24
नेबुकदनेसरमी लडाइ तोशो
1 येहो-याकीममी सासन पवा ना बेबीलोन ङा पिप नेबुकदनेसर मेको रागी नु लडाइ पथ जाक्माक्त। मिनु बर्स सां सम्म येहो-याकीम मेको आ सासनम बाक्माक्त। तन्न बर्स सां नोले मेकोमी आ थुं फाइश्शा, नेबुकदनेसर कली मटिवा बाक्त। येरमीया २२:१३-१९
2 मिनु परमप्रभु यावेमी यहूदा नु लडाइ पचा कली कल्दी, अरामी, मोआबी नु अम्मोनी आन कली सोइक्तीमी बाक्त। परमप्रभु यावेमी आ गेय पा आ लोव़ पाइब आन देंशो खोदेंशो दुम्पाइश्शा यहूदा कली खतम पोक्पाइक्चा कली मेको आन कली सोइक्तीमी बाक्त।
3 परमप्रभु यावेमी आ मिम्शो खाप्शा, मनस्से आ पशो मरिम्शो नु आ पाप आ पर्बम मेको आन कली आ ङोंइती रे ग्रुंइचा कली मो पशो बाक्माक्त। २राजा २१:१०-१६; २राजा २३:२६-२७
4 मारदे हना मनस्सेम दोस मताइब मुर आन कली साइश्शा, यरूसलेम कली हुशेम प्रिंशो बाक्माक्त। मिनु परमप्रभु यावेमी मेको कली माफ गेने मबिश्शो बाक्माक्त।
5 मिनु येहो-याकीम आ पशो अरु गेय, मेको आ पशो नेल्ल, मार, मेको यहूदा ङा पिप आन इतिहासम ब्रेक्शो मबाक्बा ङा?
6 मिनु येहो-याकीन बेक्माक्त। मिनु मेको आ पा ङा आ तौ येहो-याकीन पिप दुम्माक्त।
7 इजीप्त ङा पिप आ रागी प्रोना नोले लेंशा मजाक्माक्त। मारदे हना बेबीलोन ङा पिपम इजीप्त ङा खोला रे युफ्रेटीस खोला सम्म ङा रागी नेल्ल आ के सेल्शो बाक्माक्त।
यहूदा ङा पिप येहो-याकीन
२इतिहास ३६:९-१०
8 येहो-याकीन पिप दुम्मेनु १८ बर्स दुम्शो बाक्माक्त। मेकोमी यरूसलेमम महिना सां सासन पवा बाक्त। मेको आ ममा आ नें नहुश्ता बाक्माक्त। मेको यरूसलेम ङा एल्नाथान आ तमी बाक्माक्त। येरमीया २२:२४-३०
9 येहो-याकीनमी आ आफ खोदेंशो पा, परमप्रभु यावे आ ङोंइती मार मरिम्शो बाक्मे, मेको पवा बाक्त।
10 मेना बेबीलोन ङा पिप नेबुकदनेसर आ लडाइ पाइबपुकी यरूसलेमम लडाइ पथ जाक्शा, मेको सहर कली पुम्शो बाक्मा बाक्त।
11 मिनु आ लडाइ पाइबपुकीम मेको सहर पुम्दमेनु, बेबीलोन ङा पिप नेबुकदनेसर जाक्माक्त।
12 मिनु यहूदा ङा पिप येहो-याकीन, नेबुकदनेसर कली जिम्मा गेसे बाक्त। मिनु मेको नु मेको आ ममा, आ गेय पाइबपुकी, आ ठेयब मुरपुकी नु आ लडाइ पाइब आन ठेयब मुर नेल्ल बेबीलोन ङा पिप कली जिम्मा गेसमा बाक्त। मिनु बेबीलोन ङा पिपम सासन पवा आ ८ बर्सम येहो-याकीन कली ग्याइश्शा चोक्गा बाक्त।
13 मेकोमी परमप्रभु यावे आ खिं ङा शोंप नु पिप आ खिं ङा शोंप नेल्ल लदा बाक्त। मेकोमी सोलोमनम सेल्शो परमप्रभु यावे आ खिं ङा सुन के बोस ख्रोइश्शा लदा बाक्त। मोपा परमप्रभु यावे आ देंशो लोव़ गाम्माक्त। २राजा २०:१७
14 मेकोपुकीम यरूसलेम ङा ठेयब मुर, लडाइ पाइब आन ठेयब मुर नेल्ल, लडाइ पाइब नेल्ल १० हजार मार मार सेल्स जोक्ब नु तुप्तील नेल्ल ग्याइश्शा लदा बाक्त। थम प्रुङग आन कली ला प्रोंइशा वोदा बाक्त। येरमीया २४:१
15 नेबुकदनेसरमी येहो-याकीन कली ग्याइश्शा बेबीलोनम लदा बाक्त। पिप आ ममा, पिप आ मीशपुकी, मेको आ ठेयब गेय पाइबपुकी नु नेल्ल क्येङा जोक्ब तुइक्ब आन कली यरूसलेम रे ग्याइश्शा बेबीलोन लदा बाक्त। येरमीया २२:२६
16 बेबीलोन ङा पिपमी ७ हजार बोल्यो लडाइ पाइब नु हजार का मार मार सेल्स जोक्न नु तुप्तील आन कली ग्याइश्शा बेबीलोन लाइक्मी बाक्त। मेको नेल्ल लडाइ पचा कली बोल्यो मुर बाक्मा बाक्त।
17 बेबीलोन ङा पिपमी येहो-याकीन आ बकान्छा मत्तन्याह कली मेको आ पा ङा पिप सेला बाक्त। मिनु मेको आ नें सिदकीयाह वोदा बाक्त।
यहूदा ङा पिप सिदकीयाह
२इतिहास ३६:११-२१; येरमीया ५२:१-३०
18 सिदकीयाह पिप दुम्मेनु, मेको २१ बर्स दुम्शो बाक्माक्त। मिनु मेकोमी यरूसलेमम ११ बर्स सासन पवा बाक्त। मेको आ ममा आ नें हामुतल बाक्माक्त। मेको लिब्ना सहर ङा येरमीया आ तमी बाक्माक्त।
19 मेकोम येहो-याकीमम पशो खोदेंशो पा परमप्रभु यावे आ ङोंइती मार मरिम्शो बाक्मे, मेको पवा बाक्त। २राजा २३:३७
20 मिनु परमप्रभु यावे आ गाइश्शोम पतीके यरूसलेम नु यहूदा ङा मुर नेल्ल आन कली आ ङोंइती रे ग्रुंइदीमी बाक्त। मिनु नोले सिदकीयाहमी बेबीलोन ङा पिप कली मटिवा बाक्त। २राजा २३:२७