64
1 परमप्रभु यावे, गे सरीङ रोक्शा, यिनी हना, रिम्शो दुम वा। इन ङोंइती डांडा हिम्सीम वा।
2 मिनु दोपा मीम सोव़शो राशी जेप्बा, मिनु ब्वाक्कु ब्रुइक्पाइक्बा, मोपा इन जोरी सत्रु आन कली इन नें तुइक्पतीन। मिनु रागी रागी ङा मुर इन ङोंइती हिंशा ख्रिंख्रि पाइनीम।
3 मिनु गे आंइ ममिम्शो हिंचा ङा ठेयब गेय पाइनीनी। गे यिनीनु, इन ङोंइती डांडा ख्रिंख्रि पाइनीम। १कोरिन्थी २:९
4 सु सुमी मेको कली रिम्नीमी, मेकोमी, मेको आन पर्बम गेय पाइब। मारदे हना साइ ङोंइती रे गे ङा लाक्शा अरु परमप्रभु बाक्ब, दे सुइम मनेंशो नु मतशो बाक्तेक्म। प्रस्थान ३२:५-१०
5 गे ग्येरशा ठीक पतीके मिम्शा पाइब आन कली वारच पाइब बाक्नीनी। मेको मुरपुकी इन लांम गाक्शा, इन कली मिम्ब बाक्नीम। गे आंइ पाप पशो आ पर्बम गाइक्ताक्नी। मारदे हना गे ख्रुंइसाक्नी। मिनु गो हेंथे गाक्तक।
6 गो नेल्ल ग्रांग्रा दिशो मुर खोदेंशो दुम्तक। आंइ ठीक पतीके नेल्ल ग्रांग्रा दिशो लुम्सीशो वा खोदेंशो दुम्त। गो सफा खोदेंशो पा सोल सुल बेक्नीकी। आंइ मरिम्शो पशो फश खोदेंशो दुम्शा, आंइ कली बेरपाइक्ब।
7 मिनु इन नें थीब सुइ मबाक्नीमी। इन कली थिचा माल्ब सुइ मबाक्नीम। मारदे हना गे आंइ ङोंइती रे इन कुल ख्रुइक्ताक्नी। आंइ मरिम्शो पतीके मतेक्नी। यसैया ६३:१६; यसैया ४५:९; बिलाप ४:२; रोमी ९:२१
8 मो हना यो परमप्रभु यावे, गे आंइ आफ बाक्नीनी। गो खप नकी, गे खप के ग्योंब सेल्ब बाक्नीनी। गो नेल्ले इन सेल्शो नकी।
9 परमप्रभु यावे, शुश मगाइक्तीने। आंइ मरिम्शो पशो गेना हना यो ममिम्तीन। आंइ कली कोव़ङीन, गो नेल्ल इन मुर बाक्नीकी।
10 इन योव़शो सहरपुकी गोरशो रागी दुम्शो बाक्ब। सियोन यो गोरशो रागी दुम्शो बाक्ब। यरूसलेम मुर मबाक्तीके दुम्शो बाक्ब। भजन संग्रह २४:७
11 आंइ योव़शो नु दारशो, आंइ किकी पिपपुकीमी इन कली ठेयब सेल्शो खिं मीम ग्रोइक्त। आंइ दाक्शो खिं नेल्ले ब्रेन्ने थुम्तेक्म।
12 परमप्रभु यावे, गे मेको तशा यो, सिक्सी पा बाक्नीनी? ब्वालेइ पा बाक्शा, आंइ कली सजाइ जपाइक्नीनी?