7
सोलोमनम आ खिं सेल्‍शो
सोलोमन आ खिं सेल्‍चा कली १३ बर्स माल्‍दा बाक्‍त। मिनु मेकोमी आ खिं नु मारेइ मारेइ सेल्‍ने थुमा बाक्‍त। १राजा ९:१० मेकोमी लेबानोन ङा ब्‍वाकी माइश्‍शो खिं सेला बाक्‍त। मेको खिं सहे का कुबीत लाइश्‍शो, ५० कुबीत ब्रेम्‍शो नु ३० कुबीत ग्‍येत्‍थ लाइश्‍शो बाक्‍माक्‍त। मेको खिं ४ लहर लेबानोन ङा लाइश्‍शो रवा आ शी के थाम पाइश्‍शो बाक्‍माक्‍‍त। मिनु मेको आ तार लेबानोन ङा लाइश्‍शो रवा आ पाइद्रा वोदा बाक्‍त। कुबीत का ०.५ मिटर खोदेंशो बाक्‍ब। यसैया २२:८ मेको नेल्‍ल लेबानोन ङा लाइश्‍शो रवा आ शी के फलेकम साप्‍शो बाक्‍माक्‍त। मेको थाम लहर कामी १५ ओटा पा, लहर सांमी ४५ ओटा बाक्‍मा बाक्‍त। मेकेर लहर सां पा झेलपुकी वोइश्‍शो बाक्‍मा बाक्‍त। मेकोपुकी एर ओंथ पा कोव़मुशो बाक्‍मा बाक्‍त। लाप्‍चो ङा शी नेल्‍ल ४ पाटे बाक्‍मा बाक्‍त। मेको यो नेल्‍ल लहर सां पा कोव़मुशो बाक्‍मा बाक्‍त।
मेकोमी ५० कुबीत लाइश्‍शो नु ३० कुबीत ब्रेम्‍शो थाम पाइश्‍शो ठेयब पिंडी सेल्‍पदा बाक्‍त। मिनु मेको आ ङोंइती थाम पाइश्‍शो ओव़तीक बाक्‍माक्‍त। मेको आ ङोंइती इप्‍तीक का यो बाक्‍माक्‍‍त।
मेकोमी निसाफ पचा कली ठेयब नित्‍तीके बाक्‍शो कोठा का सेल्‍पदा बाक्‍त। मेको कली निसाफ पतीक कोठा, दे नें वोदा बाक्‍त। मिनु मेकोमी मेको कोठा नेल्‍ले इर रे उइ सम्‍म लेबानोन ङा लाइश्‍शो रवा आ शी के फलेक क्‍येप्‍पदा बाक्‍त।
मेकोम मेको निसाफ पतीक खिं आ नोले आ बाक्‍तीक खिं सेल्‍पदा बाक्‍त। मेको खिं ङोंइती ङा खिं खोदेंशो पा सेल्‍पदा बाक्‍त। मिनु सोलोमनमी आ ग्‍युंबे पा चाक्‍शो फाराओ आ तमी कली यो मोदेंशोन खिं सेल्‍पदा बाक्‍त। १राजा ३:१
मेको खिं नेल्‍ल शुश क्‍येट लाइब फुल्‍लु रे पा सेल्‍शो बाक्‍मा बाक्‍त। मेको फुल्‍लु नेल्‍ले गारपा अराम ख्रोइश्‍शो बाक्‍माक्‍त। मेको खिं इर रे उइ सम्‍म नु खिंङगा रे लाङगा सम्‍म मोदेंशो फुल्‍लु के सेल्‍शो बाक्‍मा बाक्‍त। 10 मेको आ जग फुल्‍लु ठेयब नु शुश क्‍येट लाइब बाक्‍मा बाक्‍त। मेको पुक्‍शोनु कोइ १० कुबीत लाइश्‍शो, कोइ ८ कुबीत लाइश्‍शो बाक्‍मा बाक्‍त। 11 मेको आ तार शुश क्‍येट लाइब, थम गारपा ख्रोइश्‍शो फुल्‍लु ब्रपदा बाक्‍त। मिनु मेको तार लेबानोन ङा लाइश्‍शो रवा आ शी के फलेक गारपा ब्रपदा बाक्‍‍त। 12 मिनु ठेयब लाङगाम एर ओंथ नेल्‍ल ख्रोइश्‍शा गारपाइश्‍शो फुल्‍लु सां खेयप ब्रशा, फुल्‍लु तार लेबानोन ङा लाइश्‍शो रवा आ शी के फलेक ब्रशो बाक्‍माक्‍त। मिनु परमप्रभु यावे आ खिं आगा ङा लाङगा नु आ पिंडी यो मोदेंशोन बाक्‍माक्‍त। १राजा ६:३६
हुराम आ गेय
२इतिहास ३:१५-५:१
13 पिप सोलोमनम हुराम कली टायर रे ब्रेत्‍थ सोइक्‍ता बाक्‍त। २इतिहास २:१३-१४ 14 मेको आ ममा नाप्‍ताली आ खिं ङा आ वोंइश बेक्‍शो मीश मुर का बाक्‍माक्‍त। मेको आ आफ टायर ङा थाम्‍पा कांसा के गेय पस जोक्‍ब मुर बाक्‍माक्‍त। मोपतीके हुराम यो थाम्‍पा कांसा के गेय पस जोक्‍ब बाक्‍माक्‍त। मिनु मेको पिप सोलोमन आ बाक्‍तीक जाक्‍माक्‍त। मिनु आ कली गेशो गेय नेल्‍ल पवा बाक्‍त।
कांसा के थाम निक्‍शी
15 मेकोम यपाइश्‍शा कांसा के थाम निक्‍शी सेला बाक्‍त। मेको थाम का १८ कुबीत लाइश्‍शो बाक्‍माक्‍त। मेको आ एर ओंथ नेल्‍ल १२ कुबीत बाक्‍माक्‍त। मिनु अर्को यो मोदेंशोन बाक्‍माक्‍त। कुबीत का ०.५ मिटर खोदेंशो बाक्‍त। २राजा २५:१७ 16 मिनु मेकोमी मेको थाम आस ङरम पिया वोइक्‍चा कली यपाइश्‍शो कांसा के पिया निक्‍शी सेला बाक्‍त। मेको निम्‍फा ५, ५ कुबीत लाइश्‍शो बाक्‍सा बाक्‍त। 17 मेकोमी थाम आ पिया कली बुटा आप्‍शो जाली के ७ ओटा झुम्‍का सेला बाक्‍त। मिनु अर्को थाम कली यो मोदेंशोन सेला बाक्‍त। 18 मिनु मेको थाम आ पिया ग्‍योम्‍चा कली कांसा के जाली नेल्‍ल आन एर ओंथ लहर निक्‍शी बुटा आप्‍शो दारीमपुकी सेला बाक्‍त। मिनु मेकोम अर्को कली यो मोदेंशो पान सेला बाक्‍त। 19 मिनु मेको पिंडी ङा थाम आन पिया ४, ४ कुबीत लाइश्‍शो लिली फू खोदेंशो पा सेला बाक्‍त। 20 मिनु मेको थाम आ पियामी कचौरा खोदेंशो बाक्‍तीकेम जाली थाम आ पिया आ एर ओंथ नेल्‍ल लहर लहर पा सहे निक्‍शी दारीम क्‍याइक्‍चा कली सेला बाक्‍त। मिनु अर्को थाम कली यो मोदेंशोन सेला बाक्‍त। 21 मिनु मेकोमी परमप्रभु यावे आ खिं आ पिंडीम मेको थाम निक्‍शी राप्‍पदा बाक्‍त। मिनु दक्‍खिन गे ङा थाम आ नें याकीन वोदा बाक्‍त। मिनु उत्तर गे ङा थाम आ नें बोआज वोदा बाक्‍त। 22 मेको थाम आस पिया लिली फू खोदेंशो बाक्‍मा बाक्‍त। मोपा मेको थाम आस गेय नुम्‍माक्‍‍त।
कांसा के ठेयब बोस
23 मिनु मेकोमी कांसा के यपाइश्‍शा ब्‍वाक्‍कु वोइक्‍तीक ठेयब बोस का सेला बाक्‍त। मेको आ सुर का रे अर्को सुर सम्‍म १० कुबीत बाक्‍माक्‍त। मेको ५ कुबीत ग्‍येत्‍थ लाइश्‍शो बाक्‍माक्‍त। मेको आ एर ओंथ पुक्‍शोनु ३० कुबीत बाक्‍‍बाक्‍त। 24 मेको ठेयब बोस आ एर ओंथ नेल्‍ल ङा सुरमी कुबीत काम १०, १० ओटा लौका आ बुटा आप्‍शा ग्रुंइशो बाक्‍माक्‍त। मोपा मेको ठेयब बोसुम लहर निक्‍शी लौका सेला बाक्‍त। 25 मेको ठेयब बोस १२ ओटा ब्‍यफ आन तार वोइश्‍शो बाक्‍माक्‍त। मेको ब्‍यफ सां उत्तर गे, सां पच्‍छिम गे, सां दक्‍खिन गे नु सां पूर्ब गे कोव़शो बाक्‍मा बाक्‍त। मेको ब्‍यफ नेल्‍ल लाङगा गे हिरशो बाक्‍मा बाक्‍त। 26 मेको बोस ४ आंइची थांइशो बाक्‍माक्‍त। मिनु मेको आ शोव़ चहिं कचौरा नु बोइक्‍चशो लिली फू खोदेंशो बाक्‍माक्‍त। मेकेर हजार निक्‍शी बाथ ब्‍वाक्‍कु रिक्‍बाक्‍माक्‍त। बाथ का २२ लिटर खोदेंशो बाक्‍ब।
कांसा के १० ओटा चिक्‍तीक
27 मिनु मेकोमी कांसा के १० ओटा अरु निप्‍पाइक्‍‍तीक सेला बाक्‍त। मेको नेल्‍ल ४, ४ कुबीत लाइश्‍शो ४, ४ कुबीत ब्रेम्‍शो नु ३, ३ कुबीत ग्‍येत्‍थ लाइश्‍शो बाक्‍मा बाक्‍त। कुबीत का ०.५ मिटर खोदेंशो बाक्‍त। 28 मेको निप्‍पाइक्‍‍तीक आन खोइली आन दातेमी बोइक्‍तीके बाक्‍मा बाक्‍त। 29 मेको वोइक्‍तीकेमी ब्‍यफ, गुप्‍स नु करूब आन बुटा आप्‍शो बाक्‍मा बाक्‍त। मेको आन दी गे यो झुम्‍का क्‍‍याइश्‍शो बाक्‍मा बाक्‍त। 30 मेको निप्‍पाइक्‍‍तीक नेल्‍लेम कांसा के ४, ४ ओटा गुगील बाक्‍मा बाक्‍त। मेको बोस आन पुंमी तिक्‍‍तीक क्‍येप्‍शो बाक्‍मा बाक्‍त। मेको झुम्‍का आन नेक्‍था बाक्‍मा बाक्‍त। 31 मेको आन रोक्‍तीक कुबीत का ग्‍येत्‍थ लाइश्‍शो बाक्‍मा बाक्‍त। मेको कुल कुल देंशो बाक्‍मा बाक्‍त। मेको कुबीत का नु आधा ब्रेम्‍शो बाक्‍मा बाक्‍त। मिनु मेको आन रोक्‍तीकेमी बुटा आप्‍शो बाक्‍मा बाक्‍त। मिनु मेको निप्‍पाइक्‍‍तीक चहिं कुल कुल देंशो ममाइ ४ पाटे बाक्‍मा बाक्‍त। 32 मेको ४ ओटा गुगील आगा गे बाक्‍मा बाक्‍त। मिनु मेको गुगील आन बोइक्‍तीक नु बोइश्‍शो बाक्‍मा बाक्‍त। मेको गुगील नेल्‍ल कुबीत का नु आधा ङा बाक्‍मा बाक्‍त। 33 मेको गुगील बग्‍गी आन गुगील खोदेंशो पा सेल्‍शो बाक्‍मा बाक्‍त। मेको आन गुगील नु आन मारेइ मारेइ यपाइश्‍शा सेल्‍शो बाक्‍मा बाक्‍त। 34 मेको निप्‍पाइक्‍‍तीक आन तिक्‍तीक ४ पाटे बाक्‍मा बाक्‍त। मेको नेल्‍ल टुक्रा का के सेल्‍शो बाक्‍मा बाक्‍त। 35 मेको निप्‍पाइक्‍‍तीक आन तार आधा आधा कुबीत ग्‍येत्‍थ लाइश्‍शो कुल कुल देंशो सुर बाक्‍मा बाक्‍त। मेको निप्‍पाइक्‍‍तीक आन तार बाक्‍शा, मेको नु टुक्रा का के बाक्‍मा बाक्‍त। 36 मिनु मेकोमी मेकेर तेक तेक श्‍येत्‍थ बाक्‍मा, मेक मेक गुप्‍स, करूब नु खजूर रवा आन बुटा आबा बाक्‍त। मेको आन एर ओंथ नेल्‍ल मुशा सेल्‍शो कांसा के मालापुकी सेला बाक्‍त। 37 मोपा मेकोमी मेको १० ओटा निप्‍पाइक्‍‍तीक सेला बाक्‍त। मेको नेल्‍ल खाल का ङा पा सेला बाक्‍त।
38 मेको नोले मेकोम कांसा के १० ओटा चिक्‍तीक बोस सेला बाक्‍त। मेको नेल्‍लेमी ४०, ४० बाथ ब्‍वाक्‍कु रिक्‍बाक्‍मा बाक्‍त। मेको पुक्‍शोनु ४, ४ कुबीत ङा बाक्‍मा बाक्‍त। मेको निप्‍पाइक्‍‍तीक नेल्‍ल आन कली का का बाक्‍मा बाक्‍त। बाथ का २२ लिटर खोदेंशो बाक्‍ब। 39 मिनु मेकोमी ५ ओटा निप्‍पाइक्‍‍तीके खिं आ दक्‍खिन गे नु ५ ओटा खिं आ उत्तर गे वोदा बाक्‍त। मिनु ठेयब बोस चहिं परमप्रभु यावे आ खिं आ दक्‍खिन पूर्ब गे वोदा बाक्‍त।
परमप्रभु आ खिं ङा मार मार
40 हुराममी बोसपुकी, पुलु ताप्‍तीक नु ग्‍योंबपुकी सेला बाक्‍त। मोपा हुराममी पिप सोलोमन आ देंशो खोदेंशो पा परमप्रभु यावे आ खिं ङा मारेइ मारेइ सेल्‍ने थुमा बाक्‍त। 41 थाम निक्‍शी, मेको आस ङर सुम्‍चा कली कचौरा खोदेंशो पिया निक्‍शी, मेको थाम आस पिया ग्‍योम्‍तीक बुटा आप्‍शो जाली निक्‍शी, 42 मेको जाली निक्‍शी आस कली ४ सहे दारीम, मेको कचौरा खोदेंशो पिया पाइश्‍शो थाम निक्‍शी आस कली सुम्‍तीक जाली आस कली लहर निक्‍शी दारीम, 43 मेको १० ओटा निप्‍पाइक्‍‍तीक आन कली १० ओटा बोस, 44 ठेयब बोस का मेको आगा ङा १२ ओटा ब्‍यफ सेल्‍ने थुमा बाक्‍त।
45 हुराममी बोसपुकी, पुलु ताप्‍तीक नु ग्‍योंबपुकी सेला बाक्‍त। मोपा हुराममी पिप सोलोमन आ देंशो खोदेंशो पा परमप्रभु यावे आ खिं ङा मारेइ मारेइ सेल्‍ने थुमा बाक्‍त। मेको नेल्‍ल टल्‍केशो कांसा के बाक्‍मा बाक्‍त। 46 मेको नेल्‍ल पिपम यर्दन खोला ङा दिंम सुक्‍कोथ नु चारेथन आस दातेमी मार मार यपाइक्‍तीकेम यपाइश्‍शा, सेल्‍पाइश्‍शो बाक्‍माक्‍त। 47 सोलोमनम मेको मिश का थोव़क सेल्‍तीके, मेको नेल्‍ल मनाक्‍थुन वोदमे बाक्‍त। मेको सेल्‍चा कली दोशो कांसा माल्‍दा, मेको यो मनाक्‍तमे बाक्‍त।
48 मिनु सोलोमनम परमप्रभु यावे आ खिं दारपाइक्‍चा कली मारेइ मारेइ थोव़क नेल्‍ल सेल्‍पदा बाक्‍त। मेकोमी सुन के चढ़ेतीके नु कोंइतीक शोब्‍ले वोइक्‍तीक सुन के टेबल यो सेल्‍पदा बाक्‍त। 49 क्‍येख सुन के बत्ती दातीक सेल्‍पाइश्‍शा, नेल्‍ल क्‍येङा चोव़खो बाक्‍तीक कोठाम दक्‍खिन गे ५ ओटा नु उत्तर गे ५ ओटा पा वोइक्‍पदा बाक्‍त। सुन के फू खोदेंशो बुटा, सुन के बत्ती दातीक, सुन के थनारो, 50 क्‍येख सुन के ग्‍योंब, सल्‍दो ख्रोइक्‍तीक कांइची, बोसपुकी थनौरो, कोइला कुरतीके, ब्‍वाक्‍कु ब्रुइक्‍तीक डाडु, कचौरा, थनौरो, नेल्‍ल क्‍येङा चोव़खो कोठा ङा लाप्‍चो नु अरु लाप्‍चो ङा हेक्‍तीक नेल्‍ल क्‍येख सुन के सेल्‍पदा बाक्‍त।
51 मिनु पिप सोलोमनम परमप्रभु यावे आ खिं ङा गेय नेल्‍ल थुम्‍पदा बाक्‍त। मिनु मेकोमी आ आफ दाऊदमी जिम्‍मा गेशो थोव़कपुकी, सुन, चांदी नु दारपाइक्‍तीक चाक्‍पाइश्‍शा, परमप्रभु यावे आ खिं ङा शोंप वोइक्‍तीकेमी वोइक्‍पाइक्‍मी बाक्‍त।