3
मोसा क्येङा ख्रीस्त ठेयब बाक्ब
1 मोपतीके परमप्रभु यावे आ मुर, आं लोक्बपुकी, गे यो स्वर्ग रे ब्रेत्चा पुंइसीशो बाक्नीनी। सोइश्शो, दे नें वोइक्चा पुंइसीशो नु इं थमा सुइक्तीक ङा नेल्ल क्येङा ठेयब चढ़ेब येसु कली मिम्तीने। हिब्रू ४:१४
2 दोपा मोसामी परमप्रभु यावे आ खिंमी रिम्शो गेय पवा, मोपा येसुमी यो आंम कली योव़ब आ ङोंइती रिम्शो पा आ देंशो पाप्तु। गन्ती १२:७
3 दोपा खिं क्येङा खिं सेल्ब शुश मान पाइक्चा पुंइसीबा, मोपा मोसा क्येङा येसु शुश मान पाइक्चा पुंइसीशो बाक्ब।
4 खिं नेल्ल मुरुम सेल्शो बाक्नीम। तन्न मारेइ मारेइ सेल्ब चहिं परमप्रभु यावे बाक्ब।
5 नोले तुइक्पाइक्तीक लोव़ आ पर्बम सांकछी दुम्चा कली मोसा परमप्रभु यावे आ खिंमी थम रिम्शो गेय पाइब दुम्त।
6 ख्रीस्तम चहिं परमप्रभु यावे आ खिंमी आ तौ दुम्शा, रिम्शो गेय पाप्तु। मिनु गो मेको कली आस पा थमा सुइक्चा मप्रोंइतय हना, गो आ खिं बाक्नय। एफिसी २:१९; १पत्रुस २:५
परमप्रभु कली टीब दुमीन
7 परमप्रभु यावे आ सोक्तीमी मार देंत देंशा हना “मुलाक्ती आं लोव़ नेंतीनी हना, हिब्रू ४:७
8 साइ नेसी इन किकी पिपी गोरशो रागीम गाक्शा, नाक्चा पुंइसमानु, पशो खोदेंशो इन थुं खकटा पा मटीब मदुमीन। प्रस्थान १७:७; गन्ती २०:२-५
9 इन किकी पिपीम ४० बर्स सम्म आं ठेयब गेय तशा यो, आं थुं थाम्ना थाम्न बाक्तेक्म।
10 मोपतीके मेको आन कली तशा, आं थुं जिक्त। मिनु गो ‘मेकोपुकी गेना हना यो हेंथे गाक्नीम। आं लां मतुइक्नीम’ देंती।
11 मिनु गो चुरशा ‘मेकोपुकी गेनायो आं राज्य ओव़शा थुं नाइक्चा मताइनीम’ दे कसम जशा देंती” देंत। भजन संग्रह ९५:७-११; हिब्रू ४:३; गन्ती १४:२१-२३
12 आं लोक्बपुकी, होस पांइसीने। मारदे हना मरिम्शो नु थमा मसुइक्तीक थुंमी गेना हना यो ब्रोंइशा बाक्ब परमप्रभु यावे रे सुइ इन कली फ्राशा मलदल।
13 पापम इं थुं क्याल्शा मटीब मदुम्यल, दे मुलाक्त रेन नाक्त किंत किंत अर्ती गेमुने। १थिस्सलोनिकी ५:११
14 इं ङोंइती नाक्त ङा थमा सुइक्तीके नोले सम्म मप्रोंइतय हना, गो ख्रीस्त नु थुं का ङा दुम्शा बाक्नय। हिब्रू ६:११
15 ङोंइती “मुलाक्ती आं लोव़ नेंतीनी हना, इं किकी पिपीम मटिशो खोदेंशो पा इन थुं खकटा पा मटीब मदुमीन” देंशो बाक्ब।
16 नेंशा यो मटीब सु नमी? मोसाम इजीप्त रे ग्रुंइशा पिश्शोपुकी मनमी ङा?
17 सु सुमी ४० बर्स सम्म परमप्रभु यावे आ थुं जिक्तमे? मेको पाप पाइबपुकी मनमी ङा? मेको गोरशो रागीमी बेक्शो बाक्तेक्म। गन्ती १४:२९; १कोरिन्थी १०:१०
18 परमप्रभु यावेमी आ लोव़ मटीब आन पर्बम “मेकोपुकी गेनायो आं राज्य ओव़शा थुं नाइक्चा मताइनीम” दे कसम जशो मबाक्बा ङा?
19 मोपतीके परमप्रभु यावे आ लोव़ कली थमा मसुइक्तीकेन आ राज्य ओव़शा नाइक्चा मतामे बाक्त, दे रुप्नय।