42
अय्युब परमप्रभु कली तुइक्ब दुम्शो
1 मिनु अय्युबम परमप्रभु यावे कली
2 “गे मारेइ मारेइ पने चाप्नीनी, दे गो तुइक्नुङ। इन मिम्शो मारेइ मारेइ सुइम क्याम्ने मचाप्नीम।
3 ‘दूली लोव़ पा अर्ती गेब सु बाक्म? मारेइ मजोक्थु मार लोव़ पवा?’ देंतीनी गो थमा पा, आंमा मरुप्थु लोव़ पाता। मेको आं रुप्ने मचाप्शो थम छक लाक्चा ङा बाक्नीम। अय्युब ३८:२
4 मुल गो लोव़ पाइनुङ। नेनीन। गो इन कली लोव़ हिल्लो पाइनुङ। मिनु गे आं लोव़ लेत्तीनी। अय्युब ३८:४
5 इन पर्बम नेंशो ला बाक्ती। तन्न मुल गो इन कली ताता। अय्युब १९:२६-२७
6 मोपतीके गो आं कली आइक्च मिम्ताक्ङ। मिनु गो फुरक नु पुलुम बाक्शा, माफ पुंइनुङ” दे अय्युबमी देंमाक्त।
अय्युब आ रिम्शो नाक्ती लेश्शो
7 मिनु परमप्रभु यावेम अय्युब नु लोव़ पने थुम्शा, मेकोम तेमान ङा एलीफाज कली “गे नु इ वारच निक्शी इन कली तशा, गो गाइश्शो बाक्नुङ। मारदे हना गे आं पर्बम थमा लोव़ मपनी। तन्न आं गेय पाइब अय्युबमी आं पर्बम थमा लोव़ पाप्तु।
8 मोपतीके गे ७ ओटा ब्यफ नु ७ ओटा सांड लाइश्शा आं गेय पाइब अय्युब आ बाक्तीके लने। मिनु गेपुकीम इन पर्बम चोशा चढ़ेतीक चढ़ेने। मिनु आं गेय पाइब अय्युबमी इन पर्बम आं कली माफ पुंइचा माल्ब। मिनु गो मेको आ पुंइशो लोव़ नेंनुङ। मिनु गे इन मूर्ख लोव़ पशो ङा सजाइ मगेनन्नी। मारदे हना गे आं पर्बम थमा लोव़ मपनी। तन्न आं गेय पाइब अय्युबमी आं पर्बम थमा लोव़ पाप्तु” देंमाक्त। १इतिहास १५:२६; इजीकीएल १४:१४
9 मिनु तेमान ङा एलीफाज, शुआह ङा बिल्दाद नु नामा ङा सोफारमी परमप्रभु यावेम देंशो खोदेंशो पामे बाक्त। मिनु परमप्रभु यावेमी अय्युब आ पुंइशो लोव़ नेना बाक्त।
10 मोपा अय्युबम आ वारच आन पर्बम पुना नोले, परमप्रभु यावेम अय्युब आ शोंप नेल्ल लेश्शा गेवा बाक्त। मिनु मेको आ शोंप नेल्ल, ङोंइती ङा क्येङा निक्शी खेयप शुश गेवा बाक्त। अय्युब १:२; अय्युब ८:७
11 मेको नोले अय्युब आ लोक्ब नेल्ले, आ समी नेल्ले नु मेको आ ङोंइती ङा तुइश्शो मुर नेल्ल जाक्शा, मेको आ खिंम भोज जामे बाक्त। मिनु मेकोपुकीमी अय्युब कली “गे परमप्रभु यावे आ गुइ रे शुश श्येत नु मरिम्शो दुम्तीके ताइतीनी” दे मेको कली थम रिम्शो लोव़ पामे बाक्त। मिनु नेल्लेम मेको कली सुन के क्येट नु सुन के औंठी गेमे बाक्त। अय्युब १९:१३-१४,१९
12 मिनु परमप्रभु यावेम अय्युब कली आ नोले ङा ब्रोंइशो नाक्ती कली आ ङोंइती ङा ब्रोंइशो नाक्ती क्येङा शुश आसीक गेवा बाक्त। मिनु मेको के १४ हजार भेडा, ६ हजार दलओंठ, हजार का हाल ब्यफ नु हजार का गधा दुम्मा बाक्त।
13 मिनु मेको के ७ जना तौ नु तमी सां दुम्मा बाक्त। अय्युब १:२
14 मेकोमी आ ङोंइती जरमेशो तमी आ नें येमीमाह, माइली आ नें केसीया नु कान्छी आ नें केरेन-हाप्पुक वोइक्मी बाक्त।
15 मिनु रागी नेल्लेम अय्युब आ तमी खोदेंशो दारशो अरु सुइ मबाक्मा बाक्त। मिनु मेको आन आफोम मेको आन कली आन लोक्बपुकी नु उइक्थ उइक्थ पा शोंप योक्शो गेमी बाक्त। गन्ती २७:८-११
16 मेको नोले अय्युब सहे का ४० बर्स सम्म ब्रोंइमाक्त। मेकोम आ तौपुकी नु ४ पाला सम्म ङा चच युइ नेल्ल तवा बाक्त। भजन संग्रह ९०:१०
17 मिनु नोले अय्युब आ नाक्त नेल्ल नेक्शा, शुश ब्रोंइशा खूशो दुम्शा बेक्माक्त। उत्पत्ती २५:८; उत्पत्ती ३५:२९; १इतिहास २९:२८