13
बेबीलोन सहर कली निसाफ पशो
यसैया २१:१-१०; यसैया ४७:-; येरमीया ५०:५
1 आमोज आ तौ यसैयामी बेबीलोन आ पर्बम तशो नु तुइश्शो लोव़ एको बाक्ब। येरमीया २३:३३
2 रवा मबाक्शो डांडामी छेदर का ख्रुक्कीन। मिनु ठेयब सेंदा पा गुइ हिक्शा, मेको आन कली ठेयब मुर आन लाप्चो रे ओव़पतीन।
3 परमप्रभुमी “गो आं मुर आन कली पोक्शा, आं ग्येरसीशो, बोल्यो लडाइ पाइब मुर आन कली आं गाइश्शो कोंइचा कली ब्रेत्ताक्ङमी” देंत।
4 नेनीन, शुश रागी ङा मुरपुकी डांडामी रेयके पाइनीम। मेको रेयके शुश राज्य ङा खुम्सीशो मुर आन रेयके बाक्ब। मुर नेल्ल आन परमप्रभु यावेमी ठेयब हुल लडाइ पाइब पोक्ब।
5 मेकोपुकी ङोन रागी रे जाक्नीम। रागी ङा सुर रे पा जाक्नीम। मिनु परमप्रभु यावेमी गाइश्शा, या शेशा रागी नेल्ल खतम सेल्पाइक्ब। योएल १:१५
6 ठेयब सेंदा पा ङाक्कीन। मारदे हना परमप्रभु यावे आ नाक्त जाक्चशो बाक्ब। नेल्ल क्येङा ठेयब सक्ति पाइश्शो परमप्रभु मेको नाक्ती खतम पोक्थ जाक्ब।
7 मोपतीके मुर नेल्ल आन थुं लुक्च लशा, मारेइ पने मचाप्नीम।
8 मिनु मुरपुकी शुश हिंशा, आन थुं लुक्च लशा, शुश सुर्ता पाइनीम। फाल्ने मचाप्चा ङा पा खाइश्शा, आल थिचशो मीश मुर खोदेंशो पा नकचुर पाइनीम। हिंशा आन कुल कोव़मुमानु, ब्रशो मी खोदेंशो तमुइनीम।
9 नेनीन, परमप्रभु यावे आ नाक्ती हिंचा ङा श्येतम जाक्ब। आ गाइश्शो चुरशोमी रागी नेल्ल मुर मबाक्तीके सेल्ब। मिनु पाप पाइब आन कली क्याम्ब।
10 सरीङ ङा सोरुलपुकीम आन छेङछेङ साम्नीम। नां दाप्ना दाप्न छिङछिङ दुम्ब। तास्लाम छेङछेङ मगेब।
11 परमप्रभुमी “गो रागी कली आ मरिम्शो पशो आ पर्बम सजाइ गेनुङ। आं अरेशो लोव़ मटिथु, मरिम्शो पाइब आन कली सजाइ गेनुङमी। मिनु ठेयब लेश्शो आन ठेयब लेत्तीके साम्पाइक्नुङमी। ठेयब श्येत गेशा हुकुम पाइब आन कली ब्रेम्पाइक्नुङमी।
12 गो मुर आन कली क्येख सुन क्येङा यो रिम्शो सेल्नुङमी। मेको आन कली ओफीर ङा सुन क्येङा रिम्शो सेल्नुङमी।
13 मिनु आं गाइक्तीक नाक्ती गो सरीङ कली हिम्पाइक्नुङ। रागी यो आं गाइश्शोमी आ बाक्तीक रे प्रेक्शा ग्रूब” दे मुर नेल्ल आन परमप्रभु यावेमी देंत।
14 मुरपुकी खेदा पचा पुंइसीशो किश्श नु गोठला मबाक्शो भेडा खोदेंशो दुम्नीम। मेकोपुकी आंम आंम मुर बाक्तीके लाइनीम। आंम आंम रागी मेर प्रोक्नीम।
15 खेदा पा थित्चा पुंइसीशोपुकी तूशा साइक्चा पुंइसीनीम। मिनु ग्याइक्चा पुंइसीशोपुकी तरवारम क्योरचा पुंइसीनीम।
16 आन आल आन कली आन ङोंइती खपीम राप्शा साइश्शो ताइनीम। मेको आन खिं ङा मारेइ मारेइ योल्नीम। मेको आन मीश बिथोलो पाइनीम। भजन संग्रह १३७:८-९
17 मिनु परमप्रभुमी “नेनीन, गो मादी आन कली गेपुकी नु लडाइ पपाइक्चा कली पोक्नुङमी। मेकोपुकीमी सुन चांदी ठेयब ममिम्नीम।
18 वोंइश आल आन कली लिब्राम साइक्नीम। आइक्च आल नु ठेयब आल नेल्ल आन कली शिशी मपथु साइक्नीम।
19 ठेयब लेश्शो कल्दी आन दाक्शो नु राज्य राज्य ङा नेल्ल क्येङा दारशो बेबीलोन कली सोदोम नु गोमोररा खोदेंशो सेल्नुङ। उत्पत्ती १९:२४-२५
20 मिनु मेको सहरम गेनायो लेंशा मुर मबाक्नीम। पाला पाला सम्म मुर मबाक्नीम। मेकेर अराबीपुकीम आन ताम्बु मकीनीम। गोठलापुकीमी आन बस्तु भाव मनाइक्पाइक्नीम।
21 तन्न मेको ब्वाकी ङा जन्तु आन बाक्तीक दुम्ब। मेको आन खिंम बुक्स ब्रीशो बाक्नीम। मेकेर ब्वाकी ङा ग्रीब जन्तु, ठेयब चिक्ब बाक्नीम। मिनु ब्वाकी ङा क्यारश सिल पाइनीम। यसैया २३:१३
22 मेको आन श्येत्थ खिंम फर ग्रीनीम। आन दारशो दरवारमी सिवार ग्रीनीम। मोदेंशो दुम्तीक नाक्ती जाक्चशो बाक्ब। मुल रीब पा जाक्ब” देंत।