26
इसहाक गेरार सहर लशो
1 मिनु नोले रागीमी अन्काल दुम्माक्त। ङोंइती अब्राहाम बाक्मेनु यो, अन्काल दुम्शो बाक्माक्त। मिनु इसहाक पलिस्ती आन पिप अबीमेलेक आ रागी ङा गेरार सहर लमाक्त।
2 मिनु परमप्रभु यावेमी इसहाक आ ङोंइती ग्रूमाक्त। मिनु इसहाक कली “इजीप्त रागी मलावो। आं देंशो रागीम बाक्थ लावो।
3 मेको रागीमी अर्को रागी ङा मुर दुम्शा बाक्को। गो गे नु बाक्शा, इ कली आसीक गेनुङ। गो इ कली नु इ चच युइ आन कली एको रागी नेल्ल गेनुङ। गो इ आफ अब्राहाम नु कबल पा, कसम जाता। मुल आं कबल खाप्नुङ। उत्पत्ती १७:१९; उत्पत्ती २२:१६-१७
4 इ चच युइ आन कली सरीङ ङा सोरुल खोदेंशो पा शुश सेल्नुङ। मेको आन कली एको रागी नेल्ल गेनुङ। मिनु इ चच युइ आन पर्बम रागी रागी ङा मुर नेल्ल आसीक ताइनीम।
5 मारदे हना अब्राहामम आं देंशो टिशा, आ पचा माल्शो पाप्तु। आं शेंशो, आं फुल्लुम मुशा ब्रेक्शो लोव़ नु आं अरेशो नेल्ल पाप्तु” दे मदा बाक्त। उत्पत्ती १५:५
6 मिनु इसहाक गेरार सहर उइ बाक्माक्त।
7 मिनु अबीमेलेक आ मुरपुकीमी इसहाक कली आ मीश आ पर्बम लोव़ पामे बाक्त। मेकोमी चहिं “आं समी बाक्ब” दे लोव़ लेत्ता बाक्त। मारदे हना रेबेका शुश दारशो मीश मुर दुम्तीके “आं मीश बाक्ब” देंचा हिंमाक्त। मारदे हना “मेको कली तशा, लाइक्चा कली आ कली साइक्नीम” दे हिंशो बाक्माक्त।
8 मिनु इसहाक मेको रागीमी शुश बाक्शा, काबु पलिस्ती आन पिप अबीमेलेकमी झेल रे इसहाक नु आ मीश रेबेका चाल्शो तवा बाक्त।
9 मोपतीके अबीमेलेकमी इसहाक कली ब्रेश्शा “नेनो, एको थमा पा इ मीश बाक्ब। दोपा ‘आं समी बाक्ब’ देंने?” दे हुइक्ता बाक्त। मिनु इसहाकमी “एको आ पर्बम आं कली साइक्नीमी, कों, दे हिंती” देंमाक्त।
10 मिनु अबीमेलेकमी “आंइ कली मार पवी? आं मुर का मेको नु इप्शो हना, गे आंइ कली शुश मरिम्शो मपपदी वा?” दे मदा बाक्त।
11 मिनु अबीमेलेकमी आ मुर नेल्ल आन कली “सुम मेको नु आ मीश आस कली मरिम्शो पाइबा, मेको थमा पा साइक्चा पुंइसीब” दे माइक्मी बाक्त।
12 मिनु इसहाकमी मेको रागीमी मार मार शोक्शा, मेको बर्सम गेडा का के सहे का गेडा सम्म सिप्पाइश्शा ख्रेला बाक्त। मारदे हना परमप्रभु यावेमी इसहाक कली आसीक गेवा बाक्त। हितोपदेस १०:२२
13 मिनु शुश शोंप पाइश्शो दुम्शा, दारना दारन शुश क्येट थीब दुम्माक्त।
14 मेको आ क्यारश भेडा नु बी ब्यफ शुश दुम्मा बाक्त। मिनु वाइलीम वाइलपुकी यो शुश दुम्मा बाक्त। मोपतीके पलिस्तीपुकीमी गेहे पामे बाक्त।
15 मिनु पलिस्तीपुकीमी अब्राहाम आ गेय पाइब आन दोशो इनार खपीम प्रिंशा, ब्वाक्कु तेक्गमे बाक्त। उत्पत्ती २१:२२-३४
16 मिनु अबीमेलेकम इसहाक कली “आंइ क्येङा गे बोल्यो बाक्नीनी, मोपतीके एकेर रे लने” दे मदा बाक्त।
17 मिनु इसहाक नु आ मुरपुकी मेकेर रे लशा, गेरार ङा दिंममी जाक्दीश्शा, आन ताम्बु कीशा बाक्मा बाक्त।
18 मिनु इसहाकमी ङोंइती अब्राहाम आ दोशो इनारपुकी, लेंशा दोपाइश्शा, ब्वाक्कु ग्रूपदा बाक्त। मारदे हना अब्राहाम बेक्म नोले पलिस्तीपुकीमी मेको इनार आन कली खपीम प्रिंशो बाक्मा बाक्त। मिनु मेको इनार आन कली आ आफ आ वोइश्शो नें लेंशा वोदा बाक्त।
19 मिनु इसहाक आ गेय पाइबपुकीमी मेको दिंममी दोशा, ब्वाक्कु बुक्तीके थित्मे बाक्त।
20 मिनु गेरार ङा गोठलापुकीमी इसहाक आ गोठला आन कली “एको ब्वाक्कु आंइ के बाक्ब” दे जीमे बाक्त। मोपतीके इसहाकम मेको इनार कली एसेक नें वोदा बाक्त। मारदे हना मेकोपुकी आ मुर नु जीमे बाक्त।
21 मिनु लेंशा अर्को इनार का दोव़मे बाक्त। मेको आ पर्बम यो जीमे बाक्त। मेको कली सित्ना नें वोदा बाक्त।
22 नोले मेकेर रे लशा, अर्को इनार का दोव़मे बाक्त। मेको आ पर्बम सुइमी जिचा मपोक्गमे बाक्त। मिनु मेको आ नें रेहोबोथ वोदा बाक्त। मिनु “मुल परमप्रभु यावेमी आंइ कली बाक्तीक गेवा बाक्त। गोपुकी एको रागीमी शुश दुम्कल” देंमाक्त।
23 मिनु मेकेर रे लशा, बेयर-शेबा जाक्दीम्मा बाक्त।
24 मिनु मेको नाक्दो परमप्रभु यावे ग्रूशा “गो इ आफ अब्राहाम आ परमप्रभु नङ। महिनो। गो गे नु बाक्नुङ, इ कली आसीक गेनन। आं गेय पाइब अब्राहाम आ पर्बम गो इ चच युइ आन कली शुश सेल्नुङ” दे लोव़ पवा बाक्त।
25 मिनु इसहाकम मेकेर चढ़ेतीक सेल्शा, परमप्रभु यावे आ नें थिशा ब्रेश्शा, मेको नु लोव़ पवा बाक्त। मिनु आ ताम्बु मेक उइ कीङा बाक्त। आ गेय पाइबपुकीमी मेकेर इनार का दोव़मे बाक्त। उत्पत्ती १२:८
इसहाक नु अबीमेलेक सल्ला पशो
26 काबु अबीमेलेक, आ अर्ती गेब अहुज्जाथ नु आ फौज ङा ठेयब कप्तान फीकोल नु गेरार सहर रे जाक्शा, इसहाक कली ग्रुम्मे बाक्त।
27 मिनु इसहाकमी “गेपुकी आं कली मदाक्थु, इन बाक्तीके रे सोइक्ताक्यीनी। मुल मारदे आं कली ग्रुम्थ जाक्नी?” दे हिल्लो पवा बाक्त।
28 मिनु मेकोपुकीमी “परमप्रभु यावे गे नु बाक्ब, गो तुइक्नीकी। मोपतीके गोपुकीमी ‘गे नु कसम जशा, कबल पचा’ रिम्शो दुम्ब। ब्यवस्था २९:३; मत्ती १३:१३
29 गे आंइ कली श्येत मगेने। गोपुकीमी यो इन कली श्येत मगेथु, रिम्शो पा लडाइ मपथु सोइक्ताक्क। गे परमप्रभु यावे आ आसीक राइब बाक्नीनी” दे इसहाक कली देंमा बाक्त।
30 मिनु इसहाकम मेको आन कली भोज सेला बाक्त। मिनु मेकोपुकीम जामे, तूङमे बाक्त।
31 मिनु मेकोपुकी आ दीसा सुनी कना बोक्शा, कसम जामे बाक्त। मिनु नोले इसहाकमी मेको आन कली लचा गेवा बाक्त। मिनु आन थुं नाइश्शा लमा बाक्त।
32 मेको नाक्ती इसहाक आ गेय पाइबपुकी जाक्शा, इसहाक कली “आंइ दोतीकेमी ब्वाक्कु ग्रूत” दे शेंदमे बाक्त।
33 मिनु मेको इनार कली शिबा नें वोदा बाक्त। मोपतीके मेको सहर आ नें मुल सम्म बेयर-शेबा बाक्ब।
एसाव आ मीश निक्शी
34 एसाव ४० बर्स दुम्मेनु, हित्ती आ मुर बेयरी आ तमी युदीथ नु हित्ती आ मुर एलोन आ तमी बासेमाथ चाक्सी बाक्त। उत्पत्ती ३६:२-३
35 मिनु मेको निक्शी आस पर्बम इसहाक नु रेबेका थुं मनुथु, शुश सुर्ता पाम्से बाक्त।