66
निसाफ पशो
1 मिनु परमप्रभु यावेमी “स्वर्ग आं नित्तीके नु रागी आं खोइल वोइक्तीक बाक्ब। गे आं कली दोदेंशो खिं सेल्ने चाप्नीनी? तेकेर नाइक्नुङा? १राजा ८:२७; बिलाप २:१; प्रेरित ४:४९; प्रेरित १७:२४
2 मारेइ मारेइ आं सेल्शो मनमी ङा? मोपतीके मेको नेल्ल आं के नम” दे परमप्रभु यावेम देंत। मिनु लेंशा “मो हना यो गो आं लोव़ नेंशा, हिंशा, ख्रिंख्रि पा श्येत जाइब नु आ थुं जिक्शो मुर आन कली कोव़नुङ।
3 मिनु सुमी ब्यफ साइक्बा, मेको मुर साइक्ब खोदेंशो बाक्ब। सुमी पाठा का चढ़ेबा, मेको कुचुम आ शुर जिक्ब खोदेंशो बाक्ब। सुमी अन्न चढ़ेबा, मेको पोव़ आ हुश चढ़ेब खोदेंशो बाक्ब। सुमी मिम्शा चढ़ेतीके धूप चोइबा, मेको मूर्ति पूजा पाइब खोदेंशो बाक्ब। मेको आन दला दाक्स पाइनीमी। आन ग्रांग्रा दिशो गेयमी ग्येरसीनीमी। १सामुएल १५:२२-२३
4 गो मेको आन कली शुक्शी पाइनुङ। मिनु आन हिंशो श्येत आन तार मोइक्नुङ। मारदे हना गो मेको आन कली ब्रेङङानु, लोव़ मलेत्तेम। गो लोव़ पाता। तन्न मेकोपुकीम आं लोव़ मनेनेम। आं ङोंइती मरिम्शो पाम्तेक्म। आं मदाक्शो ला पाम्तेक्म” देंत। यसैया ६५:१२
परमप्रभुम सियोन कली ठीक सेल्शो
5 परमप्रभु यावे आ लोव़ क्येङा हिंशा, ख्रिंख्रि पाइबपुकीम “आं लोव़ नेनीन। इन लोक्बपुकीमी गेपुकी आं मुर दुम्तीके इन कली काइ मदाक्थु, तिल्नीम। मेकोपुकीमी ‘परमप्रभु यावे कली ठेयब सेलल। मिनु गो इन ग्येरशा बाक्शो तकल’ देंनीम। तन्न मेकोपुकी मुने दोक्नीम। लूका ६:२२
6 नेनीने, सहर रे ठेयब रेयके नेंसीब। परमप्रभु यावे आ खिं रे सेंदा का नेंसीब। मेको परमप्रभु यावे आ सेंदा बाक्ब। आ जोरी सत्रु आन कली क्येक्क लेत्चा कली ठेयब सेंदा पा लोव़ पाइब” देंतेक्म।
7 मिनु परमप्रभु यावेमी “सियोनमी सुत्केरी रोइ पचा क्येङा ङोंइती आल थिप्तु। सुत्केरी रोइ पचा क्येङा ङोंइती तौ का थिप्तु।
8 मोदेंशो लोव़ सुम नेन्मे, सुम तामे? मार, नाक्त कामी रागी का दुम्बा ङा? याम कामी रागी का जरमेसीबा ङा? सियोनमी सुत्केरी रोइ पचा चिक्तानु, आलपुकी थिप्तु।
9 गो आल थिचा चिक्पाइश्शा ङा मीन, थिचा मगेनुङा ङा? गो आल थिचा गेबमी, तेक्नुङा ङा?” दे इन परमप्रभुमी देंत। यसैया ३७:३
10 मिनु गे यरूसलेम कली दाक्ब नेल्लेमी मेको नु ग्येरसीन। गे मेको आ पर्बम रोंका पाइब नेल्ल ग्येरसीन।
11 गेपुकी मेको आ दूध युप्शा, रूशा, इन थुं बारपतीन। मेको आ रिम्स तशा ग्येरसीने। यसैया ६०:१६
12 मारदे हना परमप्रभु यावेमी “गो ठेयब खोला खोदेंशो पा मार मार गेनुङ। मिनु बारशो खोला खोदेंशो पा रागी रागी ङा मुर आन शोंप गेनुङ। मिनु गे जाइनीनी। गेपुकी मुप्शा, कुरचा पुंइसीनीनी। थुकुम ग्यारपाइक्चा पुंइसीनीनी। यसैया ६०:४
13 दोपा आल आ ममामी आल आ थुं बारपाइक्बा, मोपा गो इन कली इन थुं बारपाइक्नन्नी। गे यरूसलेम सहरमी इन थुं बारपाइक्चा पुंइसीनीनी। बजन संग्रह १३१:२
14 गेपुकी मेको कली तशा, शुश ग्येरशा, इन थुं बारपाइक्नीनी। गे घांस बारशो खोदेंशो पा बारनीनी” देंत। परमप्रभु यावेमी आ गेय पाइब आन कली वारच पाइब, दे मुर नेल्लेमी तुइक्नीम। मेको आ जोरी सत्रु आन पर्बम गाइक्ब।
15 परमप्रभु यावे मी नु जाक्ब। आ बग्गीपुकी फश गिवार खोदेंशो पा गाक्नीम। आ गाइश्शो चुरशोमी क्येक्क लेप्ब। आ हुइक्तीके हुरुर पा ब्रशो मी खोदेंशो बाक्ब। बजन संग्रह ५०:३; प्रकाश १९:११-१५
16 मारदे हना परमप्रभु यावेमी मीमी निसाफ पाइब। मुर नेल्ल आन कली आ तरवारम निसाफ पाइब। मिनु परमप्रभु यावेमी मोपा साइश्शो शुश दुम्नीम।
17 मिनु “सु सु देवी देवता आन ङोंइती जाक्चा कली चोव़खेसीशा, आंम कली ठीक सेल्नीमी, फू रू लशा, मेको रू आ दातेमी बाक्ब पोव़ श्ये ब्वाइब आ नोले खोइश्शा, मेको यो पोव़ श्ये ब्वशा, ग्रांग्रा दिचा ङा थोव़कपुकी नु यिच ब्वाइनीमी, मेकोपुकी कालेमी साइक्चा पुंइसीनीम” देंत। यसैया ६५:३-५; इजीकीएल ८:११
18 परमप्रभु यावेमी “गो मेको आन पतीके नु आन मिम्तीके तुइक्नुङ। मिनु रागी रागी ङा मुर नेल्ल नु नेल्ल खाल ङा लोव़ पाइब मुर आन कली खुप्नुङ। मिनु मेको मुर जाक्शा, आं छेङछेङ ताइनीम।
19 मिनु गो मेको आन दातेमी चिन्ड का वोइक्नुङ। मिनु मेको आन दाते ङा प्रोंइशो आन कली रागी रागीम सोइक्नुङमी। गो मेको आन कली टारशीश, पूत नु लूद सोइक्नुङमी। लूद ङा मुर चहिं लिब्रा आप्ब बाक्नीम। गो तूबल, यावान नु समुन्द्र आ नेक्था ङा रागी मेर सोइक्नुङमी। मेकोपुकीमी आं नें मतुइक्ब आं छेङछेङ मताइब रागी रागी ङा मुर आन कली आं पर्बम शेंनीम। मत्ती १८:१९तूबल नु यवान ग्रीस रागी बाक्ब।
20 मिनु इन लोक्ब नेल्ल आन कली रागी रागी रे परमप्रभु यावे आ ङोंइती चढ़ेशो खोदेंशो पा यरूसलेमम चाक्नीम। मेकोपुकी शारा, बग्गी, कुरतीके, गधा नु दलओंठम ङोइक्पाइश्शा, आं योव़शो डांडाम चाक्चा पुंइसीनीम। दोपा इस्राएलीपुकीमी आन अन्न चढ़ेतीके सफा ग्योंबुम परमप्रभु यावे आ खिं चाक्नीमी, मोपा मेकोपुकीमी पाइनीम। यसैया ६०:३-७
21 गो मेको आन दाते रे चढ़ेब नु लेवी योव़नुङमी” दे परमप्रभु यावेमी देंत।
22 मिनु “दोपा आं सेल्शो नक सरीङ नु नक रागी आं ङोंइती गेना हना यो बाक्बा, मोपा इन नें नु इन चच युइ आन नें गेना हना यो लीनीम। यसैया ६५:१७
23 मिनु नोले औंसी रे औंसी सम्म नु नाइक्तीक नाक्ती रे नाइक्तीक नाक्ती सम्म मुर नेल्ले आं कली ठेयब सेल्चा कली आं ङोंइती जाक्नीम। गन्ती १०:१०
24 मिनु मेकोपुकी ग्रूशा आं कली काइ मटीब आन बेक्शो रां कोव़थ लाइनीम। मेको आन लुस्पु मबेक्नीम, आन मी यो मकाप्ब। मेको मुर नेल्ल आन कली ग्रांग्रा दितीके दुम्नीम” दे परमप्रभु यावेमी देंत। मर्कूस ९:४८