47
बेबीलोन सहर खतम दुम्शो
1 मिनु “गे कन्ने तमी बेबीलोन तोइश्शा फुरकुम निस्सो। बेबीलोन ङा कल्दी आ तमी, ठेयब नित्तीक मबाक्थु, खपीम निस्सो। मारदे हना मुल रे इन कली ‘दारशो नु अरु आन क्येङा शुश दाक्शो तमी’ मदेंनीम।
2 फस हिल्दो। इ कुल सुम्सीशो वा हाक्सो। इ गुने ग्येत्थ क्युक्सो फिला कोंइशा खोला शोक्सो।
3 इ वा हुक्शा, इ शिश्रा रां कोंइचा माल्नेवे। इ मुने दोक्तीके तांइसीब। गो इ कली क्येक्क लेत्नुङ। गो सुइ कली मप्रोंइनुङमी। नहुम ३:५
4 आंइ कली श्येत रे प्रोंइब, मुर नेल्ल आन परमप्रभु यावे, इस्राएली आन का ला बाक्शो परमप्रभु बाक्ब।
5 कल्दी आ तमी ब्वालेइ पा छिङछिङम लशा निस्सो। मारदे हना गे मुल रे राज्यपुकी ङा पिपीम माइक्चा मपुंइसीनेवे।
6 गो आं मुर आन कली तशा गाइश्शा, मेको आन कली ‘आं मुर मनम’ खोदेंशो सेल्तामी। मेना इ गुइमी गेतामी। मिनु गे मेको आन कली काइ शिशी मपदी। खूशो आन कली यो श्येत गेशा, हेल्शो जवा लाप्ताक्वी। जकरिया १:१५
7 मिनु गे ‘गो गेना हना यो पिपीम बाक्नुङ’ देंते। गे आं मुर आन कली मरिम्शो पाप्तीवी। नोले मार दुम्बा, मेको ममिम्ती।
8 मोपतीके गे दला दाक्स पाइब, नेनो। गे रिम्शो पा महिंथु बाक्ते। इ थुंमी ‘गो ठेयब नङ, आं क्येङा लाक्शो अरु सुइ मबाक्ब। गो वोंइश बेक्शो मीश मुर मदुम्नुङ। आं आल बेक्शो मताइनुङ’ देंते। सेफन्याह २:१५; प्रकाश १८:७
9 वोंइश बेक्शो मीश मुर दुम्तीके श्येत नेल्ल ताइनेवे। इ आल बेक्शो ताइनेवे। नाक्ती का, याम कामीन एको श्येत निक्शी इ कली दुम्नीस। शुश मन्तर तन्तर, ठेयब सक्ति पाइश्शो टुना मुना पाप्तीवी हना यो, मो दुम्शो ताइनेवे।
10 गे, परमप्रभु यावे आ अरेशो मटिथु ‘आं कली सुइम मताइब’ दे हेम्मा पा बाक्शा, मिम्ताक्वी। मिनु इ शुश तुइक्तीके नु जोक्तीकेम इ कली दूली लां खोइक्पाइक्तु। इ थुंमी ‘गो नङ। आं क्येङा लाक्शो अरु सुइ मबाक्नीम’ देंते। भजन संग्रह १०:११
11 तन्न मुल गे शुश श्येत जाइनेवे। इ मन्तर तन्तरमी तिक्ने मचाप्नेवे। गे शुश हिंचा ङा श्येत जाइनेवे। गे मेको तेक्ने मचाप्नेवे। मुल सम्म मतुइश्शो जाम्तीक नु नुप्तीक इ तारी जाक्ब।
12 गे इ टुना मुना नु मन्तर तन्तर शुश पावो। गे आल रेन मोदेंशो पाप्तीवी। मेको पवीनु, ठीक दुम्बा कों? मेको श्येत मजाक्बा कों? दानीएल २:२
13 गे शुश अर्ती नेंशा दशो बाक्नेवे। मिनु कल्दीपुकीमी सरीङ कोव़शा, इ कली पाप रे प्रोन्मेक्ल। मिनु सोरुल कोव़बमी औंसीमी इ कली मार दुम्बा, मेको देंमल।
14 मेकोपुकी ठुटा दुम्नीम। मिनु मीम मेको आन कली नेक्ब। आंमा मेको मी रे प्रोंइसीने मचाप्नीम। मेको मी थेरचा ङा मदुम्थु, आ ङोंइती बाक्ने मचाप्नीम।
15 गे नु गेय पाइब मुरपुकी मोदेंशो मुर बाक्नीमी। गे आल रेन मेकोपुकी नु ग्याप्तीक लेयती गेय पाप्तीवी। मेको का का पा आन आंम लां खोइक्नीम। मिनु इ कली प्रोंइब सुइ मबाक्नीम” देंत।