16
1 मेको नोले परमप्रभु यावेम बाशा आ पर्बम हानानी आ तौ येहू कली लोव़ पवा बाक्त।
2 मार लोव़ पवा बाक्त देंशा हना “गो इ कली फुरक रे पोक्शा आं मुर इस्राएली आन ठेयब मुर सेल्तन। तन्न गे येरोबाम आ लांम गाक्शा, आं मुर इस्राएली आन कली पाप पपाइक्तीवी। मिनु मेको आन पापम पतीके आं कली गाइक्पाइक्तीमी। १राजा १४:७
3 मोपतीके गो बाशा नु आ खिं कली खतम पोक्चा चिक्शो बाक्नुङ। मिनु गो इ खिं कली नेबात आ तौ येरोबाम आ खिं खोदेंशो सेल्नुङ। १राजा १५:२९
4 बाशा, इ खिं ङा सहरम बेक्शो मुर आन कली कुचुमम ब्वाइनीम। मिनु रूम बेक्शो मुर आन कली चिक्बपुकीम ब्वाइनीम” देंमाक्त। १राजा १४:११
5 बाशा आ पशो नु अरु गेय, मेको आ सक्ति, मार, मेको इस्राएल ङा पिप आन इतिहासम ब्रेक्शो मबाक्बा ङा?
6 मिनु बाशा बेक्माक्त। मिनु तिरचा सहरम आ किकी पिपी आ नेक्था थिम्चा पुंइसे बाक्त। मिनु मेको आ पा ङा आ तौ एलाह पिप दुम्माक्त।
7 ङोंइती परमप्रभु यावेमी हानानी आ तौ, आ लोव़ पाइब येहू कली बाशा नु आ खिं ङा मुर आन पर्बम लोव़ पशो बाक्माक्त। मेकोमी परमप्रभु यावे आ ङोंइती मरिम्शो पा गाइक्पाइक्तीके, येरोबाम आ खिं ङा मुर खोदेंशो दुम्तीके नु येरोबाम नु आ खिं ङा मुर आन कली खतम पोक्तीके हानानी आ तौ, आ लोव़ पाइब येहू कली मोदेंशो लोव़ पशो बाक्माक्त।
इस्राएल ङा पिप एलाह
8 बाशा आ तौ एलाह इस्राएल ङा पिप दुम्माक्त। मेना आसा यहूदा ङा पिप दुम्शो २६ बर्स दुम्शो बाक्माक्त। मिनु एलाहम तिरचा सहरम बाक्शा, बर्स निक्शी इस्राएल कली सासन पवा बाक्त।
9 मिनु मेको आ लडाइ पाइब बग्गी चलेब, आन भाग निक्शीमी भाग का ङा ठेयब मुर जिम्रीमी मेको कली मरिम्शो पचा गोवा बाक्त। मेना पिप एलाह तिरचा सहरम आ खिं ङा मारेइ मारेइ कोव़ब अरचा आ खिं तिरचा सहरम बाक्शा, तूशा दुक्शो बाक्माक्त।
10 मिनु जिम्री आगा ओव़शा, मेको कली तुप्शा सदा बाक्त। मिनु मेको आ पा ङा पिप दुम्माक्त। मेना आसा यहूदामी पिप दुम्शो २७ बर्स दुम्शो बाक्माक्त। २राजा ९:३१
11 मिनु जिम्री पिप दुम चोटीन बाशा आ खिं ङा मुर नेल्ल आन कली साइक्मी बाक्त। मेकोम बाशा आ खिं ङा मुर, मेको आ वारचपुकी नु आ नाता गोव़ता वोंइश मुर नेल्ल आन कली का यो मप्रोंइथु साइक्मी बाक्त।
12 परमप्रभु यावेमी बाशा आ पर्बम आ लोव़ पाइब येहू रे देंशो खोदेंशो पा, जिम्रीमी बाशा आ मुर नेल्ल आन कली साइक्मी बाक्त।
13 बाशा नु मेको आ तौ एलाहमी पशो पाप नु इस्राएली आन कली पपाइश्शो पाप आ पतीके, आन शोर गाक्शो मूर्ति सेल्तीके नु परमप्रभु यावे, इस्राएली आन परमप्रभु कली गाइक्पाइक्तीके मोदेंशो दुम्शो बाक्माक्त।
14 एलाह आ पशो नु अरु गेय नेल्ले, मार, इस्राएल ङा पिप आन इतिहासम ब्रेक्शो मबाक्बा ङा?
इस्राएल ङा पिप जिम्री
15 मिनु जिम्रीम तिरचा सहरम ७ नाक्त सासन पवा बाक्त। मेना आसा यहूदा ङा पिप दुम्शो २७ बर्स दुम्शो बाक्माक्त। लडाइ पाइबपुकी चहिं पलिस्ती आन सहर गिब्बेथोन आ नेक्था बाक्तीक सेल्शा बाक्शो बाक्मा बाक्त। १राजा १५:२७
16 मिनु बाक्तीक सेल्शा बाक्ब इस्राएलीपुकीमी जिम्री आ पशो नु पिप कली साइश्शो लोव़ नेंशा, मेको नाक्तीन मेकोपुकीमी आन बाक्तीक उइ लडाइ पाइब आन ठेयब मुर ओम्री कली इस्राएल ङा पिप सेल्मे बाक्त।
17 मिनु ओम्री नु इस्राएल ङा लडाइ पाइब नेल्लेम गिब्बेथोन प्रोंइशा तिरचा कली पुम्दमे बाक्त।
18 मिनु जिम्रीमी सहर ग्राशो तवा चोटी पिप आ खिं ओव़शा मी सुइश्शा, आंमा यो दुप्शा बेक्माक्त। २सामुएल १७:२३
19 मेकोम परमप्रभु यावे आ ङोंइती मार मरिम्शो बाक्मे, मेको पशा, येरोबाम आ लांम गाक्शो बाक्माक्त। मिनु येरोबाम आ पशो पाप नु इस्राएली आन कली पपाइश्शो पाप पतीकेम मेको मोदेंशो दुम्शो बाक्माक्त।
20 जिम्री आ पशो नु अरु गेय, एलाह कली मरिम्शो पशो, मार, मेको इस्राएल ङा पिप आन इतिहासम ब्रेक्शो मबाक्बा ङा?
इस्राएल ङा पिप ओम्री
21 मेको नोले इस्राएल ङा मुरपुकी हुल निक्शी दुम्मा बाक्त। हुल काम गिनाथ आ तौ तिब्नी कली पिप सेल्चा कली वारच पदमे बाक्त। मिनु हुल का चहिं ओम्री आ नोले खोदमे बाक्त।
22 तन्न ओम्री आ नोले खोइक्बपुकी गिनाथ आ तौ तिब्नी आ नोले खोइक्ब आन क्येङा बोल्यो बाक्मा बाक्त। मोपतीके तिब्नी कली साइश्शा, ओम्री पिप दुम्माक्त।
23 मोपा ओम्री इस्राएल ङा पिप दुम्माक्त। मेना आसा यहूदाम पिप दुम्शो ३१ बर्स दुम्शो बाक्माक्त। ओम्रीमी नेल्ल पा १२ बर्स सासन पवा बाक्त। मेकोम ६ बर्स तिरचा सहरम बाक्शा, सासन पवा बाक्त।
24 मेकोम टलेन्ट निक्शी चांदीम शेमेर आ गुइ रे सामरीया ङा डांडा ग्याप्शा, मेकेर गारो हिरशो सहर का सेला बाक्त। मिनु मेको सहर ङा होव़प शेमेर आ नें रे पा मेको आ नें सामरीया वोदा बाक्त। टलेन्ट का ३४ किलो बाक्ब।
25 तन्न ओम्रीमी परमप्रभु यावे आ ङोंइती मार मरिम्शो बाक्मे, मेको पवा बाक्त। मेकोम आ ङोंइती ङा पिप नेल्ल आन क्येङा शुश मरिम्शो पवा बाक्त। मीका ६:१६
26 मेको नेबात आ तौ येरोबाम आ पाप ङा लांम गाक्माक्त। मेकोमी मेको पाप इस्राएली आन कली पपाइश्शो बाक्माक्त। मिनु मेकोपुकीम मेको पाप पा आन ग्रांग्रा दिशो मूर्ति आन पर्बम परमप्रभु यावे, इस्राएली आन परमप्रभु कली गाइक्पाइश्शो बाक्मा बाक्त।
27 ओम्री आ पशो नु अरु गेय, मेको आ सक्ति कोंइतीके नेल्ल, मार, मेको इस्राएल ङा पिप आन इतिहासम ब्रेक्शो मबाक्बा ङा?
28 मिनु ओम्री बेक्माक्त। मिनु सामरीया सहरम थिम्चा पुंइसे बाक्त। मिनु मेको आ पा ङा आ तौ आहाब पिप दुम्माक्त।
आहाब इस्राएल ङा पिप दुम्शो
29 ओम्री आ तौ आहाब इस्राएल ङा पिप दुम्माक्त। मेना आसा यहूदा ङा पिप दुम्शो ३८ बर्स दुम्शो बाक्माक्त। ओम्री आ तौ आहाब सामरीया सहरम बाक्शा, इस्राएल कली २२ बर्स सासन पवा बाक्त।
30 मिनु ओम्री आ तौ आहाबमी परमप्रभु यावे आ ङोंइती पिप नेल्ल आन क्येङा मरिम्शो पवा बाक्त।
31 नेबात आ तौ येरोबाम आ पाप ङा लांम गाक्चा, मेको कली मारेइ खोदेंशो मदुम्माक्त। मेकोम सीदोन ङा पिप एथ-बाल आ तमी इजेबेल कली ग्युंबे पवा बाक्त। मिनु बाल देवता कली पूजा पा ठेयब सेला बाक्त।
32 मेकोम सामरीयाम बाल आ खिंम बाल कली चढ़ेतीक का सेला बाक्त। २राजा ३:२; २राजा १०:२७-२८; २राजा ११:१८
33 आहाबम अशेराह देवी आ मूर्ति पाइश्शो थाम का यो सेल्पदा बाक्त। मिनु मेकोम आ क्येङा ङोंइती ङा इस्राएल ङा पिप आन क्येङा परमप्रभु यावे, इस्राएली आन परमप्रभु कली शुश गाइक्पाइक्तीक गेय पवा बाक्त।
34 आहाबम सासन पवा ना बेथेल ङा हीएलमी यरीको सहर लेंशा सेला बाक्त। मेको आ जग वोदमेनु, मेको आ ङोंइती जरमेशो तौ अबीराम बेक्माक्त। मिनु मेको आ ठेयब लाप्चो वोदमेनु, मेको आ कान्छा तौ सेगुब बेक्माक्त। मोपा परमप्रभु यावेमी नून आ तौ यहोसु रे पा देंशो लोव़ खबा बाक्त। यहोसु ६:२६