35
याकूबमी आसीक तशो
मिनु परमप्रभुमी याकूब कली “बोक्‍शा सासो। बेथेल सहर लावो। मिनु मेकेर बाक्‍को। इ लोक्‍ब एसाव रे प्रोक्‍ङेनु, इ ङोंइती ग्रूशो परमप्रभु, आं कली, चढ़ेतीक का सेलो” दे मदा बाक्‍त। उत्‍पत्ती २८:११-२२; उत्‍पत्ती ३१:१३ मिनु याकूब आ खिं ङा मुर नु आ बाक्‍शो मुर नेल्‍ल आन कली “इन गुइमी बाक्‍शो मूर्ति ताइक्‍तीन। इन फेक्‍शो वा प्रुइश्‍शा, चिक्‍शा, अर्को फेक्‍सीन। उत्‍पत्ती ३१:१९; ब्‍यवस्‍था २७:१५; यहोसु २४:२३ मिनु बोक्‍य, बेथेल लय। गो मेकेर जाक्‍दीश्‍शा, परमप्रभु कली चढ़ेतीक का सेल्‍नुङ। गो श्‍येत जङानु, आं पुंइशो गेप्‍तु। गो ते गाक्‍ती हना यो, मेको गो नु बाक्‍त” दे माइक्‍मी बाक्‍त। मिनु मेकोपुकीमी याकूब कली आन मूर्ति नु आन पांइशो मारवाडी नेल्‍ल गेमे बाक्‍त। याकूबमी मेको नेल्‍ल शेकेम आ नेक्‍था बाक्‍शो रवा आगाम थिमा बाक्‍त। यहोसु २४:२६; न्‍यायाधीस ९:६ मिनु मेकोपुकी लचा गोव़मे बाक्‍त। परमप्रभुमी एर ओंथ ङा सहर ङा मुर आन कली हिंब सेल्‍मी बाक्‍त। मोपतीके मेकोपुकीमी मेको आन कली खेदा मपामे बाक्‍त। प्रस्‍थान २३:२७; यहोसु १०:१०
मिनु लशा, याकूब नु मेको नु बाक्‍ब मुर नेल्‍ल कनान रागी ङा लूज सहर जाक्‍दीम्‍मा बाक्‍त। लूज सहर कली बेथेल नें वोइश्‍शो बाक्‍माक्‍त। याकूबम मेकेर चढ़ेतीक का सेला बाक्‍त। मेको आ नें एल-बेथेल वोदा बाक्‍त। मारदे हना आ लोक्‍ब एसाव रे प्रोक्‍मेनु, मेकेर परमप्रभुम तपांइसीशो बाक्‍माक्‍त। मेना रेबेका कली कोव़ब देबोरा बेक्‍माक्‍त। मिनु मेको कली बेथेल आ नेक्‍था, रवा आगामी थिम्‍मे बाक्‍त। मेको कली याकूबम अल्‍लोन-बकुथ नें वोदा बाक्‍त। मेको आ अर्थ ङाक्‍चा ङा रवा बाक्‍ब। उत्‍पत्ती २४:५९
परमप्रभुमी याकूब कली ग्रुम्‍शो
पदान-अराम रे लेम्‍मेनु, परमप्रभुमी याकूब कली लेंशा ग्रुम्‍शा, मेको कली आसीक गेशा 10 “इ नें याकूब बाक्‍ब। तन्‍न मुल रे याकूब मदेंचा, इ नें इस्राएल दुम्‍चा माल्‍ब” देंमाक्‍त। मोपतीके इस्राएल नें वोइश्‍शो बाक्‍माक्‍त। उत्‍पत्ती ३२:२९ 11 मिनु परमप्रभुमी मेको कली “गो नेल्‍ल क्‍येङा सक्ति पाइश्‍शो परमप्रभु नङ। गे सोशा बोशा, शुश दुमीने। गे रे रागी का ङा शुश मुर नु रागी रागी ङा मुर यो दुम्‍नीम। गे रे पिपपुकी दुम्‍नीमी। उत्‍पत्ती १७:१; उत्‍पत्ती २८:३-४; उत्‍पत्ती १७:६ 12 अब्राहाम नु इसहाक कली गेशो रागी गो इ कली नु इ चच युइ आन कली गेनुङ” देंमाक्‍त। 13 मिनु परमप्रभुमी लोव़ पने थुम्‍शा, मेको आ बाक्‍तीक रे लमाक्‍त। 14 मिनु याकूबमी परमप्रभु नु लोव़ पशो मिम्‍चा कली मेकेर फुल्‍लु का राप्‍पदा बाक्‍त। मिनु मेको आ तारी तूचा थोव़क चढ़ेतीक नु तेल लुक्‍ता बाक्‍त। उत्‍पत्ती २८:१८-१९ 15 याकूबमी परमप्रभु नु लोव़ पतीक सहर कली बेथेल नें वोदा बाक्‍त।
बेन्‍यामीन जरमेसेनु राहेल बेक्‍शो
16 मिनु बेथेल रे एफ्राथ जाक्‍दीत्‍चा कली गाक्‍शो बाक्‍मा बाक्‍त। मेना राहेल आल थिचा चिक्‍शो बाक्‍माक्‍त। 17 सुत्‍केरी रोइम शुश श्‍येत जवानु, आ वारच पाइब मीश मुरुमी “महिनो, गे अर्को तौ का नु थीनेवे” दे लोव़ पवा बाक्‍त। उत्‍पत्ती ३०:२४ 18 मिनु मेको मबेक्‍थु, आ सोक्‍त लची ना आ तौ आ नें बेन-ओनी वोदा बाक्‍त। आ आफोम चहिं आ नें बेन्‍यामीन वोदा बाक्‍त। मेको आ अर्थ आं श्‍येत ङा तौ बाक्‍ब। 19 मिनु राहेल बेक्‍माक्‍त। मिनु एफ्राथ लतीक लांमी थिम्‍मे बाक्‍त। एफ्राथ बेथलेहेम सहरम बाक्‍ब। उत्‍पत्ती ४८:७; १सामुएल १०:२; येरमीया ३१:१५; मत्ती २:१८ 20 मिनु याकूबमी आ थिम्‍तीक तारी फुल्‍लु के थाम का राप्‍पदा बाक्‍त। मुल सम्‍म राहेल आ थिम्‍तीके तारी मेको ठेयब फुल्‍लु के थाम बाक्‍ब।
इस्राएल आ तौपुकी
21 मिनु इस्राएल लना लन, आ ताम्‍बु एदेर माइश्‍शो लाइश्‍शो खिं आ नेक्‍था कीङा बाक्‍त। 22 मिनु इस्राएल मेको रागीमी बाक्‍मेनु, आ तौ रूबेन आ आफ आ मीश बिल्‍हाह नु इम्‍‍माक्‍त। मिनु इस्राएलमी मेको नेना बाक्‍त। उत्‍पत्ती ४९:४
याकूब आ १२ जना तौ
१इतिहास २:१-२
23 लेआ आ तौ रूबेन, याकूब आ ङोंइती जरमेशो तौ बाक्‍माक्‍त। सिमियोन, लेवी, यहूदा, इस्‍साकार नु जबूलून नेल्‍ल लेआ आ तौ बाक्‍मा बाक्‍त। 24 राहेल आ तौ योसेफ नु बेन्‍यामीन बाक्‍सा बाक्‍त। 25 राहेल आ गेय पाइब बिल्‍हाह आ तौ दान नु नाप्‍ताली बाक्‍सा बाक्‍त। 26 लेआ आ गेय पाइब जिल्‍पा आ तौ गाद नु आशेर बाक्‍सा बाक्‍त। मेको नेल्‍ल पदान-अराममी जरमेशो याकूब आ तौ बाक्‍मा बाक्‍त।
इसहाक बेक्‍शो
27 मिनु याकूब, आ आफ इसहाक आ खिं माम्रे जाक्‍दीम्‍माक्‍त। मेको कली किरयथ-अरबा सहर नु हेब्रोन यो देंनीम। मेको अब्राहाम नु इसहाक आस बाक्‍तीक रागी बाक्‍माक्‍त। 28 मिनु इसहाक सहे का ८० बर्स दुम्‍माक्‍त। 29 मिनु इसहाक शुश बर्स ङा खाल्‍पा दुम्‍शा बेक्‍माक्‍त। आ क्‍येङा ङोंइती बेक्‍शो किकी पिपी आन बाक्‍तीक लमाक्‍त। मिनु आ तौ एसाव नु याकूबम मेको कली थिम्‍से बाक्‍त।