9
शेंसीब आन कली सोइश्शो
मत्ती १०:१,५-१४; मर्कूस ६:७-१३
1 मिनु काबु येसुमी आ १२ जना शेंसीब आन कली खुप्शा, वोल आन कली ग्रुंइतीक नु रोइ पशो मुर आन कली सापाइक्ती सक्ति नु अधिकार गेमी बाक्त। लूका १०:१-१२
2 मिनु मेको आन कली परमप्रभु यावे आ राज्य ङा लोव़ शेंथ नु रोइ पाइब आन कली सापाइक्थ सोइक्तीमी बाक्त।
3 मिनु लचामेनु, येसुमी मेको आन कली “कोक्के, झोला, जचा थोव़क, क्येट मारेइ मलाइक्चा। फेक्तीक यो मकुरसीचा।
4 मिनु तेको खिंमी ओव़नी, मेको खिंमी गाक्ची मजाक्म सम्म बाक्कीन।
5 दोकका पा मुरपुकीमी इन कली बाक्चा मगेम्तेक्म हना, मेको सहर रे गाक्ची ना इन खोइल ङा फुरकु थुर थुर पा ताइश्शा गाक्कीन। मेको, मेको आन पर्बम चिन्ड दुम्ब” दे माइश्शा सोइक्तीमी बाक्त।
6 मिनु लशा, गाउं गाउं, सहर सहरम परमप्रभु यावे आ राज्य आ पर्बम शेंना शेंन, रोइ पाइब आन कली सापाइक्ना पाइक्न हिरसमा बाक्त।
हेरोदमी येसु कली ग्रुम्चा दाक्शो
मत्ती १४:१-२; मर्कूस ६:१४-१६
7 मिनु सासन पाइब हेरोदमी मेको लोव़ नेल्ल नेंशा, छक लाक्माक्त। मारदे हना मुर का निक्शीमी “ब्वाक्कुम ख्रुम्शा ग्रुंइब यूहन्ना बेक्शो रे सेंसे बाक्त” देंबाक्मा बाक्त।
8 का निक्शीमी “एको एलीया बाक्माक्त थां का” देंबाक्मा बाक्त। का निक्शीमी “साइ ङा परमप्रभु यावे आ लोव़ पाइब का बेक्शो रे सेंसे बाक्त” देंमा बाक्त।
9 मिनु हेरोदमी “गो यूहन्ना आ पिया क्योरपाइक्ता। तन्न एको सु का आ पर्बम लोव़ नेंनु?” दे मेको कली ग्रुम्चा दाक्ता बाक्त। लूका २१:८
येसुम ५ हजार आन कली थुल्शो
मत्ती १४:१३-२१; मर्कूस ६:३१-४४; यूहन्ना ६:१-१३
10 मिनु येसु आ सोइश्शोपुकी येसु आ बाक्तीके लेम्मा बाक्त। मिनु मार मार पामे, दो दो पामे, मेको नेल्ल शोव़ङमे बाक्त। मिनु येसुमी मेको आन कली बेथसैदा सहरम लाइक्मी बाक्त।
11 मिनु मुरपुकीम “येसु नु आ शेंसीब मेक लाम्तेक्म” दे तुइश्शा, आन नोले खोइश्शा लशा थित्मे बाक्त। मिनु येसुमी मेको आन कली बाक्चा गेशा, परमप्रभु यावे आ राज्य ङा लोव़ शेंशा, रोइ पाइब आन कली सापाइक्मी बाक्त।
12 मिनु नां रिक्चावानु, आ १२ जना शेंसीबपुकीम “मुर आन कली सोइक्तीन। मिनु मेकोपुकी गाउं मेर लशा, जचा तूचा ताइनीम, बास यो थित्नीम। मारदे हना एकेर सुइ मुर मबाक्नीम” दे मदमे बाक्त।
13 मिनु येसुमी “गेपुकीमी एको आन कली जचा गेने” दे माइक्मी बाक्त। मिनु शेंसीबपुकीमी “इं के ५ ओटा शोब्ले नु ङांइ निक्शी ला बाक्ब। सहर लशा, जचा थोव़क ग्याप्शा नेल्ल आन कली थुल्चा देंनी?” देंमा बाक्त।
14 मेकेर देल्शो वोंइश मुर ला ५ हजार बाक्मा बाक्त। मिनु येसुमी शेंसीब आन कली “मुर आन कली ५०, ५० जना पा निप्पतीन” देंमाक्त।
15 मिनु मेकोपुकीमी निप्पदमे बाक्त।
16 मिनु येसुमी ५ ओटा शोब्ले नु ङांइ निक्शी शेशा, सरीङ गे कोव़शा “गे रिम्शो पाइब बाक्नीनी” दे आसीक गेशा जिक्शा, शेंसीब आन कली योक्चा गेमी बाक्त।
17 मिनु नेल्लेमी रूथ्री जामे बाक्त। जशा हेंशो खुप्तमेनु, १२ डालो दुम्माक्त।
पत्रुसमी “ख्रीस्त ननी” देंशो
मत्ती १६:१३-१९; मर्कूस ८:२७-२९; यूहन्ना ६:६७-६९
18 मिनु काबु आ शेंसीबपुकी नु बाक्शा प्रार्थना पा, येसुमी “मुरपुकीमी आं पर्बम मार देंनीमी?” दे हिल्लो पवा बाक्त।
19 मिनु मेकोपुकीमी “का निक्शीमी ब्वाक्कुम ख्रुम्शा ग्रुंइब यूहन्ना, का निक्शीमी एलीया, का निक्शीमी साइ नेसी ङा परमप्रभु यावे आ लोव़ पाइब का बेक्शो रे सेंसे बाक्त देंनीम” देंमा बाक्त। लूका ९:-८
20 मिनु येसुमी “गेपुकी चहिं आं कली सु मिम्नीनी?” देंमेनु, पत्रुसमी “गे परमप्रभु यावे आ सोइश्शो ख्रीस्त ननी” देंमाक्त।
21 मिनु येसुमी “एको लोव़ सुइ आन कली मशेंदीने” दे अरेमी बाक्त।
ख्रीस्तम “श्येत जचा माल्नुङ” देंशो
मत्ती १६:२०-२१; मर्कूस ८:३०-३१
22 येसुमी “रागीम जरमेशोमी शुश श्येत जचा माल्ब। जोक्ब तुइक्ब खाल्पापुकी, ठेयब चढ़ेबपुकी नु सास्त्रीपुकीमी मेको कली मब्रथु साइक्पाइक्नीम। मिनु बेक्शो आ नित्थ नाक्ती सेंसीब” दे शेंदीमी बाक्त। लूका ९:४४-४५; लूका १८:३१-३४
आ नोले खोइक्ब “श्येत जाइनीम” देंशो
मत्ती १६:२४-२८; मर्कूस ८:३४-९:१
23 मिनु येसुमी मेको आन कली “सुमी आं नोले खोइक्चा थुं पाइबा, मेकोमी आंम दला दाक्स पचा प्रोंइशा, नाक्त किंत किंत श्येत जचा महिंथु, आं नोले खोइय्यील।
24 सुमी आंम गिंम प्रोंइचा माल्बा, मेको आ गिंम योल्ब। आं पर्बम आ गिंम सोइक्बमी आ गिंम प्रोंइब। लूका १७:२३; मत्ती १०:३९; यूहन्ना १२:२५
25 रागी नेल्ल आंम के सेल्शा, आ थुं खतम दुम्त हना, मार रिम्शो दुम्बा ङा?
26 सुमी आं पर्बम नु आं लोव़ आं पर्बम देंचा कली मुने पाइबा, मेको आ पर्बम रागीम जरमेशोमी, आ आफ आ छेङछेङमी, परमप्रभु यावे आ स्वर्ग ङा गेय पाइबपुकी नु जाक्मेनु ‘मेको कली मतुइक्नुङ, सु बाक्मे?’ देंब। मत्ती १०:३३; २तिमोथी १:८
27 गो इन कली थमा लोव़ पाइनुङ मुल गो नु काथा बाक्ब का निक्शीमी परमप्रभु यावे आ राज्य मतथु मबेक्नीम” दे माइक्मी बाक्त।
येसुमी आ रां फाइश्शा तपांइसीशो
मत्ती १७:१-८; मर्कूस ९:२-८
28 मेको लोव़ पशो हप्ता का नोले, येसुमी पत्रुस, यूहन्ना नु याकूब सां आन कली प्रार्थना पथ डांडाम लाइक्मी बाक्त।
29 मिनु येसुमी प्रार्थना पवानु, फांइसीशा आ कुल बुबु देंशो नु आ फेक्शो वा यो बुबु पा तांइसे बाक्त।
30 मिनु मुर निक्शी, मोसा नु एलीया ग्रूशा, येसु नु लोव़ पशो तामे बाक्त।
31 मेको यो छेङछेङम गिल्सीशा येसु नु लोव़सी पामे बाक्त। मेकोपुकीम यरूसलेमम दोपा श्येत जशा, बेक्चा मेको आ पर्बम लोव़ पामे बाक्त।
32 मेको सांफा मोदेंशो लोव़ पामेनु, पत्रुस, यूहन्ना नु याकूब मारेइ मतुइक्चा ङा पा निन्द्रा पामे बाक्त। तन्न मेको आ ङोंइती येसु नु मुर निक्शी राप्शो तामे बाक्त। येसु आ छेङछेङम मेको निक्शी नु बाक्शो तामे बाक्त।
33 मिनु मोसा नु एलीया गाक्चाम्सेनु, पत्रुसमी येसु कली “शेंब, इं कली एकेर बाक्चा रिम्शो दुम्ब। बाक्तीके सां सेल्नीकी। का इन कली, का मोसा कली, का एलीया कली” देंमाक्त। मोपा ब्वाक्शो आंमान मतुइक्ता बाक्त।
34 मिनु पत्रुसमी लोव़ पवानु, सरीङ रे गोस्स यिशा, मेको आन कली सुम्मी बाक्त। मेको गोस्सुम गिल्मीनु, हिंमा बाक्त।
35 मिनु गोस्स आगा रे सेंदा का “एको आं योव़शो तौ बाक्ब। मेको आ लोव़ नेनीन” देंशो नेन्मे बाक्त। लूका ३:२२; भजन संग्रह २:७; ब्यवस्था १८:१५
36 मिनु मेको लोव़ नेन्मेनु, येसु का ला तामे बाक्त। मिनु मेको आन तशो नु नेंशो शुश नाक्ती सम्म सुइ आन कली मशेंथु, सिक्सी पा थुंमी वोदमे बाक्त।
वोलमी सुम्शो आल कली सापाइश्शो
मत्ती १७:१४-२१; मर्कूस ९:१४-२९
37 मो दुम्मे आ दीसा डांडा रे यिशा, शुश मुर नु ग्रुम्शा देल्मा बाक्त।
38 मेकेर मुर का जाक्शा ठेयब सेंदा पा “हे शेंब, आं तौ कली वारच पने। मारदे हना आं तौ का ला बाक्ब।
39 मेको कली वोलम हो हु सुमानु, वाइ ब्रेश्शा, शोव़ रे बोग्यो ग्रुंइशा, ख्रिंख्रि पना पन मोल मोल थाइब।
40 गो इन शेंसीब आन कली ‘वोल ग्रुंइदीने’ दे पुंइता। तन्न ग्रुंइने मचबेम” देंमाक्त।
41 मिनु येसुमी “गे थमा पा थमा मसुइक्ब नु दूली पाइब, गेना सम्म इन पशो फाल्शा बाक्नुङा ङा? इ तौ एक चाक्को” दे मदा बाक्त।
42 मिनु चाक्गानु, वोलम मेको वोंइश आल कली खोल्शा रोप्से पा, शोव़ रे बोग्यो ग्रुंइपदा बाक्त। मिनु येसुमी ग्रांग्रा दिचा ङा वोल कली हुइश्शा, वोंइश आल कली सापाइश्शा, आ आफ कली गेवा बाक्त। लूका ७:१५
रागीम जरमेशो श्येत जचा माल्ब देंशो
मत्ती १:२२-२३; मर्कूस ९:३०-३२
43 मिनु मुर नेल्लेमी परमप्रभु यावे आ गेय तशा छक लाक्शा “परमप्रभु यावे ठेयब बाक्ब” दे लोव़ पामे बाक्त। मिनु मुर नेल्लेमी येसु आ पशो तशा छक लाक्मानु, येसुमी आ शेंसीब आन कली
44 “नोफा दाइश्शा नेनीन। आं देंशो लोव़ थुंमी वोतीन। रागीम जरमेशो दा मुर आन गुइमी गेशा साइक्चा पुंइसीब” देंमाक्त। लूका ९:२२; लूका १८:३१-३४
45 तन्न मेकोपुकीमी मेको लोव़ काइ मरुप्मे बाक्त। मारदे हना मेको आन कली मेको लोव़ रुप्चा कली थुं मगेशो बाक्माक्त। येसु कली “एको लोव़ मार में?” दे हिल्लो पचा यो हिंमा बाक्त। लूका २४:४५
“ठेयब सु बाक्या माइ?” देंशो
मत्ती १८:१-५; मर्कूस ९:३३-३७
46 काबु शेंसीबपुकीमी “गो इं १२ जनामी नेल्ल क्येङा ठेयब सु बाक्या माइ?” दे लोव़ पमुमा बाक्त।
47 येसुमी मेको आन मिम्शो तुइश्शा, आल का कली आ नेक्था वोइश्शा
48 “सुमी एको आल कली आं नेंमी ब्राइबा, मेकोमी आं कली ब्राइब। मिनु सुमी आं कली ब्राइबा, मेकोमी आं कली सोइक्ब कली यो ब्राइब। गे इन दातेमी सु नेल्ल क्येङा आइक्च सुंइसीबा, मेको नेल्ल क्येङा ठेयब दुम्ब” दे शेंदीमी बाक्त। मत्ती १०:४०
छक लाक्चा गेय पाइब का
मर्कूस ९:३८-४०
49 मिनु यूहन्नामी “शेंब, इं नोले मखोइक्ब मुरुमी इन नें थिशा, वोल आन कली खेरशो ताइतक। मिनु मो पचा मदुम्ब, दे माइक्तक। मारदे हना मेको इं नोले खोइश्शा मगाक्ब” दे मदा बाक्त।
50 मिनु येसुमी “मोदेंचा मदुम्ब, मारदे हना इं कली मरिम्शो मपाइब इं मुरुन बाक्ब” दे शेंदा बाक्त। लूका ११:२३; फिलिप्पी १:१८
बास मगेचा पुंइसीशो
51 मिनु येसुमी परमप्रभु यावे आ बाक्तीके लची नाक्त आं नेक्था जाक्शो तुइश्शा, यरूसलेम लचा थुं पवा बाक्त। मर्कूस १०:३२
52 मिनु सामरीया रागी ङा गाउं आ नेक्था जाक्दीश्शा, मुर का निक्शी आन कली “आं ङोंइती लशा, नेल्ल ठीक पने” दे सोइक्तीमी बाक्त। मिनु मेको सामरीया ङा मुर आन गाउंमी ओव़मा बाक्त।
53 तन्न मुरपुकीम बाक्चा गेने मबिस्समा बाक्त। मारदे हना येसुमी “यरूसलेम लाइनुङ” देंशो बाक्माक्त। मिनु सोइश्शो मुरपुकी लेश्शा जाक्शा “बास मगेनीकी, देंतेक्म” दे येसु कली मदमे बाक्त। यूहन्ना ४:९
54 मिनु आ शेंसीब याकूब नु यूहन्नामी मेको लोव़ नेंशा, येसु कली “प्रभु, मेको गाउं ङा मुर आन कली परमप्रभु यावे कली पुंइशा, सरीङ रे मी तोक्पाइश्शा, खतम पपाइय्य?” दे हिल्लो पाम्से बाक्त। २राजा १:१०-१२
55 तन्न येसुमी मेको आस गे हिरशा हुइक्तीम्सी बाक्त।
56 मिनु बास बाक्थ अर्को गाउं लमा बाक्त।
आ नोले खोइक्चा कली सु शिरबा?
मत्ती ८:१९-२२
57 मिनु लांमी गाक्मानु, मुर कामी येसु कली “प्रभु, गो इन नोले खोइक्चा दाक्नुङ” देंमाक्त।
58 मिनु येसुमी “सिवार आन बाक्तीके ढोडोङगा बाक्ब, चिक्ब आन बाक्तीके ग्योव़ बाक्ब। तन्न रागीम जरमेशो के आ बाक्तीके खिं मबाक्ब” देंमाक्त।
59 नोले येसुमी अर्को मुर का कली “आं नोले खोइय्यी” दे मदानु, मेकोमी “ङोंइती लशा, आं आफ कली थिम्चा गेयीनी” देंमाक्त।
60 मिनु येसुमी मेको कली “बेक्शो मुरुमी बेक्शो कली थिम्मेक्ल। गे चहिं परमप्रभु यावे आ राज्य ङा लोव़ नेंपाइक्थ लावो” दे मदा बाक्त।
61 अर्को मुरुमी “प्रभु, गो इन नोले खोइक्चा दुम्ती, तन्न ङोंइती आं खिं ङा मुर आन कली तुइक्पाइक्थ लचा गेयीनी” देंमेनु, १राजा १९:२०
62 येसुमी “ब्यफ वाक्बमी वाक्तानु, आ नोले हिरशा मवाक्ब। नोले हिरशा कोव़ना कोव़न वाक्ब मुर चहिं परमप्रभु यावे आ राज्य ङा गेय पचा मशिरब” देंमाक्त। फिलिप्पी ३:१३