18
दान आ मुरपुकीम रागी माल्शो
1 मेना इस्राएल रागीम पिप मबाक्मा बाक्त। मिनु मेना दान आ थर ङा मुरपुकीमी बाक्चा कली रू माल्ना माल्न बाक्मा बाक्त। मारदे हना इस्राएली आन दातेमी योक्शो रागी मथेरशो बाक्मा बाक्त। न्यायाधीस १:३४; यहोसु १९:४०-४८
2 मोपतीके दान आ थर ङा मुरपुकीमी सोराह नु एश्ताओल रे ५ जना मुर आन कली क्यारी पथ सोइक्त्मे बाक्त। मिनु मेको आन कली “लन, मिनु मेको रागी कली क्यारी पन” देंमा बाक्त। मिनु मेकोपुकी एफ्राइम आ पहाडी रागी, मीकाह आ खिंमी जाक्शा, बास बाक्मा बाक्त। न्यायाधीस १३:२५
3 मिनु मेकोपुकी मीकाह आ खिंम बाक्मानु, मेको लेवी ठिटा आ लोव़ पशो नेंशा तुइक्तमे बाक्त। मिनु मेको लेवी कली “सुम इ कली एकेर चाक्गा? एकेर मार पाइनेवे? मार गेय पाइनेवे?” दे हिल्लो पामे बाक्त। न्यायाधीस १७:७
4 मिनु मेकोमी “मीकाहमी गेय गेती। मेको आ चढ़ेब दुम्ती” देंमाक्त।
5 मिनु मेकोपुकीमी मेको लेवी कली “मो हना आंइ गेय रिम्शो दुम्बा देय मदुम्बा, परमप्रभु कली हिल्लो पावो” देंमा बाक्त।
6 मिनु लेवीमी “थुं नाइश्शा लने, परमप्रभु यावेमी इन गेय दाक्शो बाक्ब” देंमाक्त।
7 मिनु मेको ५ जना मुर लशा, लाइश सहरमी जाक्दीम्मा बाक्त। मेकोपुकीमी मेकेर ङा मुर आन कली सीदोन ङा मुरपुकी खोदेंशो पा लडाइ मपथु, रिम्शो नु क्येट थीब दुम्शा, बाक्शो तामे बाक्त। मेकोपुकी नु मारेइ मारेइ बाक्माक्त। मेको आन रागी सीदोनी आन रागी क्येङा ङोन बाक्माक्त। मिनु मेकोपुकी आंमा ला बाक्शो बाक्मा बाक्त।
8 मिनु मेको ५ जना मुर सोराह नु एश्ताओल सहरमी लेश्शा जाक्मा नोले आन लोक्बपुकीमी “मार लोव़ चाक्नी?” दे हिल्लो पामे बाक्त।
9 मिनु क्यारी पाइबपुकीमी “लो, लय। मिनु मेकोपुकी नु लडाइ पय। मारदे हना मेको रागी थम रिम्शो बाक्ब। मुल मार सिक्सी पा बाक्नीनी? मुल लचा कली देश मपने। मिनु मेको रागी कली आंम के सेल्य।
10 गे मेकेर जाक्दीश्शा, कोव़नीनु, ठेयब रागीमी थम रिम्शो पा बाक्शो जात का ङा मुर आन कली ताइनीनी। मेको मुरपुकीमी लडाइ आ पर्बम मारेइ ममिम्शो बाक्नीम। मेको रागी परमप्रभुमी इन गुइमी गेशो बाक्ब। मेको रागीमी बाक्शो मारेइ मारेइ थीसीब” देंमा बाक्त।
मीकाह आ मूर्ति रोइश्शो
11 मिनु दान आ थर ङा ६ सहे या कुरशो मुरपुकी सोराह नु एश्ताओल सहर रे पा गाक्मा बाक्त। न्यायाधीस १३:२,२५
12 मेकोपुकी कुशा, यहूदा ङा किरयथ-यारीम आ नेक्था ताम्बु कीशा बाक्मा बाक्त। मोपतीके मुल सम्म मेको कली माहानेह-दान देंनीम। मेको किरयथ-यारीम आ पच्छिममी बाक्ब।
13 मिनु मेक रे गाक्शा, एफ्राइम ङा पहाडी रागीम बाक्शो मीकाह आ खिंमी जाक्दीम्मा बाक्त।
14 मिनु ङोंइती रागी क्यारी पथ पिशो ५ जना मुरुमी आन लोक्ब आन कली “एको खिं कामी चढ़ेब आ निसाफ पतीक ऊरीम नु थुम्मीम बाक्शो झोला नु खिं ङा देवता, मुशा चांदीमी गिल्शो मूर्ति बाक्नीम। गेपुकीमी तुइक्चा माल्नीनी। मिनु मुल मार पचा माल्बा, मिम्चा माल्नीनी” देंमा बाक्त।
15 मिनु मेकोपुकी मीकाह आ खिं आ नेक्था जाक्शा, लेवी ठिटा आ बाक्तीक जाक्मा बाक्त। मिनु “दोदेंशो बाक्नेवे?” दे हिल्लो पामे बाक्त।
16 या कुरशो ६ सहे दान आ थर ङा मुरपुकी चहिं लाप्चोमी बाक्मा बाक्त।
17 मिनु ङोंइती क्यारी पथ जाक्शो ५ जना मुर खिं आगा ओव़मा बाक्त। मिनु मेकोपुकीमी मेको मुशा चांदीम गिल्शो मूर्ति, निसाफ पतीके ऊरीम नु थुम्मीम बाक्शो झोला नु खिं ङा देवता नेल्ल लदमे बाक्त। मेना चढ़ेब यो मेको ६ सहे मुर नु लाप्चोम राप्शा बाक्शो बाक्माक्त। न्यायाधीस १७:५
18 मिनु मोपा मेको ५ जना मुरुमी मीकाह आ खिंमी ओव़शा, मेको मुशा चांदीम गिल्शो मूर्ति, चढ़ेब आ ङोंइती फेक्शो निसाफ पतीके ऊरीम नु थुम्मीम बाक्शो झोला नु खिं ङा देवतापुकी लदमेनु, चढ़ेबमी “मार पनी?” दे हिल्लो पामी बाक्त।
19 मिनु मेकोपुकीमी “ब्वालेइ पावो। लोव़ का यो मपावो। गो नु गाक्शा आंइ आफ नु चढ़ेब दुमो। मार, मुर का आ चढ़ेब दुम्चा रिम्शो देय इस्राएल ङा थर का नु आन मुर आन चढ़ेब दुम्चा रिम्शो दुम्बा? लो, मिम्तो” देंमा बाक्त।
20 मिनु मेको चढ़ेब बिश्शा, मेको निसाफ पतीके ऊरीम नु थुम्मीम बाक्शो झोला खिं ङा देवतापुकी नु मेको मुशा चांदीम गिल्शो मूर्ति कुरशा, मेकोपुकी नु गाक्माक्त।
21 मिनु मेकोपुकी मेकेर रे लेश्शा, आन लां खोदमे बाक्त। मेकोपुकीमी आलपुकी, बस्तु भाव नु आन मारेइ मारेइ लाइश्शा, आन ङोंइती खुल्शा गाक्मा बाक्त।
22 मिनु दान आ थर मा मुरपुकी मीकाह आ खिं रे इच्का ङोन जाक्दीम्मानु, मीकाहमी आ नेक्था ङा मुर आन कली ब्रेश्शा खुप्शा, खेदा पा थिम्मी बाक्त।
23 मिनु हुइक्तीमी बाक्त। मिनु दान आ थर ङा मुरपुकीमी मीकाह कली “इ कली मार दुम्मे? मारदे मोदेंशो पा शुश मुर खुप्तीमी?” देंमा बाक्त।
24 मिनु मीकाहमी “आं कली सेल्सीशो देवी देवता नु आं चढ़ेब मुर मारदे लाइक्नी? आं कली मारेइ महेंदीनी। मिनु आं कली ‘इ कली मार दुम्मे?’ दे हिल्लो पाइनीनी?” देंमाक्त।
25 मिनु दान आ थर ङा मुरपुकीमी “ब्वाले पावो। मारदे हना आंइ दाते ङा चुरब मुरपुकीमी चुरशा, इ कली नु इ खिं ङा मुर आन कली साइक्नीमी” देंमा बाक्त।
26 मिनु मेको दान आ थर ङा मुरपुकी मेकेर रे गाक्मा बाक्त। मीकाह यो आ क्येङा बोल्यो मुर तशा, मारेइ मपथु, आ खिं लेम्माक्त।
27 मोपा मेको चढ़ेब नु मीकाह आ सेल्सीशो मूर्ति लाइश्शा, मेकोपुकी गाक्मा बाक्त। मिनु मेकोपुकी लाइश सहर नु लडाइ पामे बाक्त। मेकेर ङा मुरपुकी थुं नाइश्शा, लडाइ ममिम्थु बाक्शो बाक्मा बाक्त। मिनु दान आ थर ङा मुरपुकीमी मेको आन कली तरवारमी साइश्शा, मेको आन सहरम मी सुइक्तमे बाक्त।
28 मेको आन कली प्रोंइब सुइ मबाक्मा बाक्त। मारदे हना मेको सहर सीदोन रे शुश ङोन बाक्माक्त। मेको सहर बेथ-रेहोब आ नेक्था ङा दिंममी बाक्माक्त। मिनु दान आ थर ङा मुरपुकीमी मेको सहर सेल्शा बाक्चा गोव़मे बाक्त।
29 मिनु मेको सहर कली इस्राएल आ तौ, मेको आन किकी पिपी आ नें दान वोदमे बाक्त। मेको सहर आ नें ङोंइती लाइश बाक्माक्त। यहोसु १९:४७
30 मिनु दान आ थर ङा मुरपुकीमी मेको मूर्ति पूजा पचा कली वोदमे बाक्त। इस्राएली नेल्ल ग्याइश्शा लाइक्चा मपुंइसीमा सम्म मोसा आ तौ गेरशोम, आ तौ योनाथन नु मेको आ चच युइ दान आ थर ङा चढ़ेब दुम्मा बाक्त। १राजा १२:२९; आमोस ८:१४; प्रस्थान १८:३; २राजा १५:२९
31 परमप्रभु आ खिं शिलोमी बाक्म सम्म मेकोपुकीमी मीकाहमी सेल्सीशो मूर्ति कली पूजा पामे बाक्त। यहोसु १८:३; येरमीया ७:१२