17
पाप रे प्रोंइतीके नु निसाफ
1 परमप्रभु यावेमी “यहूदा आ पाप फलाम के मुतीकेम मुशा ब्रेक्शो बाक्ब। मेको हीरा पाइश्शो मुतीकेमी आन थुं नु आन चढ़ेतीक ङा ग्रोव़पुकीम मुशा ब्रेक्शो बाक्ब। २राजा २३:४-१८
2 मेको आन आलपुकीमी यो आन चढ़ेतीक नु आन मूर्ति पाइश्शो थाम आन कली मिम्नीम। मेको नेल्ल गिगी रवा आन पुंम नु लाइश्शो पहाड तार बाक्तेक्म।
3 मेको डांडा तार नु रूम बाक्तेक्म। मिनु इन रागी ङा शोंप नु इन रिम्शो मारेइ मारेइ थोव़क नेल्ल इन पाप पतीकेम रोइक्पाइक्नुङ। येरमीया १५:१३
4 इन पाप पतीकेम गो इन कली गेशो, इन थेरशो रू साम्नीनी। मिनु गो इन कली इन मतुइश्शो रागीम इन जोरी सत्रु आन वाइल दुम्पाइक्नन्नी। मारदे हना आं गाइक्तीके मी ब्रशो खोदेंशो बाक्ब। मिनु मेको गेना हना यो ब्रस ङा ब्रस बाक्ब” देंत।
5 परमप्रभु यावेम मार देंत देंशा हना “सु सुमी मुर आन कली थमा सुइक्नीमी, मेको सराप राइनीम। आन रां ङा सक्तिम थमा सुइक्ब यो सराप राइनीम। मारदे हना मेको आन थुं परमप्रभु यावे रे ङोन लशो बाक्ब। भजन संग्रह ११८:८; भजन संग्रह १४६:३; २इतिहास ३२:८
6 मेको गोरशो रागी ङा पोथ्रा रवा खोदेंशो बाक्नीम। मेकोमी रिम्शो दुम्मेनु यो, मारेइ मताइनीम। मेको मुर मबाक्तीक रागी ङा नेल्ल क्येङा सोव़शो खपीम नु हिक्सी बाक्शो रागीम बाक्नीम। येरमीया ४८:६
7 परमप्रभु यावे कली थमा सुइक्ब मुर आसीक रशो बाक्नीम। मेकोपुकीम परमप्रभु यावे कली आस पशो बाक्नीम। बजन संग्रह १४६:५
8 मेको ब्वाक्कु आ नेक्था ख्रुम्शो रवा खोदेंशो बाक्नीम। मेकोमी आन शाक्श खोला आ सुर सम्म चाक्दीत्नीम। मेको हुप्तानु, महिंनीम। मेको आन सफापुकी गेना हना यो गिगी बाक्नीम। नां पवानु मेको मारेइ सुर्ता मपाइनीम। मेको गेना हना यो फल सिप्ब बाक्नीम” देंत। भजन संग्रह १:३
9 मुर आन थुं नेल्ल क्येङा जोल पाइब बाक्ब। गेना हना यो दूली पाइब बाक्ब। मेको कली सुम रुप्ने चाप्बा ङा? १सामुएल १६:७; बजन संग्रह ७:१०; हितोपदेस १५:११; रोमी २:६
10 गो, परमप्रभु यावेमी मुर आन कली नाक्नुङ। आन थुंम मार बाक्मे, मेको कोव़नुङ। आन गाक्शो लां नु आन पशो कोव़शा, इनाम गेनुङमी।
11 मुर, आंम आ मपशो ब्वोफु पुप्ब क्येन्रे खोदेंशो बाक्ब। मेकोमी हेंथे पा शोंप चेम्ब। मेको आ ब्रोंइतीक नाक्ती उइक्थ दुम्मेनु, मेको आ शोंपोम मेको मुर कली प्रोंइब। मिनु आ बेक्ची ना मेको कली मूर्ख मिम्सीब। लूका १२:२०
12 ङोंइती रे मान तशा बाक्शो इन सक्ति पाइश्शो नित्तीके आंइ ब्रोंइशा बाक्तीक बाक्ब। येरमीया ३:१७
13 गे इस्राएली आन आस पशो परमप्रभु यावे, इन कली प्रोंइब नेल्ल मुने दोक्नीम। इन कली प्रोंइशा गाक्ब मुर नेल्ल फुरकुम नें ब्रेक्शो खोदेंशो ला बाक्नीम। मारदे हना मेकोपुकीमी गेना हना यो ब्रोंइचा गेब ब्वाक्कु, परमप्रभु यावे कली प्रोंइशो बाक्नीम। येरमीया २:१३
येरमीया आ पुंइशो
14 मिनु गो “परमप्रभु यावे आं कली सापाइय्यीनी। मिनु गो सानुङ। आं कली प्रोंइयीनी। मिनु गो ब्रोंइनुङ। मारदे हना गे आं सक्ति बाक्नीनी। प्रस्थान १५:२६; बजन संग्रह ६:३
15 मेकोपुकीमी आं कली ‘परमप्रभु यावे आ लोव़ ते बाक्म? मुल मेको नेल्ल गाप्ल’ देंतेक्म। बजन संग्रह ५:१९
16 तन्न गो इन गोठला दुम्तीक रे मप्रोक्ङ। गे तुइक्नीनी। गो नोले ङा नाक्ती सुर्ता पचा ममाल्नुङ, दे मिम्शो बाक्नुङ। गो मार देंङा, मेको इन ङोंइती बाक्ब।
17 गे आं कली हिंपाइक्ब मदुमीन। गो खतम दुम्चा ङा नाक्ती गेन आं ख्रुंइसीतीके बाक्नीनी।
18 आं कली खेदा पाइब आन कली मुने तोक्कीन। तन्न आं कली चहिं मुने मतोक्यीनी। मेकोपुकी हिंमल। तन्न आं कली चहिं हिंतीक रे प्रोंइयीनी। मेको आन ठेयब श्येत ङा नाक्त चाक्कीन। मेको आन कली निक्शी खेयप ङा श्येतम सतीन” देंती। बजन संग्रह ३५:४
नाइक्तीक नाक्त आ पर्बम लोव़
19 परमप्रभु यावेम आं कली “गे मुर आन ओव़तीक ठेयब लाप्चो आ नेक्था रपो। मेको लाप्चो रे यहूदा ङा पिप लाङगा खिंङगा पाइब। यरूसलेम ङा गारो ङा लाप्चो नेल्ल आन ङोंइती लशा रपो। नेहेम्याह १३:१५-२२
20 मिनु मेको आन कली ‘एको ठेयब लाप्चो रे पा आगा ओव़ब यहूदा ङा पिप, मेकेर ङा मुर नेल्ल नु यरूसलेममी बाक्ब मुर नेल्ल परमप्रभु यावे आ लोव़ नेनीन’ देनो” देंत।
21 परमप्रभु यावेमी “गेपुकी होस पा बाक्कीन। मिनु गे नाइक्तीक नाक्त ठेयब लाप्चो आगाम मारेइ भारी मकुरीन। यरूसलेम ङा गारो ङा ठेयब लाप्चो रे पा आगा मारेइ मओंइदीन। प्रस्थान २०:८-१०
22 ‘गेपुकी नाइक्तीक नाक्ती इन खिं रे भारी मकुरीन। मेको नाक्ती मारेइ गेय मपने। गो इन किकी पिपी आन कली शेंशो खोदेंशो पा नाइक्तीक नाक्त कली अरु नाक्ती खोदेंशो मपने। मारदे हना मेको आं नाक्त बाक्ब’ देंती। यसैया ५६:२
23 तन्न मेकोपुकीमी मनेनेम। आन नोफा मदाइक्तेम। मिनु मेको आन थुं खकटा दुम्तीके मटीमे नु शेंशो नेंने मबिस्सम। येरमीया ११:८
24 तन्न गेपुकीम आं लोव़ नेंतीनी हना, नाइक्तीक नाक्ती सहर नु ठेयब लाप्चो रे मारेइ भारी आगा मओंइताक्नी हना नु नाइक्तीक नाक्त आं नाक्त मिम्शा, मारेइ गेय मपाइतीनी हना,
25 दाऊद आ नित्तीकेम निप्ब पिप, आन गेय पाइब मुरपुकी एको सहर ङा ठेयब लाप्चो रे शाराम कीशो बग्गीम ङोइश्शा ओव़नीम। यहूदा ङा मुर नु यरूसलेममी बाक्ब जाक्नीम। मिनु एको सहरमी गेना हना यो मुर शुश बाक्नीम। येरमीया २२:४
26 मिनु यहूदा ङा सहर रे नु यरूसलेम आ एर ओंथ ङा गाउं रे, बेन्यामीन आ रागी रे, शेफेलाह ङा दिंम रे, पहाड रे नु नेगेब रे चोशा चढ़ेतीके, क्योरशा चढ़ेतीके, अन्न चढ़ेतीके, धूप चढ़ेतीक नु ‘गे रिम्शो पाइब बाक्नीनी’ दे चढ़ेतीके चाक्शा, परमप्रभु यावे आ खिंम जाक्नीम।
27 तन्न गेपुकीम आं लोव़ मनेंतीनी हना, नाइक्तीक नाक्ती आं नाक्त बाक्ब, दे ममिम्ताक्नी हना नु नाइक्तीक नाक्त भारी कुरशा यरूसलेम ङा ठेयब लाप्चो आगा ओव़तीनी हना, आं देंशो मबिस्साक्नी हना, गो यरूसलेम ङा ठेयब लाप्चोमी गेनायो मकाप्ब मी जेत्नुङ। मिनु मेकोमी यरूसलेम ङा दरवार दाक्ब” दे परमप्रभु यावेमी देंत। इजीकीएल २०:१२-१३