19
एलीया प्रोक्शा, होरेब डांडा लशो
1 मिनु आहाबमी इजेबेल कली एलीया आ पशो गेय नेल्ल नु मेकोमी दोपा देवी देवता आन लोव़ पाइब नेल्ल आन कली तरवारम सदा, मेको नेल्ल शेंदा बाक्त।
2 मिनु इजेबेलम एलीया आ बाक्तीकेम “गे दोपा मेको आन कली सदी, मोपा गो दीसा एं ना सम्म इ कली मसाइक्तन हना, देवतापुकीम आं कली यो मोदेंशोन पाइय्यीमील। मेको क्येङा यो शुश पाइय्यीमील” देंथ लोव़ कुरब मुर सोइक्ता बाक्त।
3 मिनु एलीया हिंशा, प्रोक्माक्त। मिनु मेको प्रोक्शा यहूदा ङा बेयर-शेबा जाक्माक्त। मिनु मेकोमी आ गेय पाइब कली मेक उइ प्रोना बाक्त।
4 मिनु आं चहिं काबु ङा लां ङोन गोरशो रागीम ओव़माक्त। मिनु मेको बुटा आगाम निश्शा, परमप्रभु यावे कली “मुल नुप्त। आ सोक्त ब्रने। मारदे हना गो आं किकी पिपी आन क्येङा रिम्शो मनङ” देंमाक्त। अय्युब ७:१५; योना ४:३
5 मिनु नोले बुटा आ आगामीन गोल्शा निन्द्रा पवा बाक्त। मेना परमप्रभु यावे आ स्वर्ग ङा गेय पाइब कामी मेको कली ब्रा थिशा “बोक्शा जावो” देंमाक्त।
6 मिनु मेकोमी बोक्शा, एर ओंथ कोव़ङानु, आ पिया गे चोशो होश शोब्ले का नु ढुङग्रो का ब्वाक्कु तवा बाक्त। मिनु मेकोम मेको जशा तूशा लेंशा इम्माक्त।
7 मिनु परमप्रभु यावे आ स्वर्ग ङा गेय पाइब लेंशा जाक्शा, मेको कली थिशा “बोक्शा जावो। इ लां थम लाइश्शो बाक्ब” देंमाक्त।
8 मोपतीके मेको बोक्शा, जवा तूङा बाक्त। मिनु मेको आ बोलम मेको ४० नाक्त नु ४० नाक्दो सम्म गाक्शा, परमप्रभु आ डांडा होरेब जाक्दीम्माक्त। प्रस्थान २४:१८
9 मिनु मेकेर ङा पुक्खी काम ओव़शा, मेक उइ नां सोंइदा बाक्त। मेकेर बाक्मेनु, परमप्रभु यावेम मेको कली “एलीया, गे एक मार पा बाक्ङे?” दे हिल्लो पवा बाक्त।
10 मिनु मेकोमी “परमप्रभु यावे, मुर नेल्ल आन परमप्रभु, गो इन पर्बम शुश गेय पाता। इस्राएलीमी इन कबल प्रोंइतेक्म। इन कली चढ़ेतीक प्रेत्तेक्म। मिनु इन लोव़ पाइब आन कली तरवारम क्योरशा साइक्तेक्म। गो आं का ला लीशो बाक्नुङ। मिनु मुल मेकोपुकीमी आं कली यो साइक्चा माल्शो बाक्नीम” देंमाक्त। भजन संग्रह ६९:१०; यसैया ४९:४; १राजा १८:२२; रोमी ११:३
11 मिनु परमप्रभु यावेमी “ग्रूङो, आं ङोंइती डांडाम रपो” देंमाक्त। मारदे हना परमप्रभु यावे मेकेर रे लन लन बाक्माक्त। मिनु परमप्रभु यावे आ ङोंइङोंइती ठेयब फश गिवार डांडा आन कली प्रोल्ना प्रोल्न नु फुल्लु आन कली ख्रिन्ना ख्रिन्न जाक्माक्त। तन्न परमप्रभु यावे मेको फशेम मबाक्माक्त। मेको आ नोले ठेयब ख्रिनु कुमाक्त। तन्न परमप्रभु यावे मेको ख्रिनुमी यो मबाक्माक्त। प्रस्थान ३३:२२
12 मिनु मेको ख्रिनु आ नोले मी का जाक्माक्त। तन्न मेको मीमी यो परमप्रभु यावे मबाक्माक्त। मिनु मी आ नोले इम्चीली सेंदा का जाक्माक्त।
13 मिनु एलीयामी मेको सेंदा नेंशा, आ वामी आ कुल सुम्से बाक्त। मिनु लाङगा ग्रूशा पुक्खी आ ङोंइती राम्माक्त। मिनु मेको आइक्च सेंदाम “एलीया गे एक मार पन पन बाक्ङे?” देंमाक्त।
14 मिनु मेकोमी “परमप्रभु यावे, मुर नेल्ल आन परमप्रभु गो इन पर्बम शुश गेय पाता। इस्राएलीमी इन कबल प्रोंइतेक्म। इन कली चढ़ेतीक प्रेत्तेक्म। मिनु इन लोव़ पाइब आन कली तरवारम क्योरशा साइक्तेक्म। गो आं का ला लीशो बाक्नुङ। मिनु मुल मेकोपुकीमी आं कली यो साइक्चा माल्शो बाक्नीम” देंमाक्त।
15 मिनु परमप्रभु यावेम मेको कली “गे तेको लां रे जाक्शो बाक्ङे, मेको लां रे पा लेश्शा दमस्कस ङा गोरशो रागीम लावो। मिनु गे मेको सहर जाक्दीश्शा, हजाएल कली अराम ङा पिप सेलो। २राजा ८:१३,१५
16 मिनु निम्शी आ तौ येहू कली यो इस्राएल ङा पिप सेलो। आबेल-मेहोलाह ङा शाफात आ तौ एलीशा कली इ पा ङा आं लोव़ पाइब सेलो। २राजा ९:२-३
17 मिनु हजाएल आ तरवार रे ब्रोंइशो आन कली येहूमी साइक्ब। मिनु येहू आ तरवार रे ब्रोंइशो आन कली एलीशामी साइक्ब।
18 मो हना यो, गो ७ हजार जना आन कली इस्राएलम प्रोंइशा वोइक्नुङमी। मेकोपुकीमी बाल आ ङोंइती आन पोक्च मथेक्शो बाक्नीम। मिनु मेकोपुकीम बाल कली पुक्पु मपाइश्शो बाक्नीम” देंमाक्त। रोमी ११:४
एलीयामी एलीशा कली ब्रेश्शो
19 मिनु एलीया मेकेर रे लमाक्त। मिनु शाफात आ तौ एलीशा कली ग्रुमा बाक्त। मेको १२ हाल ब्यफ वाक्ना वाक्न बाक्माक्त। मेको चहिं मेको नेल्ल क्येङा नोले ङा हाल वाक्ना वाक्न बाक्माक्त। मिनु एलीया लशा, आ फेक्शो वा मेको आ तार कोप्ता बाक्त।
20 मिनु एलीशामी आ ब्यफ प्रोंइशा, एलीया आ नोनोले दोरमाक्त। मिनु मेकोम “आं कली आं आंम आफ आस कली पुक्पु पाइक्चा गेयीनी। मिनु इन नोले खोइक्नुङ” देंमाक्त। मिनु एलीयाम “लावो, गो इ कली मार पङा मेको मिम्तो” दे मदा बाक्त। लूका ९:६१-६२
21 मिनु एलीशाम एलीया कली प्रोंइशा लमाक्त। मिनु मेकोमी आ हाल ब्यफ लाइश्शा क्योरा बाक्त। मिनु मेकोम हलो चोशा श्ये क्येवा बाक्त। मिनु मुर आन कली ब्वचा गेमी बाक्त। मिनु मुरपुकीम ब्वामे बाक्त। मिनु मेको नोले एलीया आ नोले खोदा बाक्त। मिनु मेको आ गेय पाइब दुम्माक्त।