19
ब्रोल्शो गर
1 परमप्रभु यावेमी “लशा खप के ग्योंब सेल्ब रे ब्वाक्कु कुर पतीक ग्योंब का ग्यापो। मिनु का निक्शी मुर आन दाते ङा खाल्पा नु का निक्शी चढ़ेब आन कली लाइक्मी।
2 मिनु गे हिन्नोम आ तौ आ बेंसीम बाक्शो गम्टे लाप्चोम लावो। गो इ कली मार शेंदु, मेको लोव़ मेकेर ठेयब सेंदा पा नेंपाइक्मी। येरमीया ७:३१
3 यहूदा ङा पिप नु यरूसलेमम बाक्ब मुरपुकी परमप्रभु यावे आ लोव़ नेनीन। मुर नेल्ल आन परमप्रभु यावे, इस्राएली आन परमप्रभुमी ‘आं लोव़ नेनीन। गो एको रागीम थम मरिम्शो दुम्पाइक्नुङ’ मेको आ पर्बम लोव़ नेंब नेल्ल आन नोफा दाइक्नीम। २राजा २१:१२
4 मेको मुरपुकीमी आं कली प्रोंइतीमी। मिनु एकेर अर्को रागी ङा देवी देवता आन कली चढ़ेशा, एको रागी ग्रांग्रा दिशो सेल्तेक्म। मेको देवी देवता आन किकी पिपी नु यहूदा ङा पिपम यो मतुइश्शो बाक्तेक्म। मिनु मेकोपुकीम रागी कली दोस मताइब आन हुशेम प्रिंताक्म।
5 मेकोपुकीमी आंम आल आन कली बाल देवता कली मीम चोशा चढ़ेचा कली डांडाम थान सेल्ना सेल्न बाक्तेक्म। मेको मो पन, दे गो मअरेङमी। गो मेको मशेंदुमी। मोदेंशो गेनायो ममिम्तु। येरमीया ७:३१-३३; लेवी १८:२१
6 मोपतीके होस पा बाक्कीन। मेको बेंसी कली तोफेथ नु हिन्नोम आ तौ आ बेंसी, दे वोइश्शो नें प्रोंइनीम। मेको शुश नाक्त रिम्चा ममाल्नीनी। तन्न मेको कली मुर साइक्तीक बेंसी, दे नें वोइक्नीम। येरमीया ७:३२
7 गो एको रागीमी यहूदा नु यरूसलेम आस मिम्शो मदुम्पाइक्नुङ। गो मेको आन कली आन जोरी सत्रु आन ङोंइती तरवारम साइक्पाइक्नुङमी। सु सुम मेको आन कली साइक्चा दाक्नीमी, मेको आन गुइम गेनुङमी। आन बेक्शो रां चहिं सरीङ ङा चिक्ब नु रागीम बाक्ब ब्वाकी ङा जन्तु आन कली ब्वचा गेनुङमी।
8 मिनु गो मेको सहर कली हिंचा ङा सेल्नुङ। मिनु मेको सहर गेना हना यो शुक्शी पतीक दुम्ब। मेकेर रे सु सु गाक्मा, मेको ग्रीचोक पा हिंनीम। मिनु आ खतम दुम्तीके आ पर्बम आबी, आबी देंनीम। येरमीया १८:१६
9 मेको आन कली आन तमी तौ आन श्ये ब्वपाइक्नुङमी। सहर पुम्तीके मुर नेल्ल आन नेक्था ङा मुर आन श्ये ब्वाइनीम। आन जोरी सत्रु नु मेको आन कली साइक्चा माल्ब आन गेशो श्येतम मोदेंशो पाइनीम। लेवी २६:२९; ब्यवस्था २८:५३
10 मिनु नोले गे मेको ब्वाक्कु कुर पतीक खप के ग्योंब, गे नु लाइब आन ङोंइती प्रोलो।
11 मिनु गे मेको आन कली मुर नेल्ल आन परमप्रभु यावेमी ‘दोपा खप के ग्योंब सेल्ब आ ग्योंब गेनायो मबोंइसीचा ङा पा ब्रोल्मे, मोपा गो मेको मुर आन कली नु एको सहर आन कली प्रोल्नुङ। तोफेथमी मुर थिम्तीक मनुम्म सम्म बेक्शो मुर थिम्नीम। यसैया ३०:१२-१४; येरमीया ७:३२
12 गो एको सहर नु एकेर बाक्ब मुर आन कली मो पाइक्नुङमी। गो एको सहर कली तोफेथ खोदेंशो सेल्नुङ।
13 यरूसलेम ङा खिंपुकी नु यहूदा ङा पिप आन खिंपुकी तोफेथ खोदेंशो पा ग्रांग्रा दिचा ङा दुम्नीम। तेको तेको खिं तारी सरीङ ङा नां, तास्ला नु सोरुल आन कली चढ़ेशा, अरु देवी देवता आन कली तूचा थोव़क चढ़ेमे, मेको खिं नेल्ल ग्रांग्रा दिचा ङा दुम्नीम’ देनो” दे परमप्रभु यावेमी देंत। येरमीया ३२:२९; २राजा २३:१२; सेफन्याह १:३
14 मिनु परमप्रभु यावेमी येरमीया कली लोव़ पथ, तोफेथ सोइक्ताक्व। मिनु येरमीया मेकेर रे जाक्शा, परमप्रभु यावे आ खिं ङा लाङगाम बाक्शा, मुर नेल्ल आन कली
15 मुर नेल्ल आन परमप्रभु यावे, इस्राएली आन परमप्रभुमी मार देंत देंशा हना “गो एको सहर नु आ नेक्था ङा सहर ङा मुर नेल्ल आन कली आं ङोंइती देंशो ठेयब श्येत जपाइक्नुङमी। मारदे हना मेको आन थुं खकटा बाक्ब। मिनु आं लोव़ नेंचा मदाक्नीम” दे माइक्तीमी।