25
ग्याइश्शा लाइक्चा पुंइसीब
1 मिनु परमप्रभु यावेमी येरमीया कली यहूदा ङा मुर आन पर्बम लोव़ पाप्तु। मेना यहूदा ङा पिप योसीयाह आ तौ येहो-याकीमपिप दुम्शो ४ बर्स दुम्मेनु, बेबीलोन ङा पिप नेबुकदरेसर पिप दुम्शो बर्स का दुम्शो बाक्त। येरमीया ३६:१
2 मिनु परमप्रभु यावे आ लोव़ पाइब येरमीयामी यहूदा ङा मुर नेल्ल नु यरूसलेममी बाक्ब मुर नेल्ल आन कली मेको लोव़ पाप्तु।
3 यहूदा ङा पिप आमोन आ तौ योसीयाह पिप दुम्शो १३ बर्स रे मुल २३ बर्स सम्म परमप्रभु यावेमी आं कली लोव़ पना पन बाक्त। मिनु गो मेको लोव़ इन कली शेंस ङा शेंस बाक्शो बाक्ती। तन्न गेपुकीम इन नोफा मदाइक्तीनी। येरमीया १:२; येरमीया ३६:२
4 मिनु परमप्रभु यावेम आ लोव़ पाइब आन कली मोदें लोव़ पथ सोइक्स ङा सोइक्स पाप्तु हना यो, गेपुकीम मेको आन लोव़ मनेंनी। इन नोफा मदाइक्तीनी। येरमीया ७:२५-२६; येरमीया ११:७; येरमीया २६:५; येरमीया २८:८; येरमीया २९:१९; येरमीया ४४:४; २इतिहास ३६:१५-१६
5 मेकोमी “गे नेल्ल इन मरिम्शो पशो नु परमप्रभु यावे आ अरेशो मटितीके रे लेतीन। मिनु परमप्रभु यावेम इन कली नु इन किकी पिपी आन कली गेना हना यो कली गेशो रागीम बाक्चा ताइनीनी। येरमीया ७:३
6 अर्को रागी ङा देवी देवता आन कली पूजा पशा, ठेयब सेल्चा कली मेको आन नोले मखोतीन। इन गुइम सेल्शोमी आं कली मगाइक्पाइय्यीनी। मिनु गो इन कली मारेइ श्येत मगेनुङ” देंशो बाक्त।
7 परमप्रभु यावेमी “तन्न गेपुकीम आं लोव़मी नोफा मदाइक्तीनी। इन गुइम सेल्शोमी आं कली गाइक्पाइक्तीनी। मिनु गेपुकी आंमान सजाइ ताइब सेल्सीशो बाक्नीनी” देंत।
8 मोपतीके मुर नेल्ल आन परमप्रभु यावेमी “मारदे हना गेपुकीम आं लोव़ मटिनी।
9 गो उत्तर ङा जात नेल्ल नु आं गेय पाइब बेबीलोन ङा पिप नेबुकदरेसर कली ब्रेश्शा चाक्नुङमी। गो मेको आन कली एको रागी ङा मुर नु एर ओंथ ङा जात नेल्ल आन पर्बम चाक्नुङमी। मिनु गो मेको नेल्ल आन कली साइक्पाइक्नुङमी। गो मेको आन कली शुश हिंचा ङा, शुक्शी पाइक्चा पुंइसीब नु शिशी मताइब सेल्नुङमी। दानीएल ३:३१-३३
10 मिनु गो मेको आन रे थुं नाइश्शा बाक्तीके, ग्येरशो सेंदा नु ग्युम्ली ग्युम्ले आन सेंदा क्याम्नुङ। यात ग्रीशो नु बत्ती आ हाम्सो नेल्ल योल्नुङ। येरमीया ७:३४
11 एको रागी ङा खिं नेल्ल ब्रेश्शो नु मुर मबाक्शो दुम्नीम। मिनु एको जात ङा मुरपुकी ७० बर्स सम्म बेबीलोन ङा पिप आ वाइल दुम्नीम। २इतिहास ३६:२१; येरमीया २९:१०; एज्रा १:१-२
12 तन्न ७० बर्स गाम नोले, गो बेबीलोन ङा पिप नु कल्दी आन रागी कली मेको आन मरिम्शो पशो ङा सजाइ गेनुङ। मेको आन रागी गेना हना यो मुर मबाक्तीके सेल्नुङमी” दे परमप्रभु यावेमी देंत।
13 परमप्रभु यावेमी “मेको रागी कली आं देंशो लोव़ नेल्ल, एको किताबम ब्रेक्शो लोव़ नु आं लोव़ पाइब येरमीयामी रागी रागी नेल्ल ङा मुर आन कली पशो नोले दुम्ब लोव़ नेल्ल मेको रागीम मोइक्नुङ।
14 मिनु रागी रागी ङा मुर नु ठेयब पिपमी यहूदा ङा मुर आन कली वाइल सेल्नीम। गो मेको आन पशो नु आन गुइमी सेल्शो कोव़शा, मेको आन कली क्येक्क लेत्नुङमी” देंत। येरमीया २७:७
परमप्रभु आ गाइश्शो कचौरा
15 मिनु परमप्रभु यावे, इस्राएली आन परमप्रभुमी आं कली “आं गुइ रे आं गाइश्शोमी ब्रीशो अङगुर शांबु बाक्शो कचौरा ताक्को। मिनु इ कली सोइश्शो रागी रागी ङा मुर नेल्ल आन कली तूपाइक्मी। येरमीया ५१:७; यसैया ५१:१७; प्रकाश १४:१०
16 मेकोपुकीमी मेको तूशा, दिङ दाङ गोल्शा, मारेइ मिम्ने मचाप्नीम। मारदे हना गो मेको आन दातेमी तरवार सोइक्नुङ” देंत।
17 मोपतीके गो मेको कचौरा परमप्रभु यावे आ गुइ रे ताक्ता। मिनु गो परमप्रभु यावेमी सोइश्शो रागी नेल्ल नु मुर नेल्ल आन कली तूपाइक्तामी।
18 मिनु मुलाक्ती तशो खोदेंशो पा यरूसलेम नु यहूदा ङा सहर नेल्ल आन कली श्येत्थ नु मुर मबाक्तीके सेलो। मेकेर ङा पिप नु आन सरकार आ गेय पाइब मुर खतम दुम्नीम। मेको सहर शुक्शी पाइक्चा नु सराप पाइक्चा पुंइसीब दुम्त।
19 मेको प्रोंइशा यो इजीप्त ङा पिप फाराओ, मेको आ गेय पाइब मुर नेल्ले, मेको आ सरकार ङा मुरपुकी नु मेको आ मुर नेल्ल आन कली,
20 मेकेर बाक्ब अर्को रागी ङा मुर नेल्ले, ऊज रागी ङा पिप नेल्ले, पलिस्ती आन पिप नेल्ले, अश्कलोन, गाजा, एक्रोन नु अश्दोद सहरम लीशा बाक्शो मुर नेल्ल आन कली,
21 एदोम, मोआब नु अम्मोन ङा मुर नेल्ल आन कली,
22 टायर नु सीदोन ङा पिप नेल्ले, समुन्द्र आइक्ची हांबु ङा पिप नेल्ल आन कली,
23 देदान, तेमा, बूज नु आन चां एर ओंथ ख्रोइक्ब नेल्ल आन कली, येरमीया ९:२५
24 अराब रागी ङा पिप नेल्ल, गोरशो रागीम बाक्ब अर्को रागी ङा मुर आन पिप नेल्ल आन कली,
25 जिम्री ङा पिप, एलाम ङा पिप नु मादी ङा पिप नेल्ल आन कली,
26 मिनु उत्तर गे आ नेक्था नु ङोन बाक्ब पिप नेल्ल आन कली का का पा तूपाइक्तामी। मिनु नोले अर्को रागीम बाक्शो राज्य नेल्ल ङा मुर आन कली तूपाइक्तामी। मिनु मेको नेल्ल आन नोले शेशाक ङा पिपमी यो मेको तूचा माल्ब। शेशाक बेबीलोन आ अर्को नें बाक्ब। येरमीया ५१:४१
27 मिनु नोले गे मेको आन कली “मुर नेल्ल आन परमप्रभु यावे, इस्राएली आन परमप्रभुमी मार देंत देंशा हना ‘गे मेको तूशा दुक्शा मेने। मिनु गेना यो मबोक्चा ङा पा गोलीन। गो इन दातेम सोइश्शो तरवार आ पर्बम मो दुम्ब’ दे माइक्मी।
28 तन्न मेकोपुकीमी इ गुइ रे मेको कचौरा तूने मबिस्साक्म हना, गे मेको आन कली मुर नेल्ल आन परमप्रभु यावेमी ‘गेपुकीम मेको तूचान माल्नीनी’ देंशो बाक्ब” दे माइक्मी।
29 मेकोमी “कोव़ङीन, मुल गो आं नेंम वोइश्शो सहर कली श्येत गेचा चिक्शो बाक्नुङ। मिनु मार, गेपुकी चहिं सजाइ मतथु ब्रोंइनीनी ङा? इन कली सजाइ मगेथु मप्रोंइसीब। मारदे हना गो रागीम बाक्ब मुर नेल्ल आन पर्बम तरवार का ठीक पशो बाक्ती, दे मुर नेल्ल आन परमप्रभु यावेमी देंत” दे माइक्मी। इजीकीएल ९:६; १पत्रुस ४:१७; येरमीया ४९:१२
30 परमप्रभु यावेमी “मुल गे मेको नेल्ल आन पर्बम एको आं लोव़ पावो। मेको आन कली ‘परमप्रभु यावे इर आ बाक्तीक रे ब्वाक्ब। आ बाक्तीक रे आ सेंदा ग्रुंइब। मिनु आंम रागी आ पर्बम मेको ठेयब सेंदा पा ब्वाक्ब। रागीम बाक्ब नेल्ल आन पर्बम अङगुर ख्राक्ब खोदेंशो पा ग्रीब। होसे ११:१०; योएल ४:१६; आमोस १:२
31 मेको रेयके पा, थोप्ला दाइश्शो, रागी ङा सुर सम्म नेंसीब। मारदे हना परमप्रभु यावेम रागी रागी आन कली दोस गेब। मिनु मेकोमी मुर नेल्ल आन कली निसाफ पाइब। मिनु दोस ताइब तरवारम क्योरचा पुंइसीनीम’ दे माइक्मी” देंत।
32 मुर नेल्ल आन परमप्रभु यावेमी “कोव़ङीन शुश श्येत दुम्तीक रागी का रे अर्को रागी सम्म ब्रना ब्रन लाइब। रागी आ सुर रे हिंचा ङा फश गिवार जाक्ना जाक्न बाक्ब” देंत।
33 मेको नाक्ती परमप्रभु यावे आ साइश्शोपुकी रागी आ सुर का रे अर्को सुर सम्म बाक्नीम। मेको आन पर्बम सुइ रोंका मपाइनीम। मेको बेक्शो मुर आन कली सुइमी खुप्शा मथिम्नीम। मेको आन कली सुइम मथिम्नीम। मेकोपुकी खपीम मोव़ल खोदेंशो दुम्नीम। येरमीया ९:२१
34 गे गोठलापुकी रोंका पने। मिनु वाइ ब्रेश्शा ङाक्कीन। गे मेको बगाल ङा लां कोंइबपुकी पुलुम दिङ दाङ गोलीन। मारदे हना इन कली क्योरशा साइक्तीक नाक्त जाक्शो बाक्ब। गेपुकी गोल्नीनी। मिनु शुश क्येट लाइब ग्योंब खोदेंशो पा प्रोल्चा पुंइसीनीनी। येरमीया २३:१
35 गोठला आन कली प्रोक्तीक तेइ मबाक्ब। बगाल ङा लां कोंइब आन ब्रोंइतीक लां तेइ मबाक्ब।
36 गोठला आन ङाक्शो नेनीन। बगाल आन कली लां कोंइब आन हिंमा क्येम्स पशो नेनीन। मारदे हना परमप्रभु यावेम मेको आन बस्तु योव़तीके क्याम्चा चिक्शो बाक्ब।
37 परमप्रभु यावे आ ठेयब पा गाइश्शोम मेको रिम्शो बस्तु योव़तीके खतम दुम्नीम।
38 गुप्सम खोदेंशो पा मेकोमी आ बाक्तीके प्रोंइतु। मारदे हना मेको आन रागी साइक्ब तरवार नु परमप्रभु आ गाइक्तीक आ पर्बम मुर मबाक्तीके दुम्त। येरमीया ४:७