15
“जाम्शो थिश्शा ग्येरसमल” दे शेंशो
1 मिनु शुश तिरो पोक्ब नु पापीपुकी येसु आ लोव़ नेंथ जाक्मा बाक्त।
2 मिनु फरिसी नु सास्त्रीपुकीमी तिरो पोक्ब नु पापी शुश येसु नु काथा बाक्शा जशो तशा “मेको मुरुमी पापी आन कली ब्राइब। पापीपुकी नु काथा बाक्शा, खमे जाइब” दे आन थुं मनुथु, लोव़ पामे बाक्त। लूका ५:३०; लूका १९:७
3 मिनु येसुमी मेको आन थुं मनुशो तुइक्ता बाक्त।
जाम्शो भेडा आ कथा
4 मिनु “मुर कामी सहे का भेडा थुल्शा, मेको आन कली योव़ङानु, भेडा का जाम्त हना, मार, मेकोमी लीशो ९९ भेडा आन कली प्रोंइशा, जाम्शो कली माल्थ मलाइबा ङा? मथिदा सम्म माल्ना माल्न गाक्ब। मत्ती १८:१२-१४; लूका १९:१०; इजीकीएल ३४:१२; यूहन्ना १०:११-१२
5 मिनु मेको जाम्शो भेडा का कली थिश्शा, ग्येरसीशा, बलाम लाप्शा, आ खिं चाक्ब।
6 मिनु आ वारच आन कली ‘आं जाम्शो भेडा थिश्शा चाक्ता। मोपतीके नेल्ल ग्येरसय’ देंब।
7 मारदे हना ९९ परमप्रभु यावे गे लेत्चा ममाल्शो रिम्शो पाइब आन क्येङा पापी कामी पाप पचा प्रोंइशो तशा, स्वर्गम बाक्बपुकी ग्येरसीनीम” दे शेंताक्मी।
जाम्शो क्येट आ कथा
8 मिनु “मार, मीश मुर कामी १० ओटा द्राक्मे वोइश्शोमी का जाम्त हना, बत्ती दाशा, खिं गा, कुना लाङगा नेल्ल हिरशा, मथिदा सम्म ममाल्बा ङा? द्राक्मे ग्रीक लोव़ बाक्ब। मेको देनार का खोदेंशो नाक्त का ङा गाल्च बाक्त। देनार चहिं रोमी लोव़ बाक्ब।
9 मिनु थिश्शा आ वारच आन कली नु आ नेक्था ङा मुर आन कली ब्रेश्शा ‘आं के जाम्शो द्राकमे का माल्शा थित्ता। मुल ग्येरसाक्यी’ देंब।
10 मोपा पापी मुर कामी पाप पचा प्रोंइशा, आ थुं परमप्रभु यावे गे लेत्ताक्व हना, परमप्रभु यावे आ स्वर्ग ङा गेय पाइबपुकी ग्येरसीनीम” दे माइक्मी बाक्त।
जाम्शो तौ आ कथा
11 मिनु लोव़ बोइश्शा “मुर का के तौ निक्शी बाक्सा बाक्त।
12 मिनु काबु कान्छा तौमी ‘आं आफ अङस योक्शा गेयी’ देंमाक्त। मिनु आफोमी जेठा नु कान्छा आस कली अङस योक्शा, गेम्सी बाक्त।
13 मिनु कान्छामी इच्का नाक्त नोले आ अङस नेल्ल खुप्शा, क्येट नेल्ल कुरशा गाक्माक्त। मिनु जशा, तूशा, तेल्लेम पा, जवा ग्यारशा, क्येट नेल्ल थुमा बाक्त। हितोपदेस २९:३
14 मिनु मेको रागीमी अन्काल दुम्माक्त। मिनु कान्छामी श्येत जवा बाक्त।
15 मिनु मेको रागी ङा मुर का आ खिंमी गेय पवा बाक्त। मिनु मेको मुरुमी कान्छा कली पोव़ योव़ब सेला बाक्त।
16 मिनु जचा मतथु, शोव़लु बेक्शा, पोव़ कली जचा गेशो थोव़की यो जङ खोदेंशो दुम्माक्त। तन्न सुइमी मारेइ जचा मगेमे बाक्त। हितोपदेस २३:२१
17 मिनु शुश श्येत जशा ‘आं आफ आ खिंमी गेय पाइबपुकीमी रूथ्री जाइनीम। हेंथ्री दुम्ब। गो चहिं शोव़लुम बेक्चता।
18 मुल गो आं आफ आ खिं लेत्नुङ। मिनु आं आफ कली “गो परमप्रभु यावे आ देंशो मटिङ। इन देंशो यो मटिङ। भजन संग्रह ५१:६; येरमीया ३:१२-१३
19 मुल इन तौ देंचा मशिरनुङ। मोपतीके इन गेय पाइब का सेल्यीनी” दे माइक्नुङ’ दे मिम्ता बाक्त।
20 मिनु आ आफ आ खिं लेम्माक्त। मिनु आ आफ आ खिं जाक्दीत्चावानु, आ आफोमी कान्छा कली पिशो तशा, शिशी पा दोरशा लशा मुप्शा पुक्पु पदा बाक्त।
21 मिनु मेकोमी ‘आं आफ, गो परमप्रभु यावे आ देंशो मटिङ। इन देंशो यो मटिङ। मोपा मटितीके पापम ग्रुम्ती। इन तौ देंचा मशिरनुङ’ देंमाक्त।
22 मिनु आफोमी गेय पाइब आन कली ‘नेल्ल क्येङा दारशो फेक्तीक वा ग्रुंइशा, आं तौ कली फेक्तीने। आ गुइमी औंठी लिक्तीन। जुत्ता मुइक्पतीने।
23 मिनु दोम्शो बाछा क्योरशा, क्येशा जचा तूचा सेल्शा, नेल्ल ग्येरसय।
24 मारदे हना आं बेक्शो तौ सेस दुम्त। आं जाम्शो तौ थित्ता’ देंमाक्त। मिनु जशा तूशा नेल्ले ग्येरसमा बाक्त। एफिसी २:५
25 मेकोपुकी ग्येरसीशा बाक्मानु, जेठा तौ रूमी गेय पथ लशो बाक्माक्त। मिनु लेश्शा खिं आ नेक्था जाक्मेनु, शुश मुर खुम्सीशा सिल पा, जशा तूशा ग्येरसीशा बाक्शो तवा बाक्त।
26 मिनु गेय पाइब का कली ‘इं खिंमी मार दुम्मे?’ दे हिल्लो पवानु,
27 मेकोमी ‘इन लोक्ब जाक्त। मिनु इन आफोमी जाक्शो तशा, ग्येरसीशा, दोम्शो बाछा क्योरपाइक्तु’ देंमाक्त।
28 मिनु मेको नेल्ल नेंशा ‘खिं मओव़नुङ’ दे चुरशा बाक्माक्त। मत्ती २०:१५
29 मिनु आफोमी लेम्शा ‘ओव़ङो, गे यो ग्येरसो’ देंमेनु ‘मार ग्येरसीनुङा, गो शुश बर्स एको खिं ङा गेय पना पन बाक्ती। इन लोव़ नेल्ल टिशा बाक्ती। गेना हना यो रिम्शो ला पाता। तन्न आं वारचपुकी नु बाक्शा ग्येरसीचा कली बोका का यो मगेनी।
30 इन तौ कान्छामी इं खिं ङा बाक्शो नेल्ल लाइश्शा, तेल्लेम पा थुम्तु। मोदेंशो मुर लेश्शा जाक्मेनु, दोम्शो बाछा क्योरतीनी। मिनु मचुरनुङा ङा?’ देंमाक्त।
31 मिनु आफोमी ‘आं तौ, गे गो नु काथा बाक्ते। आं मार मार बाक्मा, मेको नेल्ल इ के नमी।
32 इ लोक्ब चहिं बेक्शा रे ब्रोंइत। जाम्शो रे थिस्साक्व। मोपतीके गो नेल्ल ग्येरसय’ देंमाक्त” दे येसुमी शेंदीमी बाक्त।