32
याकूबम एसाव कली ग्रुम्चा चिक्शो
1 मिनु याकूब लांमी लना लन बाक्मेनु, परमप्रभु आ स्वर्ग ङा गेय पाइबपुकी याकूब कली ग्रुम्थ जाक्मा बाक्त।
2 मिनु याकूबमी मेको आन कली तशा “एकेर परमप्रभु आ लडाइ पाइब आन बाक्तीके बाक्ब” देंमाक्त। मोपतीके मेको ग्रुम्तीक रागी आ नें महा-नाइम वोदा बाक्त। महा-नाइम आ अर्थ चहिं “बाक्तीक निक्शी” बाक्ब।
3 मिनु याकूबमी आ लोक्ब एसाव ग्रुम्चा कली आ ङोंइती मुरपुकी एदोम ङा सेइर रागी सोइक्ता बाक्त। उत्पत्ती ३६:८
4 मेको आन कली “गे आं प्रभु एसाव कली ‘इन गेय पाइब याकूबमी इन कली लोव़ सोइक्ताक्व। गो मुल सम्म लाबान नु आ रागीमी अर्को रागी ङा मुर दुम्शा बाक्ती।
5 गो नु शुश ब्यफ, गधा, क्यारश भेडा, वाइलीम वाइल बाक्नीम। गो आं प्रभु, इन ङोंइती शिशी तङल, दे मुर आन कली सोइक्ताक्ङ’ देंत, देंचा माल्नीनी” दे अरेशा सोइक्तीमी बाक्त।
6 मिनु आ सोइश्शो मुरपुकी लेश्शा जाक्शा, याकूब कली “गोपुकी इन लोक्ब एसाव आ बाक्तीक जाक्दीत्तक। मेकोमी ४ सहे मुर नु कुशा, इन कली ग्रुम्थ जाक्ब” दे शेंदमे बाक्त।
7 मिनु याकूब शुश हिंशा, सुर्ता पवा बाक्त। मेको नु बाक्ब मुर क्यारश भेडा, बी ब्यफ नु दलओंठ आन कली हुल निक्शी पा योक्गा बाक्त।
8 मेकोमी “एसावमी ङोंइती ङा हुल साइक्तु हना, अर्को प्रोक्ने चाप्नीम” दे मिम्ता बाक्त।
9 मिनु याकूबम “आं बाजे अब्राहाम आ परमप्रभु, आं आफ इसहाक आ परमप्रभु, आं कली लोव़ पाइब परमप्रभु यावे, गे आं कली ‘इ खिं ङा मुर आन बाक्तीक, इ रागी लेतो। गो इ कली रिम्शो पाइनुङ’ दे लोव़ पाइतीनी। उत्पत्ती ३१:३,१३
10 गो, इन गेय पाइब आं कली पशो गेना हना यो दाक्तीक नु इन रिम्शो पचा मप्रोंइतीके मशिरनुङ। गो कोक्के का ला कुरशा, यर्दन खोला शोक्शा लशो नङ। मुल आं के हुल निक्शी दुम्शो बाक्नीम। २सामुएल ७:१८
11 गो आं कली आं लोक्ब एसाव आ गुइ रे प्रोनीने। मारदे हना आं कली, आं मीश आन कली नु आल नेल्ल आन कली साइक्ब, दे हिंती।
12 गे आं कली ‘गो इ कली थमा पा रिम्शो पाइनुङ। इ चच युइ आन कली समुन्द्र ङा बाल्वा खोदेंशो पा, हिक्ने मचाप्चा ङा सेल्नुङ’ देंतीनी” दे याकूबमी परमप्रभु कली लोव़ पवा बाक्त। उत्पत्ती २८:१३-१४
13 मिनु मेको नाक्दो मेकेर बाक्शा, आ मारेइ मारेइ रे एसाव कली कोसेली योव़ङा बाक्त।
14 मेकोमी सहे निक्शी ओटा क्यारश, २० ओटा बोका, सहे निक्शी ओटा भेडा नु २० ओटा सांड,
15 मिनु ३० ओटा दूध तूब चाइक्ब पाइश्शो दलओंठ, ४० ओटा बी नु १० ओटा ब्यफ, २० ओटा गधैनी नु १० ओटा गधा एसाव कली योव़शा, ठीक पवा बाक्त।
16 मिनु आ गेय पाइब आन कली का का पा हुल हुल पा गेवा बाक्त। आ गेय पाइब आन कली “गे आं ङोंइती हुल हुल पना पन गाक्कीन। हुल नेल्ल कालेमी मखुलीन। का अर्को क्येङा ङोन खुल्चा माल्नीनी” दे माइक्मी बाक्त।
17 मिनु नेल्ल क्येङा ठेयब अरेतीके लोव़ “आं लोक्ब एसाव इन कली ग्रुम्थ जाक्त हना, मेकोमी इन कली ‘गे सुका आ मुर ननी? ते लाइनीनी? इन ङोंइती गाक्ब बगाल सु के नमी?’ दे हिल्लो पाप्तु हना,
18 गेमी ‘एको इन गेय पाइब याकूब के नम। आ प्रभु एसाव कली कोसेली बाक्ब। आं यो खोइश्शा पिना पिन बाक्ब’ देंचा माल्नीनी” दे गेय पाइब आन कली माइक्मी बाक्त।
19 मोदेंशो पा ङोंइती गाक्ब, नोले गाक्ब नु नेल्ल क्येङा नोले गाक्ब नेल्ल आन कली अरेमी बाक्त। मिनु “मोदेंशो पा एसाव नु ग्रुम्ची ना लोव़ पचा माल्नीनी।
20 मिनु ‘इन गेय पाइब आंइ नोले पिना पिन बाक्ब’ देंचा मप्रेंदीन” दे माइक्मी बाक्त। मारदे हना याकूबमी “गो आं ङोंइती सोइश्शो कोसेलीमी गो मेको कली लेम्नुङ। मिनु नोले मेको कली ग्रुम्नुङ, आं कली ब्राइबा कों” दे मिम्ता बाक्त।
21 मिनु आ कोसेली आ ङोंइती लदमे बाक्त। आं चहिं मेको नाक्दो आ मुर बाक्तीकेमी बाक्माक्त।
याकूब यब्बोक खोलाम बाक्शो
22 मिनु मेको नाक्दो बोक्शा, आ मीश निक्शी, आ गेय पाइब मीश निक्शी नु आ ११ जना तौ आन कली लाइश्शा, यब्बोक खोला शोक्पाइक्मी बाक्त।
23 मिनु मेको आन कली शोक्पाइश्शा, आ मारेइ मारेइ यो सोइक्ता बाक्त।
24 मिनु आइक्ची हांबुम याकूब का ला बाक्माक्त। मिनु नां रिक्शा, नां मसोव़म सम्म मुर का नु राम्शी पवा बाक्त। होसे १२:४-५
25 मेको मुरुम याकूब नु राम्शी पा आं ब्रुचशो तशा, याकूब आ फिला ङा बोंइसे थिवा बाक्त। मिनु आ फिला ङा बोंइसे याक्ता बाक्त।
26 मिनु मेको मुरुमी “नां दाप्चावानु, मुल लचा गेयी” देंमाक्त। मिनु याकूबमी “आं कली आसीक मगेवी सम्म मप्रोंइनन” दे मदा बाक्त मत्ती १५:२२-२८
27 मिनु मेकोम “इ नें मार में?” दे हिल्लो पवानु, याकूबमी “याकूब” देंमाक्त।
28 मिनु मेकोमी “मुल ङा मेरे इ नें याकूब ममाइ, इ नें इस्राएल देंचा माल्नीम। मारदे हना गे परमप्रभु नु राम्शी पा ग्राते, मुर नु राम्शी पा यो ग्राते” देंमाक्त। उत्पत्ती ३५:१०; येरमीया २०:७
29 मिनु याकूबम “इन नें मार में?” दे हिल्लो पवा बाक्त। मिनु मेकोमी “आं नें मारदे माल्दे?” देंशा, मेको कली आसीक गेवा बाक्त। न्यायाधीस १३:१७-१८
30 मिनु याकूबमी “गो परमप्रभु आ कुल तशा यो मबेक्ङ” दे मेको बाक्तीके आ नें पेनीएल वोदा बाक्त। प्रस्थान ३३:२०
31 मिनु नां दाप्मेनु, याकूब पेनुएल रे खोङ चेङ पा गाक्माक्त।
32 मोपतीके इस्राएलीपुकीमी मुल सम्म मेको बोंइसे ग्याइक्ब नारी नु मेकेर ङा श्ये मब्वाइनीमी। मारदे हना मेकोमी याकूब आ फिला ङा बोंइसे याक्ता बाक्त।