5
देबोरा नु बाराक आस कुम्सो
1 मेको नाक्त देबोरा नु अबीनोअम आ तौ बाराकमी कुम्सो पाम्से बाक्त। मेको निक्शीमी मार कुम्सो पाम्से बाक्त, देंशा हना
2 “इस्राएल ङा ठेयब मुरुमी लडाइ पाइब आन कली खुल्मेनु, मेकोपुकीमी आन ठेयब मुर आन कली टिम्तेक्म। मोपतीके परमप्रभु यावे कली ठेयब सेलीन।
3 पिपपुकी, नेनीन। सासन पाइबपुकी, इन नोफा दाइक्तीन। नेनीन। गो परमप्रभु यावे कली कुम्सो पाइनुङ। गो परमप्रभु यावे, इस्राएली आन परमप्रभु कली ताप्तीक का ताप्शा, कुम्सो का पाइनुङ।
4 परमप्रभु यावे, सेइर रे पा गाक्नी ना, एदोम रागी रे लाइतीनी, मेना रागी नेल्ल ख्रिंख्रि पाप्तु। रेउ यित। गोस्सुमी रेउ यिपाइक्तु। ब्यवस्था ३३:२; हबकुक ३:३-६
5 मिनु सीनै डांडा ङा परमप्रभु यावे आ ङोंइती पहाडमी ख्रिनु कुत। परमप्रभु यावे, इस्राएली आन परमप्रभु आ ङोंइती डांडा ख्रिंख्रि पाप्तु। भजन संग्रह ६८:९
6 अनाथ आ तौ शाम्गार आ पालामी, याएल बाक्म सम्म ग्याप्ब लेयब आन हुल ठेयब लां मगाक्ब दुम्तेक्म। मुरपुकी ख्रुइश्शो लांमी गाक्चा गोम्तेक्म। न्यायाधीस ३:३१
7 मिनु इस्राएलीपुकीमी आन रूमी शोक्ने खुप्ने मचबेम। देबोरा, गे मेको आन दातेमी मजाक्ङे सम्म मारेइ पने मचबेम। गे इस्राएली आन ममा खोदेंशो पा जाक्ते।
8 इस्राएलीपुकीमी नक देवी देवता आन कली ठेयब सेल्चा कली योव़ची ना सहर ङा लाप्चोमी लडाइ दुम्त। मिनु ४० हजार इस्राएली आन के तेक्तीक नु तरवार मबा।
9 इस्राएली लडाइ पाइब आन ठेयब मुर दाक्नुङ। मारदे हना मेकोपुकी महिंथु, लडाइ पचा कली, दे आंम कली जिम्मा गेम्तेक्म। परमप्रभु यावे ठेयब बाक्ब।
10 बुश गधा ङोइश्शा गाक्बपुकी, राडी तारी निप्बपुकी, खोइलीम गाक्ब नेल्लेमी यो परमप्रभु यावेम मेको लडाइ ‘दोपा पवा’ मेको शेंदीन।
11 मिनु ब्वाक्कु बुक्तीकेमी बाजा ताप्शा ‘परमप्रभु यावे आ ग्रातीक ठेयब बाक्ब’ दे लेंशा कुम्सो पाइनीम। ‘मिनु इस्राएल ङा बोल्यो मुर आन ग्राशो आ पर्बम कुम्सो पाइनीम। मिनु परमप्रभु यावेमी रूम शोक्ब आन कली ग्रापाइक्तु’ दे कुम्सो पाइनीम। मिनु परमप्रभु यावे आ मुरपुकी उइ सहर ङा ठेयब लाप्चोमी लाम्तेक्म।
12 बोक्को, देबोरा, बोक्को, बोक्शा ङा मीन, कुम्सो पावो। अबीनोअम आ तौ बाराक, बोक्को, इ ग्याइश्शो मुर आन कली एक रे योल्दो।
13 मिनु ठेयब मुरपुकी उइ गाक्तेक्म। परमप्रभु यावे आ मुरपुकी ङोंइती बारशा, बोल्यो मुर नु लडाइ पचा चिक्ताक्म।
14 एफ्राइम आ थर ङा मुर दिंमम जाक्तेक्म। बेन्यामीन आ थर ङा मुरपुकीमी मेको आन नोले खोइक्तेक्म। माकीर रे आन ठेयब मुर यिम्तेक्म। जबूलून आ थर ङा मुर आन रागी रे पिशा, आन थर ङा कप्तानपुकी जाक्तेक्म। यहोसु १७:१
15 इस्साकार आ थर ङा हुकुम पाइबपुकी देबोरा नु जाक्तेक्म। मिनु इस्साकार आ थर ङा मुर बाराक कली मप्रोंइथु आ नोले खोइक्तेक्म। मेकोपुकी उइ दिंममी मेको आ नोले दोरशा लाम्तेक्म। मिनु रूबेन आ थर ङा मुर चहिं आन दातेमी ‘लचा देय मलचा’ दे शुश लोव़ पा मिम्ना मिम्न थुं नाक्मुम्तेक्म।
16 मारदे गोठम बाक्नीनी? मेको योव़ब आन ताप्शो नेंचा दाक्नीनी? मिनु रूबेन आ थर ङा मुर आन दातेमी शुश मिम्ना मिम्न बाक्तेक्म।
17 गिलाद ङा मुरपुकी यर्दन आइक्ची हांबुमी बाक्तेक्म। दान आ थर ङा मुरपुकी, मारदे डोंगा आन नेक्था रिम्शा बाक्नीमी? मिनु आशेर आ थर ङा मुरपुकी समुन्द्र आ नेक्था देश पा बाक्तेक्म। मेकोपुकी डोंगा आन नाइक्तीकेमी मेक उइ बाक्शो बाक्तेक्म।
18 मिनु जबूलून आ थर ङा मुरपुकीमी महिंथु लडाइ पाम्तेक्म। मिनु नाप्ताली आ थर ङा मुरपुकीमी यो लडाइ पाम्तेक्म।
19 कनान ङा पिपपुकी लडाइ पा जाक्तेक्म। मेगीददो आ नेक्था तानाक सहरमी लडाइ पाम्तेक्म। तन्न चांदी नु अरु रोइश्शो मारेइ यो लाइक्चा मताम।
20 मिनु सोरुलपुकीमी सरीङ रे लडाइ पाम्तेक्म। मेको आन लतीक लां रे सीसेरा नु लडाइ पाम्तेक्म। प्रस्थान १४:२५; यहोसु १०:१४
21 मिनु किशोन खोलामी सीसेरा आ लडाइ पाइब आन कली योल्ताक्व। मेको बारशो किशोन खोलाम मोदेंशो पाप्तु। आं थुं महिंथु, बारशा, लडाइ पावो।
22 मिनु शारा आन खोइल रेयके पपाइश्शा मेको साप्पा दोरतेक्म। आन खोइल ताप्शा, मेको साप्पा दोरतेक्म।
23 परमप्रभु यावे आ स्वर्ग ङा गेय पाइबमी ‘मेरोज कली सराप पावो। मिनु मेकेर बाक्ब मुर आन कली सराप पावो। मारदे हना मेकोपुकीमी परमप्रभु यावे कली मारेइ यो वारच मपाम’ देंत।
24 केनी हेबेर आ मीश याएल मीश मुर नेल्ल आन क्येङा आसीक ताइब दुम्ब। ताम्बुमी बाक्ब मीश मुर नेल्ल आन क्येङा आसीक ताइब बाक्ब।
25 सीसेरामी ब्वाक्कु पुंइतु। तन्न मेकोमी दूध गेप्तु। मेको कली दारशो डप्कामी दहि ख्रेत्ताक्व। न्यायाधीस ४:१९
26 मिनु मेकोमी ताम्बु आ किला तुल्शा, थात्ला का गुप्तु। मिनु सीसेरा आ पियाम थोक्ताक्व। मेको कली आ रेक्च्रे ख्रिश्शा साइक्तु।
27 सीसेरा याएल आ खोइलीम बेक्त। मेको आ खोइलीमी गोल्शा बेक्त।
28 मिनु सीसेरा आ ममामी झेल रे चिवा पा कोव़तु। मोपा चिवा पा कोव़शा ‘मेको आ बग्गी मारदे मजाक्मे? आ बग्गी आ रेयके मारदे मनेंसे?’ दे वाइ ब्रेत्त।
29 मिनु मेकेर बाक्ब नेल्ल क्येङा अरेब मीश मुरुमी आ देंशो लोव़ आंमान लेन्ना लेन्न
30 मेको आन रोइश्शो नेल्ल योक्गमे कों? मुर नेल्ल कली मीश आल का कि निक्शी ताइनीम कों? मिनु सीसेरामी रिम्शो रङ पाइश्शो वा ताइबा कों? आं कली बुटा आप्शो दारशो कुप्नी निक्शी चाक्बा कों? दे आंमा नु लोव़ पशो बाक्त।
31 मिनु परमप्रभु यावे, इन जोरी सत्रु नेल्ल मोपान खतम दुम्मल। इन कली दाक्बपुकी चहिं सुनी दाप्शो नां खोदेंशो पा ब्रशा सक्ति पाइश्शो दुम्शा, बाक्मल” दे कुम्सो पाम्से बाक्त। मिनु ४० बर्स सम्म मेको रागीमी लडाइ मदुम्माक्त। ब्यवस्था ६:५