37
येरमीया कली चोक्शो
1 बेबीलोन ङा पिप नेबुकदरेसरमी योसीयाह आ तौ सिदकीयाह कली यहूदा ङा पिप सेल्शो बाक्त। मिनु येहो-याकीम आ तौ कोन्याह आ पा ङा मेकोमी सासन पचा गोप्तु। येहो-याकीम आ अर्को नें कोन्याह बाक्ब।२राजा २४:१७
2 मिनु मेको, मेको आ गेय पाइबपुकी नु मेको रागी ङा मुर नेल्लेम परमप्रभु यावे आ लोव़ पाइब येरमीया आ देंशो परमप्रभु यावे आ लोव़ मनेंनेम।
3 मो हना यो पिप सिदकीयाहम शेलेम्याह आ तौ येहुकल नु मासेयाह आ तौ चढ़ेब सेफन्याह आस कली परमप्रभु यावे आ लोव़ पाइब येरमीया आ बाक्तीकेम “आंइ पर्बम इं परमप्रभु यावे नु पुंइशा गेने” देंथ, मुर सोइक्ताक्व। येरमीया ७:१६; येरमीया ४२:२
4 मेना सम्म येरमीया मुर आन दातेमी एर ओंथ गाक्ना गाक्न बाक्त। मारदे हना मेना सम्म मचोक्सीशो बाक्त।
5 मेना फाराओ आ लडाइ पाइबपुकी इजीप्त रे जाक्शो बाक्तेक्म। मिनु कल्दी ङा मुरपुकीमी यरूसलेम कली एर ओंथ नेल्ल रे पुम्शो लोव़ नेंतेक्म। मिनु मेकोपुकी यरूसलेम रे नोले शोंइसाक्म।
6 मिनु परमप्रभु यावेम येरमीया कली लोव़ पाप्तु।
7 मार लोव़ पाप्तु देंशा हना “परमप्रभु यावे, इस्राएली आन परमप्रभुमी ‘यहूदा ङा पिपम आं कली हिल्लो पथ इ बाक्तीक सोइक्ताक्व। मेको कली इ कली वारच पाइक्थ जाक्ब फाराओ आ लडाइ पाइब आन रागी इजीप्त लेश्शा लाइनीम, दे मतो।
8 मिनु कल्दी लेश्शा जाक्नीम। मिनु एको सहर कली लडाइ तोइनीम। मिनु मेकोपुकीमी एको सहर ग्राशा, मीम क्रोइक्नीम’ देंशो बाक्ब, देंत, मतो” देंत। येरमीया ३४:२२
9 परमप्रभु यावेमी “गेपुकीमी कल्दीम थमा पा आंइ कली लडाइ तोइनीम, दे मिम्तीन। मारदे हना मो पाइनीम।
10 गेपुकी नु लडाइ पाइब कल्दी नेल्ल आन कली गे ग्रातीनी हना, मेको आन गार दुम्शोपुकी ला आन ताम्बुम लीतेक्म हना यो, मेकोपुकी जाक्शा एको सहर कली मी सुइक्नीम” देंत।
11 फाराओ आ लडाइ पाइबपुकीम पतीके कल्दी यरूसलेम रे नोले शोंइसीची ना
12 येरमीया आं रू ङा भाग ताक्चा कली यरूसलेम रे ग्रूशा बेन्यामीन आ रागी गे लचा गोप्तु। येरमीया ३२:८-९
13 मिनु मेको बेन्यामीन लाप्चोमी जाक्दीम्मेनु, हनान्याह आ चच शेलेम्याह आ तौ खाल पाइब आन ठेयब मुर इरीयाहम येरमीया कली ग्याइश्शा “गे प्रोक्शा कल्दी आन बाक्तीकेम लशो बाक्नेवे” देंत।
14 मिनु येरमीयामी “एको लोव़ थमा ममाइ। गो कल्दी आन बाक्तीके प्रोक्शा लशो मनङ” देंत। तन्न इरीयाहम मेको आ लोव़ मनेन। मिनु मेकोमी येरमीया कली ग्याइश्शा ठेयब मुर आन बाक्तीके चाक्तु।
15 मिनु मेकोपुकी येरमीया तशा गाइक्ताक्म। मिनु मेको कली तुप्शा, ब्रेक्ब योनाथन आ खिंम चोक्शा वोइक्तेक्म। मारदे हना मेको खिं जेल्खान सेल्शो बाक्तेक्म। येरमीया २०:२
16 मेकोपुकीमी येरमीया कली जेल्खानम चोक्तेक्म। मिनु येरमीया थम छिङछिङम शुश नाक्त सम्म बाक्त।
17 मिनु पिप सिदकीयाहम मेको कली ग्रुंइथ सोइक्ताक्व। मिनु मेको कली दरवारम चाक्शा सुइम मतुइक्चा ङा पा “मार, परमप्रभु यावे रे पा मारेइ लोव़ बाक्मे?” दे हिल्लो पाप्तु। मिनु येरमीयामी “ओं, बाक्ब। गे बेबीलोन ङा पिप आ गुइम गेचा पुंइसीनीनी, देंशो बाक्ब” देंत।
18 मिनु येरमीयामी पिप सिदकीयाह कली “गो इन कली, इन गेय पाइब ठेयब मुर आन कली नु एको मुर आन कली मार पङा ङा? गे मारदे आं कली जेल्खानम चोक्यीनी?
19 इन कली नु एको रागी कली लडाइ तोचा कली बेबीलोन ङा पिप मजाक्ब, दे इन कली देंब, परमप्रभु यावे आ लोव़ पाइबपुकी ते बाक्मा?
20 तन्न मुल आं प्रभु, पिप गो इन कली पुंइनुङ। आं पुंइशो लोव़ नेनीन। आं देंचा माल्शो लोव़ इन ङोंइती देंचा तङल। गो आं कली ब्रेक्ब योनाथन आ खिंम मसोइक्तीनी। मो दुम्त हना, गो मेकेर बेक्नुङ” देंत।
21 मिनु पिप सिदकीयाह आ हुकुममी येरमीया पिप आ दरवार खाल पाइब मुर आ जेल्खानम वोइक्चा पुंइसाक्व। मिनु सहर ङा शोब्ले चोतीक रे मनुम्म सम्म, नाक्त किंत किंत मेको कली शोब्ले चाक्शा गेम्तेक्म। मोपा येरमीया पिप आ दरवार खाल पाइब आ जेल्खान ङा लाङगाम बाक्त। येरमीया ३२:२