49
अम्मोन आ पर्बम लोव़
इजीकीएल २५:३-७; आमोस १:१३-१५; सेफन्याह २:८-११
1 अम्मोनी आन पर्बम परमप्रभु यावेमी “मार, इस्राएल आ तौपुकी मबाक्नीमी? मार, मेको आ हक ताइब सुइ मबाक्नीमी? मारदे मिल्कोम देवता आ मुरपुकीमी गाद आ बाक्तीके आन के सेल्मे? मिनु मारदे मिल्कोम आ मुर सहरम बाक्थ लमा?” देंत। मिल्कोम देवता मोलेक यो देंनीम।१राजा ११:५
2 मोपतीके परमप्रभु यावेमी “गो अम्मोनी आन रब्बाह कली लडाइ ङा तुराही ताप्शो नेंपाइक्नुङ। मेको श्येत्थ डांडा खोदेंशो दुम्ब। मिनु मेको आ एर ओंथ ङा गाउं मीम क्रोइक्चा पुंइसीनीम। मेना इस्राएलमी आ कली रोइक्ब आन कली रोइक्ब” दे परमप्रभु यावेमी देंत।
3 परमप्रभु यावेमी “हेश्बोन रोंका पावो। मारदे हना ऐ सहर खतम पोक्शो बाक्ब। गे रब्बाह ङा तमी, वाइ ब्रेश्शा ङाक्कीन। भाङग्रा फेंसीशा रोंका पने। वाम ग्याम दुम्शा एर ओंथ दोरीन। मारदे हना मिल्कोम, आ चढ़ेबपुकी नु आ नोले खोइक्ब ग्याइश्शा लाइक्चा पुंइसाक्म।
4 गे मारदे इ सक्तिम ठेयब लेश्शा बाक्नेवे? इ सक्ति ग्युम्ब। गे हेंथे गाक्ब तमी, गे इ शोंप कली थमा सुइश्शा ‘सुमी आं कली लडाइ तोइबा ङा’ देंनेवे।
5 गो परमप्रभु, मुर नेल्ल आन परमप्रभु यावे नङ। गो इ नेक्था बाक्ब मुर रे हिंतीक श्येत गेपाइक्नुङ। गे नेल्ल एर ओंथ फ्रचा पुंइसीनीनी। मिनु प्रोक्शो आन कली खुप्ब सुइ मबाक्नीम।
6 मो हना यो गो नोले अम्मोनी आन शोंप लेश्शा गेनुङ” दे परमप्रभु यावेमी देंत। येरमीया ४८:४७
एदोम आ पर्बम लोव़
यसैया २१:११; यसैया ३४:५-१५; इजीकीएल २५:१२-१४; आमोस १:११-१२
7 मुर नेल्ल आन परमप्रभु यावेमी एदोम आ पर्बम “मुल तेमान सहरम तुइक्तीक मबाक्बा ङा? मार, रुप्ब मुर आन अर्ती जाम्शा लमे? मार, मेको आन रुप्तीक योल्मे?
8 ए देदानम बाक्बपुकी, लेश्शा प्रोक्कीन। लुक्च लने। मारदे हना गो एसाव कली सजाइ गेची ना मेको कली हिंचा ङा श्येत गेनुङ।
9 अङगुर सेक्बपुकी इ बाक्तीके जाक्तेक्म हना, मार, मेकोपुकीम अरु सीला गुप्तीके मप्रोंइनीमी ङा? मार, नाक्दो खुइ जाक्शो नम हना, मेकोपुकीमी आन कली माल्शो थोव़क ला मलाइक्नीमी ङा?
10 तन्न गो एसाव कली शिश्रा सेल्ता। गो मेको आ ख्रुइक्तीक नेल्ल तांइसीतीके सेल्ता। मिनु मेको ख्रुइक्चा मताइब। मेको आ आल, आ खिं ङा मुर, आ नेक्था बाक्ब नु आंमा यो मली।
11 इ रोम रोइक्च आन कली प्रोंइशा वोतो। गो मेको आन कली कोव़नुङमी। मिनु वोंइश बेक्शो मीश मुरपुकीमी यो आं कली थमा सुइक्चा तामेक्ल” देंत।
12 परमप्रभु यावेमी “श्येत ङा कचौरा तूचा ममाल्शोमी यो मेको तूचा माल्ताक्व हना, मार, गे सजाइ मतथु ब्रोंइचा ताइनेवे? गे सजाइ तचा माल्नेवे। गे मेको तूचा माल्नेवे। येरमीया २५:१५,२८,२९; भजन संग्रह १३७:७
13 मारदे हना बोज्रा ब्रेश्शा हिंचा ङा, शुक्शी पाइक्चा पुंइसीब, श्येत्थ नु सराप पाइक्तीके दुम्ब, दे आं नेंम कसम जाता। मिनु आ सहर नेल्ले गेना हना यो कली ब्रेश्शा लीनीम” देंत।
14 गो परमप्रभु यावे आ लोव़ कुरब रे पा लोव़ का नेंता। लोव़ कुरब का रागी रागी ङा मुर आन पर्बम सोइश्शो बाक्ब। मेकोमी “लडाइ तोचा कली बुक्कीन। लडाइ पचा कली सासीन” देंत।
15 परमप्रभु यावेम “मुल गो इ कली रागी रागी आन दाते ङा नेल्ल क्येङा आइक्च सेल्नन। मुरपुकीमी इ कली महिक्नीम।
16 गे सेरथे फुल्लु आ पुक्खीम बाक्नेवे। इ हिंच कोंइतीके नु इ थुं ङा ठेयब लेत्तीकेमी इ कली जोल पाम्ताक्स। गे डांडा ङा बाक्तीक आंम के सेल्तीवी। गेमी इ बाक्तीक ककाकुली आ ग्योव़ खोदेंशो पा इर सेल्तीवी हना यो, गो इ कली मेकेर रे उइ तोक्नन” दे परमप्रभु यावेम देंशो बाक्ब।
17 परमप्रभु यावेम “एदोम थम हिंचा ङा दुम्ब। सु सु मेकेर लाइनीमी, मेको एदोम आ शुश श्येत तशा हिंनीमी। मिनु शुक्शी पाइनीम।
18 दोपा सोदोम, गोमोररा नु मेको आस एर ओंथ ङा सहर नेल्ल श्येत्थ दुम्मा, मोपा मेकेर सुइ मलीनीम। सुइ मबाक्नीम। येरमीया ५०:४०; यसैया १:९
19 यर्दन आ नेक्था ङा ठेयब ब्वाकी रे बस्तु भाव योव़तीकेम गुप्स जाक्शो खोदेंशो पा गो एदोम कली याम कामी मेको आ रागी रे ग्रुंइनुङ। गो सु कली सासन पचा कली योव़ङु, मेको कली गेनुङ। आं खोदेंशो सु बाक्बा? आं कली सुम अरेने चाप्बा ङा? तेको गोठला आं ङोंइती राप्ने चाप्बा ङा?” दे परमप्रभु यावेमी देंत येरमीया ५०:४४-४६
20 मोपतीके परमप्रभु यावेम एदोम आ पर्बम पचा चिक्शो गेय नु तेमान सहरम बाक्ब आन पर्बम मेको आ मिम्शो दोदेंशो बाक्बा, मेको नेनीन। थमा पा बगाल ङा आइक्च कीशा लाइक्चा पुंइसीनीम। मेको आन पतीके आन योव़तीक खतम दुम्ब।
21 मेको आन गोल्शो रेयकेमी रागी ख्रिंख्रि पाइब। मेको आन वाइ ब्रेश्शो लल समुन्द्र सम्म नेंसीब।
22 कोव़ङीन, मेको ककाकुली खोदेंशो पा बेरशा जाक्ब। मिनु मेको जुक्शा बोज्रा तार मेको आ फ्रां हाम्ब। मेको नाक्ती एदोम ङा लडाइ पाइब आन थुं सुत्केरी रोइ पशो मीश मुर आन थुं खोदेंशो दुम्ब। येरमीया ४८:४०
दमस्कस आ पर्बम लोव़
यसैया १७:१-३; आमोस १:३-५
23 परमप्रभु यावेमी दमस्कस आ पर्बम “हमाथ नु अरपाद वाम ग्याम दुम्शो बाक्नीस। मारदे हना मेको निक्शीमी मरिम्शो लोव़ नेंताक्स। मेको हिंशा आस थुं ग्येत्थ लुक्च दुम्शो बाक्नीस। मिनु समुन्द्र खोदेंशो पा सिक्सी पा बाक्ने मचाप्नीस।
24 दमस्कस मचाप्ब दुम्शो बाक्ब। मेको प्रोक्त। मेको शुश हिंब। मेको सुत्केरी रोइ पशो मीश मुर खोदेंशो पा सुर्ता पा हिंब।
25 दोपा मेको नें चलेशो सहर प्रोंइचा पुंइसे? मेको सहर ङा मुर शुश ग्येरसाक्म।
26 मुल मेको आ ठिटा मुरपुकी लां मेर गोल्नीम। मिनु मेको नाक्ती मेको आ लडाइ पाइब नेल्ल खतम दुम्नीम।
27 गो दमस्कस ङा गारोपुकीम मी सुइक्नुङमी। मेकोमी बेन-हादाद आ गारो हिरशो सहर खतम सेल्ब” दे मुर नेल्ल आन परमप्रभु यावेम देंत।
केदार नु हासोर आस पर्बम लोव़
28 बेबीलोन ङा पिप नेबुकदरेसरम केदार नु हासोर आस कली ग्रात। एको केदार नु हासोर आस पर्बम पशो लोव़ बाक्ब। मिनु परमप्रभु यावेमी “बोक्कीन। केदार मेर लने। पूर्ब ङा मुर आन कली खतम पोक्कीन। यसैया २१:१६-१७; यहोसु ११:१०
29 मेको आन ताम्बु, मेको आन क्यारश भेडा, मेको आन वासी नु आन मारेइ मारेइ लतीन। आन दलओंठ रोइश्शा आंम के सेल्सीन। मिनु मुरपुकीम ‘एर ओंथ नेल्ल हिंचा ङा श्येत बाक्ब’ दे ग्रीचा माल्नीम। येरमीया २०:३
30 ए, हासोरम बाक्बपुकी, रीब पा प्रोक्कीन। लुक्च लशा ख्रुइश्शा बाक्कीन। बेबीलोन ङा पिप नेबुकदरेसरमी इन कली मरिम्शो पचा मिम्शो बाक्ब। मेकोम इन कली मरिम्शो पचा कली गेय का पशो बाक्ब” दे परमप्रभु यावेमी देंत।
31 मिनु “बेबीलोन ङा पिप नेबुकदनेसरमी इन कली श्येत गेचा मिम्ब। इन कली मरिम्शो पचा मिम्ताक्व। बोक्कीन, थुं नाइश्शा रिम्शो पा बाक्ब मुर गे बारीन। मेको रागी ङा मुर आन के ठेयब लाप्चो नु चोक्तीके मबाक्नीम। मेको रागी ङा मुर अरु क्येङा ङोन बाक्नीम।
32 मेको आन दलओंठ रोइक्चा पुंइसीनीम। आन बी ब्यफ यो रोइक्चा पुंइसीनीम। मेको चां प्रेक्शो मुर आन कली तेइ तेइ ब्रपाइक्नुङमी। मिनु मेको आन कली हिंचा ङा श्येत गेनुङ। येरमीया २५:२३
33 हासोर सिवार आन बाक्तीके दुम्ब। मेको गेना हना यो कली मुर मबाक्तीक रागी दुम्ब। मेकेर सुइ मबाक्नीम, मेकेर सुइ मुर बाक्थ मलाइनीम” दे परमप्रभु यावेम देंत। येरमीया ४९:१३
एलाम आ पर्बम लोव़
34 यहूदा ङा पिप सिदकीयाहम सासन पचा गोवा ना परमप्रभु यावेम आ लोव़ पाइब येरमीया कली एलाम आ पर्बम लोव़ पाप्तु। येरमीया २५:२५
35 मुर नेल्ल आन परमप्रभु यावेम मार लोव़ पाप्तु देंशा हना “गो एलाम आ लिब्रा जिक्नुङ। मेको आन लिब्रा आन ठेयब सक्ति बाक्ब। यसैया २२:६
36 गो एलाम ङा मुर आन कली सरीङ आ एर ओंथ नेल्ल रे फश गिवार पपाइश्शा एर ओंथ ब्रपाइक्नुङमी। एलाम ङा ग्याइश्शा लाइक्चा पुंइसीशो नेल्ल रागी रागीम ब्राइनीम।
37 मेको एलाम ङा मुर आन कली, आन जोरी सत्रु नु मेको आन कली साइक्चा माल्ब आन ङोंइती शुश हिंब सेल्नुङमी। गो मेको आन कली ठेयब श्येत गेनुङ। गो मेको आन कली साइक्ने मथुमु सम्म मेको आन नोले तरवार सोइक्नुङ। इजीकीएल ३२:२४
38 गो आं नित्तीके एलामम सेल्नुङ। मिनु मेकेर ङा पिपी नु मेको आन ठेयब मुर आन कली साइक्नुङमी” दे परमप्रभु यावेमी देंत।
39 परमप्रभु यावेमी “मो हना यो गो मुल नोले ङा नाक्ती एलाम ङा मुर आन शोंप लेश्शा गेनुङमी” दे परमप्रभु यावेमी देंत।