21
इसहाक जरमेशो
1 मिनु परमप्रभु यावेमी सारा कली मार देंमे, मेकोन दुम्पदा बाक्त। उत्पत्ती १८:१०
2 मिनु सारामी खाल्पी दुम्शा, अब्राहाम के कोव़ज कुरशा, तौ का थिमाक्त। परमप्रभुमी गेना थीब देंमे, मेना थिमाक्त। हिब्रू ११:११
3 मिनु अब्राहाममी सारा आ थिशो तौ कली इसहाक नें वोदा बाक्त। उत्पत्ती १७:१९
4 मिनु अब्राहाममी आ तौ इसहाक कली ८ नाक्ती दुम्मेनु, ख्रोइक्तीक चिनु ख्रोदा बाक्त। परमप्रभुमी ङोंइती दोपा अरेवा, मोपा पवा बाक्त। उत्पत्ती १७:११-१२; प्रेरित ७:८
5 अब्राहाम आ तौ इसहाक थिमेनु, सहे का बर्स दुम्शो बाक्माक्त। उत्पत्ती १७:१७
6 मिनु सारामी “परमप्रभुमी आं कली रिप्पाइक्ती। सु सुम एको नेंनीमी, मेको यो गो नु रित्नीम। उत्पत्ती १८:१२
7 सु सुमी अब्राहाम कली ‘इ मीशेमी आल कली दूध तुंइब’ देंनीमी? गो खाल्पा दुम्शो अब्राहाम के तौ का थिती” देंमाक्त।
हागार नु आ तौ खेरशो
8 मिनु आल कोल्शा, दूध तूचा प्रोना बाक्त। मिनु दूध तूचा प्रोना नाक्ती अब्राहाममी ठेयब भोज सेल्शा, मुर आन कली थुल्मी बाक्त।
9 मिनु सारामी इजीप्त ङा हागार नु अब्राहाम आस थिशो तौ इश्माएलमी इसहाक कली शुक्शी पशो तवा बाक्त।
10 मिनु मेकोमी अब्राहाम कली “वाइलीम नु आ तौ आस कली खेरो। मेको वाइलीम आ तौ कली, आं तौ इसहाक नु अङस योक्शा गेचा मदुम्ब” देंमाक्त। गलाती ४:३०
11 अब्राहामम आ लोव़ नेंशा, थुं मनुमाक्त। मारदे हना इश्माएल यो आ तौ बाक्माक्त।
12 तन्न परमप्रभुमी अब्राहाम कली “वोंइश आल नु इ वाइलीम आ पर्बम सुर्ता मपावो। सारामी मार मार देंमे, मेको नेल्ल पावो। मारदे हना इसहाक आ चच युइ इ जात दुम्नीम। उत्पत्ती १७:२१; रोमी ९:७-८; हिब्रू ११:१८
13 मिनु इ वाइलीम आ तौ इश्माएल आ चच युइ रे यो ठेयब जात का सेल्नुङ। मारदे हना मेको यो इ तौ बाक्ब” देंमाक्त। उत्पत्ती १७:२०
14 मिनु अब्राहाम सुनी कना बोक्शा, हागार कली शोब्ले नु ब्वाक्कु कुरपाइश्शा, आ तौ नु सोइक्ता बाक्त। मिनु हागार नु आ तौ लसा बाक्त। मिनु लशा, लां जाम्शा, बेयर-शेबा माइश्शो गोरशो रागीम हिरससा बाक्त।
15 मिनु ब्वाक्कु नुप्शा, आ आल कली बुटा आगाम वोदा बाक्त।
16 मिनु हागार चहिं आइदी लशा, निस्से बाक्त। मारदे हना मेकोमी “आं आल बेक्शो मतङल” दे मिम्ता बाक्त। मिनु ठेयब सेंदा पा ङाक्माक्त। यसैया ४९:१५
17 मिनु परमप्रभुमी आल आ ङाक्शो सेंदा नेना बाक्त। मिनु परमप्रभु आ स्वर्ग ङा गेय पाइबमी सरीङ रे “हागार, मार दुमे? महिनो। मारदे हना परमप्रभुमी उइ बाक्शो इ तौ आ ब्रेश्शो नेंतु।
18 बोक्को, इ तौ लाइश्शा गाक्को। गो मेको रे ठेयब जात का सेल्नुङ” देंमाक्त।
19 मिनु परमप्रभुमी हागार आ मिक्च तपदानु, ब्वाक्कु बुक्तीके का तवा बाक्त। मिनु आ ब्वाक्कु कुरतीके प्रिंशा, आ तौ कली तूपदा बाक्त। २राजा ६:१७,२०
20 मिनु परमप्रभु मेको वोंइश आल नु बाक्मेनु, मेको कोल्शा, गोरशो रागीमी बाक्शा, लिब्रा आप्स शुश जोक्ब दुम्माक्त।
21 मेको गोरशो रागी आ नें पारान बाक्माक्त। मिनु आ ममामी आ तौ कली इजीप्त रागी ङा तमी चाक्शा गेवा बाक्त। उत्पत्ती १६:३
अबीमेलेक नु अब्राहाम सल्ला पशो
उत्पत्ती २६:१५-३३
22 मिनु काबु अबीमेलेक नु आ फौज ङा ठेयब कप्तान फीकोल अब्राहाम आ बाक्तीक जाक्शा, अब्राहाम कली “गे मार मार पाइनीनी, परमप्रभु गे नु बाक्ब।
23 मोपतीके गो इन कली मार पुंइनुङ देंशा हना, आं कली, आं तमी तौ नु आं चच युइ आंइ कली श्येत मगेकी। गो इन कली रिम्शो पशो खोदेंशो पा, आं कली यो रिम्शो पने। इन बाक्शो रागी कली यो रिम्शो पने। ‘रिम्शो पाइनुङ’ दे परमप्रभु आ नें थिशा, कसम जने” दे पुना बाक्त। उत्पत्ती २०:१५
24 मिनु अब्राहाममी “गो कसम जाइनुङ” देंमाक्त।
25 मिनु अब्राहाममी अबीमेलेक कली हुइक्ता बाक्त। मारदे हना अबीमेलेक आ गेय पाइबपुकीमी अब्राहाम आ इनार आ पर्बम जिशा, रोइक्तमे बाक्त।
26 मिनु अबीमेलेकमी “गो मेको मतुइक्तु, सुम पवा? गे यो मशेंदीनी। मुलाक्त ला नेंता” देंमाक्त।
27 मिनु अब्राहाममी भेडापुकी नु ब्यफपुकी अबीमेलेक कली गेवा बाक्त। मोपा मेको निक्शी सल्ला पाम्से बाक्त।
28 अब्राहामम ७ ओटा पाठी चहिं बगाल रे ग्रुंइशा, वोदा बाक्त।
29 मिनु अबीमेलेकम “मेको ७ ओटा पाठी मारदे वोइक्नी?” दे हिल्लो पवा बाक्त।
30 मिनु “मेको ७ ओटा पाठी आं गुइ रे लाइक्चा माल्नीनी। गो आं दोशो इनार आ सांकछी दुम्नीनी” देंमाक्त।
31 मिनु मेको बाक्तीके कली बेयर-शेबा, दे नें वोदसे बाक्त। मारदे हना मेको निक्शी मेकेर कसम जाम्से बाक्त।
32 मिनु बेयर-शेबामी मेको सल्ला पने थुम्शा, अबीमेलेक नु फीकोल आ ठेयब कप्तान पलिस्ती आन रागी लेस्सा बाक्त।
33 अब्राहाममी चहिं बेयर-शेबाम रवा का ख्रुमा बाक्त। मिनु मेकेर परमप्रभु यावे, गेना हना यो बाक्ब परमप्रभु आ नें थिशा, मेको नु लोव़ पवा बाक्त। उत्पत्ती १२:८; रोमी १६:२६
34 मिनु पलिस्ती आन रागीमी अब्राहाम अर्को रागी ङा मुर दुम्शा, शुश नाक्त बाक्माक्त।