51
बेबीलोन खतम दुम्‍शो
मिनु परमप्रभु यावेमी “गो बेबीलोन नु लेब-कमाइ ङा मुर आन पर्बम खतम सेल्‍ब फश गिवार कली सोइक्‍नुङ। खतम सेल्‍ब फश गिवार कली यो खतम सेल्‍ब सोक्‍त देंसीब। गो बेबीलोन कली क्राप्‍ब मुर सोइक्‍नुङमी। मेकोपुकीम बेबीलोन आ श्‍येत जतीक नाक्‍ती आ एर ओंथ नेल्‍ल रे जाक्‍शा, मेको आ रागी श्‍येत्‍थ सेल्‍नीम। येरमीया १५:७ लिब्रा आप्‍बम आ लिब्रामी ब्रा मचुइक्‍तल। मिनु लडाइ पाइबमी आ लडाइ ङा वा मफेक्‍सेक्‍ल। मेको आ ठिटा मुर आन कली मप्रोनीन। मेको आ लडाइ पाइब नेल्‍ल आन कली सतीन। मेकोपुकी कल्‍दी आन रागीम साइक्‍चा पुंइसीनीम। मेकोपुकी आ लां मेर गार दुम्‍शा गोल्‍नीम। मिनु इस्राएल नु यहूदा परमप्रभु, मुर नेल्‍ल आन परमप्रभु यावे रे मप्रोंइसीशो बाक्‍ब। मेको आन रागी इस्राएली आन का ला बाक्‍शो परमप्रभु यावे कली पापम ब्रीशो बाक्‍ब। यसैया ५४:४; येरमीया ५०:२९
बेबीलोन आ दाते रे प्रोक्‍कीन। मुर नेल्‍ल आंम आंम गिंम प्रोंइचा कली प्रोक्‍कीन। मेको आ दोसम पतीकेम गे मबेक्‍कीन। मारदे हना मेको परमप्रभु यावे आ क्‍येक्‍क लेत्‍तीक नाक्‍ती बाक्‍ब। मेकोमी मेको कली आ तचा माल्‍शो सजाइ गेब। येरमीया ५०:८; प्रकाश १८:४ बेबीलोन परमप्रभु यावे आ गुइम सुन के कचौरा का बाक्‍त। मेकोमी रागी नेल्‍ल ङा मुर आन कली दुक्‍पाइक्‍तु। रागी रागी ङा मुरपुकीम मेको आ अङगुर शांबु तूतेक्‍म। मोपतीके मेको रागी ङा मुर निप्‍स ग्‍यशो दुम्‍तेक्‍म। प्रकाश १७:४; येरमीया २५:१५; प्रकाश १८:३ बेबीलोन याम कामी गोल्‍त। मिनु टुक्रा टुक्रा सेल्‍चा पुंइसाक्‍व। मेको आ पर्बम रोंका पने। मेको आ गारम ख्रेक्‍चा कली ख्रेक्‍तीक चाक्‍कीन। मो पशोनु, मेको साबा कों। यसैया २१:९ गोपुकीम बेबीलोन कली सापाइय्य वा। तन्‍न मेको मसाब। गो मेको कली प्रोंइतक। मिनु आंम आंम रागी लेत्‍तक। मारदे हना मेको आ निसाफ पशो सजाइ स्‍वर्ग सम्‍म जाक्‍दीश्‍शो बाक्‍ब। मेको सरीङ सम्‍म बोक्‍शो बाक्‍ब। 10 परमप्रभु यावेमी आंइ ठीक पतीके कोंइताक्‍व। जाक्‍कीन, मिनु इं परमप्रभु यावेमी मार पवा, मेको सियोनमी नेंपाइश्‍शा देंय।
11 इन ब्रा शेप्‍पीन। मिनु ब्रा कुरतीक प्रिंदीन। परमप्रभु यावेम मादी आन पिप कली लडाइ पपाइक्‍तु। मारदे हना मेकोमी बेबीलोन कली खतम सेल्‍चा कली मिम्‍ताक्‍व। मेको आ खिं आ पर्बम क्‍येक्‍क लेत्‍तीके बाक्‍ब। यसैया १३:१७; येरमीया ५०:२८ 12 बेबीलोन ङा गारो आ ङोंइती छेदर ख्रुक्‍‍कीन। शुश कोव़ब वोतीन। खाल पाइब वोतीन। बाप्‍ब आन कली ठीक पा वोतीन। परमप्रभु यावेमी बेबीलोन ङा मुर आन पर्बम आ मिम्‍शो पाप्‍तु। 13 गे शुश ब्‍वाक्‍कु आ नेक्‍था बाक्‍नेवे। इ शोंप शुश बाक्‍नीम। मुल इ नाक्‍ती जाक्‍त। इ ब्रोंइतीक नाक्‍त नुप्‍त। प्रकाश १७:१ 14 मुर नेल्‍ल आन परमप्रभु यावेम आ नेंम कसम जाप्‍तु। गो थमा पा सल्‍हा खोदेंशो पा लडाइ पाइब मुर जाक्‍पाइश्‍शा, इ रागी प्रिंनुङमी। मिनु मेकोपुकीमी इ क्‍येङा ग्राशो आ पर्बम ठेयब सेंदा पा रेयके पाइनीम।
15 मेकोमी रागी कली आ सक्तिम सेल्‍तु। मेकोमी आ तुइक्‍तीकेम रागी कली वोइक्‍तु। मेकोमी आ रुप्‍तीकेम सरीङ प्राक्‍तु। येरमीया १०:१२-१६ 16 मेकोमी लोव़ पवानु, सरीङमी रेउ यिशा, गरङ गुरुङ पाइब। मेकोमी रागी आ सुर रे गोस्‍स पोक्‍ब। रेउ नु काथ काथा चिला दाप्‍पाइक्‍ब। मिनु फश आ बाक्‍तीक रे ग्रुंइशा, फश पपाइक्‍ब। बजन संग्रह १३५:७ 17 मुर नेल्‍ल मूर्ख नु मजोक्‍ब मतुइक्‍ब बाक्‍नीम। सुन चेम्‍ब नेल्‍ल आन मूर्तिम पतीके मुने दोक्‍नीम। मारदे हना मेको आन सेल्‍शो मूर्ति सोक्‍त मपाइश्‍शो जोल बाक्‍नीम। 18 मेको शोर गाक्‍शो बाक्‍नीम। मेको मुर आन मिम्‍शो ला बाक्‍नीम। मेको आन कली सजाइ गेशोनु, मेकोपुकी खतम दुम्‍नीम। 19 परमप्रभु यावे मेको खोदेंशो ममाइ। परमप्रभु यावे याकूब आ भाग बाक्‍ब। मेको आन खोदेंशो ममाइ। मारदे हना परमप्रभु यावे मारेइ मारेइ सेल्‍ब बाक्‍ब। मिनु इस्राएली मेको आ मुर बाक्‍नीम। मेको आ नें मुर नेल्‍ल आन यावे बाक्‍ब।
20 बेबीलोन, गे लडाइ पचा कली आं तुप्‍‍तीके नु लडाइ पतीक या बाक्‍नेवे। गो इ रे पा रागी रागी ङा मुर आन कली तुप्‍ता‍मी। गो इ रे पा राज्‍य आन कली खतम पोक्‍‍तामी। येरमीया ५०:२३ 21 गो इ रे पा शारा नु शारा ङोइक्‍ब आन कली तुप्‍तामी। गो इ रे पा बग्‍गी नु बग्‍गी चलेब आन कली तुप्‍ता‍मी। 22 गो इ रे पा वोंइश मुर नु मीश मुर आन कली तुप्‍ता‍मी। गो इ रे पा खूशो नु ठिटा आन कली तुप्‍ता‍मी। गो इ रे पा ठिटी नु ठिटा आन कली तुप्‍ता‍मी। 23 गो इ रे पा गोठला नु मेको आ बगाल कली तुप्‍तामी। गो इ रे पा रू दोइब नु आन ब्‍यफ आन कली तुप्‍ता‍मी। गो इ रे पा सरकार आ गेय पाइब नु हुकुम पाइब आन कली तुप्‍ता‍मी। 24 गो इ ङोंइती बेबीलोन नु कल्‍दी रागीम बाक्‍ब मुर नेल्‍लेम सियोनम मरिम्‍शो पशो आ पर्बम क्‍येक्‍क लेत्‍नुङ” दे परमप्रभु यावेम देंत। येरमीया ५०:२९; अय्‍युब १:१७
25 परमप्रभु यावेमी “गे मारेइ मारेइ आन कली साइक्‍ब डांडा, गो इ कली काइ मदाक्‍नुङ। गे रागी नेल्‍ल खतम सेल्‍नेवे। गो आं गुइ दिशा, इ कली रोंगु रे उइ तोक्‍नन। मिनु कोक्‍त जेश्‍शो डांडा सेल्‍नन। 26 खिं ङा सुर वोइक्‍चा कली इ रे पा फुल्‍लु का यो मलाइक्‍नीम। जग वोइक्‍चा कली यो इ फुल्‍लु मलाइक्‍नीम। तन्‍न गे गेना हना यो कली श्‍येत्थ रागी दुम्‍चा माल्‍नेवे” दे परमप्रभु यावेम देंत।
27 मिनु परमप्रभु यावेमी “गे रागीम छेदर का ख्रुक्‍कीन। रागी रागी आन दातेमी तुराही तपीन। मेको नु लडाइ पचा कली रागी रागी ङा मुर आन कली ठीक सेलीन। राज्‍य आन कली बेबीलोन नु लडाइ पचा कली पोक्‍कीन। आरारात, मिन्‍नी नु अश्‍केनजमी बेबीलोन नु लडाइ पाइब आन ठेयब मुर का योव़ङीन। सल्‍हा आन हुल खोदेंशो पा शुश शारा चाक्‍कीन। यसैया १३:३ उत्‍पत्ती १०:३ 28 मेको नु लडाइ पचा कली रागी रागी ङा मुर आन कली पोक्‍कीन। मादी आन पिप, मेको आन हुकुम पाइब, मेको आन ठेयब मुर नु मेको आन हुकुम पशो रागी नेल्‍ल ङा मुर आन कली पोक्‍कीन” देंत। 29 ख्रिनु कुशा रागी ख्रिंख्रि पाइब। मारदे हना परमप्रभु यावेम बेबीलोन कली श्‍येत्‍थ नु मुर मबाक्‍तीके सेल्‍नुङ देंशो लोव़ गाप्‍ब। 30 बेबीलोन ङा लडाइ पाइबपुकीम लडाइ पचा प्रोंइतेक्‍म। मेको आन बोल्‍यो दरवारम बाक्‍नीम। मेको आन सक्ति जाम्‍त। मेकोपुकी मीश मुर खोदेंशो दुम्‍तेक्‍म। मेको आन खिंम मी सुइक्‍ने थुम्‍तेक्‍म। मेको आन लाप्‍चो ङा आग्‍लो जिक्‍शो बाक्‍नीम। येरमीया ५०:३७ 31 लोव़ कुरबम अर्को लोव़ कुरब आन कली लांम ग्रुम्‍नीम। मेकोपुकीमी बेबीलोन ङा पिप कली “मेको सहर नेल्‍ल ग्रातेक्‍म। 32 मिनु खोला शोक्‍तीके ग्रातेक्‍म। जोरी सत्रु आन कली ओव़चा मगेचा कली सेल्‍शो तेक्‍तीक नेल्‍ल मी सुइक्‍ताक्‍मे। मिनु लडाइ पाइबपुकी शुश हिंशा वाम ग्‍याम दुम्‍तेक्‍म” देंशा पिप कली लोव़ नेंपाइक्‍नीम। 33 मिनु मुर नेल्‍ल आन परमप्रभु यावे, इस्राएली आन परमप्रभुमी “बेबीलोन आ तमी दांइ पतीक खला का खोदेंशो दुम्‍ब। मेको दिप्‍चा पुंइसीब। इच्‍का नोले रिक्‍ची नाक्‍ती रीब पा जाक्‍ब” देंत।
34 सियोनमी “बेबीलोन ङा पिप नेबुकदरेसरमी आं कली दाक्‍ती। आं कली खतम सेल्‍ती। आं कली श्‍येत्‍थ गर खोदेंशो सेल्‍ती। आं कली अजीङगरम खोदेंशो पा दाक्‍ती। मिनु ब्रोव़शो जचा थोव़कम खोदेंशो पा आ कोव़ज प्रिंताक्‍व। मिनु नोले आं कली ताइक्‍ताक्‍यी। 35 आं मुर आन कली साइश्‍शो आ पर्बम बेबीलोन क्‍येक्‍क लेत्‍चा पुंइसीब” देंत। सियोन ङा यरूसलेममी “कल्‍दी रागीम बाक्‍ब मुरपुकीम ‘आं हुश आ क्‍येक्‍क लेत्‍चा पुंइसीनीम’ देंचा माल्‍नीम” देंत। 36 मोपतीके परमप्रभु यावेमी “गो इ पोन बोक्‍नुङ। गो इ कली गेशो श्‍येत आ क्‍येक्‍क लेत्‍‍नुङ। गो मेको आ समुन्‍द्र सोव़पाइक्‍नुङ। आ ब्‍वाक्‍कु बुक्‍तीके यो सोव़पाइक्‍नुङ। 37 मिनु बेबीलोन खिं ब्रेश्‍शा देल्‍शो, सिवार आन बाक्‍तीके, हिंचा ङा नु शुक्‍शी पाइक्‍चा पुंइसीतीके नु मुर मबाक्‍तीक दुम्‍ब। येरमीया ५०:१३
38 मेकेर ङा मुर नेल्‍ल गुप्‍स खोदेंशो पा ग्रीनीम। मेकोपुकी गुप्‍स आन चाइक्‍ब खोदेंशो पा ङरर ङरर पाइनीम। 39 नोले मेकोपुकी बोक्‍शा, मार मार माल्‍मेनु, गो मेको आन कली तूतीक ख्रेत्‍नुङ। मिनु गो मेको आन कली रिश्‍शा ग्‍यारशा मपामे सम्‍म दुक्‍पाइक्‍नुङमी। मिनु गेना हना यो कली इप्‍नीम। मिनु गेनायो मसेंसीनीम” दे परमप्रभु यावेमी देंत। 40 मिनु परमप्रभु यावेमी “गो मेको आन कली क्‍योरचा कली कीशा लाइश्‍शो पाठा, सांड नु क्‍यारश खोदेंशो पा चाक्‍नुङमी।
41 शेशाक सहर कली दोपा ग्राने चाप्‍मे? रागी नेल्‍ल ङा ठेयब नु दारशो सहर ब्रुत। बेबीलोन दोपा रागी रागी आन दातेमी शुश हिंचा ङा दुम्‍मे? शेशाक बेबीलोन कली अरु नें का बाक्‍ब।येरमीया २५:२६ 42 समुन्‍द्र ङोइश्‍शा बेबीलोन कली सुम्‍तु। समुन्‍द्र आ ग्रीशो छालम मेको कली सुम्‍तु। 43 मेको आ सहरपुकी हिंचा ङा दुम्‍‍तेक्‍म। सोव़शो, गोरशो नु मुर मबाक्‍तीके दुम्तेक्‍म। मेको रे पा सुइ मगाक्‍नीम। 44 गो बेबीलोन ङा बेल देवता कली सजाइ गेनुङ। मिनु आ दाक्‍शो थोव़क मेपाइक्‍नुङ। मुल रागी रागी ङा मुर मेकेर चोक्‍थ्री क्राक्‍थ्री पा मलाइक्‍नीम। बेबीलोन आ गारो ब्रेत्‍त। येरमीया ५०:२; यसैया ४६:१
45 आं मुरपुकी मेकेर रे ग्रूशा पिने। गे नेल्‍ल ब्रोंइचा कली प्रोक्‍कीन। परमप्रभु यावे आ ठेयब पा गाइश्‍शो रे प्रोक्‍कीन। 46 रागीम मारेइ रेयके नेंनीनु, इन थुं ग्‍येत्‍थ लुक्‍च मदुमीन। महिनीन। एको बर्सम खाल का ङा रेयके नु अर्को बर्सम अर्को खाल ङा रेयके नेंसीब। मेको रागीम हुश ख्राक्‍श पोक्‍शोनु, सासन पाइब कामी अर्को सासन पाइब कली जिचा तोशो रेयके बाक्‍ब।
47 गो बेबीलोन ङा मूर्ति आन कली सजाइ गेनुङमी। मेको आ रागी नेल्‍ल मुने दोक्‍नीम। मिनु मेको आ मुर नेल्‍ल मेको आ दातेमी साइक्‍चा पुंइसीनीम। मोदेंशो नाक्‍ती थमा पा जाक्‍ब। 48 मिनु नोले सरीङ, रागी नु मेकेर बाक्‍ब नेल्‍लेमी बेबीलोन ब्रुशो आ पर्बम ग्‍येरशा वाइ ब्रेत्‍नीम। मारदे हना मेको आन कली क्‍येक्‍क लेप्‍ब उत्तर रे जाक्‍नीम” दे परमप्रभु यावेम देंत। प्रकाश १८:२० 49 परमप्रभु यावेमी “इस्राएली आन कली साइक्‍तीके बेबीलोन ब्रुचा माल्‍ब। बेबीलोनम रागी ङा मुर आन कली साइक्‍तीके बेबीलोन यो साइक्‍चा पुंइसीब।
50 गे तरवार रे ब्रोंइशा प्रोक्‍कीन। देश मपने। ङोन रागीम बाक्‍शा, परमप्रभु यावे कली मिम्‍तीन। यरूसलेम इन थुंम वोतीन” देंत। भजन संग्रह १३७:५ 51 मेकोपुकीमी “आंइ कली शुक्‍शी पाइश्‍शो नेंशा, गो मुने दोक्‍तक। गो आंइ कुल सुम्‍तक। मारदे हना परमप्रभु यावे आ खिंम अर्को रागी ङा मुर जाक्‍शा ओव़तेक्‍म” देंतेक्‍म।
52 परमप्रभु यावेमी “गो मेको आ रागी नेल्‍लेमी आन मूर्ति आन कली सजाइ गेनुङमी। मिनु मेकेर गार दुम्‍शो मुर हुकयी पाइनीम। मेको नाक्‍ती थमा पा जाक्‍ब। 53 बेबीलोन इर सरीङ सम्‍म बोक्‍त हना यो, आ इर ङा सहर बोल्‍यो सेल्‍तु हना यो, गो मेको कली खतम सेल्‍बपुकी सोइक्‍नुङमी” दे परमप्रभु यावेमी देंत। उत्‍पत्ती ११:४; यसैया १४:१३
54 परमप्रभु यावेम “बेबीलोन रे वाइ ब्रेश्‍शो सेंदा नेंसीब। कल्‍दी ङा मुर आन रागी रे मारेइ मारेइ प्रेश्‍शो रेयके नेंसीब। 55 परमप्रभु यावेम बेबीलोन कली श्‍येत्‍थ सेल्‍ब। मिनु मेको आ ठेयब सेंदा सिक्‍सी पपाइक्‍ब। मेको आ छाल समुन्‍द्र खोदेंशो पा रेयके पाइब। 56 बेबीलोन कली खतम पोक्‍ब जाक्‍ब। बेबीलोन ङा लडाइ पाइबपुकी ग्‍याइक्‍चा पुंइसीनीम। मेको आन लिब्रा जिक्‍नीम। मारदे हना परमप्रभु यावे क्‍येक्‍क लेप्‍ब बाक्‍ब। मेकोमी आ पशो आ पा ङा नेल्‍ल गेब। ब्‍यवस्‍था ३२:३९-४१ 57 गो मेको आ सरकार ङा गेय पाइब, जोक्‍ब तुइक्‍ब, मेको आ हुकुम पाइब, नु आ लडाइ पाइब नेल्‍ल आन कली दुक्‍पाइक्‍नुङमी। मिनु मेकोपुकी गेना हना यो कली इप्‍नीम। लेंशा मबोक्‍नीम” दे पिपम देंत। मेको पिप आ नें मुर नेल्‍ल आन परमप्रभु यावे बाक्‍ब।
58 मुर नेल्‍ल आन परमप्रभु यावेम “बेबीलोन ङा ब्रेम्‍शो गारो दिंम दुम्‍ब। मिनु मेको आ लाइश्‍शो ठेयब लाप्‍चोपुकी मीम नेक्‍ब। मुरपुकी मोशा गेय पाइनीम। रागी रागी ङा मुर आन श्‍येत पा पशो गेय नेल्‍ल मी कली ला दुम्‍ब” दे परमप्रभु यावेमी देंत। हबकुक २:१३
59 परमप्रभु यावे आ लोव़ पाइब येरमीयामी माहसेयाह आ चच नेरीयाह आ तौ सेरायाह पिप आ गेय पाइब कली अरेप्‍तु। मिनु मेको यहूदा ङा पिप सिदकीयाहम सासन पवा आ ४ बर्सम पिप नु बेबीलोन लशो बाक्‍त। येरमीया ३६:४ 60 येरमीयामी बेबीलोनम जाक्‍चा चिक्‍शो श्‍येत आ पर्बम ङा लोव़ कागज काम ब्रेक्‍ताक्‍व। बेबीलोन आ पर्बम नेल्‍ल ब्रेक्‍ताक्‍व। येरमीया ५०:१-५०,५८ 61 मिनु येरमीयाम सेरायाह कली “गे बेबीलोनम जाक्‍दीनेनु, एको लोव़ नेल्‍ल पढेवो। 62 ‘परमप्रभु यावे, गे एको रागी कली खतम पोक्‍नुङ’ देंतीनी। ‘एकेर मुर नु बी ब्‍यफ, क्‍यारश भेडा, मारेइ बास मबाक्‍चा ङा पा श्‍येत्‍थ रागी सेल्‍नुङ। एको गेना हना यो मुर मबाक्‍तीके दुम्‍ब’ देंतीनी” देनो। 63 मोपा एको कागज पढेने थुम्‍शा, फुल्‍लु काम फ्रेंशा युफ्रेटीस खोलाम ताइक्‍तो। प्रकाश १८:२१ 64 मिनु “कागज ब्‍वाक्‍कुम ग्रुम्‍शो खोदेंशो पा बेबीलोन आं चाक्‍शो श्‍येत आ पर्बम ग्रुम्‍ब। मेको गेनायो ग्रूने मचाप्‍ब, देंचा माल्‍नेवे” देंत। मोपा येरमीया आ लोव़ नुप्‍त।