14
सिम्सोनमी मीश आल दाक्शो
1 काबु सिम्सोन तिम्नाह सहर ब्रुम्माक्त। मिनु मेकेर पलिस्ती मीश आल का तवा बाक्त। यहोसु १९:४३
2 मिनु आ खिं लेश्शा, आ आम आफ आस कली “तिम्नाहमी पलिस्ती मीश आल का ताता। मेको नु ग्युंबे पा गेयीनी” दे माइक्सी बाक्त।
3 मिनु आ आम आफोमी “मार, आंइ मुर नु इं थर ङा मीश आल मबाक्बा? मिनु गे ख्रोइक्तीक चिनु मख्रोइश्शो, मेको पलिस्ती आ तमी का चाक्चा दाक्नेवे?” देंसा बाक्त। तन्न सिम्सोनमी “मेको मीश आल आं कली चाक्कीन। मारदे हना गो मेको कली दाक्नुङ” देंमाक्त। उत्पत्ती ३४:१४; प्रस्थान ३४:१६
4 परमप्रभु यावेम सिम्सोन कली मेको मीश आल कली दाक्पाइश्शो बाक्त, दे आ आम आफोमी मतुइश्शो बाक्ताक्स। परमप्रभुमी पलिस्ती आन कली खतम पचा कली मोदेंशो पशो बाक्माक्त। मेना पलिस्तीपुकीमी इस्राएली आन कली सासन पशो बाक्मा बाक्त।
5 मिनु नोले सिम्सोन आ आम आफ नु तिम्नाहमी ब्रुम्माक्त। मिनु मेकेर ङा अङगुर रूमी जाक्दीम्माक्त। मिनु मेकेर ठिटा गुप्स का ग्रूशा, मेको कली ग्राम्दा बाक्त।
6 मिनु परमप्रभु यावे आ सोक्तीम सिम्सोन कली ठेयब सक्तिम सुमा बाक्त। मिनु आ गुइमी मारेइ यो या मबाक्त हना यो, मेको गुप्स कली पाठा खोदेंशो पा सदा बाक्त। मिनु गुप्स साइश्शो लोव़ आ आम आफ कली मशोव़ङा बाक्त। न्यायाधीस १३:२५
7 मिनु सिम्सोन मेकेर जाक्दीश्शा, मेको मीश आल नु लोव़ पवा बाक्त। मिनु मेको मीश आल कली दाक्शा लेम्माक्त।
8 मिनु इच्का नोले सिम्सोन मेको मीश आल कली ग्युंबे पचा कली लेंशा तिम्ना ब्रुम्माक्त। मिनु लां प्रोंइशा, साइश्शो गुप्स कोव़थ लमाक्त। मिनु राक्शो गुप्स आ आगाम हुल का सुरब नु खुदो बाक्माक्त।
9 मिनु खुदो ग्रुंइशा, जना जन लमाक्त। मेकोमी आ आम आफ आस कली यो जचा गेम्सी बाक्त। मिनु जाम्से बाक्त। तन्न मेको खुदो राक्शो गुप्स आ आगा रे ग्रुंइशो, दे आ आम आफ कली मशोव़ङा बाक्त।
10 मिनु सिम्सोन आ आफ मेको मीश आल कोव़थ लमाक्त। मिनु सिम्सोनमी अरुम ग्युम्लेम पशो खोदेंशो पा भोज का गेवा बाक्त।
11 मिनु मेकेर ङा मुरपुकीमी सिम्सोन कली ग्रुम्शा, ३० जना वोंइश मुर मेको कली वारच पचा कली चाक्गमे बाक्त।
12 मिनु सिम्सोनमी मेको आन कली “इन कली लोव़ का हिल्लो पाइनन्नी। एको ७ नाक्त ङा भोजमी मेको लोव़ लेन्ने चाप्तीनी हना, गो इन कली ३० ओटा बुश फेक्तीक वा नु ३० ओटा शुश क्येट लाइब फेक्तीक वा गेनन्नी।
13 तन्न आं हिल्लो पशो लोव़ लेन्ने मचाप्तीनी हना, गे आं कली ३० ओटा बुश फेक्तीक वा नु शुश क्येट लाइब फेक्तीक वा गेचा माल्नीनी” देंमाक्त। मिनु मेकोपुकीमी “लो दुम्ब, हिल्लो पन” देंमा बाक्त।
14 मिनु सिम्सोनमी मेको आन कली “शुश ब्वाइब रे जचा थोव़क ग्रूत। बोल्यो रे जिज थोव़क ग्रूत। मेको मार बाक्बा?” दे हिल्लो पामी बाक्त। मिनु मेकोपुकीमी नाक्त सां सम्म मिम्ना मिम्न बाक्शा, मेको लोव़ मार बाक्बा, दे लेन्ने मचाप्बमे बाक्त।
15 मिनु ४ नाक्तीम मेकोपुकीमी सिम्सोन आ मीश कली “इ वोंइश कली लेम्शा, हिल्लो पावो। मिनु आंइ कली शोव़ङो। मोदेंशो मपाप्तीवी हना, गो इ कली नु इ आफ आ खिं कली मी सुइक्नीकी। आंइ कली प्रुङग सेल्चा कली निम्तो पवी?” देंमा बाक्त।
16 मिनु सिम्सोन आ मीश आ वोंइश आ ङोंइती ङाक्शा “गे आं कली काइ मदाक्नीनी। गे थमा पा आं कली मदाक्नीनी। गे आं मुर आन कली लोव़ का हिल्लो पाइतीनी। मिनु मेको लोव़ आ अर्थ चहिं आं कली मदेंनी” देंमाक्त। मिनु सिम्सोनमी “मेको लोव़ आ अर्थ आं आम आफ कली लाइयो मदेंङ। मिनु इ कली मारदे देंनुङा?” देंमाक्त।
17 मिनु भोज के ७ नाक्ती मनुम्म सम्म आ मीश सिम्सोन आ ङोंइती ङाक्स ङा ङाक्स बाक्माक्त। मोपतीके ७ नाक्त सम्म शुश हिल्लो पा पुंइतीके सिम्सोनमी मेको लोव़ आ मीश कली शोव़ङा बाक्त। मिनु मेकोमी लशा, आ मुर आन कली देंमाक्त। न्यायाधीस १६:१६-१७
18 मिनु मेको ७ नाक्ती नां सोव़चा क्येङा ङोंइती सहर ङा मुरपुकीमी सिम्सोन कली “खुदो क्येङा जिज, मार बाक्बा ङा? गुप्स क्येङा बोल्यो सु बाक्बा ङा?” देंमा बाक्त। मिनु सिम्सोनमी “आं मीशेमी इन कली मेको लोव़ मशोव़ङ हना, गेपुकीमी लेन्ने मचाप्नी वा” देंमाक्त।
19 मिनु परमप्रभु यावे आ सोक्तीम सिम्सोन कली ठेयब सक्तिम सुमा बाक्त। मिनु मेको अश्कलोन सहरमी लशा, मेकेर ३० जना मुर साइक्मी बाक्त। मिनु मेको आन के मार मार थोव़क नु वा पिश्शा, मेको लोव़ लेप्ब आन कली शुश क्येट लाइब फेक्तीक वा गेवा बाक्त। मिनु सिम्सोन गाइश्शा, आ आफ आ खिं लेम्माक्त।
20 मिनु सिम्सोन आ मीश चहिं सिम्सोन कली वारच पाइब का कली गेमे बाक्त। न्यायाधीस १५:२