9
गिबोन ङा मुरपुकीम जोल पशो
1 मिनु यर्दन आइक्ची हांबु पहाड नु दिंममी, ठेयब समुन्द्र आ नेक्था नु लेबानोन गे बाक्ब हित्ती, एमोरी, कनानी, परिज्जी, हिव्वी नु यबुसी आन पिपपुकीमी एको लोव़ नेंशा,
2 मेकोपुकी थुं का दुम्शा, यहोसु नु इस्राएलीपुकी नु लडाइ पचा कली बुक्तेक्म।
3 मिनु गिबोन ङा मुरपुकीमी यहोसुमी यरीको नु ऐ सहर कली मार मार पवा, मेको लोव़ नेंशा, यहोसु ६:२०-२१; यहोसु ६:२६-२८
4 मेकोपुकीमी ङोन रागी रे जाक्शो खोदेंशो पा बुत सेल्शा, आन गधा तारी माइत धोक्रो वोइश्शा, गाक्शो फेरशो कुशुल के अङगुर शांबु वोइक्तीक कुर पाइक्तेक्म।
5 मिनु गाक्शो माइत जुत्ता नु जेक्शो वासी फेक्साक्म। मेको आन कुरशो बुत सोव़शो नु बुंखी ङाइश्शो बाक्त।
6 मिनु मेकोपुकीमी गिल्गाल यहोसु आ बाक्तीकेमी जाक्शा, यहोसु नु इस्राएली नेल्ल वोंइश मुर नेल्ल आन कली “गोपुकी ङोन रागी रे जाक्शो नकी। मोपतीके गोपुकी नु गारशा, कबल पने” देंतेक्म।
7 मिनु इस्राएलीपुकीमी मेको हिव्वी आन कली “गेपुकी आंइ दातेमी बाक्ब मुर बाक्नीनी, कों? गोपुकी गेपुकी नु दोपा गारने चाप्नीकी ङा?” देंतेक्म। यहोसु ११:१९; प्रस्थान २३:३२
8 मिनु मेकोपुकीमी यहोसु कली “गो इन गेय पाइब नकी” दे लोव़ लेत्ताक्म। मिनु यहोसुमी मेको आन कली “गे सु ननी? ते रे जाक्शो ननी” दे हिल्लो पाप्तु।
9 मिनु मेकोपुकीमी “गो इन गेय पाइबपुकी शुश ङोन रागी रे जाक्शो नकी। गोपुकी परमप्रभु यावे, इन परमप्रभु आ पर्बम शुश नेंतक। मिनु इजीप्त रागीमी मार पवा मेको नेल्ल नेंतक।
10 यर्दन आइक्ची हांबु ङा एमोरी आन पिप निक्शी, हेश्बोन ङा पिप सीहोन कली नु अश्तारोथम बाक्ब बाशान ङा पिप ओग कली मार मार पनी मेको नेल्ल नेंतक। गन्ती २१:२१-३५
11 मोपतीके आंइ ठेयब मुरपुकी नु आंइ रागी ङा मुर नेल्लेमी ‘गेपुकीमी लांम जतीक बुत कुरशा, मेको आन कली ग्रुम्थ लने’ देंतेक्म। मेको आन कली ‘गो इन गेय पाइब नकी। गे गो नु कबल पा आंइ कली ब्रने, दे देनीन’ देंतेक्म।
12 इन कली ग्रुम्थ गाक्शो नाक्ती गोपुकीमी आंइ खिं रे एको शोब्ले होश कुरशो नकी। मुल सोव़शा बुंखी ङाइश्शो बाक्ब।
13 मिनु आंइ गाक्ची ना एको अङगुर शांबुम प्रिंशो कुशुल के थैलो नक बाक्तेक्म। मुल कोव़ङीन, एको यो गाक्ने थुम्तेक्म। मेको लाइश्शो लां दुम्तीके आंइ फेक्शो वासी नु जुत्ता यो माइत दुम्शा जेक्तेक्म” देंतेक्म।
14 मिनु इस्राएलीपुकीमी आन चाक्शो कोसेली ताक्तेक्म, तन्न परमप्रभु यावे कली हिल्लो मपथु, जाम्तेक्म। गन्ती २७:२१
15 मिनु यहोसुमी मेको आन कली “इन थुं नांइसीन। ब्रोंइचा ताइनीनी” दे कबल पाप्तु। मिनु मेकेर ङा ठेयब मुरपुकीमी यो कसम जाम्तेक्म।
16 मिनु कबल पशो सां नाक्त नोले मेको मुर आन नेक्था ङा मुर आंम दातेमी बाक्ब मुर बाक्तेक्म, दे इस्राएलीपुकीमी नेंतेक्म।
17 मिनु इस्राएली गाक्शा, सां नाक्तीमी मेको आन सहर जाक्दीत्तेक्म। मेको आन सहर गिबोन, केफीरा, बेयरोथ नु किरयथ-यारीम बाक्तेक्म।
18 मिनु इस्राएलीपुकीमी मेको आन सहर कली लडाइ मतोम। मारदे हना इस्राएल ङा ठेयब मुरपुकीमी मेको नु परमप्रभु यावे, इस्राएली आन परमप्रभु आ ङोंइती कसम जशो बाक्तेक्म। मोपतीके मुरपुकीमी इस्राएली आन ठेयब मुर आन पर्बम गन गन पाम्तेक्म।
19 मिनु ठेयब मुरपुकीमी इस्राएली नेल्ल आन कली “गोपुकीमी परमप्रभु यावे, इस्राएली आन परमप्रभु आ नेंमी कसम जाइतक। मोपतीके गो मेको आन कली ब्रोंइचा गेचा माल्नीकी।
20 मुल मेको आन कली ब्रोंइचा गेचा माल्नीकी। मोदेंशो मपाइतक हना, आंइ जशो कसममी पतीके, गो सराप राइनीक” दे इस्राएली आन कली देंतेक्म। गन्ती १:५३; २सामुएल २४:१
21 मिनु ठेयब मुरपुकीमी “मेको आन कली ब्रोंइचा गेन” देंतेक्म। मिनु मेकोपुकी इस्राएली आन शी चेप्ब नु ब्वाक्कु क्याक्ब वाइल दुम्तेक्म। ठेयब मुरुमी दोदेंशो देंमे मोदेंशो दुम्त।
22 मिनु यहोसुमी मेको गिबोन ङा मुर आन कली ब्रेश्शा “गेपुकी आंइ नेक्था गोपुकी नु बाक्ब बाक्नीनी। तन्न ‘गो ङोन रागी ङा नकी’ दे मारदे जोल पनी?
23 मोपा जोल पतीके मुल गेपुकी सराप रशो दुम्तीनी। गेपुकी गेना हना यो वाइल दुम्चा माल्नीनी। गेपुकी आं परमप्रभु यावे आ खिं ङा शी चेप्ब नु ब्वाक्कु क्याक्ब दुम्तीनी” देंत।
24 मिनु मेकोपुकीमी यहोसु कली “परमप्रभु यावे, इ परमप्रभुमी आ गेय पाइब मोसा कली ‘रागी नेल्ल इन के दुम्ब। एको रागी ङा मुर नेल्ल सतीन’ दे अरेशो तुइश्शो नकी। मोपतीके गो इन कली तशा शुश हिंतीके, आंइ कली प्रोंइचा कली जोल पाइतक।
25 मुल गो इन गुइमी बाक्नीकी। आंइ कली मार पशो नु रिम्शो लाक्नीनी, मोदेंशोन पन” देंतेक्म।
26 मोपा यहोसुमी मेको आन कली इस्राएली आन गुइ रे पा प्रोंइतु। मिनु इस्राएलीपुकीमी मेको आन कली साइक्चा मतामे।
27 मिनु मेको नाक्त रे यहोसुमी मेको आन कली इस्राएली नेल्ल नु परमप्रभु यावे आ चढ़ेतीक कली शी चेप्ब नु ब्वाक्कु क्याक्ब सेल्तु। मेकोपुकीम मुल सम्म मोदेंशो पाइनीमी। ब्यवस्था २९:१०; १इतिहास २१:२९; २इतिहास १:३