11
कबल क्याम्शो
1 परमप्रभु यावेम येरमीया कली,
2 “गे एको कबल ङा लोव़ नेनो। मिनु यहूदा ङा मुरपुकी नु यरूसलेममी बाक्ब आन कली लोव़ पावो।
3 गे मेको आन कली ‘इस्राएली आन परमप्रभु यावेम मार देंत देंशा हना, सु सुमी एको कबल मखाप्नीमी, मेको सराप राइनीम। ब्यवस्था २७:२६;
4 गो मेको कबल ङा पचा माल्शो गेय इन किकी पिपी आन कली श्येत जतीक इजीप्त रागी रे ग्रुंइची ना अरेशो नङमी। गो मेको आन कली आं अरेशो यो टिने। इन कली अरेशो लोव़ नेल्ल पा आं मुर दुम्नीनी। मिनु गो इन परमप्रभु दुम्नुङ। येरमीया ७:२३
5 गो इन किकी पिपी आन कली दूध नु खुदो शुश बाक्शो रागी का गेनन्नी, दे कसम जशो खाप्नुङ। मिनु मेको रागी मुल इन अधिकारम बाक्ब’ देनो” देंत। मिनु गो “परमप्रभु यावे, मोदेंशो दुम्ल” दे लोव़ लेत्ताक्ङ। प्रस्थान ३:८
6 मिनु परमप्रभु यावेम आं कली “यहूदा ङा सहर नेल्लेम नु यरूसलेम ङा लां मेर एको कबल ङा लोव़ उरदी पा, मेको कबल ङा लोव़ नेंशा पने।
7 गो इन किकी पिपी आन कली इजीप्त रे प्रोंइशा चाक्गुमी रे मुल सम्म ‘आं लोव़ टिने’ दे अरेना अरेन बाक्ती। येरमीया २५:४
8 तन्न मेकोपुकीमी आन नोफा मदाइक्तेम। आं देंशो लोव़ मटीमे। मेको आ पा ङा मेकोपुकीमी आन खकटा थुंमी मरिम्शो पा काइ मटीमे। गो मेको आन कली आं कबल ङा लोव़ नेल्ल पने, दे अरेता। तन्न मेको पने मबिस्सम” देंत। येरमीया ३:१७; येरमीया ७:२६; येरमीया १३:१०; येरमीया १८:१२; ब्यवस्था २८:१५-६८
9 मिनु परमप्रभु यावेम आं कली “यहूदा ङा मुरपुकी नु यरूसलेममी बाक्बपुकीम मरिम्शो पचा मिम्नीम।
10 मेको आन किकी पिपी आन मरिम्शो पतीक गे लेश्शा लाम्तेक्म। आं अरेशो मटीम। पाप गे लेश्शा लाम्तेक्म। अरु देवी देवता आन कली पूजा पा, मेको आन नोले खोइक्तेक्म। गो मेको आन किकी पिपी नु पशो कबल इस्राएल आ खिं ङा मुर नु यहूदा आ खिं ङा मुर नेल्लेमी क्याम्ताक्म” देंत।
11 मोपतीके परमप्रभु यावेमी “गो थमा पा, मेको आन कली ठेयब श्येत गेनुङमी। मिनु मेको रे प्रोक्ने मचाप्नीम। आं कली पुंइतेक्म हना यो, गो मेको आन लोव़ मनेंनुङ। भजन संग्रह १८:४२; यसैया १:१५; इजीकीएल ८:१८
12 मिनु नोले यहूदा सहर ङा मुरपुकी नु यरूसलेमम बाक्ब मुरपुकीमी लशा, मेको आन पूजा पशो देवी देवता आन कली पुंइनीम। तन्न मेकोपुकीमी मेको आन कली आन श्येत रे गेनायो मप्रोंइनीम। येरमीया २:२८; ब्यवस्था ३२:३७-३८
13 यहूदा, इ के दोशो सहर बाक्मा, मोशो इ देवी देवता दुम्तेक्म। यरूसलेममी गिश लां बाक्मा, मीश मुने दोक्तीक बाल देवता कली चढ़ेतीक सेल्तेक्म।
14 येरमीया, गे मेको जात ङा मुर आन पर्बम मपुनो। मेको आन पर्बम ङाक्शा प्रार्थना पा मपुनो। मारदे हना मेकोपुकी श्येत जामे ना मेको आन पुंइशो मनेंनुङ। येरमीया ७:१६
15 आं दाक्शो मुरपुकी आं खिं ओव़चा मार अधिकार बाक्बा? मेको नेल्ल मरिम्शो पाइब बाक्नीम। आं कली चढ़ेशो श्येम इन कली सजाइ गेतीक रे तेक्ने चाप्बा ङा? मिनु गे ग्येरने चाप्नीनी” दे परमप्रभु यावेमी देंत। रोमी ११:२८; होसे ८:१३
16 परमप्रभु यावेम इन कली रिम्शो फल सिप्ब दारशो गिगी तेल रवा, दे नें वोइक्तु। तन्न मेकोम ठेयब फश गिवार पपाइश्शा, मेको कली मी सुइक्ब। मिनु मेकोम आ राशी आन कली दाक्ब।
17 मुर नेल्ल आन परमप्रभु यावेम इन कली ख्रुम्तु। मिनु मेकोमी इन कली मरिम्शो पचशो बाक्ब। मारदे हना इस्राएल आ खिं ङा मुर नु यहूदा आ खिं ङा मुरुम मरिम्शो पाम्तेक्म। परमप्रभुमी “मेकोपुकीमी बाल देवता कली मार मार चढ़ेशा आं कली गाइक्पाइक्तीमी” देंत।
येरमीया कली साइक्चा माल्शो
18 परमप्रभु यावेम आं कली मेको मुरपुकीम मार पचा माल्शो बाक्मा, मेको कोंइशा तुइक्पाइक्ती। गे आं कली, आन मरिम्शो पचशो कोंइताक्यीनी।
19 गो साइक्चा कली लाइश्शो मारेइ पने मचाप्ब पाठा का खोदेंशो बाक्ती। मेकोपुकीमी आं पर्बम “एको रवा कली आ फल सुन्दा तिम्य। एको कली ब्रोंइशा बाक्ब आन रागी रे क्योरशा ताइक्तय। मिनु एको आ नें गेनायो ममिम्सेक्ल” देंशा मरिम्शो पशो गो मतुइक्तु। यसैया ५३:७
20 तन्न गे, मुर नेल्ल आन परमप्रभु यावे, ठीक पा निसाफ पाइनीनी। मिनु थुं नु सोक्त नाक्शा कोव़नीनी। गेमी मेको आन कली क्येक्क लेश्शो गो कोव़चा तङल। मारदे हना गो इन कली आं निसाफ पतीक जिम्मा गेशो बाक्नुङ। भजन संग्रह ७:१०; येरमीया १७:१०; येरमीया २०:१२
21 मोपतीके आं कली साइक्चा माल्ब अनाथोथ ङा मुर आन पर्बम परमप्रभु यावेम “मेको मुरपुकीम इ कली ‘परमप्रभु यावे आ नेंमी लोव़ मपावो। लोव़ पाप्तीवी हना, गे आंइ गुइ रे बेक्नेवे’ देंनीम। येरमीया १:१
22 मोपतीके मुर नेल्ल आन परमप्रभु यावेम ‘गो मेको आन कली सजाइ गेनुङमी। मेको आन ठिटा मुरपुकी तरवारम क्योरशा साइक्चा पुंइसीनीम। मिनु मेको आन तमी तौ चहिं अन्कालम बेक्नीम।
23 मेकोपुकी सुइ मब्रोंइनीम। मारदे हना मेको आन कली सजाइ गेतीक बर्सम गो अनाथोथ ङा मुर आन तार ठेयब श्येत चाक्नुङ’ ” देंशो बाक्ब।