37
यरूसलेम कली प्रोंइशो
1 मिनु पिप हिज्कीयाहमी मेको लोव़ नेंशा, आ वा खाक्शा, अरन्डी फेक्शा परमप्रभु यावे आ खिं लत।
2 मिनु मेकोमी आ दरवार कोव़ब एल्याकीम, ब्रेक्ब शेब्ना नु चढ़ेब आन दाते ङा खूशो आन कली अरन्डी फेक्पाइश्शा, आमोज आ तौ यसैया आ बाक्तीक सोइक्ताक्व।
3 मिनु मेकोपुकीमी यसैया कली “हिज्कीयाहमी ‘मुलाक्ती श्येत जतीके, तुप्पांइसीतीके नु शुक्शी पाइक्चा पुंइसीतीके नाक्त बाक्ब। आल थिचशो मीश मुरुमी आल थिचावानु, थिचा कली बोल मबाक्शो खोदेंशो दुम्त।
4 इन परमप्रभु यावे, इन परमप्रभुमी राब्शाके आ लोव़ नेंना माइ। अस्सुर ङा पिपमी मेको कली गेना हना यो ब्रोंइशा बाक्ब परमप्रभु कली शुक्शी पथ सोइक्ताक्व। मेको आ लोव़ नेंशा, परमप्रभु यावे, इन परमप्रभुमी मेको कली सजाइ गेबा कों? मोपतीके लीशो मुर आन पर्बम पुनीन’ देंत” दे मेकोपुकीमी देंतेक्म।
5 मोपा हिज्कीयाह आ मुरपुकी यसैया आ बाक्तीक जाक्मानु,
6 यसैयामी मेको आन कली “गेपुकीमी पिप कली ‘परमप्रभु यावेम इन कली मार देंशो बाक्ब देंशा हना, इन नेंशो अस्सुर ङा पिप आ मुरुमी आं कली शुक्शी पशो लोव़ आ पर्बम महिनीन।
7 गो मेको कली हिंब थुं का गेनुङ। मिनु हिंचा ङा लोव़ नेंशा, मेको आ रागी लेश्शा लाइब। मिनु गो मेको कली आ रागीम क्योरशा साइक्पाइक्नुङ देंत’ दे मतीन” दे माइक्तीमी।
8 मिनु राब्शाके आ पिप बाक्तीके लेम्मेनु “पिपम लाकीश प्रोंइतु” देंशो लोव़ नेना बाक्त। मिनु लमेनु, अस्सुर ङा पिप लिब्ना ङा मुर नु लडाइ पना पन बाक्शो थिदा बाक्त।
9 अस्सुर ङा पिपमी एथीयोपीया ङा पिप तिरहाकाह “गे नु लडाइ पथ जाक्ना जाक्न बाक्ब” देंशो लोव़ नेना बाक्त। मिनु मेको लोव़ नेंशा, हिज्कीयाह आ बाक्तीकेमी आ मुर आन कली लोव़ कुरब पा सोइक्ताक्व।
10 मार लोव़ सोइक्ताक्व देंशा हना, यहूदा ङा पिप हिज्कीयाह कली “इन थमा सुइश्शो परमप्रभुमी इन कली दूली लां मखोइक्पांइसीन। ‘यरूसलेम अस्सुर ङा पिप आ गुइमी मदुम्ब’ देंनीनी।
11 गे अस्सुर ङा पिपपुकीमी रागी नेल्ल आन कली क्याम्शो, लोव़ नेंशो बाक्नीनी। मार गे चहिं ब्रोंइनीनी ङा?
12 आं किकी पिपीम क्याम्शो रागी रागी गोजान, हारान, रेचेफ नु तेलास्सारम बाक्शो एदेन ङा मुर आन देवी देवतामी मेको रागी प्रोंइने चाप्मे ङा? यसैया ३६:१८
13 हमाथ, अरपाद, सेफारवाइम, हेना नु इव्वाह ङा पिपपुकी ते लाक्गमे? दे मतीन” देंत।
हिज्कीयाह आ पुंइशो
14 मिनु हिज्कीयाहमी मेको लोव़ कुरब मुर आन गुइ रे मेको चिठी ताक्शा, पढेप्तु। मिनु मेको चिठी परमप्रभु यावे आ खिं लाइश्शा, परमप्रभु यावे आ ङोंइती प्राक्शा वोइक्तु।
15 मिनु हिज्कीयाहमी परमप्रभु यावे कली
16 “मुर नेल्ल आन परमप्रभु यावे, इस्राएली आन परमप्रभु, गे करूब आस तार बाक्ब बाक्नीनी। गे ला रागी नेल्ल ङा राज्य ङा परमप्रभु बाक्नीनी। सरीङ नु रागी इन सेल्शो बाक्नीस।
17 परमप्रभु यावे, आं लोव़ नेनीन। परमप्रभु यावे, कोव़ङीन। सन्हेरीबमी गेना हना यो ब्रोंइशा बाक्ब परमप्रभु, इन कली शुक्शी पथ सोइश्शो लोव़ नेनीन।
18 परमप्रभु यावे, थमा पा अस्सुर ङा पिपपुकीमी रागी रागी नेल्ल क्याम्ताक्म।
19 मेको आन देवी देवता मीम हुम्ताक्म। मारदे हना मेकोपुकी मुर आन गुइमी सेल्शो, शी नु फुल्लु के बाक्नीम। मेकोपुकी इन खोदेंशो मनम। मोपतीके खतम सेल्चा पुंइसाक्म।
20 परमप्रभु यावे, आंइ परमप्रभु, मुल आंइ कली सन्हेरीब आ गुइ रे प्रोनीन। रागी नेल्ल ङा मुरपुकीम गे ला परमप्रभु यावे बाक्नीनी, दे तुइक्तमेक्ल” दे पुंइशा, लोव़ पाप्तु। यसैया ४०:५; दानीएल ६:२७
यसैयामी पिप कली लोव़ पशो
21 नोले आमोज आ तौ यसैयामी हिज्कीयाह कली “परमप्रभु यावे, इस्राएली आन परमप्रभुमी ‘अस्सुर ङा पिप सन्हेरीब आ पर्बम इ पशो लोव़ गो नेंता’ देंत।
22 परमप्रभु यावेमी सन्हेरीब आ पर्बम मार देंत देंशा हना ‘सियोन ङा कन्ने तमी इ पर्बम शुक्शी पा रिश्शो बाक्ब। यरूसलेम ङा तमीमी इ नोले कोव़शा, आ पिया हिक्शो बाक्ब।
23 गे सु कली शुक्शी पवी? सु आ पर्बम गे ठेयब लेश्शो लोव़ पवी? गे इस्राएली आन का ला बाक्शो परमप्रभु आ ङोंइती ठेयब लेश्शो दुमे?
24 मिनु इ सोइश्शो गेय पाइब मुर रे पा परमप्रभु कली शुक्शी लोव़ पपाइक्तीवी’ देंत। मिनु गे ‘आं शुश बग्गीमी डांडा ङोंइसाक्यी। लेबानोन नेल्ल ङोंइसाक्यी। गो मेकेर ङा लाइश्शो रवा नु रिम्शो रवा नेल्ले आन कली तिम्तामी। गो नेल्ल क्येङा इर नु ङोन नु ठेयब ब्वाकी सम्म जाक्दीत्ती। यसैया १४:८
25 गो इनार दोशा ब्वाक्कु तूता। आ खोइलीमी इजीप्त ङा ठेयब खोला नेल्ल सोव़पाइक्ता, दे शुक्शी पपाइक्तीवी।
26 गो आं ङोंइती मिम्शो, गे मतुइक्ती? आं ङोंइती मिम्शो गो मुल पाइनुङ। गे गारो हिरशो सहर आन कली फुल्लु तेल्तीक सेल्चा माल्नेवे।
27 मेकेर ङा मुर आन सक्ति जाम्शा, हिंब दुम्शा, मुने पा, मारेइ पने मचबेम। मेकोपुकी रू ङा घांस नु खिं तार वाशो घांस खोदेंशो दुम्तेक्म। मेको वाचा क्येङा ङोंइती सोव़ब।
28 गो इ बोक्शो, इ निश्शो नेल्ल तुइक्नुङ। इ लशो, पिशो तुइक्नुङ। मिनु गे आं पर्बम गाइक्ताक्वी।
29 मारदे हना गे आं पर्बम गाइक्तीनु, इ ठेयब लेश्शो नेंता। मोपतीके गो इ नेंम बोल्सी का ब्वेक्नुङ। मिनु इ शोव़मी लगम पाइश्शा इ जाक्शो लां लेप्पाइश्शा सोइक्नन’ देंत, दे मतीन” दे मुर सोइताक्मी।
30 मिनु परमप्रभु यावेमी हिज्कीयाह कली “इ कली एको चिन्ड दुम्ब। मुलाक्त थोचे आंमा वाशो बाली नाली जाइनीनी। माइक्थी आंमा दोक्शा वाशो बाली नाली जाइनीनी। तन्न न्युं चहिं आंमा शोक्शा खुप्तीन। अङगुर ख्रुम्शा जने।
31 यहूदा आ खिं ङा लीशोपुकी लेंशा, सोशा बोशा, शाक्श थोक्शा, फल सित्नीम। शुश दुम्नीम।
32 मारदे हना यरूसलेम रे लीशोपुकी लाइनीमी। सियोन डांडा रे हुल का ब्रोंइशोपुकी ग्रूनीम। मुर नेल्ल आन परमप्रभु यावेमी, गो मेको पाइनुङ” देंत। यसैया ९:६
33 मोपतीके परमप्रभु यावेमी अस्सुर ङा पिप आ पर्बम “मेको सहरम मजाक्ब। ब्रा का यो मआप्ब। सहर आ ङोंइती ब्रा तेक्तीके मकुरनीम। सहर ओव़चा कली गारो ङोइक्तीक मसेल्नीम।
34 मेको तेको लां जाक्मे, मेको लां लेप्ब। सहर मओव़ब।
35 गो मेको सहर कली आं पर्बम नु आं गेय पाइब दाऊद आ पर्बम आन गुइ रे प्रोंइशा, वोइक्नुङ” देंत।
36 मिनु परमप्रभु यावे आ स्वर्ग ङा गेय पाइब का अस्सुर ङा मुर आन बाक्तीकेम लशा, लाख का ८५ हजार जना मुर सदा बाक्त। मिनु मुरपुकी सुनी बोक्शा कोव़ङमेनु, बेक्शो मुर ला ताम्तेक्म। यसैया १७:१४; यसैया ३१:८
37 मो दुम्मेनु अस्सुर ङा पिप सन्हेरीब लेश्शा लशा निनवे सहरम बाक्त।
38 मिनु आ देवता निस्रोक आ खिंमी बाप्शा पूजा पना पन बाक्मेनु, आ तौ अद्राम्मेलेक नु शरेसेरमी मेको कली तरवारमी क्योरशा साइक्ताक्स। मिनु मेको निक्शी प्रोक्शा, आरारात रागी लाम्ताक्स। मिनु मेको आ पा ङा आ तौ एसर-हददोन पिप दुम्त।