19
तिरो पोक्ब जक्कै
1 मिनु यरीको सहरम जाक्दीश्शा, बास मबाक्चा, दे गाक्मा बाक्त।
2 मेको सहरमी जक्कै नें पाइश्शो शुश शोंप पाइश्शो तिरो पोक्ब ठेयब मुर का बाक्माक्त।
3 मेकोमी “इं सहरम येसु जाक्ब” देंशो नेंशा “गो कोव़थ लाइनुङ” दे मिम्ता बाक्त। सहर ङा मुरपुकी यो “येसु कली कोव़चा” दे लांमी रिम्शा, आ लां कोव़शा बाक्मा बाक्त।
4 जक्कै अरु आन क्येङा आइक्च बाक्माक्त। मिनु शुश मुरुमी लांमी रिम्शा फारशो तशा, मेको आन ङोंइती लशा, रवा का ङोइश्शा कोव़ङा बाक्त।
5 मिनु येसु मेको लां पिमेनु, जक्कै कली रवाम ङोइश्शा बाक्शो तशा “ए जक्कै, फ्रु तोंइसो। मारदे हना मुलाक्दो इ खिंमी बास बाक्नुङ” देंमाक्त।
6 मिनु जक्कै फ्रु तोंइसीशा, ग्येरसीशा आ खिं लाइश्शा, बास बाक्चा गेवा बाक्त।
7 मेकोमी मोदेंशो पशो तशा, मेकेर बाक्बपुकीमी “मेको पापी आ खिंम ओव़शा बास बाक्त” दे आन थुं मनुथु, लोव़ पामे बाक्त। लूका १५:२
8 मिनु जक्कैमी प्रभु कली खिंम ओंइशा “हे प्रभु, आं शोंप क्येट नेल्ल उइक्थ पा योक्शा, मथीब आन कली गेनुङमी। सु सु कली हिम हिम पा मार मार ताक्गु, मेको आन कली ४ खेयप तेम्शा लेश्शा गेनुङमी” देंमाक्त। प्रस्थान २१:३७; इजीकीएल ३३:१४-१६
9 मिनु येसुमी “थमा पा इ खिंमी बास बाक्शो रिम्शो दुम्त। मारदे हना गे पाप रे ब्रोंइते। इं किकी पिपी अब्राहाम आ तौ बाक्ङे बाक्त। लूका १३:१६
10 रागीम जरमेशो लां साम्शो आन कली लां कोंइथ जाक्त” देंमाक्त। लूका ५:३२; इजीकीएल ३४:१६; १तिमोथी १:१५
ठेयब मुर लेश्शा जाक्ब, दे शेंशो
मत्ती २५:१४-३०
11 मिनु यरूसलेम आ नेक्था जाक्दीम्मा बाक्त। मिनु शुश मुरुमी “यरूसलेम जाक्दीश्शा नोले येसु पिप दुम्ब। मिनु परमप्रभु यावे आ राज्य पशो तांइसीब” दे मिम्शो बाक्मा बाक्त। येसुमी मेको आन मिम्शो तुइश्शा कथा सेल्शा
12 “खेयप का ठेयब मुर का पिप रे सासन पतीक ताक्चा कली ङोन रागी लचा चिक्शो बाक्माक्त।
13 मिनु मेकोमी ‘गो शुश नाक्ती खिंम मबाक्नुङ’ दे तुइश्शा, लचा ङोंइती आ गेय पाइब १० जना मुर आन कली ब्रेश्शा, का का पा मीना का का गेशा ‘एको क्येटम खेलो पने। नोले जाक्ङानु, लेश्शा गेयीनी’ दे गाक्माक्त। मीना का १०० देनार बाक्ब। देनार का नाक्त का ङा गाल्च बाक्माक्त। देनार रोमी आन चांदी के क्येट बाक्माक्त। मत्ती २०:२
14 मेको मुर गाक्म नोले मेको रागी ङा मुरपुकीमी ‘मेको मुर आंइ कली सासन पाइब मदुम्ल’ दे लोव़ कुरब मुर मेको पिप आ बाक्तीक सोइक्तमे बाक्त। मारदे हना मेको कली मदाक्बाक्मा बाक्त। यूहन्ना १:११
15 मो हना यो मेकोमी सासन पतीक अधिकार ताक्शा, खिं लेम्माक्त। मिनु जाक्शा, आ गेय पाइब आन कली ब्रेश्शा, आ ङोंइती राप्पाइश्शा ‘आं गेशो क्येटमी मार पनी? गिश सेल्नी?’ दे हिल्लो पवा बाक्त।
16 मिनु ङोंइती ङा जाक्शा ‘आं होव़प, इन गेशो क्येटमी, मार मार ग्याप्शा लेयशा, अर्को १० मीना चेम्ता’ देंमाक्त।
17 ‘गे रिम्शो गेय पाइब बाक्ते, आइक्च गेयमी रिम्शो पाप्तीवी। मोपतीके १० ओटा सहर कली अधिकार पाइब सेल्नन’ देंमाक्त। लूका १६:१०
18 मिनु मेको नोले अर्को जाक्शा ‘आं होव़प, इन गेशो क्येटमी ग्याप्शा लेयशा, अर्को ५ मीना चेम्ता’ देंमाक्त।
19 मिनु मेकोमी ‘इ कली यो ५ ओटा सहर कली अधिकार पाइब सेल्नन’ देंमाक्त।
20 मिनु मेको आ नोले अर्को जाक्शा ‘आं होव़प, इन क्येट एकेर बाक्त। गो मेको वाम गिल्शा ख्रुइश्शा वोइक्ता।
21 गो इन क्येङा हिंती। मारदे हना गे हिंचा ङा होव़प बाक्नीनी। इन मगेशो थोव़क ताक्नीनी। इन मशोक्शो खुप्नीनी’ देंमाक्त।
22 मिनु ठेयब मुरुमी ‘गो इ लोव़म इ कली निसाफ पाइनुङ। आं देंशो मटीब गेय पाइब बाक्नेवे। मार मगेङा, मेको ताक्नुङ। मार मशोक्गु, मेको खुप्नुङ। गो मरिम्शो मुर नङा दे गे तुइश्शोन नवे?
23 गे मारदे मेको क्येट वोइक्तीक खिंमी मवोदी? गो मेको आ चाइक्ब तङ वा’ देंमाक्त।
24 मिनु मेकेर बाक्ब आन कली ‘मेको आ क्येट रोइश्शा १० मीना चेम्ब कली गेने’ देंमाक्त।
25 मिनु मुरपुकीमी ‘हजुर, मेको नु १० मीना सुन बाक्ब’ देंमा बाक्त।
26 मिनु मेकोमी ‘सु नु बाक्मे, मेको तेम्शा गेचा पुंइसीब। सु नु मबाक्मे, मेको के बाक्शो यो रोइक्चा पुंइसीब। लूका ८:१८; मत्ती १३:१२
27 तन्न आं कली मटीब आं जोरी सत्रु आन कली चहिं ग्याइश्शा चाक्शा आं ङोंइती क्योरशा सतीन’ देंमाक्त” दे शेंदीमी बाक्त।
येसु यरूसलेम जाक्दीश्शो
मत्ती २१:१-११; मर्कूस ११:१-१०; यूहन्ना १२:१२-१६
28 मिनु मेको लोव़ नेल्ल शेंने थुम्शा, यरूसलेम मेर लमा बाक्त।
29 मिनु जैतून डांडा जाक्दीम्मा बाक्त। मेको डांडा आ आइदी बेथफागे नु बेथानी गाउं निक्शी बाक्सा बाक्त।
30 मेको गाउं आ नेक्था जाक्दीश्शा, येसुमी आ शेंसीब निक्शी आस कली “मेरे गाउं लसे। मिनु गाउं ओव़सीनु, सुइमी मङोइश्शो गधा आ चाइक्ब का पाइश्शो थित्नीसी। मेको कली प्रोंइशा चाक्कीसे।
31 मुरपुकीमी ‘मारदे प्रोंइशा लाइक्सी?’ दे हिल्लो पाम्तेक्म हना ‘प्रभु कली माल्ताक्व’ दे मतीसे” दे माइश्शा, सोइक्तीम्सी बाक्त।
32 मिनु लसानु, येसुमी देंशो खोदेंशो पा गधा पाइश्शा वोइश्शो थित्से बाक्त।
33 मिनु प्रोन्सेनु, गधा आ होव़पमी “गधा मारदे प्रोंइसी?” दे हिल्लो पवा बाक्त।
34 मिनु मेको निक्शीमी “प्रभु कली माल्ताक्व” देंसा बाक्त।
35 मिनु लाइश्शा येसु आ बाक्तीकेम चाक्दीत्से बाक्त। मिनु येसु आ शेंसीबपुकीमी गधा तारी आन वा ब्रशा, येसु कली ङोइक्पदमे बाक्त।
36 मिनु गाक्मा बाक्त। मिनु मुरपुकीमी आन फेक्शो वा लांमी ब्रामे बाक्त।
37 मेको जैतून डांडा लाक्शा ब्रुम्मा बाक्त। येसुमी शुश छक लाक्चा ङा गेय पतीके मुर नेल्ल थाम्पा ग्येरशा, कुम्सो पा परमप्रभु यावे कली ठेयब सेल्ना सेल्न,
38 “परमप्रभु यावे आ नेंमी जाक्ब पिप ठेयब बाक्ब। सरीङम यो ग्येरसमल। इर ङा नेल्ल रिम्शो दुम्ल” दे रेयके पामे बाक्त। भजन संग्रह ११८:२६; लूका २:१४
39 मेकेर फरिसी का निक्शी यो बाक्मा बाक्त। मेकोपुकीमी येसु कली “इन शेंसीब आन कली हुइक्तीन” देंमा बाक्त।
40 तन्न येसुमी “एकोपुकीमी सिक्सी पाम्तेक्म हना, फुल्लुमी यो रेयके पचा गोइनीम” देंमाक्त।
41 मिनु यरूसलेम सहर आ नेक्था जाक्शा, सहर तांइसेनु, येसु मेको सहर आ पर्बम ङाक्शा
42 “थुं नाइक्तीक ते रे जाक्बा, दे तुइक्ती हना दुम वा। तन्न मुल मेको इ ङोंइती रे ख्रुइश्शो बाक्ब। लूका १३:३४; मत्ती १३:१३,१४
43 नोले इ जोरी सत्रु बोक्शा, इ कली एर ओंथ रे पुम्शा, तेइ लचा मगेथु, गारो ङोइक्नीम।
44 मेकोपुकीमी इ कली नु इ आल आन कली खपीम राप्नीम। मेकेर फुल्लु का सम्म ख्रोप्शा मलीनीम। मारदे हना गे इ कली ग्रुम्थ जाक्ब कली मतुइक्ती” देंमाक्त। लूका २१:६
यरूसलेम सहरम बाक्शा, शेंशो
मत्ती २१:१२-१६; मर्कूस ११:१५-१८; यूहन्ना २:१३-१६
45 मिनु येसु सहरम जाक्दीश्शा, परमप्रभु यावे आ खिं लमाक्त। मिनु मार मार लेयब आन कली खेरा बाक्त।
46 मिनु येसुमी मेको आन कली “परमप्रभु यावे आ लोव़मी ‘आं खिं आं कली प्रार्थना पचा कली बाक्ब’ दे ब्रेक्शो बाक्ब। तन्न गेपुकीमी चहिं खुइ आन बाक्तीक पुक्खी सेल्तीनी” दे हुइश्शा खेरमी बाक्त। यसैया ५६:७; येरमीया ७:११
47 मिनु येसुमी परमप्रभु यावे आ खिंमी बाक्शा, नाक्त किंत किंत मुर आन कली शेंदीमी बाक्त। ठेयब चढ़ेब, सास्त्री नु ठेयब मुरपुकीमी येसु कली साइक्चा माल्मे बाक्त।
48 तन्न मेकोपुकीमी येसु कली मारेइ दोस गेने मचाप्मे बाक्त। मारदे हना मुर नेल्लेमी येसु आ शेंशो थाम्पा नोफा दाइश्शा नेंन्मे बाक्त।