35
येरमीया नु रेकाबी
1 यहूदा ङा पिप योसीयाह आ तौ येहो-याकीमम सासन पवा ना परमप्रभु यावेम येरमीया कली लोव़ पाप्तु। २राजा २३:३४
2 मार, लोव़ पाप्तु देंशा हना “गे रेकाबी आन खिं लशा, मेकोपुकी नु लोव़ पावो। मेको आन कली परमप्रभु यावे आ खिं ङा कोठा कामी ओंइदीमी। मिनु मेको आन कली अङगुर शांबु ख्रेत्तीमी” देंत। १इतिहास २:५५
3 मोपतीके गो हाबासीन्याह आ तौ येरमीया, आ तौ याजन्याह नु मेको आ लोक्बपुकी, मेको आ तौ नेल्ल नु रेकाबी आन खिं ङा मुर नेल्ल आन कली लाइक्तामी।
4 मिनु गो मेको आन कली परमप्रभु यावे आ खिंम परमप्रभु आ मुर हानान आ तौ आन कोठाम चाक्तामी। हानान परमप्रभु आ मुर यिग्दाल्याह आ तौ बाक्त। मेको कोठा चहिं ठेयब मुर आन कोठा आ नेक्था बाक्त। मेको शाल्लुम आ तौ लाप्चो खाल पाइब, मासेयाह आ कोठा आ तार बाक्त।
5 मेको नोले गो अङगुर शांबु आ गर नु बोटकोपुकी रेकाबी आन ङोंइती वोइक्ता। मिनु मेको आन कली “अङगुर शांबु तूङीन” दे माइक्तामी।
6 तन्न मेकोपुकीमी “गो अङगुर शांबु मतूनीकी। मारदे हना रेकाब आ तौ आंइ किकी योनादाबम आंइ कली ‘गेपुकी नु इन आलपुकीम गेनायो अङगुर शांबु मतूङीन। २राजा १०:१५
7 मेको प्रोंइशा यो गेपुकीम गेनायो खिं मसेलीन। वांचेर मशोक्कीन। अङगुर मख्रुमीन। गेपुकीम मोदेंशो गेय गेनायो मपने। तन्न इन बाक्शो रागीम शुश सम्म ब्रोंइमल, दे गेना हना यो ताम्बुपुकीम बाक्शा हिरशा गाक्कीन’ दे शेंशो बाक्त।
8 मिनु गो आंइ किकी रेकाब आ तौ योनादाब आ शेंशो नेल्ल पाइतक। गोपुकी आंमा नु आंइ मीशपुकी नु आंइ तमी तौ नेल्लेम गेनायो अङगुर शांबु मतूक।
9 गो बाक्चा कली खिं यो मसेल्नीकी। अङगुर रू, अरु रू नु वांचेर गोपुकी नु मबाक्ब।
10 गो ताम्बुम बाक्शा, आंइ किकी योनादाबम शेंशो नेल्ल पाइतक।
11 तन्न बेबीलोन ङा पिप नेबुकदरेसरमी एको रागी कली लडाइ तोप्तु। मिनु गोपुकीम ‘कल्दी नु अरामी आन लडाइ पाइबपुकी रे प्रोक्चा कली यरूसलेम लय’ देंतक। मोपतीके गो यरूसलेममी बाक्शो बाक्नीकी” देंतेक्म।
12 मिनु नोले परमप्रभु यावेम येरमीया कली लोव़ पाप्तु।
13 मुर नेल्ल आन परमप्रभु यावे, इस्राएली आन परमप्रभुमी मार लोव़ पाप्तु देंशा हना “गे यहूदा ङा मुर नु यरूसलेममी बाक्ब आन कली लशा ‘मार, गे आं देंशो मपाइनीनी? मिनु आं लोव़ मटीनीनी?’ देंत” दे माइक्मी।
14 परमप्रभु यावेमी “मार, रेकाब आ तौ योनादाबम आ चच युइ आन कली ‘गेपुकीम अङगुर शांबु मतूङीन’ दे शेंशो लोव़ मेकोपुकी टीनीमी। मोपतीके मेकोपुकीमी मुल सम्म अङगुर शांबु मतूनीम। मारदे हना मेकोपुकीमी आन किकी पिपीम शेंशो टिशो बाक्नीम। तन्न गो इन कली लोव़ पना पन बाक्ती। मो हना यो गेपुकीम आं लोव़ मटिनी। येरमीया २५:४
15 गो इन कली आं गेय नु आं लोव़ पाइब आन कली सोइक्ना सोइक्न बाक्ती। मेकोपुकीमी इन कली ‘गे नेल्ल इन मरिम्शो लां रे लेतीन। मिनु इन मरिम्शो गेय रिम्शो सेलीन। मिनु देवी देवता आन कली पूजा पचा नु आन नोले खोइक्चा प्रोनीन। मिनु गे इन किकी पिपी आन कली गेशो रागीम बाक्चा ताइनीनी’ देंती। तन्न गेपुकीम आं देंशो लोव़ मनेंनी नु मटिनी। मत्ती २३:३७
16 रेकाब आ तौ योनादाब आ चच युइमी आन किकी पिपीमी अरेशो टीनीम। तन्न एको मुरपुकीम आं देंशो मटिशो बाक्नीम” देंत।
17 मोपतीके मुर नेल्ल आन परमप्रभु यावे, इस्राएली आन परमप्रभुमी “नेनीन, गो यहूदा नु यरूसलेमम बाक्ब मुर आन कली आं देंशो ठेयब श्येत नेल्ल चाक्नुङ। मारदे हना गो मेको आन कली लोव़ पाता, तन्न मेकोपुकीमी मनेनेम। गो मेको आन कली ब्रेत्ताक्ङमी, तन्न मेकोपुकीमी लोव़ मलेत्तीमी” देंत। येरमीया ७:१३-१५
18 मिनु येरमीयामी रेकाबी आन चच युइ आन कली “मुर नेल्ल आन परमप्रभु यावे, इस्राएली आन परमप्रभुमी गेपुकीम इन किकी योनादाब आ देंशो टिना टिन नु मेको आ शेंशो नेल्ल नु इन कली अरेशो नेल्ल पाइतीनी।
19 मोपतीके रेकाब आ तौ योनादाब आ चच युइ का गेना हना यो आं ङोंइती बाक्चा ताइब” दे मुर नेल्ल आन परमप्रभु यावे, इस्राएली आन परमप्रभुम देंत।