16
सिम्सोनमी लाप्चो कुरशो
1 काबु सिम्सोन गाजा सहरमी लमाक्त। मिनु मेकेर तेल्लेम का तशा, मेको नाक्दो मेको नु इप्थ लमाक्त।
2 मिनु गाजेज सहर ङा मुरपुकीमी “सिम्सोन मेकेर जाक्शो बाक्ब” दे गाजा ङा मुर आन कली तुइक्पदमे बाक्त। मिनु मेकोपुकीमी सिम्सोन आ बाक्तीक पुम्तमे बाक्त। मिनु मुरपुकी नाक्दो सहर ङा ठेयब लाप्चोमी बाप्शा बाक्मा बाक्त। नाक्दो मेकोपुकी सिक्सी पा बाक्मा बाक्त। मेकोपुकीमी “नां सोव़चीना साइक्चा” दे सल्ला पशो बाक्मा बाक्त।
3 तन्न सिम्सोन क्येर नाक्दो सम्म ला आ ब्राख्येमी गोल्शा बाक्माक्त। मिनु बोक्शा लशा, सहर ङा ठेयब लाप्चो नु आ थाम निक्शी आ दलीन नेल्ल तुल्शा बालाम लाप्शा, हेब्रोन आ नेक्था ङा डांडाम लदा बाक्त।
सिम्सोन नु देलीलाह
4 मिनु नोले सिम्सोनम सोरेक ङा दिंममी बाक्ब देलीलाह माइश्शो मीश मुर का दाक्ता बाक्त।
5 मिनु पलिस्ती आन ठेयब मुरपुकी मेको मीश मुर कली ग्रुम्थ लमा बाक्त। मिनु मेको कली “सिम्सोन कली लेम्शा ‘इ कली सुमी बोल गेबा? दोपा इ कली फ्रेंने चाप्नीकी’ दे हिल्लो पावो। मिनु गो आंइ कली शेंदो। मारदे हना गो ग्याइक्चा दाक्नीकी। मिनु ग्याइश्शा गो का का पा इ कली ११, ११ सहे चांदी के शेकेल गेनीकी” देंमा बाक्त।
6 मिनु देलीलाहमी सिम्सोन कली “सुमी इन कली शुश बोल गेवा? दोपा इन कली फ्रेंने चाम्सीबा? मुरपुकीम दोपा इन कली ग्याइक्ने चाप्नीमी? आं कली शेंदीन” दे हिल्लो पवा बाक्त।
7 मिनु सिम्सोनमी “आं कली लिब्रा आ ७ ओटा क्येख डोरीमी फ्रेंताक्यीमी हना, अरु मुर खोदेंशो बोल मपाइश्शो दुम्नुङ” देंमाक्त।
8 मिनु पलिस्ती आन ठेयब मुरपुकीमी ७ ओटा लिब्रा आ क्येख डोरी चाक्शा, देलीलाह कली गेमे बाक्त। मिनु मेकोमी सिम्सोन कली फ्रेंदा बाक्त।
9 मेकोमी आगा ङा कोठामी मुरपुकी ख्रुइश्शा वोइश्शो बाक्माक्त। मिनु मेकोमी “सिम्सोन इन कली साइक्चा, दे पलिस्ती जाक्तेक्म” दे ग्रीमाक्त। मिनु सिम्सोनमी मेको डोरी कली मीम किक्शो पले खोदेंशो पा प्रोइश्शा प्रोक्माक्त। मिनु आ बोल चहिं मारम बाक्बा, दे मतुइक्तमे बाक्त।
10 मिनु देलीलाहमी सिम्सोन कली “गे आं कली शुक्शी पा जोल पाइतीनी। तन्न मुल ङा मेरे दोपा इन कली पाइक्ने चाम्सीबा, लो, देनीन” देंमाक्त।
11 मिनु सिम्सोनमी “आं कली नक मारेइ यो मफ्रेंशो डोरीमी फ्रेंताक्यीमी हना, अरु मुर खोदेंशो दुम्नुङ” देंमाक्त।
12 मोपतीके देलीलाहमी नक डोरी चाक्शा, मेको कली फ्रेंदा बाक्त। मेना यो मुरपुकी आ कोठामी ख्रुइश्शा बाक्शो बाक्मा बाक्त। मिनु मेकोमी “सिम्सोन इन कली साइक्चा, दे पलिस्ती जाक्तेक्म” दे ग्रीमाक्त। मिनु सिम्सोनमी मेको डोरी कली श्येले प्रोइश्शो खोदेंशो पा प्रोदा बाक्त।
13 मिनु देलीलाहमी लेंशा सिम्सोन कली “गे मुल सम्म आं कली शुक्शी पा जोल पाइतीनी। इन कली दोपा फ्रेंने चाम्सीबा?” दे हिल्लो पवा बाक्त। मिनु सिम्सोनमी “गे आं चां ङा ७ ओटा लामा कली तोव़ ओल्तीकेम पाइक्ताक्यी नु मेको तोव़ आ प्रोव़शो हिरतीक ठीक पा वोइक्तीवी हना, अरु मुर खोदेंशो पा बोल मपाइश्शो दुम्नुङ” देंमाक्त।
14 मोपतीके मेकोमी सिम्सोन इम्मेनु, मेको आ चां ङा ७ ओटा लामा कली तोव़ आ प्रोव़शो हिरतीकेमी हिरशा फ्रेंशा वोदा बाक्त। मिनु मेकोमी “सिम्सोन इन कली साइक्चा, दे पलिस्ती जाक्तेक्म” दे ग्रीमाक्त। मिनु सिम्सोन निन्द्रा रे सेंशा, तोव़ ओल्तीके, तोव़ नेल्ल नु प्रोव़शो वा यो उइश्शा बोक्माक्त।
15 मिनु देलीलाहमी “आं कली दाक्नुङ, दे दोपा देंने चाप्नीनी ङा? इन थुंमी आं कली मदाक्शो बाक्नीनी। गे आं कली खेयप सां शुक्शी पा, इन ठेयब बोल मारम बाक्बा, मुल सम्म मशेंदीनी” देंमाक्त।
16 मिनु मेकोमी सिम्सोन कली नाक्त किंत किंत हिल्लो पा श्येत गेवा बाक्त। न्यायाधीस १४:१७
17 मोपतीके सिम्सोनमी आ ख्रुइश्शो थमा लोव़ मेको कली शेंदा बाक्त। मेकोमी “मुल सम्म आं चां मप्रेक्शो बाक्ब। मारदे हना गो जरमेसी ङा रे परमप्रभु आ योव़शो नाजिरी का नङ। आं चां प्रेक्तेक्म हना, आं बोल लाइब। मिनु गो अरु मुर खोदेंशो पा बोल मपाइश्शो दुम्नुङ” देंमाक्त। न्यायाधीस १३:५
18 मिनु सिम्सोनमी देलीलाह कली आ थुं ङा लोव़ नेल्ल शोव़शा, नोले देलीलाहमी पलिस्ती आन ठेयब मुर आन कली “रीब पा जाक्कीन। मारदे हना मेकोमी आ थुं ङा लोव़ नेल्ल शेंताक्यी” दे ब्रेत्थ सोइक्ता बाक्त। मिनु पलिस्ती आन ठेयब मुरपुकी चांदी कुरशा जाक्मा बाक्त।
19 मिनु देलीलाहमी सिम्सोन कली आ थुकुमी इप्पदा बाक्त। मिनु मुर का ब्रेश्शा, आ ७ ओटा लामा प्रेक्पदा बाक्त। मोपा देलीलाहमी सिम्सोन आ बोल जाम्पाइश्शा सक्ति मपाइश्शो सेला बाक्त।
20 मिनु मेकोमी “सिम्सोन बोक्कीन, इन कली साइक्चा, दे पलिस्ती जाक्तेक्म” दे ग्रीमाक्त। मिनु मेको निन्द्रा रे बोक्माक्त। मिनु गो आंम कली गेना हना यो प्रोंइनुङ, दे मिम्ता बाक्त। तन्न “परमप्रभु यावेमी आं कली प्रोंइने थुम्तु” दे मेकोमी मतुइक्ता बाक्त। १सामुएल १६:१४
21 मिनु पलिस्तीपुकीमी मेको कली ग्याइश्शा, आ मिक्च पुक्तमे बाक्त। मिनु गाजा सहरम चाक्गमे बाक्त। मिनु कांसा के साङलोमी पाइश्शा जेल्खानमी यात हिल्पदमे बाक्त।
22 मिनु नोले आ प्रेक्शो चां लेंशा लाइश्शो दुम्माक्त।
सिम्सोन बेक्शो
23 मिनु पलिस्ती आन ठेयब मुरपुकीमी “इं देवतामी इं सत्रु सिम्सोन कली इं गुइमी गेप्तु” देंशा, आन देवता दागोन कली ठेयब चढ़ेतीक चढ़ेचा कली नु ग्येरसीचा कली खुम्समा बाक्त।
24 मिनु खुम्सीशो मुरपुकीमी सिम्सोन आ पर्बम “इं देवतामी इं सत्रु, इं रागी ङा सत्रु, इं रागी ङा मुर साइक्ब मुर कली इं गुइमी गेशो बाक्ब” दे ग्रीशा, आन देवता कली ठेयब सेल्मे बाक्त।
25 मिनु शुश ग्येरसीशा “सिम्सोन कली ग्रुंइदीन। मिनु मेकोमी आंइ कली सिल पा कोंइदल” दे पुन्मे बाक्त। मिनु सिम्सोन कली जेल्खान रे ग्रुंइदमे बाक्त। मिनु मेकोमी मेको आन कली सिल पा कोंइदा बाक्त। मिनु मेकोपुकीमी सिम्सोन कली ठेयब थाम आस दातेमी राप्पदमे बाक्त।
26 मिनु सिम्सोनमी आ गुइ ग्याइश्शा खुल्ब ठिटा कली “एको खिं कली तिक्ब नेल्ल क्येङा ठेयब थाम कली ग्याइक्चा गेयी। मिनु गो मेकेर रक एश्शा बाक्नुङ” देंमाक्त।
27 मेको खिंम शुश वोंइश मुर नु मीश मुर बाक्मा बाक्त। पलिस्ती आन ठेयब मुरपुकी यो नेल्ल मेकेर बाक्मा बाक्त। हजार सां खोइ वोंइश मुर नु मीश मुर चहिं खिं ङा नेल्ल क्येङा तला तार बाक्शा, सिम्सोन आ सिल कोव़ङमे बाक्त।
28 मिनु सिम्सोनमी परमप्रभु यावे कली “परमप्रभु, परमप्रभु यावे, आं कली मिम्तीन। आं कली लेंशा खेयप का सक्ति गेयीनी। परमप्रभु, गो काले आं मिक्च निक्शी आ पर्बम मेको आन कली क्येक्क लेत्ने चबुल” दे पुना बाक्त।
29 मिनु सिम्सोनमी मेको खिं कली तिक्शा वोइक्ब खिं आ दातेमी वोइश्शो थाम निक्शी कली पेरा गुइमी का नु ग्युरा गुइमी अर्को कली ग्याइक्ता बाक्त।
30 मिनु सिम्सोनमी “आं कली पलिस्तीपुकी नु बेक्चा गेन” देंशा, आ सक्ति नेल्लेमी बोल पा मेको थाम निक्शी कली नेप्ता बाक्त। मिनु मेको खिं ब्रेम्माक्त। मोपा बाक्शो नेल्ल ठेयब मुर नु अरु मुर नेल्ले चिप्शा बेक्मा बाक्त। मोपा सिम्सोनमी आ ब्रोंइशो क्येङा यो आ बेक्ची ना शुश मुर सदा बाक्त। हिब्रू ११:३२-३४
31 मिनु सिम्सोन आ आफ आ खिं ङा मुर नु आ लोक्बपुकी मेकेर जाक्शा, आ रां आ आफ मानोआह आ तुरस सोराह नु एश्ताओल सहर आ दातेमी थिम्मे बाक्त। सिम्सोन २० बर्स सम्म इस्राएली आन निसाफ पाइब दुम्शो बाक्माक्त। न्यायाधीस १३:२५; न्यायाधीस १५:२०