ले जचा माल्नीनी। मेको आबीब महिनामी पचा माल्नीनी। मारदे हना गेपुकी आबीब महिनामी इजीप्त रागी रे ग्रूतीनी। आं ङोंइती श्येत्थ गुइ मजाक्कीन। प्रस्थान १२:१५-२०
16 मिनु इन रूम ख्रुम्शो ङोंइती ङा मीशो मारेइ मारेइ ङा चाड मानेचा माल्नीनी। बर्स नुप्ची ना नेल्ल रिक्शा, खुप्शा, ओंइने थुम्शो ङा चाड मानेचा माल्नीनी। प्रस्थान ३४:२२
17 वोंइश मुर नेल्ल परमप्रभु, परमप्रभु यावे आ ङोंइती बर्समी खेयप सां जाक्चा माल्नीनी।
18 गेपुकीमी चढ़ेनीनु, चढ़ेशो आ हुश नु बोरब ओख्ती सुप्शो मारेइ मारेइ कालेमी मचढ़ेन। मेको चढ़ेशो श्ये आ बोंसो सुनी सम्म महेंचा। प्रस्थान १२:७-१०; प्रस्थान ३४:२५
19 मिनु इन रू ङा ङोंइती मीशो नेल्ल क्येङा रिम्शो फल फुल नु अन्न परमप्रभु यावे, इन परमप्रभु आ बाक्तीकेम चाक्चा माल्नीनी। गेपुकीमी पाठा कली आ ममा आ दूधम लोप्शा मक्येने, देनो” दे परमप्रभु मोसा कली देंत। उत्पत्ती ४:४; ब्यवस्था २६:१-११; नेहेन्याह १०:३६; ब्यवस्था १४:२१
परमप्रभु आ अरेशो नु गेशो लोव़
20 मिनु परमप्रभुमी “नेनीन, गो इन ङोंइती आं स्वर्ग ङा गेय पाइब का सोइक्नुङ। मेकोमी लांमी इन कली कोव़शा नु आं देंशो बाक्तीकेम चोव़दीब। प्रस्थान १४:१९
21 गेपुकी होस पा बाक्शा, आं देंशो टिने। गेपुकी मेको कली मगाइक्पतीन। मारदे हना आं नें मेको नु बाक्ब। मिनु मेकोमी इन हेंथे पतीक मक्याम्ब। यसैया ६३:१०
22 गेपुकी आ देंशो नेनीन। आं देंशो नेल्ल पाइतीनी हना, गो इन जोरी सत्रु आन जोरी सत्रु दुम्नुङ। इन कली खेदा पाइब आन कली खेदा पाइब दुम्नुङ।
23 आं स्वर्ग ङा गेय पाइब थमा पा इन ङोंइती लाइब। मिनु इन कली एमोरी, हित्ती परिज्जी, नानी, हिव्वी नु यबुसी कनानी आन रागी चोव़दीब। मिनु गो मेको नेल्ल आन कली क्याम्नुङ।
24 गेपुकी मेको आन खोदेंशो मपने। मेको आन देवी देवता आन ङोंइती बाप्शा सेउ मपने। मेको आन कली गेय मपने। तन्न मेको आन मूर्ति जिक्शा प्रोल्शा ताइक्तीन। प्रस्थान २०:५; ब्यवस्था १२:३०; लेवी १८:३
25 गे परमप्रभु यावे, इन परमप्रभु कली गेय पाइतीनी हना, गो इन जचा तूचा थोव़क कली आसीक गेनुङ। मिनु इन कली रोइ नेल्ल रे प्रोंइनुङ। प्रस्थान १५:२६
26 इन रागीमी मीश मुरपुकी आल शाम्ब नु आल मथीब मदुम्नीम। मिनु गेपुकी खाल्पी खाल्पा दुम्चा सम्म ब्रोंइनीनी।
27 गो इन ङोंइङोंइती हिंच कोंइनुङमी। मिनु गे ते ते जाक्दीत्नीनी, गो मेक ङा जात जात ङा मुर आन थुं लुक्च लपाइक्नुङ। मिनु इन जोरी सत्रु इन कली तशा प्रोक्नीम। उत्पत्ती ३५:५; यहोसु २:९-११; १सामुएल १४:१५
28 गो इन ङोंइङोंइती हिकवा सोइश्शो खोदेंशो पा हिंतीक सोइक्नुङ। मिनु हिव्वी, कनानी नु हित्ती इन ङोंइती रे प्रोक्पाइक्नुङ। ब्यवस्था ७:२०; यहोसु २४:१२
29 तन्न बर्स कामी मेको आन कली मप्रोक्पाइक्नुङमी। मोपा प्रोक्पाइक्तामी हना, गोरशो रागी दुम्शा, इन क्येङा ब्वाकी ङा जन्तु शुश दुम्नीम।
30 गे शुश दुम्शा, मेको रागी मब्रीनी सम्म, गो मेको आन कली इन ङोंइती रे का का पा ग्रुंइनुङमी। ब्यवस्था ७:२२
31 गो इन रागी लल समुन्द्र रे पलिस्ती आन ठेयब समुन्द्र सम्म नु गोरशो रागी रे युफ्रेटीस खोला सम्म दुम्पाइक्नुङ। मिनु गो मेको रागी ङा मुर इन कली जिम्मा गेनुङ। मिनु गे मेको आन कली खेरनीनी। उत्पत्ती १५:१८
32 गे मेकोपुकी नु मेको आन देवी देवता नु कबल मपमुने। प्रस्थान ३४:१२
33 मेकोपुकीम इन कली पाप पपाइक्नीम। मोपतीके मेको आन कली इन रागीमी बाक्चा मगेने। गे मेको आन देवी देवता आन कली गेय पाइतीनी हना, आन ग्याइलीम रेत्चा पुंइसीनीनी” दे परमप्रभु यावेमी इस्राएली आन कली अरेवा बाक्त।