2
स्वर्ग ङा गेय पाइबमी लोव़ पशो
1 मिनु परमप्रभु यावे आ स्वर्ग ङा गेय पाइब गिल्गाल रे बोकीम सहरमी कुमाक्त। मेकोमी “गो इन कली इजीप्त रे ग्रुंइताक्न्नी। इन किकी पिपी आन कली ‘इन कली गेनुङ’ देंशो रागीमी चाक्तन्नी। गो गे नु पशो कबल गेना हना यो खाप्नुङ। यहोसु २४:२९-३१
2 मिनु गे एको रागी ङा मुरपुकी नु काइ कबल मपने। गे मेको आन चढ़ेतीक प्रेत्चा माल्नीनी। तन्न गे आं देंशो मटिनी। लो कोव़ङीन, गे मार पनी?
3 मोपतीके ‘इन ङोंइती रे मेको आन कली मखेरनुङ। मेकोपुकी इन कली चू खोदेंशो दुम्नीम। मिनु मेको आन देवी देवता इन कली ग्याइल खोदेंशो दुम्नीम’ देंनुङ” देंमाक्त।
4 मोपा परमप्रभु यावे आ स्वर्ग ङा गेय पाइबमी देंने थुमा नोले, मेकेर ङा मुर नेल्ले ङाक्शा रोंका पामे बाक्त।
5 मोपतीके मेको आन बाक्तीक कली बोकीम नें वोदमे बाक्त। मिनु मेकोपुकीमी मेकेर परमप्रभु यावे कली मार मार चढ़ेमे बाक्त। बोकीम आ अर्थ ङाक्चा बाक्ब।
यहोसु बेक्शो
6 मिनु यहोसुमी नेल्ल आन कली लचा गेवा नोले, मेकोपुकी आंम आंम थेरशो रागी आंम के सेल्थ लमा बाक्त।
7 मिनु इस्राएलीपुकीमी यहोसु मबेक्म सम्म परमप्रभु यावे कली ठेयब सेल्मे बाक्त। मिनु परमप्रभु यावेम इस्राएली आन पर्बम पशो ठेयब गेय ताइब खाल्पापुकी बाक्मा सम्म यो परमप्रभु यावे कली ठेयब सेल्मे बाक्त।
8 मिनु नून आ तौ यहोसु, परमप्रभु यावे आ वाइल सहे का १० बर्समी बेक्माक्त।
9 मिनु आ थेरशो रूम थिम्मे बाक्माक्त। आ रू ते बाक्त देंशा हना, गाश डांडा आ उत्तर, एफ्राइम ङा पहाडी रागीमी बाक्शो तिम्नाथ-हेरेसमी बाक्माक्त।
10 मेको पाला ङा मुर नेल्ल बेक्मा बाक्त। मिनु मेको आन आल ठेयब दुम्मा बाक्त। मेकोपुकी परमप्रभु यावे कली मतुइक्ब बाक्मा बाक्त। मिनु इस्राएल ङा मुर आन कली ठेयब गेय पा वारच पशो यो मतुइश्शो बाक्मा बाक्त।
इस्राएलीपुकीमी हेंथे पशो
11 मिनु इस्राएलीपुकीमी परमप्रभु यावे आ ङोंइती मार मरिम्शो बाक्मे, मेको पामे बाक्त। मेकोपुकीमी बाल देवी देवता आन कली ठेयब सेल्मे बाक्त।
12 मिनु मेको आन कली इजीप्त रागी रे ग्रुंइब, परमप्रभु यावे, आंम किकी पिपी आन परमप्रभु कली प्रोन्मे बाक्त। मेको आन दातेमी बाक्ब जात जात ङा मुर आन देवी देवता आन ङोंइती बाम्मा बाक्त। मोपा परमप्रभु यावे कली चुरपदमे बाक्त।
13 मेकोपुकीमी परमप्रभु यावे कली प्रोंइशा, बाल नु अश्तारोथ देवता कली ठेयब सेल्मे बाक्त।
14 मिनु परमप्रभु यावेमी इस्राएली आन पर्बम गाइश्शा, मेको आन कली रोइक्ब आन गुइमी गेमी बाक्त। मिनु मेकोपुकीमी मेको आन मारेइ मारेइ रोइक्तमे बाक्त। मिनु मेकोमी मेको आन कली आन नेक्था बाक्ब जोरी सत्रु आन हुकुममी बाक्चा गेमे बाक्त।। मोपा इस्राएलीपुकीमी आन जोरी सत्रु आन कली ग्राने मचाप्बमे बाक्त।
15 गेना मेकोपुकी लडाइ पथ ग्रूमा, मेना परमप्रभु यावेमी मेको आन कली श्येत गेमी बाक्त। मोपा परमप्रभु यावेमी मेको आन कली ङोंइती देंशो नु आ कबल पशो खबा बाक्त। मोपतीके मेकोपुकीमी शुश श्येत जामे बाक्त। लेवी २६:१७; ब्यवस्था २:१५; ब्यवस्था २८:२०; १सामुएल १२:१५
16 मिनु नोले परमप्रभु यावेमी मेको आन कली रोइक्ब आन गुइ रे प्रोंइचा कली निसाफ पाइब सोइक्ता बाक्त। मिनु मेको आन कली प्रोंइना प्रोंइन बाक्मा बाक्त। प्रेरित १३:२०
17 तन्न मेकोपुकीमी निसाफ पाइब आन देंशो लोव़ मनेन्मे बाक्त। मेकोपुकीमी तेल्लेम पशो खोदेंशो पा अरु देवी देवता आन नोले खोदमे बाक्त। मेको आन ङोंइती बाम्मा बाक्त। मेकोपुकी परमप्रभु यावे आ शेंशो लोव़ टीब आन किकी पिपी आन गाक्शो लां प्रोंइशा, मटीब दुम्मा बाक्त।
18 गेना परमप्रभु यावेमी मेको आन कली निसाफ पाइब सोइक्ता, मेना परमप्रभु यावे मेको नु बाक्माक्त। मेको निसाफ पाइब मबेक्म सम्म आन जोरी सत्रु रे प्रोंइशा वोदा बाक्त। मारदे हना परमप्रभु यावेमी आन जोरी सत्रु रे श्येत जशो तशा शिशी पवा बाक्त।
19 तन्न निसाफ पाइब बेक्म चोटीन आन किकी पिपी क्येङा लाक्शा मरिम्शो पामे बाक्त। देवी देवता आन कली ठेयब सेल्शा, मेको आन ङोंइती बाप्शा, मेको आन नोले खोदमे बाक्त। आन मरिम्शो पशो प्रोंइने मबिस्समा बाक्त। प्रस्थान ३२:९
20 मोपतीके परमप्रभु यावे इस्राएलीपुकी नु गाइक्ता बाक्त। मिनु “गो मेको आन किकी पिपी आन कली देंशो नु कबल पशो एकोपुकीमी खतम सेल्तेक्म। आं देंशो लोव़ मटितीके
21 मुल यहोसुमी आ बेक्ची ना मखेरशो रागी रागी ङा मुर कली यो इस्राएली आन ङोंइती रे मखेरनुङ” दे परमप्रभु यावेमी देंमाक्त।
22 इस्राएली आन किकी पिपी परमप्रभु यावे आ लांम गाक्शो खोदेंशो पा मेकोपुकी गाक्नीमी कों मगाक्नीमी, दे इस्राएली आन कली नाक्चा कली मेको अर्को जात ङा मुर मखेरशो बाक्माक्त। न्यायाधीस ३:१,४; ब्यवस्था ८:२
23 मोपा परमप्रभु यावेमी ङोंइती यहोसु आ गुइमी मगेशो रागी रागी ङा मुर आन कली मोशीन प्रोंइशा वोइश्शो बाक्माक्त। न्यायाधीस १:२८; भजन संग्रह १०६:३४