4
१२ ओटा फुल्लु वोइश्शो
1 मिनु मुर नेल्ल यर्दन आइक्ची हांबु शोक्ने थुम्मे नोले परमप्रभु यावेमी यहोसु कली
2 “मेको मुर आन दाते रे १२ जना वोंइश मुर योव़ङो। थर का रे का का पा योव़शा लावो।
3 मेको आन कली ‘यर्दन आ दातेमी चढ़ेब आन राप्तीके रे १२ ओटा फुल्लु गुप्शा, कुरशा चाक्कीन। मिनु नाक्दो ते बास बाक्नीनी, मेको फुल्लु यो मेक उइ वोतीन’ दे मतो” देंत।
4 मिनु यहोसुमी आ योव़शो इस्राएली थर नेल्ल ङा का का पा १२ जना वोंइश मुर आन कली ब्रेत्ताक्व।
5 मिनु यहोसुमी मेको आन कली “गे यर्दन आ दातेमी परमप्रभु यावे, इन परमप्रभु आ कबल पशो सन्दोस आ ङोंइती लने। मिनु मेकेर इस्राएल आ १२ थर खोदेंशो पा १२ ओटा फुल्लु बलाम लाप्शा पितीन।
6 मिनु मेको इन कली मिम्तीके दुम्ल। दीसा नित्थी इन तमी तौपुकीमी ‘एको फुल्लु आ अर्थ मार बाक्म?’ दे हिल्लो पाम्तेक्म हना, प्रस्थान १२:२६;
7 गेपुकीमी मेको आन कली ‘परमप्रभु यावेमी आ कबल पशो सन्दोस यर्दन शोक्ची ना, मेको आ ङोंइती यर्दन ङा ब्वाक्कु तेक्पाइक्तु। मेको यर्दन शोक्ची ना, यर्दन ङा ब्वाक्कु नाइक्पाइक्तु। एको फुल्लु इस्राएली आन कली गेना हना यो मिम्तीक दुम्ल’ देंचा माल्नीनी” देंत।
8 मिनु परमप्रभु यावेमी यहोसु कली माइश्शो खोदेंशो पा यहोसुमी दोपा अरेवा, मोपा इस्राएल ङा १२ थर ङा १२ जना वोंइश मुरुमी १२ ओटा फुल्लु यर्दन आ दाते रे पिश्शा, मेको आन बाक्शो दिंममी वोइक्तेक्म।
१२ ओटा फुल्लु यर्दनमी वोइश्शो
9 मिनु यहोसुमी कबल ङा सन्दोस कुरशा चढ़ेबपुकी राप्तीकेमी यो यर्दन खोला आ दातेमी १२ ओटा फुल्लु वोइक्तु। मिनु मेको फुल्लुपुकी मुलाक्त सम्म बाक्नीम।
10 मिनु सन्दोस कुरब चढ़ेबपुकी यर्दन आ दातेमी परमप्रभु यावेमी यहोसु कली देंशो लोव़ नेल्ल मपामे सम्म राप्शा बाक्तेक्म। ङोंइती मोसामी अरेशो खोदेंशो पा यहोसुमी मुर आन कली मअरेवा सम्म राप्शा बाक्तेक्म। मिनु मुरपुकी रीब पा शोक्साक्म।
11 मिनु मुरपुकी शोक्ने थुम्मे नोले, परमप्रभु यावे आ कबल पशो सन्दोस कुरब आन ङोंइती चढ़ेबपुकी यो शोक्साक्म।
12 मोसामी मेको आन कली देंशो खोदेंशो पा, रूबेन आ थर, गाद आ थर नु मनस्से आ उइक्थ थर ङा वोंइश मुर या कुरशा, इस्राएली आन ङोंइती गाक्तेक्म। यहोसु १:१२-१६
13 मिनु परमप्रभु यावे आ ङोंइती हेररा ४० हजार लडाइ पाइब, या कुरशो वोंइश मुरपुकी शोक्शा, लडाइ पचा कली यरीको ङा दिंम गे लाम्तेक्म।
14 मेको नाक्त परमप्रभु यावेमी यहोसु कली इस्राएली आन ङोंइती ठेयब सेल्तु। मिनु मेकोपुकीम मोसा कली हिक्शो खोदेंशो पा यहोसु कली यो मबेक्म सम्म हिक्तेक्म। यहोसु ३:७
15 मिनु परमप्रभु यावेमी यहोसु कली
16 “कबल पशो सन्दोस कुरब चढ़ेब आन कली ‘मुल यर्दन रे इर कुन’ देंशा ब्रेत्तो” दे माइक्तु।
17 मोपतीके यहोसुमी मेको आन कली “यर्दन रे इर कुन” दे ब्रेत्ताक्व।
18 परमप्रभु यावे आ कबल पशो सन्दोस कुरब चढ़ेबपुकी यर्दन आ दाते रे गाक्शा, खोला आ सुर ङा सोव़शो खपीम थेक्त्मे नोले यर्दन ङा ब्वाक्कु लेंशा ङोंइती ङा खोदेंशो पा एर ओंथ सुम्शा शांइसाक्व।
गिल्गालमी वोइश्शो फुल्लु
19 मिनु इस्राएलीपुकी ङोंइती ङा महिना ङा १० नाक्तीमी यर्दन रे ग्रूतेक्म। मिनु यरीको आ पूर्ब गे गिल्गाल माइक्तीकेमी बास बाक्तीक सेल्साक्म। यहोसु ५:९-१०
20 मिनु यहोसुमी मुरपुकीम यर्दन रे ग्रुंइशा पिश्शो १२ ओटा फुल्लु गिल्गालमी पुक्पाइक्तु।
21 मिनु इस्राएली आन कली “इन तमी तौपुकीमी आन आफ आन कली ‘एको फुल्लु आ अर्थ मार बाक्बा?’ दे हिल्लो पाम्तेक्म हना, यहोसु ४:६
22 गेपुकीमी इन तमी तौ आन कली ‘गो इस्राएलीपुकी सोव़शो खपीम गाक्शा, यर्दन खोला शोक्सीशो नकी’ देंचा माल्नीनी।
23 दोपा परमप्रभु यावे, इन परमप्रभुमी लल समुन्द्र मशोक्सीशो सम्म सोव़पदा, मोपान आंइ ङोंइती यर्दन मशोक्सीशो सम्म मेकेर ङा ब्वाक्कु यो सोव़पाइक्तु। यहोसु ३:९-१७; प्रस्थान १४:२१-२२
24 मिनु रागी ङा मुर नेल्लेमी परमप्रभु यावे, इन परमप्रभु ठेयब सक्ति पाइश्शो बाक्ब, दे तुइक्तमेक्ल। मिनु गे परमप्रभु यावे, इन परमप्रभु कली तुइश्शा, गेना हना यो मान पा हिनीन, दे मोदेंशो पाप्तु” देंत।