2
सियोन सुर्ता पशो
1 परमप्रभु गाइश्शा, सियोन आ तमी कली मुने तोक्तु। इस्राएल आ दारस कली सरीङ रे पा रागीमी तोक्तु। आ गाइश्शो नाक्ती आंम खोइल वोइक्तीक सियोन कली यो प्रेंताक्व। भजन संग्रह १३२:७-८
2 परमप्रभुमी शिशी मपथु याकूब आ बाक्तीक नेल्ल खतम सेल्तु। मोपा चुरशा यहूदा आ तमी आ गारो हिरशो सहर नेल्ल खतम सेल्तु। मेकोमी मेको राज्य नु आ सासन पाइब आन कली मान मताइब, आइक्च सेल्तु।
3 मेकोमी शुश चुरशा, इस्राएल ङा सक्ति नेल्ल खतम सेल्तु। मेकोमी आ जोरी सत्रु आन ङोंइती सियोन कली वारच पचा प्रोंइतु। मेको याकूब आ बाक्तीके आ एर ओंथ नेल्ल ग्राव ग्रु दाक्ब मी खोदेंशो दुम्त।
4 परमप्रभुमी सियोन आ जोरी सत्रु खोदेंशो दुम्शा, आ लिब्रा कीतु। आ जोरी सत्रु खोदेंशो दुम्त। आंइ दाक्शो नेल्ल आन कली साइक्तु। परमप्रभुमी आ चुरशो मी खोदेंशो पा सियोन आ तमी आ ताम्बु तारी मोइक्तु।
5 मुल परमप्रभु सियोन आ जोरी सत्रु खोदेंशो दुम्त। मेकोमी इस्राएल कली खतम सेल्तु। आ दरवार नेल्ल आन कली खतम पोक्तु। आ गारो ङा लाइश्शो खिं नेल्ल प्रेत्तु। मिनु यहूदा आ तमी कली शुश रोंका नु हिशेक पपाइक्तु।
6 मेकोमी आंम ताम्बु कली रू ङा कटेरा खोदेंशो पा प्रेत्तु। मेकोमी आ बाक्तीके खतम सेल्तु। परमप्रभु यावेमी सियोनम चाड नु नाइक्तीक नाक्ती मानेतीक प्रोंइतु। आ शुश गाइश्शोम पिप नु चढ़ेब नेल्ल आन कली मुने तोक्तु। अय्युब २:१३; येरमीया ५:१२
7 परमप्रभुम आंम कली चढ़ेतीक नु आ बाक्तीके निम्फा प्रोंइतु। मेको आन दरवार ङा गारो जोरी सत्रु आन गुइमी गेप्तु। मोपा मेकोपुकीमी परमप्रभु यावे आ खिंमी चाड ङा नाक्त खोदेंशो पा रेयके पाम्तेक्म।
8 परमप्रभु यावेमी सियोन आ तमी आ गारो प्रेत्चा कली मिम्ताक्व। मेको आ तारी पुक्तीके कीतु। मेकोमी खतम सेल्चा कली आ गुइ मतेक्ग। मेकोमी गारो नु आ बोल्यो सेल्तीके निक्शी कली रोंका पपाइक्तु। मिनु मेको कालेक्म ब्रेत्ताक्स। २राजा २१:१३
9 मेको आ ठेयब लाप्चो खपीम दोक्तेक्म। मेकोमी आ आग्लो जिक्शा खतम पोक्तु। मेकेर ङा पिप नु आन तौ नेल्ल रागी रागी ङा मुर आन दातेमी बाक्नीम। मेकेर लां कोंइब परमप्रभु यावे आ अरेशो मबाक्ब। मिनु परमप्रभु यावे आ लोव़ पाइबपुकीमी परमप्रभु यावे रे पा मारेइ लोव़ मताइनीम।
10 सियोन ङा खाल्पा खपीम निश्शा, सिक्सी पा बाक्नीम। मेकोपुकीमी आन पियामी फुरक फुंइसीनीम। मिनु भाङग्रा फेक्शा बाक्नीम। यरूसलेम ङा मीश आलपुकीमी आन पिया खप सम्म बाप्पाइश्शो बाक्नीम।
11 गो ङाक्ना ङाक्न बाक्नुङ। आं थुं चोइब। आं थुं खाइक्ब। मारदे हना आं मुर खतम दुम्तेक्म। आल नु दूध तूब आलपुकी सहर ङा लांम शोव़लु बेक्नीम।
12 मेकोपुकीमी आन ममा आन कली “जचा तूचा थोव़क ते बाक्म” दे हिल्लो पाइनीम। मेकोपुकी सहर ङा लांम गार दुम्शो लडाइ पाइब खोदेंशो पा थाइनीम। मिनु आन ममा आन थुकुम बेक्नीम।
13 ए यरूसलेम आ तमी, गो इ पर्बम मार देंङा? गो इ कली मार नु थाप्तु? ए सियोन आ कन्ने तमी इ थुं बारपाइक्चा कली इ कली मार नु थाप्तु? इ श्येत समुन्द्र खोदेंशो पा ठेयब बाक्ब। सुइम इ कली सापाइक्ने मचब।
14 इ परमप्रभु यावे आ लोव़ पाइब आन लोव़ नेल्ल जोल नु शोर गाक्शो बाक्तेक्म। मेकोपुकीमी इ कली रिम्शो दुम्ल, दे इ मरिम्शो पशो आ पर्बम लोव़ मपाम। तन्न मेकोपुकीमी इ पर्बम पशो लोव़ नेल्ल जोल नु दूली लां कोंइब बाक्त। येरमीया १४:१४-१६; येरमीया २३:१६-२२
15 इ नेक्था रे पा लाइब नेल्लेमी इ कली तशा शुक्शी पाइनीम। यरूसलेम आ तमी तशा शुक्शी पा आन पिया हिम्नीम। मेकोपुकीमी “एको सहर कली नेल्ल क्येङा दारशो नु रागी ङा नेल्ल क्येङा दाक्शो सहर देंनीमी, ममाइ ङा?” देंनीम। भजन संग्रह ४८:३; इजीकीएल १६:१४
16 इ जोरी सत्रु नेल्लेमी इ पर्बम मरिम्शो लोव़ पा शुक्शी पाइनीम। मेकोपुकीमी आन गाइक्तीकेमी “गो मेको कली खतम सेल्तक। एको नाक्ती कोव़चा कली रिम्ताक्क। मुल गो ताइतक” देंनीम।
17 परमप्रभु यावेमी मार मिम्ता नु ङोंइती मार पाइनुङ देंमे, मेको पाप्तु। साइ ङोंइती हिंच कोंइशा देंशो लोव़ मुल पाप्तु। मेकोमी शिशी मपथु, नेल्ल खतम सेल्तु। मिनु इ जोरी सत्रु आन कली इ पर्बम ग्येरपाइक्तु। इ जोरी सत्रु आन सक्ति ठेयब सेल्तु।
18 गे सियोन आ तमी, आ गारो परमप्रभु कली ठेयब सेंदा पा पुनो। इ प्रेक्क खोला खोदेंशो पा नाक्दो नाक्त यिपतो। याम का यो मनांइसो। शुश ङाक्को।
19 बोक्को। नाक्दो ङाक्शा पुनो। खाल पाइब आन गेय पची ना यो मो पावो। इ थुं ङा श्येत परमप्रभु आ ङोंइती ब्वाक्कु खोदेंशो पा लुक्तो। लांमी बाक्ब इ शोव़लु बेक्शो आल आन पर्बम इ गुइ परमप्रभु गे पोक्शा पुनो।
20 “परमप्रभु यावे कोव़ङीन। गे सु कली ओदेंशो पा श्येत गेनी। मार मीश मुरपुकीमी आंम आल आन कली ब्वचा माल्नीमी? मार इन कली चढ़ेब नु इन लोव़ पाइबपुकी इन बाक्तीकेमी साइक्चा पुंइसीचा माल्नीनी? ब्यवस्था २८:५३-५७; येरमीया १९:९
21 ठिटा नु खाल्पापुकी लांम गोल्शो बाक्नीम। आ ठिटी मीश मुर नु ठिटा वोंइश मुर तरवारमी साइक्चा पुंइसाक्म। गे इन गाइश्शो नाक्ती मेको आन कली शिशी मपाइक्थु साइक्तीनी।
22 गे एर ओंथ ङा आं जोरी सत्रु आन कली चाड मानेचा कली खोदेंशो पा ब्रेत्ताक्नी। परमप्रभु यावे आ गाइश्शो नाक्तीमी सुइ मुर प्रोक्शा ब्रोंइचा मताइनीम। गो आं थिशो नु कोल्पाइश्शो आल आन कली आं जोरी सत्रुमी साइक्तेक्म” देंती।