3
थमा सुइश्‍शोमी ठीक दुम्‍सीब
ए गलातीपुकी, गे मरुप्‍ब मुर दुम्‍नी बाक्‍त। सुमी मोपा इन थुं हिरदा? येसु ख्रीस्‍त कली शीम केप्‍शा कांटी थोक्‍शा क्‍याइश्‍शा साइक्‍तेक्‍म, दे इन मिक्‍चीमी तशो खोदेंब पा नेंपाइक्‍तान्‍नी। मुल मेको लोव़ प्रेंदीनी? मुल लोव़ का निक्‍शी हिल्‍लो पाइक्‍नन्‍नी। परमप्रभु यावे आ सोक्‍त दोपा तनी? यहूदी आन पतीक पशोमी तनी देय ख्रीस्‍त आ लोव़ थमा सुइश्‍शोमी तनी? लो देनीन। मारेइ मरुप्‍ब मुर दुम्‍नी? परमप्रभु यावे आ सोक्‍तीम प्रिंशो थुं गेचा पुंइसीशा, प्रभु आ लां खोइक्‍चा गोइतीनी। मिनु मुल मुर आ थुंमी मिम्‍शो पशा, जाक्‍दीय्‍य, दे मिम्‍तीनी? प्रभु आ लां खोइश्‍शा गाक्‍नीनु, मारेइ मारेइ ताइतीनी। मुल मेको लां प्रोंइतीनी हना, मेको नेल्‍ल मसाम्‍नीनी ङा? परमप्रभु यावेमी इन कली आ सोक्‍त गेशा, छक लाक्‍चा ङा गेय कोंइताक्‍व। यहूदी आन पतीक पशो तशा, मोदेंशो छक लाक्‍चा ङा गेय कोंइदा ङा? ख्रीस्‍त कली थमा सुइश्‍शो तशा, कका छक लाक्‍चा ङा गेय कोंइताक्‍व।
अब्राहाम आ पर्बम “अब्राहाममी परमप्रभु यावे कली थमा सुइक्‍तु। मिनु परमप्रभु यावेमी ठीक दुम्‍पाइक्‍तु” दे ब्रेक्‍शो बाक्‍ब। उत्‍पत्ती १५:६; रोमी ४:३ थमा सुइक्‍तीके ठीक दुम्‍शो मुरपुकी अब्राहाम आ आल नम, दे रुपीने। अर्को रागी ङा मुरपुकी थमा सुइक्‍तीकेमी ठीक दुम्‍पाइक्‍चा पुंइसीनीम, दे परमप्रभु यावे आ लोव़म ब्रेक्‍शो बाक्‍ब। मारदे हना अब्राहाम कली “इ लां रे पा नेल्‍ल रागी ङा मुरपुकीमी आसीक ताइनीम” दे ब्रेक्‍शो बाक्‍ब। उत्‍पत्ती १२:३ मोपतीके सु सुमी अब्राहाममी थमा सुइश्‍शो खोदेंशो पा थमा सुदमे, मेकोपुकी अब्राहाम आ आसीक यो ताइनीम। रोमी ४:१६ 10 सु सुमी चहिं यहूदी आन पतीक पा, ठीक दुम्‍चा माल्‍मे, मेकोपुकी सराप राइनीम। मिनु “परमप्रभु यावेमी अरेशो लोव़ नेल्‍ल टिचा माल्‍ब। सु सुमी लोव़ नेल्‍ल टिशा पशा, का चहिं मटीमे, मेकोपुकी सराप राइनीम” दे ब्रेक्‍शो बाक्‍ब। ब्‍यवस्‍था २७:२६ 11 सुइमी यहूदी आन पतीक पशा परमप्रभु यावे आ ङोंइती ठीक मदुम्‍नीन, दे तुंइसीब। “थमा सुइश्‍शो रे पा ठीक दुम्‍पाइक्‍चा पुंइसीब चहिं गेना हना यो ठीक बाक्‍नीम” दे ब्रेक्‍शो बाक्‍ब। हबकुक २:४; रोमी १:१७; हिब्रू १०:३८ 12 परमप्रभु यावे आ अरेशो लोव़ येसु ख्रीस्‍त कली थमा सुइक्‍तीक रे मबाक्‍ब। “सुइम परमप्रभु यावे आ अरेशो पशो हना, मेको रे पा ब्रोंइ वा” दे ब्रेक्‍शो बाक्‍ब। लेवी १८:५ 13 ख्रीस्‍तमी सुइमी मेको लोव़ टिने मचाप्‍नीम, दे तुइश्‍शा, इं पा ङा सराप रशा, मेको सराप रे प्रोंइतु। मिनु “शीम क्‍याइश्‍शा साइक्‍चा पुंइसीबपुकी सराप रशो बाक्‍नीम” दे ब्रेक्‍शो बाक्‍ब। ब्‍यवस्‍था २१:२३; २कोरिन्‍थी ५:२१ 14 ख्रीस्‍त येसु सराप रमेनु, अर्को रागी ङा मुरपुकी यो अब्राहाम आ तशो आसीक ताइनीम। मिनु यहूदी आन पशो पतीक रे ममाइ। ख्रीस्‍त येसु कली थमा सुइश्‍शो रे पा गोपुकीमी परमप्रभु यावेमी गेनुङ देंशो आ सोक्‍त ताइतय, दे रुब्‍य।
परमप्रभु आ गेशो नु अरेशो लोव़
15 आं लोक्‍बपुकी, कथा सेल्‍शा रुप्‍पाइक्‍नन्‍नी, कागज ब्रेक्‍शा, ब्रेप्‍चो दिम्‍ने थुम्‍शो ङा मेरे मेको ब्रेक्‍शो लोव़ लीब। सुइमी मारेइ लोव़ क्‍याम्‍ने तेम्‍ने मचाप्‍नीम। 16 परमप्रभु यावेमी अब्राहाम नु अब्राहाम आ युइ का कली “इ लां रे पा रागी नेल्‍ल ङा मुरपुकी आसीक राइनीम” दे आ लोव़ गेशो बाक्‍त। शुश आन कली ममाइ “इ युइ का कली” दे ब्रेक्‍शो बाक्‍ब। मेको लोव़ खाप्‍ब चहिं ख्रीस्‍त बाक्‍ब। उत्‍पत्ती २२:१८ 17 आं देंशो रुपीन। परमप्रभु यावेमी अब्राहाम कली गेशो लोव़ कागज ब्रेक्‍शा, ब्रेप्‍चो दिप्‍शो खोदेंशो बाक्‍ब। मेको लोव़ गेशा, ४ सहे ३० बर्स नोले आ अरेशो लोव़ तुइक्‍पाइश्‍शो बाक्‍त। मेको अरेशो लोव़मी ङोंइती गेशो लोव़ ख्रोइक्‍ने मचाप्‍ब। प्रस्‍थान १२:४० 18 अरेशो लोव़ पतीके हक ताइब दुम हना, परमप्रभु यावे आ गेशो लोव़ ख्रोत वा। परमप्रभु यावेमी “हक ताइनेवे” दे अब्राहाम कली आ लोव़ गेशो बाक्‍त। 19 अरेशो लोव़ शोर गाक्‍शो मदुम्‍बा ङा? नेनीन, परमप्रभु यावेमी अब्राहाम कली गेशो लोव़ खाप्‍ब, दे तुइक्‍नय। मेको युइ मजरमेथु, परमप्रभु यावे आ अरेशो लोव़ रे पा पाप माइश्‍शो मार में, दे तुंइ‍सीशो बाक्‍त। मेको लोव़ परमप्रभु यावे आ स्‍वर्ग ङा गेय पाइबमी गारपाइक्‍ब का आ गुइमी गेशा, मुर आन कली तुइक्‍पदा बाक्‍त। रोमी ५:२०; प्रेरित ७:३८,५३; हिब्रू २:२; ब्‍यवस्‍था ५:५ 20 गारपाइक्‍तीक गेय पचा कली मुर का मदुम्‍ब। तन्‍न परमप्रभु यावे आ का ला बाक्‍शा लोव़ गेशो बाक्‍त।
21 अरेशो लोव़ नु परमप्रभु यावेमी गेशो लोव़ मगारचा ङा लोव़ नसी ङा? ममाइ। ब्रोंइचा गेचा कली अरेशो लोव़ का गेशो हना, थमा पा ठीक पतीके अरेशो लोव़ रे पा दुम वा। रोमी ८:२-४ 22 तन्‍न परमप्रभु यावेमी ब्रेक्‍पाइश्‍शो लोव़मी “मुर नेल्‍ल पाप आ वाइलीम वाइल दुम्‍शो बाक्‍नीम” दे ब्रेक्‍शो बाक्‍ब। सु सुमी येसु ख्रीस्‍त कली थमा सुदमे, मेको आन थमा सुइश्‍शोमीन “पाप रे ब्रोंइचा ताइनीम” दे गेशो लोव़ खाप्‍शो ताम्‍तेक्‍म। रोमी ३:९-२०; रोमी ११:३२
23 थमा सुइक्‍तीक जाक्‍चा क्‍येङा ङोंइती अरेशो लोव़ पना पन बाक्‍त‍क। मोपा थमा सुइक्‍तीक मजाक्‍म सम्‍म चोक्‍सीशो खोदेंशो बाक्‍तक। गलाती ४:३ 24 मोपतीके मेको अरेशो लोव़म आंइ कली हिंच कोंइ‍शा, ख्रीस्‍त आ लां गाक्‍पाइक्‍ब दुम्‍त। मोदेंशो बाक्‍त हना, थमा सुइक्‍तीक रे ठीक दुम्‍नय। 25 तन्‍न थमा सुइक्‍तीक जाक्‍चा नोले हिंच कोंइब ममाल्‍नय। रोमी १०:४ 26 ख्रीस्‍त येसु कली थमा सुइश्‍शा, गे नेल्‍ल परमप्रभु यावे आ तमी तौ दुम्‍तीनी। यूहन्‍ना १:१२; रोमी ८:१७ 27 गे ख्रीस्‍त आ नेंमी ब्‍वाक्‍कुम ख्रुम्‍शा ग्रुंइपांइसीशोपुकी येसु ख्रीस्‍त फेक्‍शो खोदेंशो पा, ख्रीस्‍त नु रां का दुम्‍तीनी। रोमी ६:३; रोमी १३:१४ 28 मोपा रां का दुम्‍शो आन कली यहूदी नु ग्रीक, वाइल नु होव़प, मीश मुर नु वोंइश मुर मतिल्‍सीब। मेको ख्रीस्‍त येसुम नेल्‍ल खाल का ङा बाक्‍नीम। रोमी १०:१२; १कोरिन्‍थी १२:१३ 29 ख्रीस्‍त नु रां का दुम्‍शा, अब्राहाम आ चच युइ दुम्‍तीनी। परमप्रभु यावेमी अब्राहाम कली गेशो लोव़ गाप्‍शा, हक ताइब दुम्‍तीनी।