होसे
ब्रेक्ब मुर: एको किताब होसेमी ब्रेक्शो बाक्ब। होसे आ अर्थ “परमप्रभु, वारच पाइय्यीनी” देंशो बाक्ब।
गेना ब्रेक्शो: होसेमी परमप्रभु यावे आ लोव़ इस्राएल ङा उत्तर रागी ङा पिप योआश आ तौ येरोबोआम आ सासन ७८२-७५३ बि. सी. रे हिज्कीयाह आ सासन ७२९/७१६-६८६ बि. सी. सम्म पशो बाक्त। मेना परमप्रभु यावे आ लोव़ पाइब आमोस, यसैया नु मीका यो बाक्मा बाक्त। गोत्ये माइश्शो ठेयब जोक्ब तुइक्ब मुर कामी “मेको किताब ८०० बि. सी.म हिब्रू लोव़ रे पा ब्रेक्शो बाक्ब” दे ब्रेक्शो बाक्ब।
मार ब्रेक्शो:
१. होसे आ ग्युंबे इस्राएली आन परमप्रभु यावे कली प्रोंइशो कोंइचा कली बाक्ब।
२. परमप्रभुमी इस्राएली आन कली दाक्शा, मप्रोंइतीके आ कोंइतीक यो बाक्ब। होसे १:-३:-
३. चढ़ेब नु पिप आन कली मरिम्शो पचा कली दोस गेतीके यो बाक्ब। होसे ४:-१०:-
४. नोले परमप्रभु आ शिशी कोंइतीके बाक्ब। होसे ११:-१४:-
1
ङोंइती ङा लोव़
1 परमप्रभु यावेमी बेयरी आ तौ होसे नु लोव़ पाप्तु। मेना यहूदा ङा पिप उज्जीयाह, योथाम, आहाज नु हिज्कीयाह बाक्तेक्म। मिनु इस्राएल ङा पिप योआश आ तौ येरोबाम बाक्त। यसैया १:१; २राजा १४:२३; आमोस १:१
नोले शोंइसीतीके आ चिन्ड
2 मिनु परमप्रभु यावेमी होसे नु लोव़ पचा गोप्तु। मेकोमी होसे कली “लावो, मिनु तेल्लेम मीश मुर कली ग्युंबे पावो। मिनु मेको नु आल थिवो। मारदे हना एको रागी परमप्रभु यावे कली प्रोंइशा, तेल्लेम खोदेंशो दुम्शो बाक्ब” देंत। होसे ३:१; ब्यवस्था २३:१८
3 मिनु होसे लशा दिब्लैम आ तमी गोमेर कली ग्युंबे पाप्तु। मिनु मेको मीशेमी आल कुरशा, तौ का थिप्तु।
4 मिनु परमप्रभु यावेमी होसे कली “मेको तौ आ नें येज्रेल वोतो। मारदे हना गो रीब पा येहू आ खिं कली येज्रेलमी पशो हुश ख्राक्श आ पर्बम क्येक्क लेत्नुङ। मिनु इस्राएल राज्य खतम पोक्नुङ। २राजा १०:१-१४
5 गो मेको नाक्ती इस्राएल कली येज्रेल ङा दिंममी खतम सेल्नुङ” देंत।
6 मिनु गोमेरमी लेंशा आल कुरशा, तमी का थिप्तु। मिनु परमप्रभुमी होसे कली “मेको आ नें लो-रूहामा वोतो। मारदे हना गो इस्राएल कली लेंशा शिशी मपाइनुङ। मिनु मेको आन पाप मक्याम्नुङ। होसे २:३,२५
7 मिनु गो यहूदा आ खिं कली शिशी कोंइनुङ। मिनु मेको आन कली जोरी सत्रु आन गुइ रे पा प्रोंइनुङ। लिब्रा, तरवार नु लडाइ पाइब शारा नु शारा ङोइक्बपुकी रे ममाइ, तन्न गो मेको आन कली आंमान प्रोंइनुङमी” दे परमप्रभु यावे, आन परमप्रभुमी देंत। लो-रूहामा आ अर्थ “मदाक्नुङ” देंशो बाक्ब।
8 मिनु गोमेरमी लो-रूहामा कली दूध तुंइचा प्रोना नोले, आल कुरशा, अर्को तौ का थिप्तु।
9 मिनु परमप्रभुमी होसे कली “मेको आ नें लो-अम्मी वोतो। मारदे हना गेपुकी आं मुर मननी। गो इन परमप्रभु मनङ। लो-अम्मी आ अर्थ ‘गे आं मुर मनवे नु गो इ परमप्रभु मनङ’ देंशो बाक्ब।
10 इस्राएलीपुकी समुन्द्र ङा बाल्वा खोदेंशो पा शुश दुम्नीम। मिनु सुइमी मेको आन कली पुक्ने नु हिक्ने मचाप्नीम। ते मेको आन कली ‘गेपुकी आं मुर मननी’ देंशो बाक्मे मेकेर मेको आन कली ‘गेना हना यो ब्रोंइशा बाक्ब परमप्रभु आ मुर’ देंनीम। उत्पत्ती २२:१७; रोमी ९:२६
11 मिनु यहूदा आ मुर नु इस्राएल आ मुर लेंशा गारशा का दुम्नीम। मिनु मेकोपुकीमी मुर का कली सासन पाइब सेल्नीम। मिनु मेको रागी रे ग्रूनीम। मारदे हना येज्रेल आ नाक्त ठेयब दुम्ब” देंत। यसैया ११:११-१३; येरमीया ३:१८; इजीकीएल ३७:२२