43
याकूब आ तौपुकी लेंशा इजीप्त लशो
1 मिनु मेको रागीमी अन्काल बारना बारन लमाक्त।
2 मिनु आन इजीप्त रे चाक्शो अन्न नेल्ल नुप्शा, आन आफोमी मेको आन कली “लेंशा इच्का जचा थोव़क ग्याप्थ लने” दे माइक्मी बाक्त।
3 मिनु यहूदामी “मेको ठेयब मुरुमी ‘गे इन लोक्ब कान्छा मचाक्तीनी हना, आं कली ग्रुम्थ मजाक्कीन’ दे आंइ कली हुइक्ताक्व। उत्पत्ती ४२:१५-३४
4 गे आंइ लोक्ब कान्छा कली गोपुकी नु सोइक्ताक्नी हना, ला लाइनीकी।
5 गे मेको कली गो नु मसोइक्ताक्नी हना, मलाइनीकी। मारदे हना मेको ठेयब मुरुमी ‘गे इन लोक्ब कान्छा मचाक्तीनी हना, आं कली ग्रुम्थ मजाक्कीन’ दे आंइ कली हुइक्ताक्व” दे आ आफ कली देंमाक्त।
6 मिनु इस्राएलमी “मारदे मेको मुर कली ‘आंइ लोक्ब कान्छा बाक्ब’ दे शेंदीनी? मिनु आं कली ओदेंशो मरिम्शो पाइय्यीनी” दे माइक्मी बाक्त।
7 मिनु मेकोपुकीमी “मेको ठेयब मुरुमी ‘इन आफ मुल सम्म ब्रोंइशो बाक्बा? अर्को लोक्ब यो बाक्बा?’ दे आंइ कली खिं ङा मुर आन पर्बम शुश हिल्लो पाप्तु। मिनु गोपुकीमी मेकोन देंतक। ‘इन लोक्ब कान्छा चाक्कीन’ देंब, दे गो दोपा तुइक्नीकी?” दे आन आफ कली देंमा बाक्त। उत्पत्ती ४२:७-१३
8 मिनु यहूदामी “कान्छा गो नु सोइक्तीन। गे गो नु इं आइक्च आल यो मबेक्मल, दे गो लाइनीकी।
9 गो एको आ जमानी दुम्नुङ। गो लेश्शा जाक्ङानु, गो एको कली चाक्शा, इन ङोंइती मवोइक्ता हना, गेना हना यो आं पाप लील।
10 गो एको कली रिम्शा मबाक्शो नकी हना, गो खेयप निक्शी लने पिने थुम्क वा” दे आ आफ कली देंमाक्त।
11 मिनु आन आफ इस्राएलमी “मुल मो दुम्चा माल्शो बाक्त हना, गे मेको ठेयब मुर कली इं रागी ङा नेल्ल क्येङा रिम्शो फल, इच्का ख्रेक्तीक तेल, इच्का खुदो, मस्लापुकी, ब्रोव़शो रिना पाइब थोव़क, फोरो नु देसी बदाम कोसेली लतीन। हितोपदेस १८:१६
12 मिनु इन क्येट नु ङोंइती ङा इन धोक्रोम बाक्शो क्येट यो लतीन। प्रेंशा मो दुम, कों? मार दुम्मे? उत्पत्ती ४२:२७, ३५
13 इन लोक्ब कान्छा लाइश्शा, मेको ठेयब मुर कली लेंशा ग्रुम्थ लने।
14 नेल्ल क्येङा सक्ति पाइश्शो परमप्रभुमी मेको मुर आ ङोंइती इन कली शिशी गेवल। मिनु इन अर्को लोक्ब नु बेन्यामीन यो सोइक्तल। गो श्येत जचान माल्शो बाक्ती हना यो, श्येत जङल” दे आ तौ आन कली माइक्मी बाक्त।
15 मिनु आ तौपुकीमी मेको कोसेली, ङोंइती ङा क्येट, अर्को क्येट नु बेन्यामीन लाइश्शा, इजीप्त रागी लशा, योसेफ आ ङोंइती जाक्दीम्मा बाक्त।
16 मिनु योसेफमी मेकोपुकी नु बेन्यामीन कली तशा, आ खिं ङा ठेयब गेय पाइब मुर कली “मेको मुर आन कली आं खिं लाइक्मी। बस्तु का क्योरशा, भोज ठीक पावो। मारदे हना मुलाक्ती मेकोपुकी गो नु जाइनीम” देंमाक्त।
17 मिनु मेको मुरुम योसेफ आ देंशो पशा, नेल्ल आन कली योसेफ आ खिं ओंइदीमी बाक्त।
18 मेकोपुकी चहिं हिंमा बाक्त, मारदे हना योसेफ आ खिं आगा ओंइदीमी बाक्त। मिनु मेकोपुकीमी “मारदे हना इं ङोंइती ङा क्येट इं धोक्रोम थित्तय। मिनु इं कली वाइल सेल्चा नु इं गधा रोइक्चा कली इं कली एके ओंइताक्मे” देंमुमा बाक्त। उत्पत्ती ४२:२८
19 मिनु योसेफ आ खिं ङा ठेयब गेय पाइब आ नेक्था लशा, लाप्चो रे मेको नु लोव़ पामे बाक्त।
20 मिनु “हजुर, गोपुकी ङोंइती खेयप का जचा थोव़क ग्याप्थ जाक्तक।
21 मिनु गोपुकी बास बाक्तीके जाक्दीश्शा, आंइ धोक्रो रोक्शा, कोव़कानु, आंइ क्येट नेल्ल आंइ धोक्रो धोक्रोम थित्तक।
22 मुल गो लेंशा चाक्तक। अर्को जचा थोव़क ग्याप्चा कली यो क्येट चाक्तक। सुम आंइ क्येट आंइ धोक्रोम कुर पवा, गो मतुइक्नीकी” दे ठेयब गेय पाइब कली देंमा बाक्त।
23 मिनु मेकोमी “इन थुं नाइक्तीने, महिनीने। इन परमप्रभु, इन आफ आ परमप्रभुमी इन क्येट इन धोक्रोम कुर पवा माइ। गो इन क्येट ताक्ता” देंमाक्त। मिनु मेकोमी सिमियोन कली चाक्गा बाक्त। उत्पत्ती ४२:२४
24 मिनु मेको मुरुम मेको आन कली योसेफ आ खिं ओंइशा, खोइल चिक्चा कली ब्वाक्कु गेवा बाक्त। आन गधा आन कली थुला बाक्त।
25 मिनु नाक्ती दुम्चा चिक्तानु, मेको नु काथा जचा माल्ब देंशो नेंशा, आन कोसेली गेचा कली ठीक पामे बाक्त।
26 मिनु योसेफ जाक्मेनु, मेकोपुकीमी आन कोसेली लाङगा रे ओंइशा, मेको आ ङोंइती वोइश्शा, खुम्की पा बाप्शा ख्रेत्मे बाक्त।
27 मिनु योसेफमी मेको आन कली “दोपा बाक्नी? इन आफ, इन देंशो खाल्पा, रिम्शो बाक्मे? मुल सम्म ब्रोंइमे?” दे हिल्लो पामी बाक्त।
28 मिनु मेकोपुकीमी “इन गेय पाइब आंइ आफ मुल सम्म ब्रोंइशो नु रिम्शो बाक्ब” देंशा, आन पिया खुक्शा, सेउ पामे बाक्त। उत्पत्ती ३७:७,९
29 मिनु योसेफमी आ लोक्ब बेन्यामीन, आ ममा आ तौ तशा “इन देंशो इन लोक्ब कान्छा एकोन बाक्बा?” देंशा, बेन्यामीन कली “परमप्रभुमी इ कली शिशी पवल, आं तौ” देंमाक्त।
30 मिनु योसेफमी आ लोक्ब तशा, ग्येरसीशा ङाक्चा कली ते लङ, दे आ कोठा लशा ङाक्माक्त।
31 मिनु आ कुल चिक्शा, लेम्माक्त। मिनु गेय पाइब आन कली “शोब्ले ख्रेत्तीन” देंमाक्त।
32 मिनु योसेफ, आ लोक्ब नु मेको नु जाइब इजीप्त ङा मुर नेल्ल आन कली आन पेवा पेवा जचा थोव़क ख्रेत्मे बाक्त। मारदे हना इजीप्त ङा मुर हिब्रू नु जचा मदुम्बाक्माक्त। इजीप्त ङा मुरपुकी ग्रांग्रा दीबाक्मा बाक्त। उत्पत्ती ३९:६; उत्पत्ती ४६:३४; प्रस्थान ८:२२
33 मिनु योसेफमी आ लोक्ब आन कली ङोंइती जरमेशो, माइला, साइला पा कान्छा सम्म गार पा निप्पदा बाक्त। मिनु मेकोपुकी छक लाक्मा बाक्त।
34 मिनु योसेफ आ ङोंइती रे जचा ब्वचा थोव़क लाइश्शा, मेको आन कली ख्रेप्पदा बाक्त। बेन्यामीन आ भाग अरु आन क्येङा ५ भाग खोइ शुश बाक्माक्त। मिनु मेकोपुकी योसेफ नु जशा तूशा, ग्येरशा बाक्मा बाक्त।