4
योना परमप्रभु नु गाइश्शो
1 मिनु परमप्रभुमी मुर आन कली खतम मपशो तशा, योना चुरशा, शुश गाइक्ता बाक्त। मिनु परमप्रभु यावे कली
2 “परमप्रभु यावे, आं रागीम बाक्ङानु, गो एको तुइश्शो नङ। मोपतीके गो टारशीश गे प्रोक्शो नङ। गे नेल्ल कली शिशी पाइब नु दाक्ब परमप्रभु ननी। इन गाइक्चा रीब पा मबोक्ब। इन शिशी ठेयब बाक्ब। इन थुं श्येत गेचा बाक्त हना यो, इन थुं लेश्शा, मेको आन कली मारेइ मपाइनीनी, दे गो तुइश्शो नङ। प्रस्थान ३४:६
3 मुल परमप्रभु यावे, आं कली साइय्यीनी। मारदे हना गो ब्रोंइचा क्येङा बेक्चा दाक्नुङ” दे परमप्रभु यावे नु लोव़ पवा बाक्त। १राजा १९:४
4 मिनु परमप्रभु यावेमी “इ गाइश्शो ठीक ममाइ” दे मदा बाक्त।
5 मिनु योना सहर रे लशा, पूर्ब गे ङा डांडामी निस्से बाक्त। मेकेर गोठ का सेल्शा बाक्शो बाक्माक्त। मेकेर फाम्सीशा निश्शा “मेको सहरमी मार दुम्बा” दे कोव़शा, रिम्दा बाक्त।
6 मिनु परमप्रभु, परमप्रभु यावेमी योना कली नां फाम्सीशा बाक्ल, श्येत मजवल, दे छक लाक्चा ङा पा आइक्च रवा का आ बाक्तीकेमी वापदा बाक्त। मिनु योना मेको रवा तशा, शुश ग्येरसे बाक्त।
7 तन्न आ दीसा सुनी कना परमप्रभुमी खोंकला का सोइक्ता बाक्त। मेकोमी मेको आइक्च रवा आ शाक्श ख्रोदा बाक्त। मिनु रवा सोल बेक्माक्त।
8 मिनु नां दाम्मेनु, परमप्रभुमी योना आ बाक्तीकेम पूर्ब रे होश फश सोइक्ता बाक्त। मिनु नांमी योना आ पिया नाप्शा, योना ओले पेते दुम्शा, गोल्माक्त। मिनु योनामी “ब्रोंइचा क्येङा बेक्चा दाक्नुङ” देंमाक्त।
परमप्रभु आ शिशी
9 मिनु परमप्रभुमी योना कली “गे मेको रवा आ पर्बम गाइक्चा, ठीक दुम्बा ङा?” दे लोव़ पवानु, मेकोमी “गो मबेक्ङा सम्म गाइक्नुङ” दे लोव़ लेत्ता बाक्त।
10 मिनु परमप्रभु यावेमी “गे इ मख्रुम्शो, मकोल्पाइश्शो, नाक्दो कामी वाशा, आ दीसा नाक्दो सोल बेक्शो रवा कली शिशी पाइनेवे।
11 मिनु गो मेको ठेयब सहर निनवे आ पर्बम शिशी मपाइनुङा ङा? मेकेर आन ग्युरा पेरा गुइ मतुइक्ब लाख का २० हजार क्येङा शुश मुर नु बी ब्यफ, क्यारश भेडा यो बाक्नीमी। गो मेको आन कली शिशी पाइनुङ” देंमाक्त।