12
परमप्रभुमी अब्राम नु लोव़ पशो
1 मिनु परमप्रभु यावेमी अब्राम कली “इ रागी, इ खिं खिं ङा मुर नु इ आफ आ खिं रे लावो। तेको रागी लचा माल्नेवे, गो इ कली कोंइनन। गन्ती २३:९; प्रेरित ७:३; हिब्रू ११:८
2 गो इ रे पा ठेयब जात ङा मुर सेल्नुङमी। गो इ कली आसीक गेनन। इ नें ठेयब सेल्नुङ। गे अर्को आन कली आसीक दुम्नेवे। उत्पत्ती २४:१,३५; भजन संग्रह ७२:१७
3 सुमी इ कली आसीक गेवा, गो मेको कली आसीक गेनुङ। सुम इ कली सराप पाइबा, गो मेको कली सराप पाइनुङ। इ पर्बम रागी ङा मुर नेल्ल आसीक ताइनीम” देंमाक्त। उत्पत्ती १८:१८; उत्पत्ती २२:१८; उत्पत्ती २६:४; उत्पत्ती २८:१४; प्रस्थान २३:२२; प्रेरित ३:२५; गलाती ३:८
अब्राममी परमप्रभु कली टिशो
4 मिनु अब्राम परमप्रभु यावे आ लोव़ नेंशा, हारान सहर रे गाक्माक्त। लोत यो अब्राम नु गाक्माक्त। हारान सहर रे गाक्मेनु, अब्राम ७५ बर्स, दुम्शो बाक्माक्त।
5 अब्राममी आ मीश साराइ, आ लोक्ब आ तौ, लोत, आन मारेइ मारेइ, हारान सहरमी ग्याप्शो वाइलीम वाइल आन कली यो लदा बाक्त। मिनु मेको नेल्ल कनान रागी लचा गोव़मे बाक्त। मिनु लशा कनान रागी जाक्दीम्मा बाक्त।
परमप्रभुमी अब्राम कली रागी कोंइशो
6 मिनु अब्राम कनान रागी जाक्दीश्शा, शेकेम सहर आ नेक्था मोरेह माइश्शो मुर आ रवा आ नेक्था जाक्दीम्माक्त। मेना कनान ङा मुरपुकी रागीम बाक्शो बाक्मा बाक्त। उत्पत्ती ३५:४; यहोसु २४:२५-२६
7 मेकेर जाक्दीम्मेनु, परमप्रभु यावे अब्राम आ ङोंइती ग्रूशा, मेको कली “एको रागी इ चच युइ आन कली गेनुङ” दे लोव़ गेवा बाक्त। मिनु अब्राममी “गो परमप्रभु यावे कली ताता” दे चढ़ेतीक का सेला बाक्त। उत्पत्ती १३:१५; उत्पत्ती १५:१८; उत्पत्ती १७:८; उत्पत्ती ३५:१२; प्रस्थान ६:४,८; प्रस्थान ३२:१३; यहोसु २१:४३; प्रेरित ७:५
8 मेकेर रे लशा, बेथेल सहर आ पूर्ब गे ङा डांडामी आ ताम्बु याक्शा कीङा बाक्त। बेथेल सहर पच्छिम गे नु ऐ सहर पूर्ब गे बाक्शा, मेकेर यो परमप्रभु यावे कली चढ़ेतीक का सेल्शा, परमप्रभु यावे कली लोव़ पा ठेयब सेला बाक्त। उत्पत्ती ४:२६
अब्राम इजीप्त रागीम लशो
उत्पत्ती २०:१-१८; उत्पत्ती २६:७-११
9 मेकेर रे लशा, नेगेब माइश्शो रागी आ दक्खिन गे लमाक्त।
10 मिनु मेको रागीम अन्काल बाक्माक्त। मोपतीके मेकेर रे लशा, इजीप्त रागीम बाक्थ, लमाक्त। मारदे हना ठेयब अन्काल बाक्माक्त।
11 मिनु इजीप्त ओव़चा क्येङा ङोंइती अब्राममी आ मीश साराइ कली “नेनो, गे दारशो मीश मुर बाक्नेवे।
12 मिनु इजीप्त ङा मुरुम इ कली तशा ‘मेको आ मीश बाक्ब’ दे आं कली साइक्नीम। इ कली चहिं ब्रोंइचा गेनीम।
13 मोपतीके ‘आ समी नङ’ देनो। मिनु इ मो देंशो आ पर्बम गो साइक्चा मपुंइसीनुङ, ब्रोंइचा ताइनुङ” दे आ मीश कली मदा बाक्त।
साराइ कली लाइश्शो
14 मिनु अब्राम इजीप्त रागीम जाक्दीम्मेनु, इजीप्त ङा मुरपुकीमी साराइ आ पर्बम “मेरे मीश मुर थम दारशो बाक्ब” देंमुमा बाक्त।
15 मिनु फाराओ माइश्शो पिप आ मुरपुकीमी साराइ कली तशा “थम दारशो मीश मुर का ताइतक” दे मदमे बाक्त। मिनु साराइ कली फाराओ आ खिं लदमे बाक्त।
16 मिनु साराइ आ पर्बम अब्राम भेडा, ब्यफ, गधा, वाइलीम वाइल नु दलओंठ मारेइ मारेइ गेचा पुंइसे बाक्त।
17 तन्न परमप्रभु यावेमी फाराओ नु आ खिं ङा मुर आन कली अब्राम आ मीश साराइ आ पर्बम ठेयब श्येत गेवा बाक्त।
18 मिनु फाराओमी अब्राम कली ब्रेश्शा “गे आं कली मार पवी? मारदे ‘इ मीश बाक्ब’ मदेने?
19 मारदे ‘आं समी बाक्ब’ देंने? गो हेरा आं मीश सेल्ता। मुल इ मीश लतो। एकेर रे लावो” दे मदा बाक्त।
20 फाराओमी मेको लोव़ आ मुर आन कली माइश्शा, अब्राम, आ मीश नु आ नु बाक्ब नेल्ल आन कली मेकेर रे सोइक्तमे बाक्त।