4
येसु नाक्‍चा पुंइसीशो
येसु परमप्रभु यावे आ सोक्‍तीम ब्रीशा, यर्दन खोला रे लशा, परमप्रभु यावे आ सोक्‍तीमी गोरशो रागीमी चाक्‍दीत्‍चा पुंइसे बाक्‍त। मिनु ४० नाक्‍ती गोरशो रागीम सैतान रे पा थुं नाक्‍चा पुंइसे बाक्‍त। मेको ४० नाक्‍त सम्‍म मारेइ मजथु बाक्‍शो बाक्‍माक्‍त। मिनु नोले शुश शोव़लु बेक्‍माक्‍त। मिनु सैतानमी “मार, गे परमप्रभु आ तौ नवे हना, एको फुल्‍लु कली ‘शोब्‍ले दुमो’ देन” देंमाक्‍त। मिनु येसुमी “परमप्रभु यावेम ब्रेक्‍पाइश्‍शो लोव़मी ‘मुर जशा ला मब्रोंइनीम’ दे ब्रेक्‍शो बाक्‍ब” देंमाक्‍त। ब्‍यवस्‍था ८:३ मिनु नोले सैतानमी येसु कली इर लाइश्‍शा, याम कामीन रागी नेल्‍ल कोंइशा “रागी, रागीमी बाक्‍शो नेल्‍ल शोंप आं के नम। रागी नेल्‍ल आन कली हुकुम पाइब यो गो नङ। गो मेको इ कली गेनुङ। मारदे हना सु कली गेचा दाक्‍तु, मेको कली गेने चाप्‍नुङ। गे आं ङोंइती बाप्‍शा, आं कली ठेयब सेल्‍तीवी हना, मेको नेल्‍ल इ कली गेनन” देंमाक्‍त। मिनु येसुमी “परमप्रभु यावे आ लोव़मी ‘परमप्रभु यावे कली ला ठेयब सेलो। मेको कली ला गेय पावो’ दे ब्रेक्‍शो बाक्‍ब” देंमाक्‍त। ब्‍‍यवस्‍था ६:१३
मिनु नोले सैतानमी येसु कली यरूसलेम लाइश्‍शा, परमप्रभु यावे आ खिं ङा नेल्‍ल क्‍येङा तारी लदा बाक्‍त। मिनु “मार, गे परमप्रभु यावे आ तौ नवे हना, एकेर रे प्रेक्‍को। 10 मारदे हना ‘इ कली कोव़चा कली आ स्‍वर्ग ङा गेय पाइब आन कली सोइक्‍ब। 11 मिनु मेकोपुकीमी इ कली आन गुइम ताक्‍शा, खपीम नाइक्‍पाइक्‍नीम। इ खोइल फुल्‍लु कामी यो मथोक्‍ब’ दे ब्रेक्‍शो बाक्‍ब” देंमाक्‍त। भजन संग्रह ९१:११,१२ 12 मिनु येसुमी “परमप्रभु, इन परमप्रभु यावे कली थुं मनाक्‍चा, दे यो देंशो बाक्‍ब” देंमाक्‍त। ब्‍यवस्‍था ६:१६ 13 मिनु सैतानमी नेल्‍ल नाक्‍ने थुमा नोले, मुल अर्को खेयप नाक्‍नुङ, दे मिम्‍शा येसु कली प्रोंइशा मेक रे गाक्‍माक्‍त। हिब्रू ४:१५
येसुमी गालील रागीम शेंशो
मत्ती ४:१२-१७; मर्कूस १:१४-१५
14 मिनु नोले, येसु परमप्रभु यावे आ सोक्‍त आ सक्तिम गालील रागी लेम्‍माक्‍त। मेकेर एर ओंथ येसु आ पर्बम शुश लोव़ ब्रशो बाक्‍माक्‍त। 15 मेकोमी आन ग्रुम्‍तीक खिं खिंमी शेंना शेंन गाक्‍मेनु, आ लोव़ नेंब नेल्‍लेमी “रिम्‍शो लोव़ पाइक्‍बाक्‍त” दे ठेयब सेल्‍मे बाक्‍त।
येसुमी नासरथ सहरम लोव़ पशो
मत्ती १३:५३-५८; मर्कूस ६:१-६
16 मोपा हिरना हिरन गाक्‍मेनु, काबु आ कोल्‍तीक नासरथ सहरम जाक्‍दीम्‍माक्‍त। आल रेन नाइक्‍तीक नाक्‍ती ग्रुम्‍तीक खिं लशो खोदेंशो पा, ग्रुम्‍तीक खिं लशा, परमप्रभु यावे आ लोव़ पढेचा कली राम्‍माक्‍त। 17 मिनु ग्रुम्‍तीक खिं ङा गेय पाइबमी मेको कली यसैया आ ब्रेक्‍शो किताब गेवा बाक्‍त। मिनु किताब प्राक्‍शा कोव़शा यसैया ६१:१-२ 18 “परमप्रभु यावे आ सोक्‍त आं तार बाक्‍ब। मारदे हना परमप्रभु यावेमी तेल लुक्‍‍ताक्‍यी। मेकोमी आं कली दिप्‍‍शो प्रुङग मुर आन कली ग्‍येरपाइक्‍ब लोव़ नेंपाइक्‍चा कली, ग्‍याइश्‍शा चोक्‍चा पुंइसीशो मुर आन कली प्रोंइ‍चा कली, मिक्‍च मताइब आन कली तपाइक्‍चा नु श्‍येत जाइब आन कली श्‍येत रे प्रोंइशा, रिम्‍शो पा बाक्‍चा गेचा कली सोइक्‍ताक्‍यी। यसैया ४२:७ 19 परमप्रभु यावे आ शिशी पतीक बर्स आ पर्बम शेंचा कली सोइक्‍ताक्‍यी” दे पढेशा नेंपाइक्‍मी बाक्‍त। लेवी २५:१० 20 मिनु किताब गिल्‍शा, ग्रुम्‍तीक खिं ङा गेय पाइब कली गेशा, निस्‍से बाक्‍त। मिनु नेल्‍लेमी येसु कली मिक्‍च मयाक्‍थु कोव़स ङा कोव़स पामे बाक्‍त। 21 मिनु येसुमी “एको इन नेंशो लोव़ मुलाक्‍त गाप्‍त” देंमाक्‍त। 22 नेंबपुकीमी मेको आ पर्बम रिम्‍शो लोव़ पामे बाक्‍त। येसु आ रिम्‍शो लोव़ नेंशा छक लाक्‍शा “एको योसेफ आ तौ ममाइ ङा?” देंमुमा बाक्‍त। लूका ३:२३ 23 मिनु येसुमी मेको आन कली “गे इच्‍ची ना आं कली ‘मुर आन कली सापाइक्‍ब, गे इ कली यो सापतो’ देंतीक लोव़ देंनीनी। मिनु ‘गो कापेरनाउम सहरम चिन्‍ड नु छक लाक्‍चा ङा गेय पशो नेंतक। मुल इ कोल्‍तीक सहरम, एकेर यो मोदेंशो पावो’ दे आं कली देंनीनी” देंमाक्‍त। 24 मिनु येसुमी “थमा पा, मुरपुकीमी परमप्रभु यावे आ लोव़ पाइब आन कली आंम आन बाक्‍तीक सहरम काइ महिक्‍नीम। यूहन्‍ना ४:४४ 25 थमा लोव़ मार बाक्‍त देंशा हना, एलीया आ पालाम इस्राएल रागीम शुश वोंइश बेक्‍शो मीश मुर बाक्‍शो बाक्‍तेक्‍म। मेना बर्स सां ६ महिना सम्‍म रेउ मयिमाक्‍त। मिनु रागी नेल्‍ल ङा मुरपुकीमी जचा मतामे बाक्‍त। १राजा १७:१,९-२४ 26 तन्‍न परमप्रभु यावेमी एलीया कली मेको आन बाक्‍तीक मसोइक्‍त। तन्‍न सीदोन रागी ङा सारेप्‍ता सहरम बाक्‍ब वोंइश बेक्‍शो मीश मुर का कली ला श्‍येत रे प्रोंइथ सोइक्‍ता बाक्‍त। सारेप्‍ता सहर कली हिब्रू लोव़मी चारेफाथ देंनीम। 27 एलीशा आ पालामी यो इस्राएल रागीमी शुश कोव़र पाइब मुर बाक्‍मा बाक्‍त। सुइ मसामा बाक्‍त। सिरीया ङा नामान माइश्‍शो मुर ला सापाइक्‍चा पुंइसे बाक्‍त” दे येसुमी माइक्‍मी बाक्‍त। २राजा ५:१-१४ 28 ग्रुम्‍तीक खिंम बाक्‍शो मुर नेल्‍लेम मेको लोव़ नेंशा चुरमा बाक्‍त। 29 मिनु छुल छाल बोक्‍शा, येसु कली आन ग्रुम्‍तीक खिं नु सहर रे ग्रुंइ‍शा, डांडा तार सेल्‍शो सहर ङा रोंगु रे तोक्‍चा, दे लदमे बाक्‍त। 30 तन्‍न येसु मेको आन दाते रे ग्रू‍शा गाक्‍माक्‍त।
येसु कापेरनाउम जाक्‍दीश्‍शो
मत्ती ८:१४-१७; मर्कूस १:२१-३९
31 मिनु नोले गालील रागी ङा कापेरनाउम सहर ब्रुम्‍‍माक्‍त। मिनु नाइक्‍तीक नाक्‍ती ग्रुम्‍तीक खिं लशा, मुर आन कली शेंदा बाक्‍त। 32 मिनु आ शेंशो नेंशा छक लाक्‍मा बाक्‍त। मारदे हना आ लोव़ अधिकार पाइश्‍शो बाक्‍माक्‍त। मत्ती ७:२८-२९; यूहन्‍ना ७:४६ 33 मेको ग्रुम्‍तीक खिंमी ग्रांग्रा दिचा ङा वोल आ सोक्‍तीम सुम्‍‍शो मुर का बाक्‍माक्‍त। मेकोमी वाइ ब्रेश्‍शा 34 “ओहो, नासरथ ङा येसु, मार पमुया ङा? आंइ कली साइक्‍थ जाक्‍नी? इन कली तुइक्‍ताक्‍क। गे परमप्रभु यावे आ योव़शो ननी” देंमाक्‍त। 35 मिनु येसुमी वोल कली “रेयके मपथु, ग्रूङो” दे हुइक्‍ता बाक्‍त। मिनु वोलमी मुर कली श्‍येत मगेथु, दिङ खोल्‍शा वोइश्‍शा ग्रूमाक्‍त। 36 मो दुम्‍शो तशा, मुरपुकी छक लाक्‍शा “मार लोव़ बाक्‍म माइ? मारदे हना अधिकार नु सक्ति पाइश्‍शो लोव़ पवानु, वोलपुकी ग्रूबाक्‍तेक्‍म” देंमुमा बाक्‍त। 37 मिनु मेको रागी नेल्‍ल येसु आ पर्बम लोव़ ब्रना ब्रन लमाक्‍त।
38 मिनु येसु ग्रुम्‍तीक खिं रे गाक्‍शा, सिमोन आ खिं जाक्‍दीम्‍माक्‍त। सिमोन आ शिमी शुश जरो पा रोइ पा गोल्‍‍शो बाक्‍माक्‍त। मिनु खिं ङा मुरुमी येसु कली “सापतीन” दे पुन्‍मे बाक्‍त। 39 मिनु येसु मेको आ नेक्‍था राप्‍शा, जरो कली हुइक्‍ता बाक्‍त। मिनु हुइक्‍तानु, जरो जाम्‍माक्‍त। मिनु साशा छुल बोक्‍शा, येसु नु आ वारच आन कली जचा गेमी बाक्‍त।
40 मिनु नां रिक्‍मेनु, शुश रोइ पाइब आन कली चाक्‍ग्‍मे बाक्‍त। मिनु येसुमी रोइ पाइब आन कली आ गुइ आन तारी चाक्‍शा, नेल्‍ल आन कली सापाइक्‍मी बाक्‍त। 41 शुश मुर रे वोल ग्रुंइदा बाक्‍त। वोल आन कली ग्रुंइदानु, मेकोपुकीमी “परमप्रभु यावे आ तौ ननी” दे ग्रीमा बाक्‍त। तन्‍न येसुमी मेको आन कली लोव़ पचा मगेथु, हुइक्‍तीमी बाक्‍त। मारदे हना मेकोपुकीम “ख्रीस्‍त बाक्ब” दे ङोंइती रे तुइश्‍शो बाक्‍मा बाक्‍त। मत्ती ८:२९; मर्कूस ३:११-१२
42 मिनु आ दीसा सुनी येसु मेकेर रे गाक्‍शा, मुर मबाक्‍तीकेम जाक्‍दीम्‍माक्‍त। मिनु मुरपुकीमी “ते लमे?” दे माल्शा, आ बाक्‍तीकेम जाक्‍दीम्‍मा बाक्‍त। मिनु “आंइ कली प्रोंइशा मगाक्‍कीन। आंइ सहरम बाक्‍कीन” देंमा बाक्‍त। 43 मिनु येसुमी “अर्को सहर लचा माल्‍नुङ। मारदे हना गो मेकेर ङा मुर आन कली यो परमप्रभु यावे आ राज्‍य ङा लोव़ पचा माल्‍नुङ। गो मेको गेय पचा कली सोइश्‍शो नङ” देंमाक्‍त। 44 मिनु रागी नेल्‍ल हिरना हिरन यहूदीया ङा ग्रुम्‍तीक खिं खिंमी शेंना शेंन गाक्‍माक्‍त। मत्ती ४:२३