26
अय्युबमी लोव़ लेश्शो
1 मिनु अय्युबमी
2 “गे दोपा बोल मपाइश्शो मुर कली वारच पाइक्नी? योक्शो गुइ कली गे दोपा नाइक्चा गेनी?
3 गे मतुइक्ब मुर कली, अर्ती गेतीनी। मिनु गे शुश रिम्शो लोव़ शेंताक्नी।
4 ओदेंशो लोव़ पचा कली गे ते शेंसीनी? मिनु तेको सोक्त रे पा ओदेंशो लोव़ पनी?” दे अय्युबमी देंमाक्त।
5 “उइ ङा मुर आन वांकु ख्रिंख्रि पाइनीम। ब्वाक्कु नु मेकेर बाक्बपुकी यो ख्रिंख्रि पाइनीम।
6 परमप्रभु आ ङोंइती बेक्शो मुर आन बाक्तीके मख्रुंइसीशो बाक्ब। मिनु जाम्शा लतीके मसुम्सीशो बाक्ब। भजन संग्रह १३९:८; हितोपदेस १५:११; आमोस ९:२; प्रकाश ९:१
7 मेकोम श्येत्थ बाक्तीकेमी उत्तर ङा सरीङ प्राक्ब। मिनु रागी कली मारेइ मबाक्तीकेम क्युक्ब।
8 मेकोमी ब्वाक्कु कली क्येर गोस्सुम तेक्शा वोइक्ब। मिनु मेको गोस्स मप्रोल्ब। ब्वाक्कु मग्रूब।
9 मेकोमी पूर्ने ङा तास्ला कली सुम्ब। मिनु आ गोस्सपुकी मेको आ तारी प्राक्ब।
10 मेकोमी ब्वाक्कु आ सुरम सांद वोइश्शो बाक्ब। छिङछिङ नु छेङछेङ फ्राचा कली मो पशो बाक्ब।
11 मिनु सरीङ ङा थामपुकी हिम्सीनीम। परमप्रभु आ हुइश्शोमी हिंशा सिक्सी पाइनीम।
12 मेकोम आ सक्तिम समुन्द्र कली थेल्तु। मिनु आ रुप्तीकेम राहाब माइश्शो समुन्द्र ङा ठेयब जन्तु कली खतम सेल्तु। अय्युब ९:१३; भजन संग्रह ८९:११
13 मेको आ फश पतीकेमी सरीङ हाक्साक्व। मेकोम दोरशा प्रोक्ब ठेयब जन्तु कली साइक्तु। यसैया २७:१
14 मेको आ सक्ति ङा आइक्च गेय ला बाक्नीम। मेको रे गो आइक्च सेंदा ङा लोव़ ला नेंतक। मिनु मेको आ सक्तिम पशो बुंबु, सुम रुप्ने चाप्बा ङा?” देंमाक्त।