21
लीशो बेन्यामीनी
1 मिनु ङोंइती मिस्पामी जाक्शो इस्राएलीपुकीमी मार कसम जशो बाक्मा बाक्त देंशा हना “गोपुकीमी इं तमी आन कली बेन्यामीन आ थर ङा मुर आन कली ग्युंबे पा मगेय” दे कसम जशो बाक्मा बाक्त। न्यायाधीस २०:१
2 मिनु मुरपुकी बेथेल लशा, नाक्दो सम्म परमप्रभु आ ङोंइती बाक्शा, शुश ङाक्मा बाक्त। न्यायाधीस २०:१८,२३,२६
3 मेकोपुकीमी “परमप्रभु यावे, इस्राएली आन परमप्रभु, मारदे ओदेंशो दुम्मे? मुलाक्त मारदे इस्राएली आन थर का जाम्मे?” देंमा बाक्त।
4 मिनु आ दीसा मुरपुकी सुनी कना बोक्शा, मेकेर चढ़ेतीके का सेल्शा, चोशा चढ़ेतीक नु दुशा बाक्चा आ पर्बम चढ़ेतीक चढ़ेमे बाक्त।
5 मिनु नोले इस्राएलीपुकीमी “तेको थर परमप्रभु यावे आ ङोंइती मजाक्मा?” दे हिल्लो पमुमा बाक्त। मारदे हना मिस्पामी मेकोपुकीमी “परमप्रभु यावे आ ङोंइती सु मजाक्बा, मेको कली साइक्चा माल्ब” दे कसम जशो बाक्मा बाक्त।
6 मिनु आंम लोक्ब बेन्यामीन आ थर ङा मुर आन पर्बम ङाक्शा “मुलाक्ती इस्राएल ङा थर का क्याम्साक्व।
7 लीशो वोंइश मुर आन कली मीश आल चाक्चा कली मार पय? गोपुकीमी परमप्रभु यावे आ ङोंइती मेको आन कली आंइ तमी ग्युंबे पा मगेनीक, दे कसम जशो बाक्नीकी” देंमा बाक्त।
8 मिनु मेकोपुकीमी “परमप्रभु यावे आ ङोंइती इस्राएली आन थर ङा मिस्पामी मजाक्ब, सु बाक्मे?” दे हिल्लो पशा, याबेश-गिलाद रे सुइ यो ग्रुम्तीक ताम्बुमी मजाक्मा बाक्त, दे तुइक्तमे बाक्त।
9 मारदे हना मेकोपुकीमी मुर हिक्गमेनु, याबेश-गिलाद ङा सुइ मुर मजाक्शो तुइक्तमे बाक्त।
10 मोपतीके मेको ग्रुम्शो मुरपुकीमी १२ हजार लडाइ पाइब आन कली याबेश-गिलाद ङा वोंइश मुर, मीश मुर, आल ब्रेप्च नेल्ल कली तरवारमी क्योरशा सतीन, दे हुकुम पा सोइक्तमे बाक्त।
11 मिनु “वोंइश मुर नु मेको नु इप्शो मीश मुर नेल्ल आन कली सतीन। तन्न कन्ने आन कली प्रोनीन” दे हुकुम पामे बाक्त। गन्ती ३१:१७-१८
12 मिनु सोइश्शोपुकीमी याबेश-गिलादमी ४ सहे सुइ नु मइप्शो कन्ने मीश आल थिश्शा, मेको आन कली कनान ङा शिलोम बाक्शो ताम्बुमी चाक्गमे बाक्त।
13 मिनु ग्रुम्शो इस्राएली नेल्लेमी रिम्मोनमी ख्रुइश्शा बाक्शो बेन्यामीन आ थर ङा मुर आन कली “गारचा” दे ब्रेत्थ सोइक्मे बाक्त। न्यायाधीस २०:४७
14 मिनु बेन्यामीन आ थर ङा मुरपुकी लेश्शा जाक्मा बाक्त। मिनु मेकोपुकीमी मेको आन कली याबेश-गिलादम सेस प्रोंइशो मीश आल गेमे बाक्त। तन्न बेन्यामीन आ थर ङा वोंइश मुर आन कली मेको मीश आल मजाक्दीम्माक्त।
15 मिनु इस्राएलीपुकीमी बेन्यामीन आ थर आ पर्बम सुर्ता पस ङा पस बाक्मा बाक्त। मारदे हना परमप्रभु यावेमी इस्राएल ङा बेन्यामीन आ थर हेररा क्याम्शो बाक्माक्त।
16 मोपतीके मेको ग्रुम्तीक ङा खाल्पापुकीमी “मुल लीशो वोंइश मुर आन कली मीश गेचा कली मार पय? मारदे हना बेन्यामीन आ थर ङा मीश मुर नेल्ल बेक्तेक्म” देंमा बाक्त।
17 मिनु मुरपुकीमी “प्रोक्शा ब्रोंइशो बेन्यामीन आ थर ङा मुर आन कली चच युइ दुम्चा माल्नीम। मोदेंशो मदुम्त हना, इस्राएल रे थर का ग्याम्शा लाइब।
18 तन्न गो मेको आन कली इं तमी गेने मचाप्नय” देंमा बाक्त। मारदे हना इस्राएलीपुकीमी “सुम बेन्यामीन आ थर ङा मुर कली आ तमी गेबा, मेको सराप राइब” दे कसम जशो बाक्मा बाक्त।
19 मोपतीके “नेनीन, परमप्रभु यावे आ पर्बम बर्सम काले दुम्ब चाड शिलोमी पाइनीम। शिलो बेथेल आ उत्तर गे बाक्ब। मिनु मेको बेथेल रे शेकेम लतीक ठेयब लां आ पूर्ब नु लेबोना सहर आ दक्खिनम बाक्शो बाक्ब” देंमा बाक्त। यहोसु १८:१
20 मिनु बेन्यामीन आ थर ङा मुर आन कली “गे लशा अङगुर रूमी ख्रुइश्शा बाक्कीन।
21 मिनु शिलो ङा मीश आलपुकी सिल पथ जाक्मानु, अङगुर रू रे फो फु ग्रूशा, आंम मीश सेल्चा कली का का पा मीश आल कीङीन। मिनु बेन्यामीन आ थर ङा रागी लन। प्रस्थान २१:१६; ब्यवस्था २४:७
22 मिनु मेको मीश आल आन आफ नु लोक्बपुकी जाक्शा, आंइ कली लोव़ पाम्तेक्म हना, गो मेको आन कली ‘बेन्यामीन आ थर ङा मुर आन कली शिशी पन। मेको आन कली ग्युंबे पचा गेन। मारदे हना गो लडाइमी मेको मिश ङा वोंइश मुर आन कली मीश आल ग्याइक्ने मचाप्क। मिनु गे इन तमी गेशा यो दोस मताइनीनी। मारदे हना गे मेको आन कली इन तमी आंमन मगेनी’ देंनीकी” देंमा बाक्त।
23 मिनु बेन्यामीन आ थर ङा मुरपुकीमी मोदेंशो पामे बाक्त। मेको सिल पाइब मीश आल का का आंम मीश सेल्चा कली कीङमे बाक्त। मेको आन रागी लेश्शा आंम सहर कली लेंशा सेल्शा, मेकेर बाक्मा बाक्त।
24 मेना इस्राएली नेल्ल मेकेर रे लशा ब्राशा, आंम आंम थर नु आंम आंम खिं लमा बाक्त।
25 मेना इस्राएल रागीम पिप मबाक्माक्त। मोपतीके सु सुमी मार मार पचा दाक्मा मेको पाइक्बाक्मा बाक्त। न्यायाधीस १७:६