21
भेटी चढ़ेचा आ पर्बम शेंशो
मर्कूस १२:४१-४४
मिनु नोले येसुमी शोंप पाइश्‍शो मुरपुकीमी भेटी चढ़ेशो तवा बाक्‍त। आ वोंइश बेक्‍शो मारेइ मथीब प्रुङग मीश मुरुमी जाक्‍शा, लेप्‍तोन निक्‍शी चढ़ेशो यो तवा बाक्‍त। लेप्‍तोन (ग्रीक लोव़) नेल्‍ल क्‍येङा आइक्‍च तांबा के क्‍येट बाक्‍त। मिनु येसुमी “नोफा दाइश्‍शा नेनीने, नेल्‍लेमी चढ़ेशो क्‍येङा एको प्रुङग मीश मुरुमी शुश चढ़ेप्‍तु। मारदे हना आ बाक्‍शो नेल्‍ल गेप्‍तु। अरुमी चहिं आन गाप्‍शो रे गेम्‍तेक्‍म” देंमाक्‍त। २कोरिन्‍थी ८:१२
परमप्रभु आ खिं मलीब
मत्ती २४:१-३६; मर्कूस १३:१-३२
काबु मुरपुकीमी “परमप्रभु यावे आ खिं ठेयब नु दारशो सेल्‍शो बाक्‍त” देंमा बाक्‍त। मिनु येसुमी “एको खिं मुल ठेयब नु दारशो सेल्‍शो ताइतीनी। नोले नेल्‍ल ब्रेश्‍शा, फुल्‍लु का यो ख्रोप्‍शा मलीब” देंमाक्‍त। लूका १९:४४
श्‍येत ङा चिन्‍ड
मिनु मुरपुकीमी “शेंब, इन देंशो लोव़ गेना दुम्‍बा? मेको दुम्‍चशो चिन्‍ड दोपा तांइसीबा?” दे हिल्‍लो पामे बाक्‍त। मिनु येसुमी “सुइमी इन थुं मक्‍याल्‍मेक्‍ल, दे होस पा बाक्‍कीन। मारदे हना शुश मुरपुकीमी आं नें ब्रशा ‘गो मेको नङ। गो मेको नङ देंतीक नाक्‍त नेक्‍था जाक्‍शो बाक्‍ब’ दे शेंनीम। मो देंब आन लोव़ थमा मसुइक्‍थु, आन नोले मखोतीन। लडाइ दुम्‍शो, जुलुस बोक्‍शो लोव़ शुश नेंनीनी। मेको लोव़ नेंशा महिनीन। मोदेंशो दुम्‍चा माल्‍ब। मिनु इच्‍का नोले ला रागी नुप्‍ची नाक्‍त जाक्‍ब” देंमाक्‍त। 10 मिनु लोव़ बोइश्‍शा “जात जात नु राज्‍य राज्‍य लडाइ पाइनीम। 11 ठेयब ख्रिनु कुइब। रागी रागीमी ठेयब अन्‍काल दुम्‍ब। शुश मुर रोइ पा बेक्‍नीम। हिंचा ङा श्‍येत जाक्‍नीम। सरीङम ठेयब चिन्‍ड तांइसीनीम।
थमा सुइक्‍ब श्‍येत जाइनीम
12 मो दुम्‍चा क्‍येङा ङोंइती थमा सुइक्‍ब इन कली खेदा पा ग्‍याइक्‍नीमी। मिनु ग्‍याइश्‍शा, आन ग्रुम्‍तीक खिंम लाइश्‍शा दोस गेशा, जेल्‍खानमी चोक्‍नीम। आं नें आ पर्बम ठेयब मुर नु पिप आन ङोंइती चाक्‍दीश्‍शा, राप्‍पाइक्‍चा पुंइसीनीनी। मत्ती १०:१८-२२,३० 13 मोपा राप्‍पाइक्‍चा पुंइसीनीनु, सांकछी का दुम्‍नीनी। 14 ‘ठेयब मुर आन ङोंइती मार देंचा?’ दे गेनायो पीर मपाइनुङ, दे इन थुं फ्रेंशा बाक्‍कीन। लूका १२:११ 15 मारदे हना मोपा राप्‍पदमेनु, इन जोरी सत्रुमी लेन्‍ने मचाप्‍चा ङा लोव़ इन शोव़ रे पपाइक्‍नन्‍नी। इन कली ठीक लोव़ पपाइक्‍नुङ। मिनु मेकोपुकीमी इन लोव़ ख्रोइक्‍ने मचाप्‍नीम। प्रेरित ६:१०
16 इन आम आफ, लोक्‍बपुकीमी, इन जात ङा मुर, इन वारचपुकीमी इन कली दोस गेशा, खेदा पा ग्‍याइक्‍पाइश्‍शा, चोक्‍पाइक्‍नीम। का निक्‍शी आन कली साइक्‍पाइक्‍नीम। 17 मुरपुकी नेल्‍लेमी आं नें आ पर्बम इन कली काइ मदाक्‍नीम। 18 तन्‍न इन पिया ङा चां का यो महेम्‍ब। लूका १२:७ 19 मोपतीके थमा सुइक्‍चा मप्रोनीन। मिनु ला गे ब्रोंइचा ताइनीनी। हिब्रू १०:३६
‘यरूसलेम जाम्‍शा लाइब’ देंशो
20 यरूसलेम सहर आ एर ओंथ लडाइ पाइबपुकीमी पुम्‍शो ताइतीनी हना ‘मुल सहर खतम दुम्‍ची नाक्‍त जाक्‍माक्‍त’ दे तुइक्‍तीन। 21 मोपतीके यहूदीया रागीम बाक्‍बपुकी डांडा ग्‍येत्‍थ प्रोक्‍मल। सहरम बाक्‍बपुकी सहर प्रोंइशा प्रोक्‍मल। सहर एर ओंथ रू मेर बाक्‍बपुकी सहर मओव़मल। 22 परमप्रभु यावे आ लोव़मी एको ओदेंशो दुम्‍ब, दे ब्रेक्‍शो बाक्‍ब। एको ब्रेक्‍शो नेल्‍ल थमा दुम्‍शा, सहर खतम दुम्‍ब। ब्‍‍यवस्‍था ३२:३५ 23 मेना आल कुरशो नु दूध तूब आल पाइश्‍शो मीश मुर आन कली श्‍येत दुम्‍ब। मारदे हना रागीमी शुश श्‍येत दुम्‍शा, मेको मुरपुकीमी परमप्रभु यावे आ गाइश्‍शो ताइनीम। 24 कोइ तरवारम बेक्‍नीमी। कोइ ग्‍याइश्‍शा अर्को रागीम लाइक्‍चा पुंइसीनीम। मिनु आन नाक्‍त मजाक्‍दीम सम्‍म अर्को जात ङा मुरपुकीमी यरूसलेम कली दिप्‍‍शा वोइक्‍नीम। यसैया ६३:१८; प्रकाश ११:२; रोमी ११:२५
चिन्‍ड तांइसीब, दे शेंशो
25 मिनु सरीङ नु रागीमी चिन्‍ड तांइसीनीम। सरीङमी नां, तास्‍ला नु सोरुल मार मार तांइसीब। रागीम समुन्‍द्रमी ठेयब ब्‍वाक्‍कु ब्रुइश्‍शा, मुर नेल्‍ल आन कली हिंपाइक्‍ब। प्रकाश ६:१२-१३ 26 मुरपुकी सरीङ नु रागी कोव़शा, हिंशा थाइनीम। मारदे हना सरीङ ङा सक्ति हिम्‍सीनीम। 27 मिनु रागीम जरमेशो कली गोस्‍स तारी बाक्‍शा, सक्ति नु ठेयब छेङछेङमी यिशो ताइनीम। दानीएल ७:१३ 28 मेको चिन्‍डपुकी दुम्‍शो तनीनु, इन पिया पोक्‍शा, ठेयब थुं पा ग्‍येरसीने। मारदे हना श्‍येत रे प्रोंइब इन नेक्‍था जाक्‍शो बाक्‍ब” दे शेंदीमी बाक्‍त। फिलिप्‍पी ४:४,५
29 मिनु कथा सेल्‍शा “फोव़शी रवा नु अरु रवा कोव़ङीन। 30 कोच्‍वा दाप्‍शा कुशो तशा, रेउ यिची ना जाक्‍चा चिक्‍शो बाक्‍त, दे तुइक्‍नीनी। 31 आं देंशो लोव़ थमा दुम्‍शो तनीनु, परमप्रभु यावे आ राज्‍य इन नेक्‍था जाक्‍माक्‍त, दे तुइक्‍नीनी। 32 नोफा दाइश्‍शा नेनीने, एको मुरपुकी मनुप्‍थु, आं देंशो नेल्‍ल थमा दुम्‍ब। 33 सरीङ नु रागी नेल्‍ल जाम्‍शा लाइनीम। तन्‍न आं लोव़ चहिं गेनायो मजाम्‍ब। 34 आं देंशो मप्रेंथु होस पा बाक्‍कीन। शांबु राकसी दुक्‍शा मबाक्‍कीन। मार जचा मार फेक्‍चा, दो पचा, दे शुश ममिम्‍तीने। मारदे हना आं देंशो लोव़ इन मतुइक्‍थु दुम्‍ब। मर्कूस ४:१९; १थिस्‍सलोनिकी ५:३ 35 मेको मोदेंशो श्‍येत नेल्‍ल रागीम दुम्‍ब। 36 मोपतीके आं देंशो मिम्‍शा बाक्‍कीन। परमप्रभु यावे कली ‘श्‍येत नेल्‍ल फाल्‍शा, थमा सुइक्‍तीक सक्ति गेकी। मिनु रागीम जरमेशो जाक्‍मेनु, सासीशा ग्रुम्‍चा तकल’ दे पुंइना पुंइन बाक्‍कीन” दे अर्ती गेमी बाक्‍त।
नाक्‍त किंत किंत शें‍शो
37 मिनु येसुमी नाक्‍त मुर आन कली शेंना शेंन नाक्‍दो चहिं जैतून डांडाम लशा इप्‍बाक्‍माक्‍त। 38 शुश मुरुमी नाक्‍त किंत किंत सुनी कना बोक्‍शा, परमप्रभु यावे आ खिं लशा, येसु आ लोव़ नेंबाक्‍मा बाक्‍त।