55
रागी नेल्ल ङा मुर आन कली ब्रेश्शो
1 मिनु परमप्रभु यावेमी “तूतू दाक्बपुकी ब्वाक्कु बाक्तीकेम जाक्कीन। क्येट मथीबपुकी यो जाक्कीन। मिनु ग्याप्शा जने। क्येट मथाप्थु, मोशा अङगुर शांबु नु दूध ग्यापीन। यूहन्ना ७:३७; प्रकाश २२:१७
2 मारदे जचा मदुम्शो थोव़क कली क्येट थाप्नीनी? मारदे मरूपाइक्ब थोव़क कली इन चेम्शो क्येट थाप्नीनी? आं लोव़ नोफा दाइश्शा नेनीन। रिम्शो थोव़क जने। मिनु ब्रोव़शो जशा, ग्येरसीने।
3 इन नोफा दाइश्शा, आं गे जाक्कीन। नेंशा, ब्रोंइनीनी। गे ब्रोंइशा बाक्चा कली आं लोव़ नेनीन। मिनु गो गेपुकी नु गेना हना यो लीब कबल का पाइनुङ। दाऊद कली खोदेंशो पा इन कली यो गेना हना यो दाक्नुङ। २सामुएल ७:८-१६; येरमीया ३१:३१-३४; प्रेरित १३:३४
4 नेनीन, गो मेको कली जात जात ङा मुर आन कली सांकछी सेल्ता। जात जात ङा मुर आन कली ठेयब मुर नु हुकुम पाइब सेल्ता।
5 नेनीन, गे इन मतुइश्शो रागी रागी ङा मुर आन कली ब्रेत्नीनी। मिनु इन कली मतुइश्शो रागी रागी ङा मुरपुकी इन गे जाक्नीम। परमप्रभु यावे, इन परमप्रभु, इस्राएली आन का ला बाक्शो परमप्रभु आ पर्बम मेकोपुकी जाक्नीम। मारदे हना मेकोमी इन कली आ खोदेंशो रिम्शो पा सेल्शो बाक्त” देंत।
6 परमप्रभु यावे कली मथिन्नी सम्म मालीने। मेको आ नेक्था बाक्मेनु, मेको कली पुनीन। येरमीया २९:१३-१४; आमोस ५:४
7 परमप्रभु यावे आ अरेशो मटीबमी आन लां प्रोन्मेक्ल। मिनु ठीक मपाइबमी आन मरिम्शो मिम्शो प्रोन्मेक्ल। परमप्रभु यावे गे लेम्मल। मिनु मेकोमी मेको आन कली शिशी पाइब। मेकोपुकी आंइ परमप्रभु गे लेम्मल। मारदे हना मेकोमी शुश माफ गेब। इजीकीएल १८:२७; इजीकीएल ३३:१; भजन संग्रह १३०:४
8 परमप्रभु यावेमी “आं मिम्शो इन मिम्शो खोदेंशो ममाइ, इन लां आं लां खोदेंशो ममाइ। रोमी ११:३३
9 सरीङ, रागी क्येङा इर बाक्शो खोदेंशो पा आं लां, इन लां क्येङा इर बाक्ब। मिनु आं मिम्शो इन मिम्शो, क्येङा इर बाक्ब।
10 सरीङ रे रेउ नु फुं यिशा, मोशीन मलेप्ब। मेकोमी खप जिप्पाइश्शा बाली नाली ग्रेल्पाइक्ब। शोक्ब कली वांचेर गेशा, मुर आन कली जचा गेब।
11 आ लोव़ यो मोदेंशो बाक्ब। मेको श्येत्थ मलेप्ब। गो मेको कली मार पथ सोइक्तु, मेको पाइब। आं दाक्शो थमा पा पाइब। आं मिम्शो पाइब। मत्ती १३:८
12 मिनु गेपुकी ग्येरसीशा लाइनीनी। रिम्शो पा लेत्नीनी। इन ङोंइती डांडा नु पहाड कुम्सो पाइनीम। मिनु ब्वाकी ङा रवा नेल्लेमी गुइ फ्रोक्नीम। यसैया ४४:२३
13 मिनु चू आन पा ङा सला रवा नु चूले आन पा ङा दारशो आइक्च फू रवा वानीम” देंत। मेको परमप्रभु यावे कली मिम्तीके नु गेना हना यो मजाम्थु, चिन्ड का दुम्शा बाक्ब। यसैया ४१:१९-२०