3
हबकुक ग्येरसीशो
1 परमप्रभु यावे आ लोव़ पाइब हबकुकमी परमप्रभु यावे कली लोव़ पा कुम्सो पा ठेयब सेल्तु।
2 “परमप्रभु यावे, गो इन पशो नेल्ल नेंता। परमप्रभु यावे, गो इन पशो तशा, इन कली ठेयब सेल्नुङ। आंइ ब्रोंइतीक नाक्तीमी मेको लेंशा कोंइदीन। मेको तुइक्पतीन। गे गाइक्ताक्नी हना, यो इन शिशी मिम्तीन।
3 परमप्रभु तेमान रे पा जाक्त। मेको का ला परमप्रभु पारान डांडा रे जाक्त। ठेयब सेंदा पा आ ठेयब दुम्तीकेमी सरीङ सुम्शो बाक्त। आ मान ततीकेम रागी नेल्ल ब्रीशो बाक्त। ब्यवस्था ३३:२
4 मेको आ छेङछेङ नां दाप्शो खोदेंशो बाक्त। आ गुइ रे पा चेयरे ग्रूशो बाक्त। मेकेर आ सक्ति ख्रुइश्शो बाक्ब।
5 आ ङोंइती मुर आन कली साइक्तीक रोइ लत। आ नोले मुर बेक्तीक रोइम खोइक्तु।
6 मेको गाक्शा नाइश्शा, रागी हिम्पाइक्तु। मेकोमी कोव़ङानु, रागी रागी ङा मुर आन कली ख्रिंख्रि पपाइक्तु। गेना हना यो बाक्ब डांडा ब्रेत्नीम। मेको गेना हना यो लीब पहाड नेल्ल यशो खोदेंशो पा दिंम दुम्तेक्म। मेकोमी साइ ङोंइती रे मोदेंशो पशो बाक्त। भजन संग्रह १०४:३२
7 गो कुशन रागी ङा ताम्बुमी बाक्ब आन कली श्येत जशो ताता। मिदयान ङा ताम्बु आन सुम्तीके हिम्साक्म।
8 परमप्रभु यावे, गे खोलापुकी नु गाइक्तीनी? गे ठेयब समुन्द्र आ पर्बम चुरनी? इन शारा नु बग्गी आन कली लां कोंइशा ग्रातीनी।
9 गे इन लिब्रा ग्रुंइताक्नी। गे इन ब्रा ते देंनी मेक लत। गे खोला शाइक्तीकेमी रागी कली चेत्तीनी।
10 मिनु डांडापुकी इन कली तशा रोम्सीनीम। ठेयब रेउ यित। ठेयब समुन्द्र आ रेयके नेंसाक्व। भजन संग्रह ७७:१७
11 इन आप्शो ब्रा जिल पा ब्रशा बेरमेनु, इन तूतीक जिल्मील पवानु, नां मसोव़। मिनु तास्ला सरीङम नांइसाक्व। यहोसु १०:१३
12 गे गाइश्शा रागी तार गाक्तीनी। चुरशा रागी रागी ङा मुर आन कली दिप्शा साइक्तीनी।
13 गे इन आंम योव़शो मुर आन कली प्रोंइचा, दे जाक्तीनी। इन तेल लुक्शो मुर कली प्रोंइथ जाक्तीनी। तन्न गे इन अरेशो मटीब रागी ङा ठेयब मुर आ खिं तला तारी रे जग सम्म प्रेत्तीनी। भजन संग्रह १८:८,१६
14 मिनु गे मेको आ लडाइ पाइब आन ब्राम आन पिया ख्रित्तीनी। मेकोपुकी ख्रुइश्शा बाक्ब प्रुङग मुर आन कली साइक्चा थुं पा फश गिवार खोदेंशो पा जाक्शो बाक्तेक्म।
15 गे ठेयब समुन्द्रमी आन शारा ओव़पाइश्शा, ठेयब ब्वाक्कु नेल्ल शाक्पाइक्तीनी। प्रस्थान १४:२६-२९
16 गो इन सेंदा नेंनुनु, ख्रिंख्रि पाता। आं शोव़ यो ख्रिंख्रि पाप्तु। आं रुश आगा नेल्ल मुक्ताक्मे। खोइल ख्रिंख्रि पाप्तु। मो हना यो आंइ कली मरिम्शो पाइब मुर आन कली श्येत दुम नाक्ती कली रिम्शा बाक्ती।
17 फोव़शी रवा मबोइक्ब। अङगुर बोट मसिप्ब। तेल रवाम फल काइ मसिप्ब। रूमी अन्न मसिप्ब। गोठीम बी ब्यफ नु क्यारश भेडा मबाक्त हना यो,
18 गो परमप्रभु यावे कली तुइश्शा ग्येरसीनुङ। मिनु आं कली श्येत रे प्रोंइब परमप्रभु कली ठेयब सेल्शा ग्येरसीनुङ। यसैया ६१:१०
19 परमप्रभु यावे, आं परमप्रभु आं सक्ति बाक्ब। मेकोमी आं खोइल किश्श आ खोइल खोदेंशो सेल्ब। मेकोमी आं कली ठेयब लाइश्शो डांडामी लतीक सक्ति गेब” दे कुम्सो पाप्तु।
मेको कुम्सो शेंब कली तार पाइश्शो ताप्तीके ताप्शा, मेको कुम्सो पपाइक्चा माल्ब। भजन संग्रह १८:३४