16
हागार नु इश्माएल
उत्पत्ती २१:९-२१
1 अब्राम आ मीश साराइ आल मथीब बाक्माक्त। मिनु साराइ नु इजीप्त ङा वाइलीम का बाक्माक्त। मेको आ नें हागार बाक्माक्त।
2 मिनु साराइमी अब्राम कली “नेनीन, परमप्रभु यावेमी आं कली आल मगेयी। मोपतीके आं वाइलीम नु बाक्कीन। मोपा गो आल ताइनुङा, कों?” देंमाक्त। मिनु अब्राममी आ मीशेमी मार देंमे, मेको पवा बाक्त। उत्पत्ती ३०:३,९
3 मिनु अब्राम कनान रागीम १० बर्स बाक्म नोले, आ मीश साराइमी आ इजीप्त ङा वाइलीम हागार लाइश्शा, आ वोंइश कली गेवा बाक्त।
4 मिनु अब्राम हागार नु इम्माक्त। मिनु हागार कोव़ज कुरशो दुम्माक्त। मेको तुइश्शा, ठेयब लेश्शो दुम्शा, आ होव़पोक्म कली मटिवा बाक्त।
5 मिनु साराइमी अब्राम कली “आं कली मरिम्शो दुम्तीके इन कली दुम्ल। गो आं वाइलीम इन कली गेता। मुल आंम कली कोव़ज कुरशो तशा, आं कली आइक्च सेल्ती। परमप्रभु यावेमी गे नु गो, इस दातेम निसाफ पवल” देंमाक्त।
6 मिनु अब्राममी “नेनो, इ वाइलीम इ गुइमी बाक्ब। मेको कली इ दाक्शो पावो” दे साराइ कली देंमाक्त। मिनु साराइमी हागार कली हुइक्तानु, मेको प्रोक्माक्त।
हागार प्रोक्शो
7 मिनु परमप्रभु यावे आ स्वर्ग ङा गेय पाइबमी हागार कली गोरशो रागी शुर लतीक लां ङा ब्वाक्कु बुक्तीके आ नेक्था थिदा बाक्त। प्रस्थान १४:१९; प्रस्थान २३:२०; गन्ती २२:२२; १राजा १९:७; १राजा १९:७; २राजा १९:३५
8 मिनु मेकोमी “हागार, साराइ आ वाइलीम, ते लशा पिनी?” दे हिल्लो पवा बाक्त। मिनु हागारमी “आं होव़पोक्म साराइ आ ङोंइती रे प्रोक्ती” दे लोव़ लेत्ता बाक्त।
9 मिनु परमप्रभु यावे आ स्वर्ग ङा गेय पाइबमी मेको कली “इ होव़पोक्म आ खिं लेतो। मिनु मेको आ अरेशो टिशा बाक्को” देंमाक्त।
10 मिनु परमप्रभु यावे आ स्वर्ग ङा गेय पाइबमी लेंशा “इ चच युइ आन कली शुश दुम्पाइक्नुङ। इ मुरपुकी सुइमी हिक्ने मचाप्चा ङा पा शुश दुम्नीम” देंमाक्त। उत्पत्ती १७:२०
11 मिनु परमप्रभु यावे आ स्वर्ग ङा गेय पाइबमी लेंशा “नेनो, गे कोव़ज कुरशो बाक्नेवे। तौ का थीनेवे। मेको कली इश्माएल नें वोइक्चा माल्नेवे। मारदे हना परमप्रभु यावेमी इ श्येत ताप्तु। प्रस्थान २:२३; अय्युब ३४:२८; भजन संग्रह ९:१३; यसैया ४१:१७; याकूब ५:४
12 इ तौ जीब दुम्ब। मुर नेल्ल नु जीब। मुरपुकी यो मेको नु जीनीम। मेको आ लोक्बपुकी नु यो जीब दुम्ब” देंमाक्त। उत्पत्ती २५:१८
13 मिनु हागारमी आ नु लोव़ पाइब परमप्रभु यावे कली “गे आं कली ताइब परमप्रभु ननी। गो थमा पा आं कली ताइब कली ताता” देंमाक्त। उत्पत्ती २२:१४; प्रस्थान ३:७; २राजा १३:४
14 मोपतीके मेको ब्वाक्कु बुक्तीक आ नें बेयर-लहाइ-रोइ वोदमे बाक्त। मेको कादेश नु बेरेद आस दातेम बाक्ब। उत्पत्ती २४:६२; उत्पत्ती २५:११
15 मिनु हागारम अब्राम के तौ का थिमाक्त। अब्रामम मेको कली इश्माएल नें वोदा बाक्त।
16 हागारम इश्माएल थिमेनु, अब्राम ८६ बर्स दुम्शो बाक्माक्त।