12
येफ्ता नु एफ्राइम
1 एफ्राइम आ थर ङा मुरुमी आ लडाइ पाइब आन कली खुप्ता बाक्त। मिनु मेकोपुकी यर्दन आइक्ची हांबु साफोन गे शोक्शा, येफ्ता कली “अम्मोनी नु लडाइ पथ लनीनु, आंइ कली मारदे मब्रेन्नी? मुल इन कली नु इन खिं कली मी सुइक्नीकी” देंमा बाक्त। न्यायाधीस ८:१
2 मिनु येफ्तामी “गो नु आं मुर अम्मोनी नु ठेयब लडाइ दुम्मेनु, गे इन कली ‘वारच पन’ दे ब्रेश्शो नङ। तन्न गेपुकीमी आंइ कली मेको आन गुइ रे मप्रोंइनी।
3 मिनु गेपुकीमी आंइ कली वारच मपाइनीनी, दे तुइक्तु नोले, महिंथु, खोला शोक्शा, अम्मोनी नु लडाइ पथ गाक्तक। मिनु परमप्रभु यावेमी मेको आन कली आंइ गुइमी गेप्तु। मिनु मारदे मुलाक्ती गेपुकी गो नु जिथ जाक्नीनी?” देंमाक्त। न्यायाधीस ५:१८; न्यायाधीस ९:१७
4 मिनु येफ्तामी गिलाद ङा मुर नेल्ल कली खुप्शा, एफ्राइम आ थर ङा मुर नु लडाइ पवा बाक्त। मिनु गिलाद ङा मुरपुकीमी मेको आन कली ग्रामा बाक्त। मेको जिचा मारदे बोक्शो बाक्त देंशा हना, एफ्राइम आ थर ङा मुरपुकीमी “गे गिलादी एफ्राइम नु मनस्से आन दातेमी बाक्शो ला ननी” दे देंशो बाक्मा बाक्त।
5 मिनु गिलादीपुकीमी यर्दन ङा शोक्तीक लां एफ्राइम रे रोइश्शा, आंम के सेल्मे बाक्त। मिनु गिलाद ङा मुरपुकीमी खोला शोक्ब मुर आन कली “गे एफ्राइम आ थर ङा मुर बाक्नीनी?” दे हिल्लो पामे बाक्त। “गो मनङ” देंमा बाक्त हना,
6 गिलाद ङा मुरपुकीमी “मो हना, शिब्बोलेथ देनो” देंबाक्मा बाक्त। मिनु मेकोमी ठीक पा देंने मचाप्थु “सिब्बोलेथ” देंतेक्म हना, मेकेर ग्याइश्शा यर्दन आ नेक्था साइक्बाक्मा बाक्त। मेना एफ्राइम आ थर ङा मुर ४२ हजार साइक्चा पुंइसमा बाक्त।
7 येफ्ता ६ बर्स सम्म इस्राएली आन निसाफ पाइब दुम्शा बेक्माक्त। मिनु मेको कली आ सहर गिलादमी थिम्मे बाक्त।
इब्सान, एलोन नु अब्दोन
8 येफ्ता आ नोले बेथलेहेम ङा इब्सान इस्राएली आन निसाफ पाइब दुम्माक्त।
9 मेको के ३० जना तौ नु ३० जना तमी बाक्मा बाक्त। मेकोमी आ तमी आन कली अरु थर ङा मुर नु ग्युंबे पा गेवा बाक्त। मिनु आ तौ आन कली अरु थर ङा ३० जना मीश आल ग्युंबे पा चाक्गा बाक्त। मेको ७ बर्स सम्म इस्राएली आन निसाफ पाइब दुम्माक्त।
10 मिनु इब्सान बेक्माक्त। मिनु मेको कली बेथलेहेममी थिम्मे बाक्त।
11 मेको बेक्म नोले जबूलून आ थर ङा एलोन १० बर्स सम्म इस्राएली आन निसाफ पाइब दुम्माक्त। गन्ती २६:२६
12 मिनु जबूलून आ थर ङा एलोन बेक्माक्त। मिनु मेको कली जबूलून आ रागी ङा आइयालोन सहरमी थिम्मे बाक्त।
13 मेको आ नोले पिराथोन सहर ङा हिल्लेल आ तौ अब्दोन इस्राएली आन निसाफ पाइब दुम्माक्त।
14 मेको के ४० जना तौ नु ३० जना चच बाक्मा बाक्त। मेको आन के ७० ओटा गधा बाक्माक्त। मिनु मेकोपुकी आंम आंम गधामी ङोइक्बाक्मा बाक्त। मिनु अब्दोनमी ८ बर्स सम्म इस्राएली आन कली निसाफ पशो बाक्माक्त।
15 मिनु नोले पिराथोन सहर ङा हिल्लेल आ तौ अब्दोन बेक्माक्त। मिनु अमालेकी आन पहाडी रागी ङा एफ्राइम ङा पिराथोन सहरमी थिम्मे बाक्त।